1. Jehovachea lokank ghoddie koslea oddchonneancho fuddo korcho poddot?

TUMI koslea-i tori kotthin poristhiticho fuddo kortat kai? Tumkam ghoddie sobhent konnem tori dukhoilam zait. (Jak. 3:2) Vo tumi Jehovachi seva kortat mhunn tumchea kamam voilim vo iskolantlim tumchi fokonnam kortat astolim. (1 Ped. 4:3, 4) Vo mittingek vo porgottnnent vochonk tumchea familintlim tumkam addaunk proitn kortat astolim. (Mt. 10:35, 36) Tumi oslea koslea-i poristhiticho fuddo kortat zalear, Jehovachi seva korop bond kelear borem, oxem tumkam disonk puro. Punn tea vellar ti sosunk Jehova Dev tumkam zannvai ani xokti ditolo mhunn tumi khatri dovrunk zata.

2. Romkarank 15:4-ant sanglolea pormonnem, Bible vachlolean amkam koso faido zata?

² Ami Bible vachtat tednam, Jehovachea oporipurnn sevokamnim apleak aslolea kotthin poristhitincho koso fuddo kelo, tea vixim amkam vachunk melltta. Tanchea vixim Jehovan boroun dovorlolean tanchea udharonnam thaun amkam buzvonn ani bhorvonso melltta mhunn apostl Paulu sangta. (Romkarank 15:4 vachat.) Punn hem mellonk ami fokot Bible vachlear pavona. Punn ami vachtat tacho amchea chintnancher ani bhavnancher probhav poddonk diunk zai. Udharonnak, amkam eka somosiacho fuddo korunk modot zai zalear, kitem korunk xoktat? Tumi heo char vostu korunk xoktat: (1) Magnnem korat, (2) Chintat, (3) Niall korat, ani (4) Lagu korat. Ami atam Raza David ani apostl Pauluchea jivitantlea thoddea ghoddnneam vixim vachtana heo char vostu koxeo korunk zatat tem polloum-ia. *

3. Bible vach’chea poilim tumi kitem korunk zai, ani kiteak?

 ³ (1) Magnnem korat. Tumi Bible vach’chea poilim, tea vachpantlean faido melloun gheunk Jehova lagim modot magat. Udharonnak, tumkam eka somosiacho fuddo korunk modot zai zalear, Bible adarit totvam sodhunk Jehova lagim magnnem korat.—Filp. 4:6, 7; Jak. 1:5.

4. Tumi Bible-antlea eke ghoddnne vixim koxem chintunk xoktat?

⁴ (2) Chintat. Ek ghoddnni polloinastana tem monant chintchi ek bori tank Jehovan amkam dilea. Tumi Bible-ant eka munxa vixim vachtana, tumkanch tea munxachea zagear ghalun chintat. Tachea bhonvtonnim kitem ghoddtta, to vo ti kitem polloita, taka vo tika koxem bhogta astolem tem pollounk ani bhogunk proitn korat.

5. Niall korop mhunnttlear kitem, ani tumi tem koxem korunk zata?

⁵ (3) Niall korat. Niall korop mhunnttlear, ami vachtat ti mahiti anik borea toren somzon ti amchea jivitant koxi lagu korunk zata, tem chintop. Oxem kelolean ami vachtat ti mahiti amkam anik borea toren somzotolim. Ami kitem-i randtat zalear, taka lagtat teo sogleo vostu ghalun randlearuch tem jevonn ruchichem zatolem. Toxench, ami borea toren niall kelearuch ami vachtat tem amkam faideak poddttolem. Niall korunk ami he prosn amkanch vicharlear modot zaunk xokta: ‘Hanv jea konna vixim vachta, tannem apli oddchonn suttavi korunk kitem kelem? Jehovan taka koxi modot keli? Ani mhojeo oddchonneo suttaveo korunk hanv tachea thaun kitem xikonk xokta?’

