1. Aplea xisanchi rakhonn kor mhunn Jezun aplea Bapa lagim kiteak maglem?

APUNN sorgar gelea uprant, aplea xisank fuddo korcho poddttolea oddchonneam vixim chintun Jezuk khont zali. Karonn taka aplea xisancho khub mog aslo dekhun to morchea poilim, tannem aplea Bapa lagim “noxtteachea hatantle tankam rakh” mhunn maglem. (Juanv 17:14, 15) Jehovachi seva kortoleam add, Soitan zhuztolo mhunn Jezuk khobor asli. Taka lagon, tankam rakhonn diunchi goroz asli.

2. Jehova amchim magnnim aikotolo mhunn ami kiteak khatri dovrunk zata?

² Jehova aplea Putacho mog kortalo dekhun tannem tachem magnnem aikolem. Ami Jehovak manvota tem kortat zalear to amcho pasun mog kortolo. Amchi modot ani rakhonn kor mhunn magtat tednam to amchem aikotolo. Jehova ek mogall Bapai sarko aplea bhurgeanchi kallji gheta. To oxem korina zalear tachem nanv pidd’ddear zaunk xokta.

3. Amkam aiz Jehovachi rakhonn kiteak zai?

³ Poilim poros chodd aiz amkam Jehovachi rakhonn zai. Karonn Soitanak sorgar thaun prithumer xevttila ani to ‘bhov ragar asa.’ (Prok. 12:12) Thodde lok amkam dhumallo ditat tednam apunn “Devachi bhokti kortat” oxem tankam dista. Hem chintop Soitanan tanchea monan ghatlam. (Juanv 16:2) Tea bhair, ami sonvsarachea lokam sarkim vagonant mhunn thodde lok amkam dhumallo ditat. Punn amkam bhieunchi goroz na. Kiteak? Karonn Devachem Utor sangta: “Somi visvas favo-aslolo: To tumkam ghottai ditolo ani Vaittoveachea hatantlim tumkam rakhtolo.” (2 Tes. 3:3) Atam Jehova amkam khoinchea don toren rakhta tem polloum-ia.

4. Efezkarank 6:13-17-ant sanglolea pormonnem amchi rakhonn korunk Jehovan amkam kitem dilam?

⁴ Soitanachea akromonna thaun rakhonk Jehovan amkam ek angtrann vo zhuzachem angvostr dilam. (Efezkarank 6:13-17 vachat.) Hem Devan dil’lem angvostr ghott asa ani amkam borea bhaxen rakhta. Punn amkam rakhonn mellonk ami tem ak’khem angvostr sodanch ghalun ravonk zai. Hea angvostrache veg-veglle bhag kitem suchit kortat tem atam polloum-ia.

5. Sotacho pott’tto mhunnttlear kitem, ani ami to kiteak bandunk zai?

⁵ Sotacho pott’tto mhunnttlear Bible-antlim sotam zaun asat. Ami ho pott’tto kiteak bandunk zai? Karonn Soitan “fottincho bapui” zaun asa. (Juanv 8:44) Ani tannem hozaramnim vorsam fott marun ‘ak’khea sonvsarak fosoila.’ (Prok. 12:9) Punn Bible-antlim sotam amkam tachea fotti thaun rakhtat. Tor ami ho pott’tto bandtolim zalear kitem korunk zai? Ami Jehova vixim sot xikonk zai, “atmean ani sotan” tachi bhokti korunk zai ani soglea vostumnim promannik asonk zai.—Juanv 4:24; Ef. 4:25; Heb. 13:18.

6. Chhatichem kott’ttem mhunnttlear kitem, ani ami tem kiteak ghalunk zai?

⁶ Chhatichem kott’ttem mhunnttlear, Jehovache nitiche dorje. Ami tem kiteak ghalunk zai? Jea toren chhatichem kott’ttem soinikachea kallzachi rakhonn korta, toxench Jehovache nitiche dorje hea sonvsarachea vaitt probhava thaun amchi rakhonn kortat. (Mho. 4:23) Ami purnn kallzan tacho mog kelolo ani tachi seva keloli Jehovak zai. (Mt. 22:36, 37) Punn ami Jehovachi seva korop bond korunk Soitan proitn korta. Taka lagon, Jehovak avoddnna tea sonvsaracheo vostuncho mog korunk to amkam uksaita. (Jak. 4:4; 1 Juanv 2:15, 16) Ani hi tachi chal cholona zalear to amkam dhumallo diun Jehovachea dorjeam add vochonk laita.

