1. Tornnatte bhav kiteak zaitem korunk xoktat?

TORNNATTEA bhavamno, tumi sobhe pasot zaitem korunk xoktat. Karonn tumchea modlea zaiteank khub xokti ani takot asa. (Mho. 20:29) Tumi bhav-bhoinnank modot korunk zaitem kortat astole ani kednam sobheche sevok zatole mhunn tumi chintat astole. Punn, tumi lhan asat vo tumi zobabdari gheunk purte nant, oxem dusreank dista mhunn tumi chintunk puro. Tori astana, tumi sobhentlea bhav-bhoinnancho visvas ani resped zoddun gheunk atam pasun zaitem korunk xoktat.

2. Hea lekhant ami kitem xiktolim?

² Hea lekhant ami David Raza thaun, ani Judache Raza Asa ani Jehoshafata thaun xiktolim. Hea tin dadleanchea jivitant khoincheo oddchonneo aileo, tannim tancho koso fuddo kelo, ani tornnattea bhavamnim tanchea udharonnam thaun kitem xikonk zata tem ami polloitolim.

3. Tornnatte sobhentlea zantteank khoinchea eke vatten modot korunk xoktat?

³ David tornnatto aslo tednam, dusreank faideak poddtta tosleo kola tannem vaddoileo. Jehova sangata tachi ixttagot ghott asli dekhun, Devan nemlolea raza pasot tannem apli kola uzar keli. To Saulu Raza pasot sitar vazoitalo. (1 Sam. 16:16, 23) Tor tornnattea bhavamno, sobhentlea bhav-bhoinnank faideak poddtta tosleo kola tumchea lagim asat kai? Tumchea modlea zaiteank asat. Udharonnak, zaitea zanttea bhav-bhoinnank  aplea svotacho obheas ani mittinge pasot aplo mobile, tablet vo her electronic sadhona uzar korunk kotthin zaunk puro. Tor tumkam tea vostunchi bori zannvai asa zalear, tumi tankam modot korunk xoktat.

4. Davida bhaxen tornnattea bhavamnim kosle gunn vaddounk zai? (Masikachem fuddlem chitr polloiat.)

⁴ David tornnatto aslo tednanch to zobabdari ghetalo ani to patiepa sarko aslo. Udharonnak, to lhan piraieruch aplea bapaichea xelliancho samball korunk khub vavurtalo. Ani tem kam dhokeachem aslem. Hea vixim tannem ek pavtti Saulu Razak oxem sanglem: “Tuzo sevok aplea bapaichim menddram rakhtana kedna-i ek vag vo ek vanxel, hinddantle eke xelliek gheun vochunk lagot zalear hanv tachea fattafatt vetalom, ani tacher akromon korun mhoje xelliek porot haddtalom.” (1 Sam. 17:34, 35) Tor Davidan xelliank rakhchi apleak dil’li zobabdari borea bhaxen samball’lli ani tanchi dhiran rakhonn keli. Teach bhaxen, tornnattea bhavamnim apleak dil’lem khoinchem-i kam borea bhaxen korunk zata.

5. Stotr 25:14 pormonnem, tornnattea bhavamnim kitem korop chodd mhotvachem?

⁵ David tornnatto astananch tannem Jehova lagim ghott ixttagot keli. To apli kola vo dhiracher patieunk na. Punn taka Jehova sangata asloli ixttagot chodd mhotvachi asli. Jehova tacho fokot Dev nhoi, punn ghott ixtt zaun aslo. (Stotr 25:14 vachat.) Tor tornnattea bhavamno tumi Jehova sangata tumchi ixttagot ghott korunk mhotv ditat zalear, tumkam sobhent anik zobabdareo mellttoleo.

6. Davida vixim thodde kitem chintale?

⁶ Davidak eka oddchonnecho fuddo korcho poddlo. Ti mhunnttlear, lok taka ek lhan bhurgo ani zobabdari gheunk purto na oxem lekhtale. Udharonnak, David Goliata add zhuzonk gelo tednam, Saulun taka, “tum ozun ek bhurgo” oxem mhunnttlem. (1 Sam. 17:31-33) Ani hachea poilim, Davidachea bhavan-ui, taka to zobabdari gheunk purto na oxem mhunnttlolem. (1 Sam. 17:26-30) Punn Jehovan Davidak oxem lekhunk na. Karonn to taka borea toren vollkhotalo. Ani David pasun Jehovacher patieun ravlo dekhun to Goliatak marunk xoklo.​—1 Sam. 17:45, 48-51.

