1-2. Jehova amkam koslem apounnem dita?

 JEHOVA vixim chintʼtana tumchea monant kitem ieta? Tumi ghoddie to tumcho Bap, Dev ani Ixtt mhunn chintit. Punn to tumkam aplea tombunt apoita mhunn tumi kednam-i chintlam?

² Raza Davidan Jehova vixim oxench kitem mhunnttlolem. Tannem mhunnttlem: “Sorvespora, Tujea tombunt biddar korunk konnak mellot? Tujea bhov povitr dongrar konnak tthikann korunk tankot?” (St. 15:1) Tor hanga, Jehova aplea visvaxi sevokank aplea tombunt ravonk apoita mhunn Davidan sanglem. Hacho orth, Jehova amkam aplim ixttam zaunk apounnem dita. Ho amkam sogleank kitlo vhoddlo man nhoi?

AMI TACHIM IXTTAM ZALʼLIM JEHOVAK ZAI

3. Jehovan sogleam-von poilim aplea tombunt konnak ieukar dilo, ani Jehovak ani Jezuk eka-meka vixim koxem distalem?

³ Jehovan kitem-i rochʼchea poilim aplea malgoddea Putak, Jezuk rochlo. Tor tannem sogleam-von poilim Jezuk aplea tombunt ieukar dilo. Ani oxem korunk to khub khuxal aslo. Bible sangta ki Jezu Jehovak ‘khub opurbaiecho’ aslo. Ani Jezu pasun Jehova sangata ‘soglea vellar khuxal aslo.’​—Mho. 8:30, NW.

4. Jehovan uprant aplea tombunt anik konnank ieukar dilo?

 ⁴ Jezu uprant Jehovan aplea her dutank rochle ani tankam pasun aplea tombunt ieukar dilo. Bible-ant tankam ‘Devache put’ mhunnttleat, ani te Jehova borabor khub khuxal asat mhunn sanglam. (Job 38:7; Dan. 7:10) Zaitim vorsam porian fokot sorgar asle tech Jehovache ixtt zaun asle. Punn uprant Jehovan prithumer munxank rochlim, ani aplea tombunt tankam pasun ieukar dilo. Tantuntle thodde Enok, Noah, Abraham ani Job asle. Tannim Devachem aikolem dekhun te Jehovache ixtt zale mhunn Bible-ant sanglam.​—Ut. 5:24; 6:9; Job 29:4; Iz. 41:8.

5. Ezekiel 37:26, 27-ant dilʼlea bhasaunnentlean amkam kitem kollon ieta?

⁵ Xekddeamnim vorsam thaun, Jehova zaiteank aplim ixttam zaunk ieukar di-it asa. (Ezekiel 37:26, 27 vachat.) Udharonnak, Ezekielachea bhasaunnentlean amkam kollon ieta ki aplea soglea visvaxi sevokanchi aplea lagim ek lagxilʼli ixttagot asloli Jehovak zai. To tanchea sangata ‘ek xanticho korar sthaptolo’ mhunn bhas dita. Hi bhasaunni oslea eka kalla vixim zaun asa jednam sorgar, toxench prithumer jieuncho bhorvonso aslolim soglim Jehovachim sevokam, ‘ekach hindda’ porim ekvottan astolim. (Ju. 10:16) Ani ho vell atam zaun asa!

AMI KHOINSORUI ASUM JEHOVA AMCHI KALLJI GHETA

6. Ami Jehovachea tombunt kednam bhitor sortat, ani tacho tombu eka umkeach zagear asa kai?

⁶ Bible kallar, ek munis eka tombunt visov gheunk xoktalo ani bhair vatavoronn borem na zalear to tea tombunt surokxit urtalo. Ani konnui dusreak aplea tombunt apoitalo zalear, to tachi ekdom bore toren kallji ghetalo. Ami Jehovak amchem jivit somorpit kelem tednam, ami eka orthan tachea tombunt bhitor sorlim. (St. 61:4) Ani tednam thaun, Jehova ekdom bore toren amchi kallji gheta. Tache lagim amchi ixttagot ghott korunk amkam goroz tem soglem to dita. Toxench, tea tombunt asat tanchea sangata pasun amkam ixttagot korunk melltta. Punn Jehovacho tombu eka umkeach zagear na. Oxem ami kiteak mhunnonk zata? Ami ghoddie eka odhivexonak hajir zaunk eka dusrea desant geleant zait. Punn thoim pasun amkam oslim munxam mellttat, jim Jehovachea tombunt ason khuxal asat. Tor Jehovachim visvaxi sevokam zoim asat, thoim tacho tombu asa.​—Prok. 21:3.

7. Moron geleant tim Jehovachim visvaxi sevokam azun poriant tachea tombunt asat mhunn ami kiteak mhunnonk zata? (Chitr pasun polloiat.)