7. Ami chhatichem kott’ttem ghaltat, hacho orth ami kitem kortat?

⁷ Ami chhatichem kott’ttem ghalunk zai, hacho orth ami Jehovachea nitichea dorjeam pormonnem jieunk zai. (St. 97:10) Tor oxem korop khub kotthin mhunn thoddeank disonk puro. Eka soinika vixim chintat. Zhuza vellar, aplem chhatichem kott’ttem zhodd asa mhunn chintun tannem tem kaddun dovorlear pixemponn zatolem. Teach bhaxen, ami Bible dorjeam pormonnem jienant zalear, ami amcho jiv hogddaunk xoktat. Punn khorem mhunnttlear, ami Jehovacho mog korun zhodd nasloli tachi adnea pallttat tednam ami amcho jiv salvar korunk xoktat. Punn khorem mhunnttlear, jim konn Jehovacho mog kortat, tankam tachi adnea pallunk “zhodd” zaina ani teo pall’llolean tancho jiv salvar zata.—1 Juanv 5:3, 4.

8. Paiank butt ghalop mhunnchem kitem?

⁸ Jea toren ek soinik sodanch aplea paim-ant butt ghalun asta, teach toren rajeachem xubhvortoman porgottunk ami sodanch toiar asonk zai mhunn Paulun sanglem. Ami oxem kortat tednam amcho bhavarth ghott zata. Sonvsarbhor Jehovache lok khoinsorui asum, veg-veglleo sondhi uzar korun porgott’ttat tem polloun ami khuxal zatat. Udharonnak, tim kamak vo iskolak voitat tednam, kitem-i haddunk voitat tednam, vollkhincheank vo aplea soireank mellttat tednam porgott’ttat. Tea bhair, tim ghor-ghoramnim, dukanamnim ani ghora bhair vochonk mellona tednam pasun porgott’ttat. Ami bhieun, porgottnni korop bond keli zalear zhuza vellar aple butt kaddun dovorta toslea eka soinika sarkim ami zaunk xoktat. Oslea soinikak mar lagonk xokta ani to apli rakhonn korunk xokchona. Tea bhair, aplea mukheleachi adnea to pallunk xokcho na.

9. Ami bhavarthachi vhodd ddhal kiteak dhorun ravonk zai?

 ⁹ Bhavarthachi vhodd ddhal mhunnttlear, amkam Jehovacher aslolo bhavarth. To apleo sogleo bhasaunneo purnn kortolo mhunn amkam bhavarth asa, jeo amkam ‘Devcharache soglle zollte bann palounk’ modot korta. Ho bhavarthacho ddhal dhorun ravop kiteak gorjecho? Karonn ho bhavarth aslear ami dhorm-broxtt korpeanchi xikounn aikon foschimnant vo lok amchea patiennik lagon amchim fokannam kortat tednam ami niraxi zaunchim nant. Bhavarth asa zalear kama zagear, iskolant vo her kodden Jehovak manvona tem korunk dusrim amcher dobhav ghaltat tednam ami te dor ek pavtti nakarunk pavtat. (1 Ped. 3:15) Toxench, amkam bhavarth asa zalear, Jehovachi seva korunk addkoll haddtta tosli vhodd pagarachi sirvis ami nakarunk pavtat. (Heb. 13:5, 6) Ani tea bhair, amkam bhavarth asa zalear, dhumallo aslear pasun ami Jehovachi seva korit ravtolim.—1 Tes. 2:2.

10. Soddvonnechem helmet mhunnttlear kitem, ani ami tem kiteak ghalunk zai?

¹⁰ Soddvonnechem xirastrann vo helmet, mhunnttlear amkam Jehovacher aslolo bhorvonso. To bhorvonso mhunnttlear, ami  tachi khuxi kortat tednam to amkam inam ditolo ani ami melear pasun to amkam porot jivont kortolo. (1 Tes. 5:8; 1 Tim. 4:10; Titak 1:1, 2) Ek helmet soinikachi tokli rakhta toxem, soddvonnechem helmet amchem chintop rakhta. Hacho orth, amcher somosia ietat tednam Devachea bhasaunneancher ami dhean dovortat zalear amkam sarke toren chintunk modot zata. Ami hem helmet ghalop mhunnttlear kitem korunk zai? Ami amchem chintop Devachea chintpa sarkem korunk zai. Udharonnak, ami amcho bhorvonso girestkaiecher dovorchea bodlek, Devacher dovrunk zai.—St. 26:2; 104:34; 1 Tim. 6:17.

11. Tolvar mhunnche kitem, ani ami ti kiteak uzar korunk zai?

¹¹ Povitr atmean dil’li torsad vo tolvar mhunnche, Devachem Utor Bible. Hi tolvar soglem torechem khotteponn ukteponnim dakhoun dita ani lokank vaitt sonvoim ani khotte xikounne thaun bhair soronk modot korta. (2 Kor. 10:4, 5; 2 Tim. 3:16, 17; Heb. 4:12) Hi tolvar ami bore toren uzar kortolim zalear, ami svotacho Bible obheas korunk zai ani Devachea songottnne thaun melltta tem proxikxonn gheunk zai. (2 Tim. 2:15) Dev dita tea angvostra bhair, amkam rakhonk Jehova amkam anik kitem dita?

