1. 1 Pedru 5:2-a pormonnem, vhoddilamnim koslem mhotvachem kam korunk zai?

 JEHOVAN aplea moladik menddranchi rakhonn korunk Kristi vhoddilank nemleat. Ani Jehovan tancher visvas dovorla mhunn he vhoddil khub upkari asat. Tor te bhav-bhoinnanchi seva korunk, ani ‘gonvlleam bhaxen tanchi rakhonn korunk’ khub vavr kortat. (Jer. 23:4; 1 Pedru 5:2 vachat.) Khorench, ami hea vhoddilam pasot kitlim upkari asat nhoi!

2. Thoddea vhoddilank kosleo oddchonneo ieunk xoktat?

² Sobhecheo zobabdareo samballttana, vhoddilank zaiteo oddchonneo ieunk xoktat. Karonn sobhechi kallji gheunk tankam zaitim kamam korunk poddttat. Udharonnak, United States-ant ravpi, Tony nanvachea eka vhoddilak, tache lagim korunk zata tachea poros chodd kam tannem gheunchem nhoi mhunn kollon ailem. To sangta: “COVID-19 pidda suru zali tednam, mittingenchi ani porgottnnechi manddavoll korunk hanv chodd-ani-chodd kam korunk proitn kortalom. Punn hanvem kitlem-i kam kelear pasun, anik kam ieit ravtalem. Xevottak him kamam korunk hanv itlo bizi urtalom ki Bible vachunk, svotacho obheas korunk ani magnnem korunk, mhaka goroz titlo vell mellonaslo.” Toxench, Kosovo-ant ravpi, Ilir nanvachea eka vhoddilak, ek veglli oddchonn asli. To zhuz zatolea eka desant aslo tednam, songottnne thaun melltta tem margdorxon apnnaunk taka kotthin zalem. To sangta: “Xakha Ofisan mhaka thoddea bhav-bhoinnank modot korunk sanglem. Punn tim ravtalim tea zagear dhoko aslo. Tor hanv bhielom ani tem margdorxon apnnavop sarkem nhoi oxem mhaka dislem.” Tea bhair, Asia-nt ravpi, Tim nanvachea eka mixinori bhavak, tannem dor disa korunk zai teo sogleo vostu korunk kotthin zatalem. To sangta: “Thodde pavtti hanv itlo thoktalom ki sobhentlea bhav-bhoinnanchi kallji gheunk mhoje bhitor xoktich uronasli.” Vhoddilamno, tumkam-i osleoch oddchonneo asat zalear tumkam koxi modot zaunk xokta?

3. Fuddari Gideonachea udharonna thaun ami kitem xikonk zata?

³ Fuddari Gideon, aiz vhoddilam pasot ek borem udharonn zaun  asa. (Heb. 6:12; 11:32) To Devachea lokancho gonvlli aslo ani tanchi rakhonn pasun kortalo. (Fudd. 2:16; 1 It. 17:6) Gideona bhaxen aiz vhoddilank eka kotthin vellar Devachea lokanchi kallji gheunk nemleat. (D.I. 20:28; 2 Tim. 3:1) Amchean jem korunk zaina tem manun gheunk, khalti ravonk, ani Devachea Utrak pallo diunk Gideona thaun ami zaitem xikonk zata. Taka dilolem kam korunk kotthin zalem. Ami vhoddil asum vo na, he bhav kortat tea kamam pasot ami amchem upkariponn vaddounk zata. Ani tanchea koxtti vavra pasot ami tankam tenko diunk zata.—Heb. 13:17.

4. Gideon mannsugen vagtalo ani khalti aslo mhunn amkam koxem kollon ieta?

⁴ Gideon mannsugen vagtalo ani khalti aslo. b Jednam Jehovachea dutan Gideonak sanglem, ki Izraelitkarank Midianitkaram thaun salvar korunk taka vinchun kaddla, tednam tannem khaltikaien oxem mhunnttlem: “Manassechea sogllea kullam modem mhojem kull bhov osokt ani mhojea kuttumbant hanv nimanno mhonn Tum borem zannai.” (Fudd. 6:15) Hem kam apleachean zaunchem na, oxem Gideonak distalem. Punn tachean hem kam korunk zatolem mhunn Jehovak khobor asli. Ani Jehovachea modotin to hem kam purnn korunk pavlo.

