Hanv Dezembr 22, 1929-ant, Belgium-antlea, Bastogne xarant aslolea Noville ganvant zolmolʼlom. Ho ganv itlo lhan aslo ki tantunt fokot nnov xetam aslim. Ho ganv Ardennes nanvachea rana lagim asa. Mhojea bhurgeponnacheo iadi mhaka azunui ugddas asat. Mhozo dhaktto bhav Raymond ani hanv dor disak amchea gaienchem dudh kaddttale, ani lunvnnechea disamnim mummy-daddy-k modot kortale. Amchea ganvantlea lokam modem ekvott aslo. Soglim eka-mekak modot kortalim.

Mhojim mummy-daddy Emile ani Alice, Catholic aslim. Tim Dev-bhirantechim munxam aslim. Tim chukonastana dor Aitarak misak voitalim. Punn sumar 1939-ant, England-a thaun thodde pioneer amchea ganvant aile, ani tannim mhojea daddy-k, Consolation (atam taka Zagrut Ravat! mhunnttat) hem masik dakhoun tachi kopi mellonk tannem subscribe korunk zata mhunn sanglem. Hem masik vachlea uprant tantunt jem kitem boroilam tem sot asa mhunn daddy-k rokddench kollʼllem. Tor tannem rokddoch Bible vachunk suru kelo. Tannem misak vochpachem bond kelem tednam, amchea sangata khub mogall toren vagtalim tim xezarim amcho virodh korunk laglim. Catholic dhorm soddina zaunk tannim mhojea daddy-cher khub dobhav ghatlo, ani kallzak lagtat toslim utram mhunnonk laglim.

Amchim xezarim daddy-k sotaitalim tednam mhaka khub dukh zatalem. Tea pasot hanvem hea lekhachea survatek sanglem toxem, mhojea daddy-k modot kor mhunn hanvem Deva lagim kallzantlean magnnem kelem. Sovkas-sovkas korun amchea xezareamnim daddy-k virodh korpacho bond kelo. Tednam hanv khub khuxal zalom ani Jehova ‘magnnem aikopi’ Dev mhunn mhaka khatri zali.

May 10, 1940 hea vorsa, Nazi Germany-n Belgium-acher akromonn kelem dekhun, zaitea  lokank des soddun pollon vochonk poddlem. Amchi famil France-ache dokxinnek pollon geli. Provas kortana amkam thodde pavtti oslea bhirankull vattarantlean vochonk poddlem, zoim Germany-che ani France-ache soinik eka-meka lagim zhogoddttale.

Uprant, ami porot ghora ailim tednam, amcheo choddxeo vostu chorun vhelʼleo mhunn ami polloilem. Fokot amcho sunno Bobbie, amkam ieukar diunk thoim aslo. Hem soglem polloun hanv chintunk poddlom, ‘Zhuzam kiteak zatat ani itle dukh-tras kiteak asat?’

Heach vellar, bhav Emile Schrantz-an a amkam bhett dili. To visvaxiponnan ek pioneer ani vhoddil mhunn seva kortalo. Tache bhette thaun amkam khub urba mellʼlli. Karonn dukh-tras kiteak asat, ani jivita vixim aslolea mhojea her prosnanche zobab tannem Bible-antlean dile. Hea pasot, Jehova sangata mhoji ixttagot anikui ghott zaunk pavli ani to ek mogall Dev mhunn mhaka khatri zali.

Zhuz azunui kabar zaunk naslem. Tori astana amchi famil, bhav-bhoinnam sangata mellonk ani ulounk xoktalim. Agost 1943-ant, bhav Jose-Nicolas Minet-an ami ravtalim thoim ieun bhaxonn dilem. Tea vellar tannem vicharlem: “Konn bautizm gheunk sodhtat?” Tednam mhojea daddy-n ani hanvem hat ubarlo. Ani laginch aslole eke nodint ami bautizm ghetlo.

