1988 hea vorsa thaun Jack ani Marie-Line purnn vellachea sevent asat. Guadeloupe ani French Guiana-nt tannim veg-vegllea poristhitint veg-veglli seva kelea. Donui zage atam France xakhe khala ietat. Tankam ami thodde prosn vicharum-ia.

Tumi purnn vellachi seva kiteak suru keli?

Marie-Line: Lhan astana Guadeloupe-ant hanv mhojea avoi sangata choddxe pavtti ak’kho dis porgottnnent voitalem. Ti ek urbebhorit porgottnnar asli. Mhaka lokancho khub mog aslo dekhun mhojem iskolachem xikxonn kabar zalea uprant hanvem 1985-ant pioneering suru kelem.

Jack: Hanv tornnatto aslo tednam sodanch seve pasot khub mog aslolea purnn vellachi seva kortolea bhav-bhoinnam sangata vell sortalom. Iskolak sutti poddttali tednam hanv sahaiok pioneering kortalom. Sonvara ani Aitara pioneer-ank sangat diunk ami kednam-kednam bus dhorun tanchea vattarant voitalim. Thoim ami ak’kho dis seva korun, magir doria deger voitalim. Tea disamnim ami khub moja keli!

1988-ant Marie-Line-a lagim kazar zalea uprant hanvem mhakach mhunnttlem, ‛Amkam titleo zobabdareo nant, tor ami sevent anik chodd vell sarunk zata?’ Hanvem Marie-Line-a sangata pioneering suru kelem. Ani eka vorsa uprant amkam pioneer korsak apoilim. Tednam amkam khas pioneer mhunn nemlim. French Guiana-nt amontronn mellchea poilim, ami Guadeloupe-ant veg-vegllea toren seva keli.

Jehovachea sevent tumkam zaite bodlav korche poddle. Tor te korunk tumkam kitem modot zali?

Marie-Line: French Guiana-nt aslolea Bethel-antlea bhavank amcho avoddtto vers Izaias 6:8 mhunn khobor asli. Tor te amkam fon kortale tednam fokannamnim, “Tumkam ugddas asa tumcho avoddtto vers khoincho to?” mhunn vichartale. Tednam amkam amchi seva bodolchi asa mhunn kollttalem. Tor ami tankam, “Ami hanga asat! Amkam dhaddat!” mhunn sangtalim.

Ek novi seva melltta tednam ami ti poilim aslolea seve sangata sor korinant karonn toxem kelear amkam amche sevent khuxalkai mellona. Tea bhair ami thoinchea bhav-bhoinnam sangata ixttagot korcho proitn kortat.

Jack: Thoddea bhav-bhoinnank, ami tankam soddun novea sevent gelolim naka aslim. Tor  tim amkam ami asa thoinch ravonk sangtalim. Punn Guadeloupe soddlea uprant, eka bhavan amkam Jezuchea utrancho ugddas korun dilo, Matev 13:38: “Xet mhonnge sonvsar.” Tor ami khoinchea-i zagear asum, ami teach xetant kam kortat mhunn dor ek pavtt veg-vegllea zagear voitat tednam ami amkanch ugddas kortat. Karonn chodd mhotvachem mhunnttlear lok ani vattar!

Ami eka novea vattarant ietat tednam thoinchea lokanchem jevonn-khann amchea thaun vegllem aslear pasun tim jevtat ani khatat tem, ami pasun samballun khatat ani pietat. Toxench, amkam dhaddlolea dor eka zagea vixim ami borem uloitat. Oxe toren thoinchea lokam sarkim ami pasun khuxalkaien jieunk xiktat.

Marie-Line: Ami thoinchea bhav-bhoinnam thaun pasun xikcho proitn kortat. Ami French Guiana-nt gelea uprant, ek dis khub paus zhoddttalo. Tor ami paus thamblea uprant sevent voitolim mhunn chintlem. Punn eke bhoinnin mhaka mhunnttlem, “Iea nu ami?” Hanvem ojap zaun, “Koxem?” mhunn vicharlem. Tinnem mhunnttlem, “Tuji cycle ani sotri gheun ieo.” Oxem korun hanv eka hatant sotri dhorun cycle cholounk xiklem. Toxem korunk naslolem zalear hanv tea pausant kednanch porgottnni korunk pavchem naslem!

Tumi sumar 15 pavtti eka zagear thaun dusrea zagear geleant. Hem tumi koxem korunk xoklim tea vixim tumi dusreank kitem sangonk sodhtat?

Marie-Line: Porgottnni korun thokon ailea uprant suseg gheunk ek borem ghor asop gorjechem. Punn eka zagear thaun dusrea zagear vochon toslem ek ghor sodhun kaddop sompem asona.

Jack: Ek novem ghor mell’llea uprant choddxe pavtt hanv ghorak bhitorlean paint martam. Ami eka zagear chodd temp seva korunk aschimnant mhunn xakhentlea bhavank khobor asa zalear te amkam bestech challoun, “Jack, ghorak anik paint marunk vochonaka” mhunnttale.