7. Tumi Davida thaun kitem xiktat?

⁷ Tumi Davida thaun kitem xiktat? Tumkam pasiens asop gorjechem. Karonn tumi vhodd zaleant mhunn lekhunk, dusreank thoddo vell lagtolo. Punn tumi bhailean koxem distat tacher Jehova dhean dina. Tachea bodlek,  tumi kallzant koxim asat ani kitem korunk xoktat tacher to dhean dita. (1 Sam. 16:7) Tor Jehova sangata tumchi ixttagot ghott korat. Davidan hench kelem. Tannem Jehovachea rochnnecher dhean dilolean to Jehova vixim xikonk pavlo ani tachea sangata apli ixttagot vaddoili. (St. 8:3, 4; 139:14; Rom. 1:20) Anik ek vixoi mhunnttlear, tumi Jehovachi modot gheunk zai. Udharonnak, tumi Jehovache Sakxi mhunn tumchea klasintlim bhurgim tumchi fokonna kortat kai? Toxem zalear, tacho fuddo korunk Jehova lagim modot magat. Tea bhair, Devachem Utor ani tachea adarit prokaxonam ani viddeo thaun melltta to sol’lo apnnaiat. Hea toren tumchea oddchonneancho fuddo korunk tumi Jehovachi modot ghetat tednam tacher tumcho bhorvonso anik vaddttolo. Ani tumi Jehovacher patietat tem polloun dusrim tumcher visvas dovrunk pavtolim.

8-9. Raza zaum porian pasiensan ravonk Davidak koxi modot zali, ani tornnattea bhavamnim tachea thaun kitem xikonk zata?

⁸ Davidak anik eka oddchonnecho fuddo korcho poddlo. Judacho raza mhunn nemlea uprant pasun taka razvottki cholounk zaitim vorsam ravchem poddlem. (1 Sam. 16:13; 2 Sam. 2:3, 4) Tea vellar taka pasiensan ravonk koxi modot zali? Niraxi zaunchea bodlek, apleachean kitem korunk zata tacher tannem dhean dilem. Udharonnak, to Filistevkaranchea vattarant pollon gelo tednam Israelachea dusmanam add zhuzonk tannem aplea vellacho boro upeog kelo. Hea toren tannem Judachea vattarachi bori rakhonn keli.​—1 Sam. 27:1-12.

⁹ Tornnattea bhavamnim Davida thaun kitem xikonk zata? Bhav-bhoinnanchi seva korunk tumkam asloleo sondheo uzar korat. Ricardo nanvachea eka tornnattea bhavachem ami atam udharonn polloum-ia. * Taka niemit pioneer mhunn seva korchi itsa asli. Punn vhoddilamnim taka thoddo temp ravonk sanglem. Hem aikon nirax zaunchea bodlek tannem apli porgottnni anik vaddoili. To mhunntta: “Tea vellar ravchem poddlem mhunn mhaka boreak poddlem. Karonn mhoji porgottnni sudharunk mhaka vell mell’llo. Amchea sondexak kan ditat tea sogleank hanv porot bhett korunk laglo ani hanv poilea pavtti ek Bible obheas gheunk laglo. Hea toren porgottnnechea kamant mhozo onnbhov vaddlo, ani mhoji bhirant unni zali.” Aiz Ricardo ek niemit pioneer ani sobhecho sevok zaun borea toren apli seva korta.

10. Ek mhotvacho nirnnoi gheunchea poilim Davidan kitem kelem?

¹⁰ Davidachea jivitant anik eka vellar kitem ghoddlem tem polloum-ia. Saulu thaun liponk David ani tache munis ek pavtti dusrea eka vattarant vochon ravle. Tea vellar, te eka zhuzak gel’le tednam dusro ek dusman ieun tanchea familicher akromonn korun tankam dhorun vhelim. Tor apunn ek boro zhuzari ani aplea familik apleachean soddounk zata mhunn David chintunk xoktalo. Punn tachea bodlek, tannem poilim Jehovachem margdorxon ghetlem. Ani Abiatar nanvachea eka iadnika udexim, tannem Jehovak vicharlem: “Hol’lo kel’leam pattlean hanv vochum?” Tednam tachean vochonk zata, ani taka ies mellttolem mhunn Jehovan khatri dili. (1 Sam. 30:7-10) Hea ghoddnne thaun tumi kitem xiktat?