Dusrea Vixv Zhuza vellar, Dezembr 1944-ant, Germany-che foujen Europe-ache poschime vatten nimannem akromonn kelem. Hea zhuzak ‘Battle of the Bulge’ mhunnttat. Hem zhuz amchea ghora laginch zatalem. Tor amkam sumar ek mhoino ghorachea basement-ant ravonk poddlem. Punn ek dis, amchea zonvarank jevonn diunk hanv bhair ailom. Tea vellar, bomb poddonk lagle ani amchea gudanvachem pakem uddon gelem. Tednam gottea laginch aslolea Amerikechea eka soinikan bob marun mhaka mhunnttlem: “Sokol nhid!” Hanv dhanvon tachea lagim gelom, ani mhoji rakhonn korunk tannem aplem helmet mhojea mathear ghatlem.

Zhuza uprant, Liege xarant aslolea bhav-bhoinnam sangata ami sodanch uloitalim. Ti sobha ami ravtalim thoim thaun utʼtore vatten 90 kilometr pois asli. Thoddea vella uprant, ami Bastogne xarantuch thoddea bhav-bhoinnam sangata mellon mitting korunk laglim. Teach vellar, hanv tax-achem  kam korunk laglom ani mhaka kaideachem xikop korunk mellʼllem. Uprant, hanv eka government ofisant sirvis korunk laglom. 1951-ant Bastogne xarant ek lhan sorkitt zomat dovorli. Thoim sumar xembor zannam hajir aslim. Tanchea modem, Elly Reuter nanvachi ek urbevont pioneer bhoinn asli. Tea zomatik hajir zaunk tem 50 kilometr cycle choloun ailʼlem. Uprant, ami dogaim mogan poddlim ani amchi mudi zali. Tea vellar, Elly-k Amerikent Gilead Korsak hajir zaunk amontronn mellʼllolem. Punn mukhel ofisak chitt boroun tem tea korsak kiteak hajir zaunk pavchem na tem tannem sanglem. Tea vellar, bhav Knorr songottnnent fuddakar ghetalo. Tannem Elly-k porot chitt boroun mogan sanglem ki fuddarak ghoddie tem tachea ghova sangata Gilead Korsak hajir zait. Uprant, ami Febrer 1953-ant kazar zalim.

Teach vorsa, Elly ani hanv New York-achea Yankee Stadium-ant, New World Society Assembly-k gelim. Thoim amkam ek bhav mellʼllo. Tannem sanglem ki Amerikent hanv settle zaunk xoktam ani to mhaka thoim ek bori sirvis diunk xokta. Punn hea vixim Jehova lagim magnnem kelea uprant ami tem nakarun porot Belgium-ant vochon, Bastogne xarant sumar dha porgottnnar aslolea lhanxea zomeak tenko diunk tharailem. Fuddlea vorsa, amcho bab Serge zolmolo. Punn dukhachem mhunnttlear, sat mhoineam uprant to duent zaun bhair poddlo. Amkam kitlem dukh zalem tem ami Jehovak magnneant sanglem, ani jivontponnachea bhorvonxeacher niall kelolean amkam ghottai mellʼlli.

Otumbr 1961-ant, mhaka part-time kam mellʼllem. Hea vorvim hanv pioneer seva korunk xoklom. Punn teach disa, Belgium-antlea xakha ofisa thaun ek bhavan mhaka fon korun vicharlem: “Tum sorkittacho sevok (atam taka sorkittachi dekhrekh korpi mhunnttat) mhunn seva korunk toiar asa?” Tednam hanvem vicharlem: “Amkam thoddea vella pasot pioneer mhunn seva korunk mellttoli?” Bhavamnim mhaka toxem korunk dilem. Tor atth mhoineam pasot pioneer mhunn seva kelea uprant, Setembr 1962-ant ami sorkittachem kam korunk gelim.

Don vorsam sorkittachem kam kelea uprant amkam Otumbr 1964-ant, Brussels-achea Bethel-ant seva korunk apoilim. Hi novi zobabdari samballttana amkam zaitim besanvam mellʼllim. Uprant 1965-ant, bhav Knorr Bethel-ak bhett diun gelo tednam, mhaka rokddoch xakhecho sevok mhunn nemlo dekhun hanv ojap zalom. Uprant, Elly-k ani mhaka Gilead-achea 41-avea Korsak hajir zaunk apounnem mellʼllem. Tor 13 vorsam poilim bhav Knorr-an sanglolim utram purnn zalim. Graduation-a uprant ami porot Belgium-antlea Bethel-ant ailim.