6. Ami xiktat tem lagu korop kiteak gorjechem?

⁶ (4) Lagu korat. Ami xiktat tem apnnainant zalear, aplem ghor rever bandlolea eka munxa sarki ami zatolim. Zachem ghor vadoll vo buddtti ieta tednam kosllun poddtta. Tor tannem ghor bandunk ghatloli mhenot nirfoll zata mhunn Jezun sanglem. (Mt. 7:24-27) Teach bhaxen, ami magnnem korun, vachlea tea vixim chintun niall korunk puro. Punn xiklam tem ami lagu korinant zalear hem soglem nirfoll zatolem. Karonn amchea jivitant tras vo dhumallo ieta tednam amcho bhavarth halonk xokta. Punn ami xikleant tem lagu kortat zalear, ami bore nirnnoi gheunk pavtolim, amkam xanti mellttoli, ani amcho bhavarth ghott zatolo. (Iz. 48:17, 18) Atam Raza Davidachea jivitantli ek ghoddnni vachtana ami xikleant te char mud’de koxe uzar korunk zata tem polloum-ia.

7. Bible-antli khoinchi ghoddnni ami polloitolim?

⁷ Tumchea eka ixttan vo familintlea eklean tumcho ghat kela kai? Toxem zalear, David Razachea jivitant kitem ghoddlem tacher dhean dilolean tumkam faido zatolo. Tacho put Absalanvan tacho ghat kelo ani tachi razvottki aplea tabeant korunk proitn kelo.—2 Sam. 15:5-14, 31; 18:6-14.

8. Jehovachi modot mellonk tumi kitem korunk zata?

⁸ (1) Magnnem korat. Hi ghoddnni monant dovrun, tumchea lagim konnui vaitt toren vagla zalear, tea vixim tumkam koxem dista tem soglem Jehovak sangat. (St. 6:6-9) Uprant, tumkam asloli oddchonn suttavi korunk hea ghoddnne thaun totvam sodhun kaddunk Jehova lagim modot magat.

9. David ani Absalanva modem kitem zalem, tea vixim thoddea utramnim sangat.

⁹ (2) Chintat. Hi ghoddnni vachtana David Razak kitem bhogchem poddlem tea vixim chintat. Davidacho put Absalanvan lokanchim kallzam jikhunk zaitea vorsam thaun proitn kel’lo. (2 Sam. 15:7) Tor atam sondhi polloun to Isrealant bhedink dhaddun, lokamnim apnnank Raza mhunn manun gheunk tankam uksaita. Tea bhair, Davidachea laginchea ixttank ani taka sol’lo diupi Ahitofelak pasun, Raza add  vochonk uksaita. Uprant, apunn Raza mhunn ghoxnna korta, ani tea vellar ghoddie duent aslolea David Razak dhorun taka marunk proitn korta. (St. 41:1-9) Davidak hea vixim kolltta tednam to Jerusalema thaun pollon voita. Xevottak, Davidachea ani Absalanvachea soineam modem zhuz zata, Absalanvachem soin harta ani Absalanv morta.

10. David Raza kitem korunk xoktalo?

¹⁰ Uprant, hem soglem ghoddttana Davidak koxem dislem astolem tea vixim chintat. To Absalanvacho khub mog kortalo, ani taka Ahitofelacher visvas aslo. Punn tannim Davidacho ghat kelo. Tannim Davidak khub dukhoilo ani taka jivexim marunk pasun proitn kelo. Hem polloun aplim her ixttam pasun Absalanva sangata mell’lleant mhunn David chintun tancher taka aslolo visvas halonk xoktalo. Vo apleach vixim chintun aplo des soddun to polloun vochonk xoktalo. Vo to sarkoch nirax zaunk xoktalo. Punn tannem oxem kainch korunk na. Davidan aplea oddchonnecho fuddo kelo. Koso?

11. Davidan aplea oddchonnecho koso fuddo kelo?

¹¹ (3) Niall korat. Hea ghoddnne thaun tumi kitem xikonk xoktat? Tumi tumkanch ho prosn vicharunk zata, “Hea oddchonnecho fuddo korunk Davidan kitem kelem ani kitem korunk na?” Tannem bhieun, goddbodd korun ani chintinastana nirnnoi gheunk na. Vo tannem dukhi zaun vo ragar zaun dusreancher visvas dovrop bond korunk na. Tachea bodlek, tannem magnnem korun Jehovachi modot ghetli, ani aplea ixttanchi pasun modot ghetli. Tea bhair, apnnem ghetlolea nirnnoi-a pormonnem rokddench kam kelem ani Jehovacher ani aplea ixttancher visvas unno zaunk diunk na.

