1. Upodexok 3:1, 7 amkam kitem xikoita?

AMCHEA modlea thoddeank zaitem ulounk borem dista. Ani thoddeank vogi ravonk borem dista. Hea lekhachem mukhel vers sangta tea pormonnem ek vell vogi ravonk asa ani ek vell ulounk. (Upodexok 3:1, 7 vachat.) Tori astana, amkam ghoddiek amchea thoddea bhav-bhoinnamnim chodd uloil’lem zai astolem ani thoddeamnim unnem uloil’lem zai astolem.

2. Ami kednam ani koxem ulounchem tea vixim tharaunk konnank odhikar asa?

² Ulounchi tank Jehova Deva thaun ek dennem zaun asa. (Sutt. 4:10, 11; Prok. 4:11) Hem dennem ami koxem uzar korunk zata tem somzonk to aplea Utrantlean amkam modot korta. Hea lekhant ami kednam ulounchem ani kednam vogi ravchem tem somzonk modot zaunk ami Bible-antlean thoddim udharonnam polloitolim. Ami dusream lagim kitem uloitat tea vixim Jehovak koxem bhogta tem pasun ami polloitolim. Poilim, ami kednam ulounchem tea vixim bhasabhas korum-ia.

3. Romkarank 10:14-ant sanglam tea pormonnem ami kednam ulounk zai?

³ Jehova vixim ani tachea Rajea vixim ulounk ami sodanch toiar asonk zai. (Mt. 24:14; Romkarank 10:14 vachat.) Oxem kortat tednam, ami Jezuchi dekh ghetat. Jezu prithumer ieunk ek mukhel karonn mhunnttlear, aplea Bapa vixim sot sangonk. (Juanv 18:37) Punn ami koxim uloitat hem pasun mhotvachem mhunn ami ugddas dovrunk zai. Tor ami Jehova vixim dusream lagim uloitat tednam ami tanchea lagim “dulobaien ani mannsugen” ulounk zai. (1 Ped. 3:15, 16) Ani ami tanchea bhavnank ani tim patietat taka resped diunk zai. Oxem kortat tednam ami tea munxa lagim uloun fokot taka mahiti diunchim  nant, punn taka xikoitolim ani ami sangtat tem ghoddie tachea kallzak pavtolem.

4. Mhonn’nneo 9:9 sangta tea pormonnem amchem ulovop dusreank koxem modot korunk xokta?

⁴ Eka bhavak vo bhoinnik sol’leachi goroz asa oxem vhoddilank dista zalear tannim tanchea lagim ulounk fatti sorchem nhoi. Oslea bhav vo bhoinni lagim uloitana, vhoddil sogleam hujir uloun tankam lojent ghalinant punn ek boro vell ani zago vinchun uloitole. Te sodanch tankam man diun ulouncho proitn kortat. Tori astana, tankam bore nirnnoi gheunk modot kortat toslim Bible-antlim totvam dakhounk te fatti soronant. (Mhonn’nneo 9:9 vachat.) Goroz tednam ulounk amkam dhirachi kiteak goroz asa? Ami don veg-vegllea torechim udharonnam polloum-ia. Poilea udharonnant eka munxan aplea putank nittaier haddunk zai aslem, ani dusrea udharonnant, eke bailen razak tannem ghetlolo nirnnoi chukicho mhunn sangonk zai aslem.

5. Porom Iadnik Eli kednam ulounk na?

⁵ Porom Iadnik Eli-k don put asle zancho to khub mog kortalo. Tachea donui putank Jehova pasot kainch resped naslo. Tankam tombunt iadnik mhunn ek mhotvachi zobabdari asli. Punn tannim apleak aslolo odhikar chukichea ritin uzar kelo. Jehovak bhettoilolea bhettovnneank tannim kainch resped dakhounk na ani te ukteponnim loingik pozoddponn kortale. (1 Sam. 2:12-17, 22) Moizesachea Somurte pormonnem Eli-chea putamnim jem kel’lem taka lagon tankam moronn favo aslem. Punn Eli-n tankam koraien sol’lo dinastana tombunt kam korunk toxech soddun dile. (D.S. 21:18-21) Eli-n jem kelem tea vixim Jehovak koxem dislem? Tannem Eli-k mhunnttlem: “Tum tujea putank mhoje-von odhik man ditai?” Magir Jehovan Eli-chea donui putank jivexim marcho nirnnoi ghetlo.—1 Sam. 2:29, 34.

