1. Avoi-bapui aplea bhurgeank kitem korunk modot korunk sodhtat?

 AVOI-BAPAIMNO, tumchea bhurgeank Jehovachi vollokh diunk ani tacho mog korunk tumi modot korunk sodhtat mhunn ami zannant. Punn ami Devak pollounk xokonant. Tor tumi tumchea bhurgeank Jehovachea gunnam vixim xikounk, ani taka anik lagim soronk koxi modot korunk zata?—Jak. 4:8.

2. Avoi-bapaimnim aplea bhurgeank Jehovachea gunnam vixim koxem xikounk zata?

² Oxem korunk, ek mukhel vatt mhunnttlear, tanchea sangata Bible obheas korop. (2 Tim. 3:14-17) Punn Bible-ant, bhurgeank Jehova vixim xikounk anik ek vatte vixim amkam kollon ieta. Mhonnʼnneo pustokant, eka bapain aplea putak, rochnne udexim to xiklolo Jehovache gunn kednanch visronaka mhunn sanglem. (Mho. 3:19-21) Tor avoi-bapaimnim aplea bhurgeank Jehovachea gunnam vixim xikounk uzar korunk zatat teo thoddeo vatto ami polloum-ia.

3. Avoi-bapaimnim aplea bhurgeank koxi modot korunk zata?

³ Bible-ant Deva vixim sanglam: “Polleunk zainant te Tache gunn . . . sonvsar rochla te meren rochlolea vostum vorvim gineanachea dolleank nivoll dixtti poddtat.” (Rom. 1:20) Avoi-bapaimno, tumkam tumchea bhurgeam sangata bhonvonk avoddtta astolem. Ho vell uzar korun, Jehovan “rochlolea vostum” thaun tache sobit gunn koxe dison ietat, tem zannam zaunk tankam modot korat. Tor Jezun rochnna uzar korun koxem xikoilem, ani avoi-bapaimnim tachi dekh koxi gheunk zata tem ami polloitolim.

4. Jezun aplea xisank rochnna uzar korun koxem xikoilem? (Lukas 12:24, 27-30)

 ⁴ Eka vellar, Jezun aplea xisank kavlleancher ani xetant aslolea ranantlea fulancher nodor marunk sanglem. (Lukas 12:24, 27-30 vachat.) Jezu anik khoinchea-i zonvara vo zhadda vixim ulounk xoktalo. Punn tache xis ekdom bore bhaxen zannam asle, tea suknnea ani fula vixim to uloilo. Karonn tachea xisamnim, kavlle ani ranantlim fulam zaite pavtti polloilʼlim astolim. Tor Jezu ti rochnna uzar korun koso uloilo tea vixim chintat. To te rochnne vixim uloilo ani uprant Jehova kitlo udar kallzacho ani doiall hea vixim tannem xisank ek mhotvachem lisanv xikoilem. Jea toren Jehova kavlleank jevonn dita ani ranantlea fulank nhesoita, teach bhaxen, to tachea visvaxi sevokancheo-i gorzo purnn kortolo mhunn tannem xikoilem.

5. Avoi-bapaimnim rochnna uzar korun Jehova vixim aplea bhurgeank koxem xikounk zata?

⁵ Avoi-bapaimno, tumchea bhurgeank xikoitana tumi Jezuchi dekh koxi gheunk zata? Jehovan jem kitem rochlam tantuntlem tumkam kitem chodd avoddtta tem tumi tankam sangonk zata. Zoxem, tumkam khoinchem zonvar vo zhadd chodd avoddtta tem tankam sangat. Oxem kortana, tantuntlean Jehova vixim kitem xikonk melltta, tem-ui tankam somzaiat. Uprant, tankam khoinchem zonvar vo zhadd chodd avoddtta tem vicharat. Tumchea bhurgeank avoddtta tea rochnne vixim tumi tanchea lagim uloitolim tednam, tim ghoddie tumchem anikui dhean diun aikotolim ani Jehovachea gunnam vixim xikonk pavtolim.

6. Bhav Christopher-achea avoichea udharonnantlean ami kitem xikonk zata?

⁶ Aplea bhurgeank Jehova vixim xikounk, avoi-bapaimnim tim ulounk sodhtat tea zhadda vo zonvara vixim zaito sodh korunk zai kai? Oxem korunkuch zai oxem na. Jezun pasun aplea xisank kavlle koxe khatat vo ranantlim fulam koxim vaddttat, tea vixim ek lamb bhaxonn diunk na. Tumchea bhurgeank Jehovache rochnne vixim bariksannechi mahiti xikonk avoddtta zalear pasun, tumi tankam tea vixim thoddench kitem sanglear vo ek lhanso prosn vicharlear tim to mudʼdo somzonk pavtolim. Christopher nanvacho ek bhav aplea bhurgeponna vixim oxem sangta: “Amchea bhonvtonnim aslolea rochnnechi tokhnnai korunk, amchi avoi amkam ek lhanso mudʼdo sangtali. Udharonnak, ami dongra lagim astalim tednam ti oxem kitem tori mhunnttali: ‘Ho dongor kitlo vhoddlo ani sobit asa. Tor Jehova kitlo vorto astolo nhoi.’ Vo ami doria deger astana ti oxem kitem tori mhunnttali: ‘Tea lharank kitli xokti asa, tor Devak kitli xokti astoli nhoi!’ Him utram khub sadim aslim. Tori astana, ti amkam chintunk laitat toslim aslim.”