11. Nirnnoi gheunchea poilim tumi kitem korunk zata?

¹¹ Nirnnoi gheunchea poilim dusreancho sol’lo gheiat. Tumchea avoi-bapai thaun ani sobhechea vhoddilam thaun pasun tumi sol’lo gheunk zata. Jehovan amkam vhoddil ‘dennem’ mhunn dilam ani tancher taka visvas  asa. (Ef. 4:8) Tumi tanchea bhavarthachi dekh gheun tancho sol’lo apnnaitat zalear tumi bore nirnnoi gheunk pavtolim. Atam ami Asa Raza thaun kitem xikonk zata tem polloum-ia.

12. Asa Razan razvottki suru keli tednam taka kosle gunn asle?

¹² Asa Raza tornnatto aslo tednam to khalto ani dhirvont aslo. Udharonnak, tacho bapui Abija melea uprant, tannem Raza zaun tea desant asloleo murteo kaddun uddounk suru kelem. Toxench, “Sorvespora, tanchea purvozanchea Devak sodunk ani tech porim tache nem kaide pallunk tannem Judak ulo marlo.” (2 Itihas 13:23-14:1-6) Ani Ethiopia desantlo Zera, Judachea add zhuzonk 10,00,000 soinikank gheun ailo tednam, Asan Jehova lagim modot magli. Tannem mhunnttlem: “Sorvespora, Tum adar ditai tedna ankdde ani boll Tuje mukhar kaich nhoi. Sorvespora amchea Deva amchea adarak pav. Tujer patieun ani Tujea Nanvan hea vorixtt porjek ami fuddo korunk vetanv.” Hea utrantlean apleak ani aplea lokank Jehova salvar kortolo mhunn Asak asloli khatri dison ieta. Ani khorench, Jehovan ‘Kushitank vo Ethiopiekarank dhanvddaile.’​—2 Itihas 14:7-11.

13. Asa sangata uprant kitem ghoddlem, ani kiteak?

¹³ Asak 10,00,000 soinikam lagim zhuz korop sompem naslem tori astana, taka zoit mell’llem. Punn uprant, Israelacho Raza Baasha, tachea add zhuzonk ailo tednam to Jehovacher patieun ravchea bodlek tannem Siriechea Razachi modot ghetli. Hi poilea poros lhan soin asli tori punn tachea hea chukichea nirnnoi-ak lagon, Asak zoit mellonk na. Provadi Hanani udexim Jehovan Asak sanglem: “Tunvem Sorvespora Devacher nhoi punn Siriechea razacher tuzo visvas thevlo dekhun Siriechea razachi fouz tujea hatantli suttun vetoli.” Tednam thaun Asa ani Israelacho Raza Baasha modem zhuzam chaluch aslim. (2 Itihas 16:7, 9; 1 Raz. 15:32) Hantuntlean ami kitem xiktat?

14. Tumi Jehovacher patietat mhunn koxim dakhounk xoktat, ani oxem kelolean 1 Timotak 4:12-nt sanglolea pormonnem kitem zatolem?

¹⁴ Sodanch Jehovacher patieun khaltim ravat. Tumi bautizm ghetlo tednam, tumkam Jehovacher kitlo bhavarth ani patienni asli ti tumi dakhoili. Ani tea vellar tumkam aplea familicho bhag korunk Jehova khuxal zalo.  Punn tumi atam pasun Jehovacher patieun ravop gorjechem. Chodd mhotvache nirnnoi ghetana tumi tacher patieun ravonk puro. Punn her nirnnoi ghetana tumi kitem kortolim? Monoronjona vixim, kamam vixim, ani jivitant tumi kitem kortolim tea vixim nirnnoi ghetana pasun Jehovacher patieun ravop gorjechem. Tor tumi tumcheach zannvaiecher patieun ravchea bodlek, Bible-antim totvam tea vixim kitem sangtat tem zannam zaun tachea adarit nirnnoi gheiat. (Mho. 3:5, 6) Tumi oxem kortat tednam Jehova khuxal zatolo, ani tumchea pasot sobhentlea bhav-bhoinnancho resped pasun vaddttolo.​—1 Timotak 4:12 vachat.