12. Amkam anik kiteachi goroz asa, ani kiteak?

¹² Eka vhodd soinea add zhuzonk apleak her soinikanchi modot zai mhunn ek onnbhovi soinik vollkhun gheta. Teach toren, Soitanacho ani tachea sangateancho ami virodh kortolim zalear, amkam amchea bhav-bhoinnanchi goroz asa. Jehovan amkam modot korunk sonvsarbhor aslolim ‘bhav-bhoinnam’ dileant.—1 Ped. 2:17.

13. Hebrevank 10:24, 25-ant sanglolea pormonnem, mittingek hajir zalolean amkam kosle faide zatat?

¹³ Mittinge udexim amkam modot melltta. (Hebrevank 10:24, 25 vachat.) Ami nirax zatat tednam mittinge udexim amkam urba melltta. Mittingent ami bhav-bhoinnanche zobab aikotat tednam, ani mittinge poilim ani uprant tanchea sangata ami uloitat tednam amkam urba melltta. (1 Tes. 5:14) Bible adarit bhaxonnam ani dekhave ami aikotat ani polloitat tednam Jehovachi seva korchi amchi itsa anik ghott zata. Tea bhair, ami mittingek voitat tednam dusreank modot korchi sondhi melltta dekhun ami khuxal zatat. (Itihas 20:35; Rom. 1:11, 12) Mittinge udexim ami eke toren zhuzak toiar zatat, mhunnche porgottnnechem kam korunk amkam thoim proxikxonn melltta. Udharonnak, porgottnnent koxem ulovop, ani Seve Pasot Mukhel Prokaxonam koxim uzar korop hem ami xiktat. Tor mittinge pasot borea toren toiari korat, mittingent kan diun aikat, ani thoim melltta tem proxikxonn apnnaiat. Hea toren tumi ‘Jezu Kristachim bollvont sevok’ zaunk pavtolim.—2 Tim. 2:3.

14. Amkam anik kosli modot asa?

¹⁴ Amkam lak’khamnim bollixtt ainzanchi pasun modot asa. Eka ainzak zaiti xokti asa. (Iz. 37:36) Tor eka ainzanchea soineak kitli xokti astoli tea vixim chintat! Khoinchoch munis vo denvchar Jehovachea bollixtt soinea add jikonk xokona. Karonn Jehova sorvxoktivont. Tor to amchea sangata aslear, ami sogleam poros xoktivont zatolim. (Fudd. 6:16) Hem tumi motint dovortat zalear, Jehovachem margdorxon pallttat mhunn tumchea kama voilim, iskolantlim, vo soirim tumchea add kitem-i mhunnttat vo kortat tednam, tumkam bhienastana ravonk modot zatoli. Karonn tumi eksurim nant.

15. Izaias 54:15, 17 pormonnem, amchem porgottnnechem kam konnacheanuch kiteak bond korunk zaina?

¹⁵ Ami Devache lok zal’lean, ami tachea noitik  dorjeam pormonnem jietat ani rajkaronnant vo zhuzant bhag gheinant. Ami Devachea nanva vixim ani fokot tachench Raj xanti haddttolem mhunn porgott’ttat. Ho sonvsar choloupi Soitan noxtto, fotting, ani khuni asa, ani tacho sonvsar beginuch nas zatolo mhunn pasun ami porgott’ttat. (Juanv 8:44) Oslea zaitea karonnank lagon Soitanacho sonvsar amcho dves korta. Punn Soitan ani tache sangati amchi porgottnni bond korunk xokchenant. Tachea bodlek amkam asat tea soglea vattamnim ami Jehovak vakhann’nni di-it ravtolim! Soitan bollixtt asa zalear pasun Jehova amkam rakhta dekhun ak’khea sonvsarant bori khobor pavonk to addaunk xokona.—Izaias 54:15, 17 vachat.

16. Vhodd sontapachea vellar Jehova aplea sevokank koso rakhtolo?

¹⁶ Jehova amkam fuddarak koso rakhtolo? To amkam vhodd sontapa vellar don vattamnim rakhtolo. Poilem, to sonvsarantlea razank uzar korun Vorixtt Babilon, mhunnche khottea dhormancho nas kortolo tednam aplea visvaxi sevokank salvar kortolo. (Prok. 17:16-18; 18:2, 4) Uprant, Armaged’donachea vellar Soitanacho sonvsar purnn toren nas kortolo tednam, to aplea lokank rakhtolo.—Prok. 7:9, 10; 16:14, 16.

17. Jehova sangata amchi ixttagot ghott asa zalear kitem faido zata?

¹⁷ Jehova sangata amchi ixttagot ghott asa zalear, Soitan amchem sasnachem luksonn korunk xokchona. Karonn toch sasnank nas zauncho asa. (Rom. 16:20) Tor Jehovan dilam tem angvostr sodanch ghalun ravat! Soitan ani tachea sonvsara add tumcheach bollan zhuzchea bodlek bhav-bhoinnanchi modot gheiat ani Jehovachem margdorxon pallat. Tumi oxem kortat zalear, tumcho mogall sorgincho Bap tumkam rakhtolo ani modot kortolo mhunn tumi khatri dovrunk xoktolim.—Iz. 41:10.