5. Eka vhoddilak mannsugen vagonk ani khalti ravonk kednam kotthin zaunk xokta?

⁵ Apunn kortat tea soglea kamamnim mannsugen vagonk ani khaltikai dakhounk vhoddil khub proitn kortat. (Mik. 6:8; D.I. 20:18, 19) Koxem? Te kitem korunk xoktat vo tannim kitem-kitem kelam tea vixim te boddaio marinant. Toxench tannim thoddeo chuki keleat dekhun, te kainch faideache nhoi oxem te chintinant. Punn thodde pavtti vhoddilank mannsugen vagonk ani khalti ravonk kotthin zaunk xokta. Udharonnak, ek vhoddil zaitim kamam korunk fuddem sorta astolo. Punn uprant tannem ghetlolim soglim kamam purnn korunk taka kotthin zata astolem. Vo ek vhoddil jem kitem korta tea pasot thoddim taka vakhannttat astolim, ani thoddim tacheo chuki kaddun dakhoitat astolim. Tor oslea poristhitimnim, vhoddilamnim Gideona thaun kitem xikonk zata?

6. Mannsugen vagchea vixim vhoddilamnim Gideona thaun kitem xikonk zata? (Chitr pasun polloiat.)

⁶ Dusream thaun modot gheiat. Ek mannsugecho munis aplea lagim kitem korunk zaina tem vollkhon gheta. Gideon mannsugen vaglo dekhun  tannem dusream koddlean modot ghetli. (Fudd. 6:27, 35; 7:24) Somjikaieche vhoddil aiz oxench kortat. Ami poilim uloilʼlo bhav Tony mhunntta: “Mhaka jea toren vaddoilʼlo tea pasot mhojean zata tachea poros hanv chodd kamam ghetalom. Tor amchea kuttumbik bhoktent, mannsugen vagop hea vixim obheas korunk hanvem chintlem. Ani hanvem khoim sudharnni korunk zai tea vixim mhoje bailek vicharlem. Toxench, hanvem jw.org-cher, Jezun Kelam Toxem Xikoiat, Visvas Dovorat ani Zobabdari Diat, ho video pasun polloilo.” Uprant, Tony-n apleak aslolim kamam korunk dusreanchi modot ghetli. Hacho porinnam kitem zalo? Tony mhunntta: “Atam sobhentlim soglim kamam bore bhaxen zatat, ani Jehova Deva sangata mhoji ixttagot ghott korunk mhaka anikui vell melltta.”

7. Dusrim apleo khoddeo kaddttat tednam, vhoddilamnim Gideonachi dekh koxi gheunk zata? (Jakob 3:13)

⁷ Dusrim tumcheo khoddeo kaddttat tednam, xantponnim zobab diat. Dusrim apleo khoddeo kaddttat tednam, vhoddilank khalti ravonk kotthin zaunk xokta. Oslea vellar tannim Gideonachi dekh gheunk zata. Apunn poripurnn na mhunn Gideon zannam aslo. Tor Efraimachea munxamnim tacheo khoddeo kaddleo tednam ragar zaunchea bodlek tannem xantponnim zobab dilo. (Fudd. 8:1-3) Tannem khaltikaien aiklolean ani doiallaien zobab dilolean tancho rag xant zalo. Tor dusrim apleo khoddeo kaddttat tednam, vhoddilamnim Gideona bhaxen tanchem dhean diun aikonk zai, ani doiallaien zobab diunk zai. (Jakob 3:13 vachat.) Oxem kelolean sobhent xanti urtoli.