6. Eli-chea udharonnantlean ami kitem xiktat?

⁶ Eli-chea udharonnantlean amkam ek mhotvachem lisanv xikonk melltta. Amchea eka ixttan vo soirean Devacho kaido moddla mhunn amkam kolltta tednam ami tachea lagim uloun Jehovachea dorjeam vixim taka ugddas korunk zai. Ani magir tankam vhoddilam thaun modot melltta mhunn ami khatri korun gheunk zai. (Jak. 5:14) Amchea ixttank vo soireank Jehova poros chodd man diun amkam Eli-a sarkim kednach zaunk naka. Ekleak nittaier haddunk lagon tachea fuddem vochon ulounk khorench dhirachi goroz asa, punn oxem kelolean khub faido asa. Eli-chem udharonn ani ek Israelit  bail Abigail-achem udharonn hanchem modem ontor polloiat.

7. Abigail Davida lagim kiteak ulounk geli?

⁷ Abigail ek girest bhattkar Nabal-achi bail asli. David ani tache munis Raza Saul-a thaun pollon voitale tednam tannim Nabal-achea menddrea rakhnnea sangata thoddo vell sarlo ani choram thaun Nabal-achea menddreanchi rakhonn keli. Tanchea modotik lagon Nabal upkari aslo kai? Na. Davidan aplea munxank dhaddun thoddem jevonn ani udok maglem tednam Nabal ragar zaun tancho opman korunk laglo. (1 Sam. 25:5-8, 10-12, 14) Taka lagon, Davidan Nabalachea ghorannantlea sogleank jivexim marcho nirnnoi ghetlo. (1 Sam. 25:13, 22) Hi vaitt ghoddnni ghoddonk koxi addaunk zatali? Ho vell ulouncho mhunn Abigail somzoli. Tor ti dhiran fuddem soron tolvar gheun aslolea 400 bhukel’lea, ragixtt dadleank mellonk ani Davida lagim ulounk geli.

8. Abigail-achea udharonnantlean ami kitem xiktat?

⁸ Abigail Davidak mell’lli tednam ti dhiran uloili. Ani tem polloun tinnem jem sanglem tem korunk David fuddem sorlo. He vaitt poristhitik lagon Abigail zobabdar nasli. Tori astana, tinnem Davida lagim vochon bhogsonnem maglem. David ek boro munis ani to sarkem tem kortolo hem apnnank khobor asa mhunn tinnem Davidak sanglem ani modotik lagon ti Jehovacher patieli. (1 Sam. 25:24, 26, 28, 33, 34) Konnui munis chukichea vatten voita tem ami polloitat tednam Abigail-a sarkim ami pasun tachea lagim ulounk zai. (St. 141:5) Oxem kortana, ami resped dakhounk zai tem khorem, punn ami dhiran pasun ulounk zai. Ami eka munxak mogan goroz to sol’lo ditat tednam ami tache khore ixtt mhunn dakhoun ditat.—Mho. 27:17.

9-10. Dusreank sol’lo ditana vhoddilamnim kitem ugddas dovrunk zai?

⁹ Sobhent konnui ek chukichem pavl gheta zalear chodd korun vhoddilamnim tachea lagim dhiran ulovop gorjechem. (Gal. 6:1) Apunnui  oporipurnn ani apnnakui kednam-na-kednam sol’leachi goroz asa mhunn vhoddil khaltikaien manun ghetat. Punn taka lagon, xistichi goroz asa tankam nittaier haddunk te fatti soronant. (2 Tim. 4:2; Titak 1:9) Eka munxak sol’lo ditat tednam te apli ulounchi tank, tankam bore bhaxen ani pasiensan xikounk uzar korcho proitn kortat. Te aplea bhavancho khub mog kortat dekhun te oxem korunk fuddem sortat. (Mho. 13:24) Punn Jehovachea dorjeank tenko diun taka man haddop ani sobhechi rakhonn korop hem tankam sogleant chodd mhotvachem.—D.I. 20:28.

¹⁰ Atam meren, ami kednam ulounchem tea vixim polloilem. Punn, kednam-kednam ami kainch uloinastana ravlear ekdom borem. Oxem korunk amkam kiteak kotthin zaunk puro?

