Him versam voilea-voir vachlear amchea monant ho prosn ieunk xokta. Punn him versam bariksannen vachlear, Mephibosheth vo Meribbaal nanvache don munis asle mhunn amkam kollon ieta. Tea bhair, hea ghoddnnentlean ami khoinchem mhotvachem lisanv xikonk zata, tem ami polloum-ia.

Israelachea Raza Sauluk sat put ani don dhuvo asleo. Tacho poilo put, Jonathanak zolmololea putache nanv Meribbaal aslem. Toxench, Saulun dovorloli bail, Rizpa thaun zolmololea putachem nanv pasun Meribbaal aslem. Tor Raza Sauluchea putachem nanv, ani tachea eka natvachem nanv pasun Meribbaal aslem.

Eka vellar Raza Saulu Gibeonitkarancho itlo dves korunk laglo ki to tankam sogleank jivexim marunk sodhtalo. Ani ghoddie tannem zaitea Gibeonitkarank jivexim pasun marle. Punn hem korop sarkem naslem. Karonn Joshuachea disamnim, Israelitkarachea fuddariamnim Gibeonitkaram sangata xanticho korar kelʼlo.—Josh. 9:3-27.

Ho korar Raza Sauluchea tempar pasun lagu aslo. Punn tea korara add vochon tannem soglea Gibeonitkarank jivexim marunk proitn kelo. Hea karonnak lagun “Saul ani tachem ghorannem guneanvkar” zalem. (2 Sam. 21:1) Uprant, David raza zalo tednam urlolea Gibeonitkaramnim, Saulun kelʼlea guneava vixim taka sanglem. Tednam desa voilem Jehovan aplem besanv kaddina zaunk, tannem koxem farikponn diunk zata mhunn Davidan Gibeonitkarank vicharlem. Tea vellar, Gibeonitkaramnim poixe magchea bodlek, Davida lagim, tankam ‘nattak korunk manddnnio ievjitolea’ Sauluchea sat putank jivexim marunk tanchea adin korunk sanglem. (Lok. 35:30, 31) Ani Davidan toxench kelem.—2 Sam. 21:2-6.

Tednam meren, Saulu ani Jonathan eka zhuzant moron gelʼle. Punn Jonathanacho put, Meribbaal jivo aslo. Bhurgeponnar zalʼlea eka opghatak lagon to opong zalo. Ani tacho azo, Sauluchea vaitt kamant tannem vantto gheunk naslo. Toxench, Davidan Jonathana sangata ixttagot kelʼli, ani tachea ani tache pinddke sangata xanticho korar kelʼlo, zo Meribbaalak pasun lagu zatalo. (1 Sam. 18:1; 20:42) Taka lagon, Bible oxem sangta: “Apnnem ani Jonathanan kelʼle bhasavnnecho ugddas monant haddun, Davidan Jonathanachea puta ani Sauluchea natva Meribbaalacho jiv rakhlo.”—2 Sam. 21:7.

Tor Davidan Gibeonitkaranchem aikon Sauluchea dog putank, zantuntlea ekleachem nanv Meribbaal aslem, ani Sauluchea panch natvank tanchea adin kele. (2 Sam. 21:8, 9) Oxem kelolean Israelachem ghorannem anik guneavkari uronk na.

Hea ghoddnnentlean amkam anik ek vixoi kollon ieta. Devachea kaideant spoxtt ritin sanglolem: ‘Avoi-bapain vaitt adarlam tea vixim bhurgeank moronn favo zaum nozo.’ (D.S. 24:16) Tor Sauluchea don putamnim ani tachea panch natvamnim kainch korunk naslem zalear Jehova tankam moronk diuncho naslo. Punn Saulu soglea Gibeonitkarank jivexim marunk sodhtalo tednam chodd korun tannim pasun Sauluk hea kamant tenko dilʼlo astolo. Karonn to kaido fuddem oxem mhunntta: “Zonn-eklean adarlam takach moronn favo.” Tor tankam tanchea guneanvanchem farikponn mellʼllem.

Hea ghoddnnentlean ami ek mhotvachem lisanv xikonk zata. Konnui dusreachem aikon vaitt korta zalear tannem apunn guneanvkari na vo apunn fokot suchounneo pallttalo mhunn sangon nimitam diunk zainant. Karonn hea vixim Mhonnʼnneo 4:26 sangta: “Tujea panvlanchi dixa soroll zaum Ani tuje roste thir asum.”—Mho. 4:24-27; Ef. 5:15.