8. Vhoddilank vakhannʼnni melltta tednam tannim kitem korunk zai? Ek udharonn diat.

⁸ Sogli vakhannʼnni Jehovak diat. Gideonak, Midianitkarancher zoit mellʼllem tednam Izraelitkaramnim taka vakhannlo. Punn tannem sogli vakhannʼnni Jehovak dili. (Fudd. 8:22, 23) Tor vhoddilamnim Gideona thaun kitem xikonk zata? Te kortat tea kamam pasot dusrim tankam vakhannttat tednam, tannim ti vakhannʼnni Jehovak diunk zai. (1 Kor. 4:6, 7) Udharonnak, eka vhoddilak xikounchi bori kola asa mhunn bhav-bhoinnam taka vakhannttat zalear, ti xikounn Devachea Utra thaun asa vo Devache songottnne thaun mellʼllolea proxikxonna vorvim apunn hem korunk pavla, mhunn tannem sangonk zata. Tea bhair vhoddilamnim, te jea toren xikoitat, tea vorvim Jehovak mhoima melltta vo tankam svotak vakhannʼnni melltta, tea vixim chintunk zata. Hea vixim amkam Timothy nanvachea eka bhavachem udharonn asa. To vhoddil zalʼlo tednam taka jahir bhaxonnam diunk khub avoddttalem. To sangta: “Mhojea bhaxonnachim survatechim utram khub lamb astalim ani hanv zaitim vhoddlim-vhoddlim udharonnam ditalom. Hea pasot, bhav-bhoinnam mhaka zaite pavtti vakhannttalim. Punn oxem kelolean, bhav-bhoinnanchem dhean Jehova Devacher vo tachea Utracher nhoi, punn mhojer ietalem.” Tor vell gelo toso, svotacher dhean haddina zaunk, apli xikoupachi rit apnnem bodlunk zai mhunn bhavak kollʼllem. (Mho. 27:21) Oxem kelolean kitem zalem? Bhav sangta: “Mhojea bhaxonnam vorvim zaitea bhav-bhoinnank, tankam aslolea oddchonneancho fuddo korunk, tanche tras sosunk vo Jehovak lagim soronk koxi modot zali tem tim mhaka sangtat. Tor adim mhojim bhaxonnam aikon bhav-bhoinnam mhaka vakhannttalim tachea poros, atam tim mhaka jem kitem sangtat tea vorvim mhaka anik chodd khuxalkai melltta.”

9. Gideonak, Jehovachi adnea pallunk ani dhiran kam korunk kiteak sompem naslem? (Masikachem fuddlem chitr polloiat.)

⁹ Jehovan jednam Gideonak fuddari mhunn nemlolo, tednam tannem Jehovachi adnea pallchi ani dhiran kam korchi goroz asli. Punn oxem korop sompem naslem. Karonn Jehovan taka, tachea bapain Baalak bhettoiloli vedi moddun uddounk sanglem. Ani hem kam dhokeachem aslem. (Fudd. 6:25, 26) Toxench, Gideonan fouz ektthaim kelea uprant, Jehovan taka don pavtti tache foujecho ankddo unno korunk sanglem. (Fudd. 7:2-7) Tea bhair, Jehovan taka modle rati  vochon dusmananchea tombucher akromonn korunk sanglem.—Fudd. 7:9-11.

10. Vhoddilank sanglolem tem pallunk kiteak kotthin zaunk xokta?

¹⁰ ‘Sanglolem tem pallunk vhoddilamnim toiar’ asonk zai. (Jak. 3:17, NW) Zo vhoddil adnea palltta to Devachem Utor ani tachea songottnne thaun ieta tem margdorxon rokddench apnnaita. To oxem korun dusreank ek bori dekh dovorta. Punn thodde pavtti taka sanglolem tem pallunk kotthin zaunk xokta. Udharonnak, taka ghoddie zaitem nirdexon melltta vo tem rokddench bodlunk xokta. Tor tem pallunk taka kotthin zaunk xokta. Vo thodde pavtti, jem nirdexon melltta tem khorench faideak poddttolem kai na, mhunn to dubhavunk xokta. Vo taka ghoddie oslem kam korunk poddot, zaka lagon taka bondkhonnint ghalunk xoktat. Oslea poristhitint vhoddilamnim Gideonachi koxi dekh gheunk zata?

11. Jehovan sanglam tem korunk vhoddilank kitem modot korunk xokta?

¹¹ Nirdexon aikon gheiat ani tem apnnaiat. Gideonan, tachea bapain bandloli vedi koxi moddchi, Jehovak ek novi vedi khoim bandchi ani tacher koslem zonvar bolidan korchem, tea vixim Jehovan taka nirdexon dilem. Ani Gideonan gunngunnchea bodlek, Jehovan sanglolem toxench kelem. Heach bhaxen, aiz vhoddilank pasun chittim vorvim, kollounneam udexim vo her vattamnim songottnne thaun nirdexon melltta, jea vorvim amkam surokxit ravonk ani Jehova sangata amchi ixttagot ghott samballunk modot zata. Vhoddil hem nirdexon apnnaitat dekhun akʼkhe sobhek faido zata. Ani hea bhavanchea visvaxiponnak lagon ami tancho khub mog kortat.—St. 119:112.