⁷ Jehovachim visvaxi sevokam jim moron geleant tanchea vixim kitem? Tim azun poriant Jehovachea tombunt asat kai? Hoi!  Karonn tim Jehovachea ugddasant jivim asat. Hea vixim Jezun mhunnttlolem: “Melolim jivont zaunchea vixim Moizesan pasun jhilkutta lagim ghoddlolea ghoddnnent sanglolem. Tannem mhunnttlolem ki Jehova ‘Abrahamacho Dev ani Izakacho Dev toxench Jakobacho Dev.’ To meleant tancho nhoi punn jivont asat tancho Dev, karonn Devachea nodren tim soglim jivim asat.”​—Luk. 20:37, 38.

AMKAM KOSLE FAIDE ANI ZOBABDAREO ASAT?

8. Jehovachea tombunt aslolean amkam koso faido zata?

⁸ Tombunt ek munis visov gheunk pavtalo ani bhair vatavoronn borem na zalear tombunt tachi rakhonn zatali. Teach bhaxen, Jehovachea tombunt aslolean tachea sangata amchi ixttagot moddunk xokta toslea vostum thaun amchi rakhonn zata. Toxench, fuddara pasot amkam bhorvonso melltta. Tea bhair, ami Jehovak sodanch lagim ravlear, amchem sasnak luksonn zata toslem kainch Soitan korunk pavchona. (St. 31:23; 1 Ju. 3:8) Ani novea sonvsarant, Jehova aplea visvaxi sevokanchi mornna thaun pasun rakhonn kortolo.​—Prok. 21:4.

9. Aplea tombunt ietat tannim kitem kelʼlem Jehovak zai?

⁹ Jehovachea tombunt asop amkam ek vhodd sueog zaun asa, ani ami sodankal tachim ixttam asonk xoktat. Oxem korunk ami kitem korunk zai? Hea vixim chintat. Tumkam konn tori aplea ghorant jevnnak apoita. Tor tumi kitem kelʼlem taka zai tem tumi zannam zaun ghetolim, ani toxem kortolim. Zoxem, tumi tumche moche bhair dovorlole tankam zai zalear, tumi toxench kortolim. Teach bhaxen, ami kitem kelʼlem Jehovak zai tem zannam zaun, ami toxench korunk zai. Tachea pasot aslolo amcho mog “taka purnn toren khuxal korunk” amkam fuddem kaddtta. (Kol. 1:10) Ani Jehova amcho Ixtt zaun asa tem khorem. Punn hachea borabor, to amcho Dev ani Bap mhunn ugddas dovrun ami taka favo to man diunk zai. (St. 25:14) Ami oxem kortat tednam, taka manvonant teo vostu korina zaunk amkam modot zatoli. Toxench, ami sodanch Deva kodde ‘khaltikaien cholonkʼ xoktolim. Ami oxench korunk sodhtat nhoi?​—Mik. 6:8.

JEHOVAN IZRAELITKARAM SANGATA BHEDBHAV KORUNK NA

10-11. Jehova Izraelitkaram sangata Sinai oronnʼnneant koso vaglo, ani hantuntlean to bhedbhav korina mhunn koxem kolltta?

¹⁰ Jehova zankam aplea tombunt apoita tanchea sangata to bhedbhav korina. (Rom. 2:11) Hem amkam, to Izraelitkaram sangata Sinai oronnʼnneant jea toren vaglo tantuntlean kolltta.

¹¹ Izraelitkarank Ejipttantlean soddoilea uprant, povitr tombunt apli bhokti korunk Jehovan iadnikank nemle. Toxench, thoinchim her kamam korunk tannem Levitank nemle. Punn te thoim seva kortale mhunnttoch, Jehovak tanchi chodd kallji asli oxem kai? Na! Karonn Jehova bhedbhav korina.

12. Jehovan Izraelitkaram sangata oronnʼnneant bhedbhav korunk na mhunn koxem kolltta? (Suttka 40:38) (Chitr pasun polloiat.)

¹² Dor ek Izraelitkar, zaum to povitr tombunt seva korum vo na korum, ani tachea lagim vo pois ravom, to Jehovacho ghott ixtt zaunk xoktalo. Oxem ami kiteak mhunnonk zata? Tombuchea voir aslolo kupacho ani ujeacho khambo akʼkhe porjek dista mhunn Jehovan khatri korun ghetloli. (Suttka 40:38 vachat.) Tor tem kup eka dusrea zagear voitalem tednam, tombu thaun khub pois ravtalo to Izraelitkar pasun tem pollounk xoktalo. Tor to aplem saman bandtalo, aplo tombu nikllaitalo ani porje sangata vattek lagtalo. (Lok. 9:15-23) Toxench, porjen eka dusrea zagear  vochonk zai mhunn kollounk chandicheo don turtureo vazoitale, ani tacho vhoddlo avaz akʼkhe porjek aikonk ietalo. (Lok. 10:2) Hantuntlean amkam kollon ieta ki Jehova khoinchea-i Izraelitkara sangata bhedbhav korinaslo, punn soglim tachim ixttam zaunk xoktalim. Ani Jehova tankam margdorxon ditolo, toxench tanchi rakhonn kortolo mhunn tannim khatri dovrunk zatali. Teach bhaxen, aiz ami prithumechea khoinchea-i konnxeak ravom, Jehova amcho mog korta, kallji gheta ani rakhonn korta mhunn ami khatri dovrunk zata.