12. Jehovan Davidachi modot koxi keli?

¹² Jehovan Davidak koxi modot keli? Tumi thoddo sodh kelear, Davidak aplea trasancho fuddo korunk Jehovan taka xokti dili mhunn tumkam kollon ietolem. (St. 3:1-8 *) Davidan ghetlolea nirnnoi-ancher Jehovan besanv ghatlem. Ani Davidachea ixttamnim tachi rakhonn keli tednam Jehovan tankam tenko dilo.

13. Tumkam konnui dukhoita zalear tumi Davidachi dekh koxi gheunk zata? (Matev 18:15-17)

¹³ (4) Lagu korat. Tumi tumkanch vicharat, ‘Hanvem Davidachi dekh koxi gheunk zata?’ Tumkam asloli somosia suttavi korunk tumi rokddench pavl gheunk zai. Tumkam konnem tori dukhoilam zalear, tumi Matev odheai 18-ant Jezun dilolem totv apnnaunk zata. (Matev 18:15-17 vachat.) Goddbodd korun tumchea bhavnancher adarit nirnnoi gheunchea bodlek, ti oddchonn suttavi korunk zannvai ani xant mon di mhunn Jehova lagim magat. Tumchea ixttancher aslolo tumcho visvas halonk dium nakat, punn tanchi modot gheiat. (Mho. 17:17) Ani sogleam-von mhotvachem mhunnttlear, Bible-ant dil’lo sol’lo apnnaiat.—Mho. 3:5, 6.

14. Khoinchea poristhitint tumkam 2 Timotak 1:12-16; 4:6-11, 17-22 vachun urba mellonk xokta?

¹⁴ Tumi Jehovachi seva kortat mhunn tumchea famili thaun tumi virodh sostat kai? Vo tumi ravtat tea desant Jehovachem kam korunk addkoll vo bondi asa kai? Toxem zalear 2 Timotak 1:12-16 ani 4:6-11, 17-22 vachun tumkam urba mellonk xokta. * Paulun him versam bondkhonnint astana boroilolim.

15. Tumi Jehova lagim kitem magonk zata?

¹⁵ (1) Magnnem korat. Him versam vach’chea poilim tumchea somosia vixim, ani tumkam  tea vixim koxem bhogta tem Jehovak sangat. Uprant, Paulun jea toren apleo oddchonneo suttaveo keleo, tantuntlim lisanvam zannam zaun tumchi oddchonn suttavi korunk modot kor mhunn Jehova lagim magat.

16. Pauluk kitem ghoddlem?

¹⁶ (2) Chintat. Tumi Pauluchea zagear Romant bondkhonnint asat mhunn chintat. Thoim taka sankhlleamnim bandlolo. To hachea poilim pasun bondkhonnint aslo. Punn hea pavtti taka jivexim martole mhunn taka khobor asli. Tache thodde sangati taka soddun gel’le, ani to khub thoklolo.—2 Tim. 1:15.

17. Paulu kitem chintunk xoktalo?

¹⁷ Apunn Kristacho xis naslo zalear, bondkhonnint pavcho naslo, mhunn Paulu chintunk xoktalo. Vo Azientlea prantantle aple ixtt apleak soddun geleat mhunn to tancher ragar zaun aplea her ixttancher visvas dovrop bond korunk xoktalo. Punn tannem oxem kainch korunk na. Tor taka aple ixtt visvaxi ravtole ani Jehova apleak inam ditolo mhunn to kiteak patieun ravonk xoktalo?

18. Paulun aplea oddchonnecho koso fuddo kelo?

¹⁸ (3) Niall korat. Hea prosnacher niall korat: “Apleak aslolea oddchonnecho Paulun koso fuddo kelo?” Apunn mortolo mhunn taka khobor asli tori astana Jehovak mhoima haddop chodd mhotvachem mhunn tannem ugddas dovorlem, to dusreank urba di-it ravlo, ani sodanch magnnem korun Jehovacher patielo. (2 Tim. 1:3) Tache thodde ixtt taka soddun gele mhunn bejar zauchea bodlek, tache her ixtt taka koxe modot kortat tancher dhean diun tannem tancho valor kelo. (2 Tim. 3:16, 17; 4:13) Tea bhair, to Devachea Utracho obheas korit ravlo. Ani ekdom mhotvachem mhunnttlear, Jehova ani Jezu tacho mog kortat, te taka sanddche nant, ani tachea visvaxi seve pasot te taka inam ditole mhunn taka purnn khatri asli.