12. Songotton vhoddilank veglle toren kam korunk sangta tednam, vhoddilamnim Hebrevank 13:17 koso apnnaunk zata?

¹² Bodlav zatat tednam te rokddech manun gheiat. Ugddas korat, Jehovan Gideonak fokot thoddeach soinikank soddun, urlolea sogleank ghora dhaddunk sanglem. (Fudd. 7:8) Gideonan ghoddie chintlem astolem: ‘Oxem korop khorench gorjechem asa kai? Oxem kelear ami jikhtole kai?’ Tori astana tannem Jehovachem aikon ghetlem. Aiz vhoddilank songottne thaun veglle toren kam korunk nirdexon melltta tednam, te Gideonachi dekh ghetat. (Hebrevank 13:17 vachat.) Udharonnak, 2014-nt, Sonchalon Monddollan, Raj-ghoram ani Zomatichim Holam bandpache manddavollint bodol kelo. (2 Kor. 8:12-14) Adim him bandkamam korunk, songotton sobhank poixe ditali. Ani Raj-ghor bandlea uprant, sobhentlea bhav-bhoinnank songottnnek te poixe porot farik korunk poddttale. Punn atam, songotton sonvsarbhor aslolea bhav-bhoinnanchim denngim uzar korun, goroz asa thoim Raj-ghoram ani Zomatichim Holam bandta. Oxe toren, chodd denngim diunk xokonant toslea sobhank pasun Raj-ghoram bandun mellttat. Tea bodlava vixim bhav Jose-k kollʼllem tednam, tem faideak poddttolem kai na mhunn to dubhavunk laglo. To chintunk laglo: ‘Oxem kelear, ekui Raj-ghor bandunk zaunchem na. Ani ami ravtat tea zagear tor, hem zaunkuch xokona.’ Hea nirdexonak pallo diunk, bhav Jose-k koxi modot zali? To mhunntta: “Mhonnʼnneo 3:5, 6-antlea utram thaun, hanvem Jehovacher patieunk zai mhunn mhaka ugddas ailo. Ani  hacho porinnam ekdom boro zalo. Aiz ami chodd-ani-chodd Raj-ghoram bandtat, toxench veg-veglle toren denngim diunk pasun xikleant. Oxe toren, chodd denngim diunk xokonant toslea sobhank pasun Raj-ghoram bandun mellʼlleant.”

13. (a) Gideonak kitea vixim dubhav naslo? (b) Vhoddilamnim Gideonachi dekh koxi gheunk zata? (Chitr pasun polloiat.)

¹³ Jehovachi khuxi korunk dhir dakhoiat. Gideonak bhirant distali ani tachea jivak dhoko aslo. Tori astana tannem Jehovachi adnea pallʼlli. (Fudd. 9:17) Jehova koddlean khatri mellʼllea uprant, tachea lokanchi rakhonn korunk Jehova taka modot kortolo mhunn taka kainch dubhav naslo. Amchea kamacher bondi aslolea zagear ravpi vhoddil pasun Gideonachi dekh ghetat. Tankam arrest korunk xoktat, prosn vicharunk xoktat, tanchem kam vochonk xokta vo tankam boddounk xoktat. Tori astana, mittingemnim ani porgottnnent te fuddakar ghetat. c Vhodd sonkoxttachea vellar, songottnne thaun melltta tem nirdexon pallop, thodde pavtti vhoddilank dhokeachem zaunk xokta. Zoxem, zhoddttecho sondex koso porgott korcho, ani Magogachea Gogachea akromonna thaun koxem salvar zaunchem, tea vixim vhoddilank nirdexon mellonk xokta. Tor tea vellar hem nirdexon pallunk vhoddilank dhirachi goroz poddttoli.—Ez. 38:18; Prok. 16:21.