11. Jakoban khoinchem udharonn uzar kelem, ani tem koxem lagu zata?

¹¹ Amchem ulovop tabeant dovrop kotthin zaunk xokta. Tem kitlem kotthin tem dakhounk Bible-antlo borovpi Jakoban ek borem udharonn uzar kelem. Tannem mhunnttlem: “Utramnim kednanch chuk korinant tim monxam sopurnn; apnnankuch tanchean purnntaien domaunk zata. Amkam zai tem korunk ghoddeachea tonddant logom ghalem mhonnttoch, taka soglloch amkam zai toso bhonvddaunk zata.” (Jak. 3:2, 3) Eka ghoddeachea tokler ani tonddar logom ghaltat. Tea logomak asloli dori oddli zalear, eka ghoddesvarak tachean zai tea vatten tea ghoddeak voronk zata vo thambounk-ui zata. Ghoddesvarachea hatantlean ti dori suttli zalear to ghoddo hanga thoim dhanvonk xokta ani ghoddeak toxench tea ghoddesvarak mar lagonk xokta. Toxench amchea ulovpacher ami tabo dovornant zalear zaitem luksonn zaunk xokta. Ami kednam ulounk zaina, tachim thoddim udharonnam polloum-ia.

12. Ami khoinchea vellar ulounchem nhoi?

 ¹² Eka bhava vo bhoinni lagim dusreank sangonk zaina tosli mahiti asa zalear tumi kitem kortolim? Udharonnak, amchea kamachea bondi aslolea zageavoilea eka bhavak vo bhoinnik tumi mellttat tednam tea desant amchem kam koxem cholta tea vixim bariksannechi mahiti tumi tankam vichartolim kai? Tumi ghoddie borea monan vicharunk puro. Ami amchea bhav-bhoinnancho mog kortat dekhun ami tanchea poristhiti vixim zannam zaunk sodhit. Tanchem nanv gheun pasun ami magnnem kortat. Tori astana, hea vellar ami ulounchem nhoi vo tankam ti mahiti vicharchi nhoi. Dusreank sangonk nozo ti mahiti zannam zaunk tumi tea bhava vo bhoinnicher dobhav ghaltat zalear, tumi tankam ani tea desant aslolea bhav-bhoinnank mog dakhoinant karonn tea bhav-bhoinnamnim to bhav vo bhoinn ti mahiti konnakuch sangchimnant mhunn tancher visvas dovorlolo asa. Amchea modlea konnakuch amchea kamacher bondi aslolea desamnim ravtolea amchea bhav-bhoinnanche tras vaddounk naka. Teach toren, oslea zagear seva korta to bhav vo bhoinn thoinche Sakxi porgottnni koxi kortat vo tanchi seva koxi chol’lea tea vixim dusreank sangchim nant.

13. Mhonn’nneo 11:13-ant sanglolea pormonnem vhoddilamnim kitem korunk zai, ani kiteak?

¹³ Chodd korun vhoddilamnim Mhonn’nneo 11:13-ant sanglolem totv apnnaunk zai. (Vachat.) Hem te umkich mahiti zankam kollonk zaina, tankam ti mahiti kolloinastana kortat. Ek vhoddil kazari asa zalear hem kotthin zaunk xokta. Ek kazari zoddpem aplem kazari jivit ghott dovrunk lagon eka-meka lagim aplim chintnam, bhavnam ani apleak aslolea uskeam vixim sodanch uloitat. Punn sobhentlea eka bhav vo bhoinni vixim dusreank sangonk zaina tosli mahiti aplea bailek sangonk zaina mhunn ek vhoddil ugddas dovorta. To toso korunk chukta zalear, to bhav-bhoinnancho bhorvonso ani aplem borem nanv hogddaitolo. Sobhent zobabdari asloleamnim “don thonddanche” vo fottkire asonk zaina. (1 Tim. 3:8.) Hacho orth, te dusreank fottoinant vo dusream vixim vaitt khobro korinant. Ek vhoddil aplea bailecho mog korta zalear tinnem zannam zaunk nozo ti mahiti to tika sangcho na.

14. Eka vhoddilachi bail aplea ghovachem nanv samballunk koxi modot korunk xokta?

¹⁴ Sangonk zaina ti mahiti sang mhunn ek bail aplea ghovacher dobhav ghalina tednam ti aplea ghovak tachem borem nanv samballunk modot korta. Ek bail ho sol’lo apnnaita tednam ti fokot aplea ghovakuch man dina, punn jea bhav vo bhoinnin tichea ghovak ti khobor sanglea tankam-i man dita. Ani sogleant mhotvachem mhunnttlear, ti Jehovak khuxal korta karonn hea toren ti sobhechi xanti ani ekvott samballunk modot korta.—Rom. 14:19.