Kaide xiklolean, Jehovachea Sakxeanchea kamacher bondi asli thoim, tancho hokʼk rakhonk hanv modot korunk pavlom. (Filp. 1:7) Amchea kamacher bondi aslolea 55-am poros chodd desantlea odhikaream lagim ulounk mhaka sondhi mellʼlli. Mhaka kaideam vixim kitlo onnbhov asa tem sangchea bodlek, hanv “Devacho monis” mhunn tea odhikareank sangtalom. Hanv sodanch magnneant Jehova lagim margdorxon magtalom. Karonn mhaka khobor asli ki “Sorvesporachea hatant razachem kalliz vhanvtea  udka sarkem; Apnnak zai te vatten To tem vollta.”—Mho. 21:1.

Ek pavtti, European Parliament-achea eka munxa lagim hanv uloilom. Ti ghoddnni mhaka azun poriant ugddas asa. Tea munxak mellonk khub pavtti proitn kelea uprant, xevottak to mellonk toiar zalo. Hanv taka mellʼllom tednam tannem mhunnttlem: “Tuka jem sangonk zai tem panch minttam bhitor sangon kabar kor.” Tednam hanv man bagoun Jehova lagim magnnem korunk laglom. Hem polloun to ojap zalo, ani hanv kitem kortam mhunn vicharunk laglo. Hanvem sanglem: “Tum Devacho sevok mhunn hanv magnneant Devache upkar attoitalom.” Tannem mhunnttlem: “Mhaka borem somzonk na. Tum kitem sangonk sodhta?” Tednam hanvem taka Romkarank 13:4 dakhoilo. To Protestant aslo ani Bible-ak resped ditalo. Tor tem vers taka rokddench somzolem. Tor ami fokot panch minttam nhoi, punn ordem vor uloile, ani amchem ulovop borem gelem. Ani xevottak, Jehovachim Sakxi kortat tea kamak to man dita, oxem pasun tannem mhaka sanglem.

Zaitim vorsam poriant, Jehovachea lokank konnachich bazu ghenastana ravop, bhurgeanchi custody, tax bhorop ani her vixoi-ancher Europe-achea korttant zhuzonk poddlem. Hantuntlea zaitea kesimnim zhuzonk mhaka sondhi mellʼlli, ani Jehovan amkam koxem zoit dilem tem hanv pollounk xoklom. Jehovachea Sakxeank European Court of Human Rights hea korttant, 140-am poros chodd kesimnim zoit mellʼllam!

Uprant, hanvem mukhel ofisantlo bhav Philip Brumley, ani Italy-ntlo bhav Valter Farneti, hanchea sangata kam kelem. Karonn Cuba desant amchea kamacher bondi asli, ani thoinchea bhav-bhoinnank ukteponnim Jehovachi seva korunk mellonk ami tankam modot korunk sodhtale. Tor hanvem Belgium-ant aslolea Cuba-che embassy-k chitt boroili ani uprant thoinchea eka officer-ak mellʼllom. Tori astana, tea desantlea sorkaran jea karonnank lagon amchea kamacher bondi ghatloli, tem ami suttavem korunk pavonk nant.

Magnneant Jehovachem margdorxon maglea uprant, Cuba-nt 5,000 Bible dhaddunk ami odhikaream koddlean porvangi magli. Ani amkam porvangi mellʼlli! Koslich addkholl nastana, bhav-bhoinnank Bible mellʼlle tem polloun, Jehovanuch amchea vavracher besanv ghatlem mhunn amkam khatri zali. Uprant ami anik 27,500 Bible dhaddunk Cuba-ntlea odhikaream koddlean porvangi ghetli. Ani ti-ui amkam mellʼlli. Tor Cuba-ntlea dor ek bhav-bhoinnik Bible mellʼllo tem polloun hanv khub khuxal zalom!