Packing korunk Marie-Line ekdom huxar! Tem sogleo vostu veg-vegllea boksamnim ghalun, tancher “bathroom,” “bedroom,” “kitchen,” oxim nanvam ghaltalem. Ani dor eka boksant kitem ghatlam tachem tem ek list toiar kortalem. Tor magir ami novea ghorant gelea uprant, tim boksam tea-tea rumant dovrunk ani amkam zai teo vostu rokddeoch mellonk sompem zatalem.

Marie-Line: Ami sogleo vostu borea manddavollin korun dovortat dekhun ami voitat tea zagear amchi seva somtich suru korunk boreak poddtta.

 Devachi seva purnn toren korunk tumi tumcho vell koso uzar kortat?—2 Tim. 4:5.

Marie-Line: Somara disa ami visov ghetat ani mitting-ek lagon toiari kortat. Mongllara thaun ami sevent voitat.

Jack: Amkam sevent umkinch voram korchim poddttat, punn tori astana ami fokot vorancheruch dhean dinant. Porgottnni amchea jivitant sogleam poros mhotvachi zaun asa. Ghora thaun bhair sortat tednam thaun ghora porot ieum porian, vatter amkam mellttat tea sogleam lagim ami uloitat.

Marie-Line: Udharonnak, piknikek voitat tednam hanv sodanch mhojea lagim ttrekttam dovortam. Thoddo lok hanv Jehovachem Sakxim mhunn sangchem poilinch amchea lagim ieun vachunk lagon prokaxonam magta. Tor lok amkam polloita dekhun amchem nhesop ani amchi vagnnuk sodanch bori dovrop gorjechem.

Jack: Ami amchea xezaream pasot lhan-lhan kamam korun tankam sakx diuncho proitn kortat. Ami tankam zomnir kagdam poddleant zalear tim kaddunk, kochro uddounk, ghora bhair garden-ant panam punzaunk modot kortat. Tor thodde pavtti amchim xezarim tem polloun, amkam ieun vichartat, “Tumchea lagim Bible astolo? Mhaka ek zai aslo.”

Tumi zaitea pavtti pois-pois vattaramnim porgottnni kelea. Tumi khoinchea-i eka vattaracho onnbhov sangonk xoktat?

Jack: Guiana-ntlea thoddea vattarant pavonk khub kotthin zata. Thoim pavonk sarke pidd’ddear zal’le rosteancher amkam sumanak choddan-chodd 600 km pois provas korcho poddttalo. Amazon-achea ranantlea St. Élie, hea ganvant ami bhett dil’li tacho mhaka boro ugddas asa. Thoim gaddien vochonk ani magir motor boat-in vochonk amkam zaitim voram laglim. Thoinche choddxe lok bhangarachea minacher kam kortale. Ami prokaxonam dilea uprant tannim khuxal zaun amkam lhan-lhan bhangarache kuddke, denngim mhunn dile! Sanjer ami tankam amchea songottnneche viddeo dakhoile. Te pollounk zaite lok ail’le.

Marie-Line: Halinch, Jack-ak Camopi hea ganvant, Jezuchea Ugddas disak bhaxonn diunk sanglem. Thoim vochonk ami Oyapock Nhoim-entlean ek boat gheun char voram provas kelo. To ek boro onnbhov aslo.

Jack: Nhoim-chea udkacho fors ekdom chodd asta tea zagear ti par korunk khub dhokeachem asta. Hea udkachea forsa modem boat vhoronk eka voddekarak bori kola asonk zai. Punn tem udok khoddpancher vhanvta tednam tem pollounk khub sobit dista. Ho onnbhov khorench ugddasak urpa sarko karonn tea ganvant fokot 6-uch Sakxi aslim tori astana Ugddas Disak sumar 50 lok ail’le. Tantunt thodde Amerindians pasun asle!

Marie-Line: Jehovachi seva chodd korunk sodht’tolea tornnatteank osle sobit onnbhov mellonk xoktat. Oslea poristhitint tumi Jehovacher bhorvonso dovrunk zai, tednam amchea kamacher tacho hat asa mhunn tumkam dixtti poddttolem. Tednanch tumcho bhavarth ghott zatolo.

Tumi zaiteo bhaso xikleant. Tor teo xikonk tumkam sompem aslem kai?

Jack: Na na, tem sompem naslem. Porgottnnent modot zaunk ani sobhek modot korunk lagon hanv heo bhaso xiklom. Sranantongo * hea bhaxent hanvem Bible vachop korunk naslem, punn atam mhaka sobhent Pahrogopur Obheas gheunk poddlo! Hanvem eka bhavak tuka somzolem kai mhunn vicharlem. Tannem mhunnttlem, “Thoddim utram somzonk nant, tori tunvem ekdom borem kelem.” Punn, bhurgeamnim mhaka khub adar dilo. Karonn hanvem thoddeo chuki kel’leo teo tannim sangleo jeo her bhav-bhoinnam sangonk nant. Tor, bhurgeam thaun hanv zaitem xikonk pavlo.