15. Job-achea tin ixttam vixim Jehovak koxem boglem, ani kiteak?

¹⁵ Ami koxem ani kednam ulounk zai tea vixim Job hea Bible-antlea pustokantlean zaitem xikonk zata. Job-acher eka-fattlean-ek tras ailea uprant taka buzvonn ani sol’lo diunk char dadle aile. Te charui zann zaito vell vogi ravle. Punn tigui dadle—Elifaz, Bildad, and Zofar—uprant je uloile tachea voilean tannim ho soglo vell Job-ak koxi buzvonn diunchi tem chintunk sarunk na mhunn kollon ieta. Tachea bodlek, te Job-an kitem tori chuk kel’li mhunn koxem dakhoun ditole tea vixim chint’tale. Tannim sanglolim choddxim utram fott naslim. Punn tannim Job-a vixim ani Jehova vixim jem kitem sanglem tem dukhoita toslem aslem ani khorem naslem. Job ek vaitt munis mhunn tannim tacher boglantt ghatlem. (Job 32:1-3) Hache vixim Jehovan kitem kelem? To tea tigui munxancher samko ragar zalo. Tannem tankam murk mhunnttle ani tankam Job-ak tanchea  pasot magnnem kor mhunn sangonk lailem.—Job 42:7-9.

16. Elifaz, Bildad, and Zofar hanchea thaun kitem korchem nhoi mhunn ami xiktat?

¹⁶ Elifaz, Bildad, ani Zofar hanchea thaun ami kitem korchem nhoi tem ami xiktat. Poilem, ami amchea bhavanchi nit korchi nhoi. (Mt. 7:1-5) Tachea bodlek, ami ulounchea poilim te kitem sangtat tem bore bhaxen aikonk zai. Tednanch amkam tanchi poristhiti koxi asa ani tankam kitem sosunk poddtta tem somzotolem. (1 Ped. 3:8) Dusrem, ami uloitat tednam amchim utram borim asat ani sarkim asat mhunn ami khatri korun gheunk zai. (Ef. 4:25) Ani tisrem, ami eka-mekak kitem mhunnttat tacher Jehova dhean dita mhunn ami ugddas dovrunk zai.

17. Elihu-chea udharonnantlean ami kitem xiktat?

¹⁷ Job-ak mellonk ail’lo to chovto munis Elihu aslo, zo Abraham-acho soiro aslo. Job ani te tigui munis uloitana to aikotalo. Te kitem uloitale tacher tannem bore bhaxen dhean dilem mhunn kolltta, karonn Job-achem chintop nittaier haddunk, to uprant thoddim doiechim utram ani bore sol’le diunk pavlo. (Job 33:1, 6, 17) Sogli vakhann’nni apleak vo dusrea khoinchea-i munxak voichi nhoi, punn Jehovak voichi ho tacho mukhel dhei aslo. (Job 32:21, 22; 37:23, 24) Vogi ravonk ani aikonk ek vell asa mhunn Elihu-achea udharonnantlean ami xiktat. (Jak. 1:19) Toxench ami sol’lo ditana amcho mukhel dhei, amkam nhoi punn Jehovak vakhann’nni haddop asonk zai mhunn ami xiktat.

18. Devan dil’lem dennem amchi ulounchi tank hacho ami valor kortat mhunn koxim dakhoitolim?

¹⁸ Kednam ani koxem ulounchem tea vixim Bible-antlo sol’lo apnnaun ami Devan dil’lem dennem, amchi ulounchi tank hacho valor kortat mhunn dakhoitat. Raza Solomon-an prerit zaun oxem boroil’lem: “Rupeachea tattan dovorlolea bhangarachea apolam itlem moladik zannvaien uloilolim utram.” (Mho. 25:11) Dusrim kitem uloitat tem ami bore bhaxen aikotat tednam ani ami ulounchea poilim chint’tat tednam amchim utram tea bhangarachea apolam sarkim zatat—mhunnche valorachim ani sobit. Magir, amchem ulovop thoddem asum vo chodd asum, amchim utram dusreank urba ditolim ani Jehovak khuxal kortolim. (Mho. 23:15; Ef. 4:29) Devan dil’lea hea denneache ami upkari asat mhunn dakhounk hi sogleant bori vatt zaun asa!