14. Gideonak jem kam mellʼllolem tem purnn korunk kiteak sompem naslem?

¹⁴ Gideonak fuddari mhunn jem kam mellʼllolem, tem purnn korunk taka khub koxtti vavr korunk poddttalo. Ratchea vellar zhuz kortana, Midianitkar pollon gele tednam, Gideon tanchea fattik laglo. Jezreelachea falkea thaun Jordan Nodi poriant, tannem tanchi fatt dhorli. Ani ti akʼkhi vatt chodd korun jhilkuttamnim bhorloli. (Fudd. 7:22) Gideon Jordan nodi kodden ieun ravlo kai? Na. To ani tache 300 munis thoklole aslear pasun, te Jordan nodi par korun dusmananchea fatti dhanvot ravle. Xevottak tannim Midianitkarancher akromonn kelem, ani tankam zoit mellʼllem.—Fudd. 8:4-12.

15. Aplea lagim anik zaunchem na oxem thodde pavtt vhoddilank kiteak disonk xokta?

¹⁵ Vhoddilank sobhechi ani familichi zaiti zobabdari asta. Tor thodde pavtt te ekdom thokonk  xoktat, ani tankam oxem disonk xokta, ki tanche lagim atam anik zaunchem na. Oslea vellar tannim Gideona thaun kitem xikonk zata?

16-17. Gideonak zoit kiteak mellʼllem, ani vhoddilamnim kitem ugddas dovrunk zata? (Izaias 40:28-31) (Chitr pasun polloiat.)

¹⁶ Jehova tumkam boll ditolo mhunn visvas dovrat. Jehova apleak boll ditolo mhunn Gideonak visvas aslo. Ani Jehovan tacho visvas moddunk na. (Fudd. 6:14, 34) Ek pavtti Gideon ani tache munis, don Midianitkar razanchea fattik laglole. Te tanchea fattlean dhanvot voitale. Punn te raza ghoddie unttancher boson voitale astole. (Fudd. 8:12, 21) Tori astana, Jehovan Izraelitkarank tea razank dhorunk ani zhuz jikhonk modot keli. Aiz vhoddilamnim pasun, tankam goroz tednam Jehova tankam boll ditolo mhunn visvas dovrunk zata. Karonn Jehova “thokona, Taka kednanch puro zaina.”—Izaias 40:28-31 vachat.

¹⁷ Hea vixim amkam Matthew nanvachea eka bhavacho onubhov asa. To Hospital Liaison Somitint seva korta. Taka asloleo zobabdareo samballop taka sompem na. Tori astana, oxem korit ravonk taka koxi modot zata? To sangta: “Filipkarank 4:13-nt sanglolim utram kitlim khorim asat tem hanvem polloilem. Zaite pavtti hanv ekdom thoktalom ani mhojean anik zaunchench na oxem mhaka distalem. Tednam, mhojea bhav-bhoinnank modot korunk mhaka xokti ani boll di mhunn hanvem Jehova lagim vinoti keli. Tea vellar, Jehovache povitr xokte udexim mhaka goroz ti xokti mellʼlli, ani hem kam korit ravonk mhaka modot zali mhunn hanvem onubhovlem.” Gideona bhaxen aiz vhoddilank pasun, Jehovachea xellianchi kallji gheunk khub vavr korunk poddtta. Ani oxem korop sodanch sompem asona. Hem khorem ki vhoddilamnim korunk zai tem soglem, te sodanch korunk xokchenant mhunn tannim ugddas dovrunk zai. Tori astana, te Jehova lagim modot magtat tednam, Jehova tanchi vinoti aikon ghetolo ani tem kam korit ravonk tankam boll ditolo mhunn tannim visvas dovrunk zata.—St. 116:1; Filp. 2:13.

18. Vhoddilamnim Gideonachea udharonna thaun kitem xikonk zata?

¹⁸ Vhoddilamnim Gideonachea udharonna thaun zaitem xikonk zata. Apleachean kitem korunk zata vo zaina tem tannim vollkhon gheunk zai. Ani dusrim tanchi vakhannʼnni kortat vo khoddeo kaddttat tednam, tannim khaltikai dakhounk zai. Toxench, hea noxttea sonvsaracho xevott lagim pavta toso, tankam sanglolem tem pallunk zai ani dhir dakhounk zai. Tea bhair, tancher kosli-i somosia ailear pasun, Jehova tankam modot kortolo mhunn tacher patieunk zai. Khoreanich, hea koxtti vavr kortolea vhoddilank ami moladik mhunn lekhtat ani ‘oslea soglea munxank man ditat.’—Filp. 2:29.