Cuba-ntlea bhav-bhoinnank ukteponnim Jehovachi seva korunk mellonk, hanv zaite pavtti Cuba-nt pasun gelom. Hea vorvim hanv thoinchea zaitea  sorkari odhikareank mellʼllom. Tor hanv tankam bore toren vollkhotalom.

1994-ant, Rwanda-nt Tutsi lokanchi ak’khi zat kabar korunk 10,00,000-am poros chodd lokank jivexim marle. Dukhachem mhunnttlear, tantunt amchim bhav-bhoinnam pasun aslim. Tor thoinchea bhav-bhoinnank gorjecheo vostu pavounk thoddea bhavank nemle.

Hanv tea bhavam sangata thoinchi rajdhani Kigali-nt pavlom tednam, ami thoincho RTO ani prokaxonam dovortat to zago polloilo. Thoim pistolamnim far marlole dekhun, thoinchea vonttincher burak zalʼle. Toxench, vhoddleo tolvareo gheun amchea bhav-bhoinnancho jiv kaddlolo mhunn pasun ami aikolem. Punn hachea bhair, bhav-bhoinnamnim eka-mekak mog dakhoilo hem-ui ami aikolem. Zoxem ami Tutsi zatichea eka bhavak mellʼlle, zo 28 disam pasot eka fonddant liplolo. Ani sangchem mhunnttlear, Hutu zatintlea Sakxi aslole eke familin taka thoim lipoun tacho jiv salvar kelʼlo. Uprant Kigali-nt eke mittinge vellar, 900 poros chodd bhav-bhoinnank ami urba ani bhuzvonn dili.

Rwanda-nt zalʼlea zhogddeank lagon zaitim bhav-bhoinnam Goma xarant aslolea refugee camp-ant pollon gelʼlim. Tor tankam sodhunk ami border cross korun Zaire (atam taka Democratic Republic of the Congo mhunnttat) desant gele. Punn thoim tim amkam mellonk nant. Tor ami Jehova lagim, “Please tim amkam mello-xim kor” mhunn magnnem kelem. Uprant, amchea mukhar konn tori cholon ieta to ami polloilo. Ami taka vicharlem: “Hanga konnui Jehovacho Sakxi asa?” Tannem mhunnttlem: “Hoi, hanv ek Sakxi. Hanv tumkam odruxttak sampoddloleank modot korpi somiti lagim vhortam.” Ami somitintlea bhavank mellʼlle, ani uprant sumar 1,600 bhav-bhoinnank mellon tankam urba ani bhuzvonn dili. Toxench, Sonchalon Monddollan dhaddloli chitt ami tankam vachun dakhoili. Tantuntlim utram tanchea kallzak laglim. Karonn tantunt boroilʼlem: “Tumchea pasot ami magnnem korit asat. Jehova tumkam kednanch sanddchona mhunn amkam purnn khatri asa.” Sonchalon Monddollan mhunnttlolim him utram ekdom khorim zalim. Karonn aiz Rwanda-nt 30,000-am poros chodd Sakxi khuxalkaien Jehovachi seva kortat!

Amchem kazar zaun sumar 58 vorsam uprant, 2011-nt mhojem mogall Elly bhair poddlem. Hanvem mhoji khont Jehovak magnneant sangli, ani tannem mhaka bhuzvonn dili. Toxench, mhojea xezareank Rajeachi bori khobor sangon mhaka ghottai mellʼlli.

Aiz hanv 90-am poros chodd vorsancho asa. Torui, hanv dor sumanak porgottnni kortam. Belgium-antlea xakha ofisant Kaidea Sombondit Khateant kam korunk, mhozo onnbhov dusreank sangon tankam modot korunk, ani Bethel-antlea tornnatteank gonvlli-bhett korunk mhaka khub khuxalkai bhogta.

Sumar 84 vorsam adim, hanvem poilech pavtti Jehovak magnnem kelʼlem. Jehova sangata mhoji ixttagot ghott korunk hi ekdom bori survat asli. Ani jivitbhor Jehovan mhojea magnneancher dhean dilem mhunn hanv tacho khub upkari!—St. 66:19. b