Devak manvololim zaunk amkam bhavarth asonk zai. Punn Bible-ant oxem sanglam: “Sogleach lokank bhavarth asta oxem nhoi.” (2 Tes. 3:2) Apostl Paulun him utram mhunnttlim tednam, aplo virodh kortolea “vaitt ani noxttea lokam” vixim to uloitalo. Punn bhavarth na toslo anikui lok asa ani Pauluchim him utram tankam-i lagu zatat. Zoxem thoddo lok, soglem rochpi ek Dev asa mhunn maninant. (Rom. 1:20) Toxench thoddim zannam, Dev asa mhunn mantat. Punn Jehovak manvololim zaunk itlench manlear puro nhoi.

Jehova Dev khorench asa ani tacher ghott bhavarth dovortoleank to inam dita, hachi amkam purnn khatri asonk zai. (Heb. 11:6) Bhavarth povitr xoktechea follacho ek bhag zaun asa. Tor amkam ghott bhavarth asonk zai zalear, ami magnnem korun Jehova lagim tachi povitr xokti magonk zai. (Luk. 11:9, 10, 13) Toxench Devachem Utor Bible, jem tachea povitr xokte udexim boroilam, tem ami vachunk zai, tacher niall korunk zai ani amchea jivitant apnnaunk zai. Oxem kelear, Jehovachi povitr xokti amchea jivitant kam kortoli ani amkam bhavarth asa mhunn ami dakhoun diunk pavtolim. Ani hem Jehovak khuxalkai haddtta.