Marie-Line: Eka vattarant hanv French, Portuguese, ani Sranantongo hea bhasamnim Bible obheas ghetalem. Eke bhoinnin mhaka ek boro sol’lo dilo. Tinnem sanglem, “Sogleam-von kotthin bhas poilim xik ani sogleam-von sompi bhas xevottak xik.” Ho sol’lo mhaka khub faideak poddlo.

Ek dis mhaka Bible obheas Sranantongo bhaxent gheuncho aslo ani dusro Bible obheas Portuguese bhaxent. Jednam hanvem dusro Bible obheas suru kelo, mhojea sangata aslolea bhoinnin mhaka mhunnttlem, “Marie-Line, kitem tori sarkem na oxem dista!” Pollounk gelear, hanv Brazil-antle  baile lagim Portuguese bhaxen ulounchea svater, Sranantongo bhaxen uloitalem!

Tumi seva kelea thoinchim bhav-bhoinnam tumcho khub mog kortat. Tumi tanchim ghott ixttam koxim zaunk pavlim?

Jack: Mhonn’nneo 11:25 sangta: “Dusreak dhadoxi korpi apunn svota dhadoxi zatolo.” Dusream sangata vell sarunk ani tanchea pasot zata tem korunk ami fatti soronant. Raj-ghoracho samball korchea vixim thoddea bhavamnim mhaka oxem mhunnttlem: “Tem kam porgottnnarank korum di.” Tor hanvem tankam: “Hanv-ui ek porgottnnar. Kitem-i kam korchem asa zalear, mhaka-i tantunt vantto gheunk zai,” mhunn sanglem. Amkam amchea pasot thoddo vell zai tem khorem, punn tea karonnak lagon dusreank borem korunk ami fatti sorchem nhoi mhunn ami amkanch ugddas kortat.

Marie-Line: Amchea bhav-bhoinnank kitem goroz asa tem ami zannam zauncho proitn kortat. Udharonnak, konnank tori aplea bhurgeank samballunk vo iskola thaun ghora haddunk modot zai zalear ami polloitat. Tea udexim, ami amchim her kamam tanchea kamam sangata manddavoll korun tanchea adarak pavcho proitn kortat. Hea toren tanchea gorje vellar pavlolean ami tanchea lagim ghott ixttagot zoddttat.

Porgottnnaranchi chodd goroz asa toslea zagear vochon seva kelolean tumkam koslim besanvam mell’lleant?

Jack: Purnn vellachi seva kelolean amkam zaitim besanvam mell’lleant. Choddxe pavtt amkam Jehovachi rochnna pollounk melltta zantunt ami khub sontostat. Amkam zaiteo oddchonneo asleo tem khorem, punn amkam monachi xanti asli karonn ami khoinsorui asum amkam Devachea lokancho adar asa mhunn ami zannam aslim.

Mhojea tornnatteponnant rajkaronnant bhag ghenastana ravlolean mhaka French Guiana-nt bondkhonnint ghatlolo. Punn, hanv porot tea desant ek mixinori mhunn voitolom ani thoinchea bondkhonnintlea lokank bhett korunk mhaka porvangi mellttoli mhunn hanvem kednanch chintunk na. Khorench, Jehovan mhaka zaitim besanvam dileant!

Marie-Line: Dusreanchi seva kelolean mhaka vhoddantlo vhodd sontos melltta. Jehovache sevent ami khuxal asat. Hea udexim amchem kazari jivit pasun ghott zalam. Udharonnak, ami thodde pavtti ekech bhaxen chintunk pavtat. Zoxem kednam-kednam niraxi zalolea eka zoddpeak amchea ghora jevnnak apoum-ia kai mhunn Jack mhojea lagim vicharta ani tednam “hanv pasun tench chintalem” mhunn hanv taka sangta.

Jack: Mhaka prostate cancer asa mhunn halinch kollon ailem. Ani Marie-Line-ak hem aikonk borem disona, tori astana hanv taka oxem sangtam, “Moga, hanv moronk ‘chodd mhataro’ zaunk na. Punn hanv faleam melom zalear pasun, hanvem mhojem jivit Jehovachi seva korunk uzar kelam mhunn hanv khub khuxal asa.”—Ut. 25:8.

Marie-Line: Ami kednanch opekxa korunk na title sueog Jehovan amkam dileat, ani amchean kednanch korunk zaunche naslem oxem distalem tem pasun korunk tannem amkam modot keli. Jehovan amkam zaiteo boreo vostu dileant. Tor Jehovachem songotton amkam khoinsorui vochonk sangta zalear, tacher purnn bhorvonso dovrun ami vochonk toiar asat!