JEHOVA AIZ AMCHEA SANGATA PASUN BHEDBHAV KORINA

13. Jehova aiz aplea sevokam sangata bhedbhav korina mhunn amkam koxem kollon ieta?

¹³ Aiz Jehovachim thoddim sevokam, Jehovachea Sakxeanchem mukhel ofis vo xakha ofisa bhonvtonnim ravtat. Toxench, thoddim zannam tantunt kam pasun kortat. Tor thoim zatat tea zaitea kamamnim bhag gheunk, ani fuddakar ghetolea bhavam sangata kam korunk vo tanchea sangata vell sarunk tankam sondhi melltta. Tea bhair, thodde sorkittachi dekhrekh korpi mhunn kam kortat vo her torechi khas purnn vellachi seva kortat. Punn choddxim zannam mukhel ofis vo xakha ofisa thaun pois ravtat, vo khas purnn vellachi seva korinant. Tanchea modlim tumi pasun asat kai? Toxem zalear, ugddas dovrat ki aplea tombunt aslolea dor ekleacho Jehova khub mog korta. Toxench, to sogleanchi ekdom bore bhaxen kallji gheta. (1 Ped. 5:7) Ani aplea sangata amchi ixttagot ghott korunk to amkam modot korta, amkam margdorxon dita ani amchi rakhonn korta.

14. Jehova aiz bhedbhav korina mhunn amkam anik koxem kolltta?

¹⁴ Toxench, Jehovan sonvsarbhor aslolea soglea lokank Bible vachunk sondhi dilea. Hantuntlean pasun to bhedbhav korina mhunn amkam kolltta. Devachem Utor survatek fokot tin bhasamnim boroilʼlem. Teo mhunnttlear Hebrev, Aramaik ani Grik. Hacho  orth, heo bhaso ulounk ietat toch lok Jehova sangata ghott ixttagot korunk xokta oxem kai? Na, toxem nhoi.​—Mt. 11:25.

15. Jehova aiz bhedbhav korina mhunn koslo puravo asa? (Chitr pasun polloiat.)

¹⁵ Amkam vhodd xikop aslearuch vo Bible survatek jea bhasamnim boroilʼlo teo bhaso amkam ietat zalearuch, Jehova amcho ixtt zatolo oxem kai? Na, toxem nhoi. Amkam vhodd xikop asum vo nasum, Jehova sogleank aplim ixttam zaunk ieukar dita. Tea pasot tachem Utor Bible, hozaramnim bhasamnim bhaxantor kelʼlo asa. Hea vorvim, sonvsarbhor aslolea lokank tantunt kitem boroilʼlem asa tem zannam zaun, tachim ixttam koxim zaunchim tem xikonk melltta.​—2 Tim. 3:16, 17.

SODANCH JEHOVAK ‘MANVOLOLIM’ ZAIAT

16. Jehovak manvololim zaunk ami kitem korunk zai? (Itihas 10:34, 35)

¹⁶ Jehova amkam aplea tombunt apounnem dita. Ho khorench ek vhoddlo sueog zaun asa. Karonn Jehova sogleam poros doiall ani mogall zaun asa. Ani sogleam-von chodd, to amchi ekdom bore toren kallji gheta. Toxench, to bhedbhav korina. Ek munis khoim ravta, tachi sonskruti, xikxonn, zat, kull, pirai vo to dadlo vo bail, hem soglem Jehova polloina. To sogleank aplea tombunt apounnem dita. Tori astana, fokot jim konn tachea dorjeam pormonnem choltat, tinch taka manvotat ani tankanch to aplea tombunt bhitor gheta.​—Itihas 10:34, 35 vachat.

17. Sodanch Jehovachim ixttam uronk ami kitem korunk zai tea vixim amkam khoim xikonk mellttolem?

¹⁷ Stotr 15:1-ant Davidan oxem mhunnttlem mhunn sanglam: “Sorvespora, Tujea tombunt biddar korunk konnak mellot? Tujea bhov povitr dongrar konnak tthikann korunk tankot?” Ani teach Stotrant hea prosnancho zobab diunk Jehovan Davidak prerit kelo. Tor Jehovak manvota tem korunk ani sodanch tachim ixttam uronk, ami kitem korunk zai tem ami fuddlea lekhant polloitolim.