19. Jehovan Pauluk koxi modot keli?

¹⁹ Ek Kristanv zal’lean taka dhumallo soscho poddttoloch mhunn Jehovan Pauluk poilinch sanglolem. (Itihas 21:11-13) Punn tannem Pauluk koxi modot keli? Tannem Pauluchea magnneancho zobab dilo ani taka xokti di-it ravlo. (2 Tim. 4:17) Tea bhair, tannem kel’lea koxtti vavrak lagon taka inam mellttoloch mhunn Jehovan taka khatri dili ani tachea visvaxi ixttam udexim taka goroz ti modot dili.

20. Romkarank 8:38, 39 motint dovrun, tumi Pauluchi dekh koxi gheunk zata?

²⁰ (4) Lagu korat. Tumi tumkanch ho prosn vicharunk zata: ‘Hanvem Pauluchi dekh koxi gheunk zata?’ Ami Jehovachi seva kortat dekhun, Paulu bhaxen amkam pasun dhumallo ietolo. (Marku 10:29, 30) Punn tea vellar ami visvaxi ravtolim zalear, ami magnnem korit ravonk zai, ani Devachea Utracho sodanch obheas korunk zai. Tea bhair, tea vellar ek ekdom gorjecho vixoi mhunnttlear, ami sodanch Jehovak mhoima haddunk zai. Toxench, Jehova amkam kednanch sanddcho na ani tachea moga thaun amkam konnuch pois vhoronk xokcho na mhunn ami khatri dovrunk zata.—Romkarank 8:38, 39 vachat; Heb. 13:5, 6.

21. Aya-k ani Hector-ak aplea oddchonneancho fuddo korunk koxi modot mell’lli?

²¹ Soglea poristhitincho fuddo korunk Bible-antlim udharonnam amkam modot korunk xoktat. Udharonnak, Japan-antli Aya nanvachi ek pioneer bhoinnik jahir zagear bhienastana porgottnni korunk Jonas-achea udharonna thaun modot mell’lli mhunn ti sangta. Indonesia-ntlea Hector nanvachea eka tornnatteachi avoi-bapui Jehovachi seva korinant. Taka Ruth-achea udharonnantlean Jehova vixim xikonk ani tachi seva korunk urba mell’lli mhunn to sangta.

22. Tumi Bible-acher adarit viddeo polloitat tednam vo “Imitate Their Faith” he lekh vachtat tednam tumkam koxi modot zatoli?

 ²² Tumkam modot zata toslim Bible-antlim udharonnam khoim mellonk xoktat? Tim amkam Bible-acher adarit audio ani viddeo nattkam ani “Imitate Their Faith” hea lekhamnim mellonk xoktat. * Hem tumi pollounchea, aikonchea, vo vach’chea poilim, tantuntlea lisanvam thaun tumkam aslolea oddchonnecho fuddo korunk modot kor mhunn Jehova lagim magat. Magir, tumi tea munxachea suvater asat mhunn chintat. Hea Devachea sevokamnim kitem kelem ani tanchi somosia suttavi korunk Jehovan tankam koxi modot keli, tacher niall korat. Uprant, tantuntlim lisanvam tumchea jivitant lagu korat. Jehovachea modoti pasot upkar attoiat, ani herank urba ani tenko diunk veg-veglleo vatto sodhun hem upkariponn dakhoiat.

23. Izaias 41:10, 13 pormonnem, Jehova amkam kitem khatri dita?

²³ Soitanachea sonvsarant amkam jievop sompem na, ani kitem korchem tem amkam thodde pavtti kollona. (2 Tim. 3:1) Punn amkam uskeunchi vo bhieunchi goroz na. Karonn ami khoinchea poristhiticho fuddo kortat tem Jehova boro zannam. Ani amkam modotichi goroz asa tednam Jehova amchea uzvea hatak ghott dhortolo mhunn amkam khatri dita. (Izaias 41:10, 13 vachat.) Kosle-i oddchonnecho fuddo korunk Jehova amkam tenko ditolo ani Bible-a udexim goroz ti xokti ditolo mhunn ami purnn khatri dovrunk zata.