15. 2 Itihas 18:1-3; 19:2-ant sanglolea pormonnem Jehoshafat Razan kosleo chuki keleo?

¹⁵ Soglim opurnn asat dekhun thodde pavtti tumi chuki korunk puro. Punn haka lagon Jehovachi seva korunk tumi fatti soronakat. Jehoshafat Razachem udharonn polloiat. Taka zaite bore gunn asle. To tornnatto aslo tednam, tannem “Sorvesporak aplea bapaichea Devak sodlo ani Tacheo adnia pall’lleo.” Tea bhair, tannem lokank Jehova vixim xikounn diunk aplea odhikareank Judachea xaramnim dhaddle. (2 Itihas 17:4, 7) Punn thodde pavtti tannem chukiche nirnnoi pasun ghetle. Oslea eka vellar Jehovan taka aplea provadeam udexim sol’lo dilo. (2 Itihas 18:1-3; 19:2.) Hea ghoddne thaun tumi kitem xikonk zata?

16. Rajeev-achea onnbhovantlean tumi kitem xikonk zata?

¹⁶ Tumkam melltta to sol’lo manun gheun lagu korat. Zaitea tornnatteam bhaxen tumkam jivitant Jehovachea sevek poilo zago diunk ghoddie kotthin zaunk puro. Punn nirax zaum nakat. Rajeev-acho onnbhov polloum-ia. Apunn tornnatto aslo tednam kitem zalem tem to sangta: “Hanv mhojea jivitant fuddem kitem kortolo tem mhaka thodde pavtti somzonaslem. Zaitea tornnatteam bhaxen mittingent ani porgottnnent bhag gheunchea poros, khellonk ani moja korunk mhaka chodd borem distalem.” Rajeev-ak koxi modot zali? Eka vhoddilan taka sol’lo dilo. Rajeev fuddem mhunntta: “Tea vhoddilan mhaka 1 Timotak 4:8-ant aslolem totv somzailem dekhun, hanvem uprant mhojea jivitant Jehovachea sevek poilo zago diunk nirnnoi ghetlo.” Tor Rajeev-an apleak mell’llolo sol’lo apnnailolean porinnam kitem zalo? To fuddem mhunntta, “To sol’lo mellon  thoddeach vorsamnim hanv ek sobhecho sevok mhunn seva korunk pavlo.”

17. Tornnatte bhav Jehovachi seva kortat tem polloun sobhentlea zantteank koxem dista?

¹⁷ Tornnattea bhavamno, tumi “ekchitan” tanchea sangata mellon Jehovachi seva kortat mhunn sobhentlim zanttim tumcho khub valor kortat! (Zef. 3:9) Tumkam dilolem kam tumi tumchi xokti uzar korun urben kortat tem tankam avoddtta ani tim khuxal zatat.​—1 Juanv 2:14.

18. Mhonn’nneo 27:11 pormonnem, apleachi seva kortolea tornnatteam dadleam vixim Jehovak koxem bhogta?

¹⁸ Tornnattea bhavamno, Jehova tumcho mog korta ani tumcher visvas dovorta mhunn kednanch visronakat. Karonn nimannea disamnim tornnattea dadleanchem soin ap-khuxen fuddem sortolem mhunn Jehovan adim fuddench bhasailolem. (St. 110:1-3) Tumi tacho mog kortat ani tumchean zata titlea borea toren tachi seva korunk sodhtat mhunn to zannam. Punn dusreank tumcher visvas dovrunk thoddo vell lagtolo dekhun pasiens dakhoiat. Tumi chuki kortat tednam tumkam melltta to sol’lo ani xist manun gheiat ani tem Jehova thaun ieta mhunn lekhat. (Heb. 12:6) Tumkam melltta tem soglem kam borea bhaxen korat. Ani sogleam-von mhotvachem mhunnttlear, tumi kortat tea soglea kamant tumchea sorginchea Bapak khuxal korat.​—Mhonn’nneo 27:11 vachat.