7. Rochnne vixim chintunk tumi tumchea bhurgeank koxem proxikxonn diunk zata?

⁷ Tumchim bhurgim vaddttat toxim, rochnne vixim chintunk ani tea udexim Jehova vixim xikonk, tumi tankam proxikxonn diunk xoktat. Oxem korunk, Jehovan rochlolea khoinchea-i eke rochnne vixim uloun tumi tankam vicharunk zata: “Hantuntlean tuka Jehova vixim kitem xikonk melltta?” Tancho zobab aikon, ghoddie tumi ojap zatolim.—Mt. 21:16.

8. “Rostear choltana” Israelitkar avoi-bapui tanchea bhurgeank koxim xikounk xoktalim?

⁸ Israelitkar avoi-bapaimnim tanchea bhurgeank ‘ghora bhair astana [“rostear choltana,” NW]’ Jehovachea kaideam vixim xikounk zai aslem. (D.S. 11:19)  Oxem korunk, Israelitkar familink zaiteo sondhi mellttaleo. Karonn Israelant zaite roste asle ani thoim veg-vegllim zonvaram, suknnim ani fulam distalim. Tor avoi-bapaimno, tumi pasun chodd korun osleo sondhi uzar korun tumchea bhurgeank Jehova vixim xikounk zata. Thoddea avoi-bapaimnim hem koxem kelam tem atam polloum-ia.

9. Punitha ani Katya thaun tumi kitem xiktat?

⁹ Bharotantlea eka vhoddlea xarant ravpi, Punitha nanvachi ek avoi oxem sangta: “Ami amchea ghorcheank mellonk ganvant voitat tednam, amchea bhurgeank Jehovachea sobit rochnne vixim xikounk hi sondhi ami uzar kortat. Amchim bhurgim xarantlea bovalla thaun ani gorde thaun pois astat tednam, tim Jehovache rochnne vixim anik bore toren xikonk pavtat oxem mhaka dista.” Toxench Moldova-nt ravpi, Katya nanvachi bhoinn oxem mhunntta: “Hanv lhan aslem tednam, mhojea avoi-bapai sangata hanvem ganvant sarlolo vell, mhaka azun poriant ugddas asa. Tannim mhaka vell kaddun Jehovachi rochnna pollounk, ani tantuntlean tache vixim xikonk modot keli mhunn hanv tanche khub upkari.” Tor avoi-bapaimno, tumi tumchea bhurgeam sangata eka sobit zagear sartat to vell tim chodd korun kednanch visorchimnant mhunn ugddas dovrat.

10. Avoi-bapaink xara bhair vochonk kotthin zata zalear, tannim kitem korunk zata? (“ Avoi-bapaim Pasot Modot,” hem boks polloiat.)

¹⁰ Punn xara bhair vochonk kotthin zata zalear, avoi-bapaimnim kitem korunk zata? Bharotant ravpi Amol oxem sangta: “Hanv ravtam tea zagear, avoi-bapaink khub voram kam korchem poddtta ani ganvant vochonk khub khorch zata. Punn eka lhan garden-ant vo terrace-ar ravon, ami rochnna pollounk xoktat ani Jehovachea gunnam vixim ulounk xoktat.” Tumi bariksannen polloilem zalear, tumchea ghora bhonvtonninch tumkam osli zaiti rochnna mellttoli, ji uzar korun tumi tumchea bhurgeam lagim ulounk xoktat. (St. 104:24) Tumkam ghoddie suknnim, kidde, zhaddam ani anikui zaiti rochnna disot. Germany-nt ravpi bhoinn Karina sangta: “Mhojea mummy-k fulam khub avoddttat. Tor hanv lhan astana ami pasoiek voitalim tednam, mhoji mummy mhaka sobit fulam dakhoitali.” Avoi-bapaimno, tumchea bhurgeank rochnne vixim xikounk, songottnnen toiar kelʼle zaite video ani prokaxonam pasun tumi uzar korunk xoktat. Tumchi poristhiti kitem-i asum vo tumi khoinsorui ravom, rochnnecher dhean diunk tumi tumchea bhurgeank modot korunk xoktat. Oxem  kortana, tumi Jehovachea khoinchea gunnam vixim ulounk zata tem fuddem polloum-ia.

11. Jehova kitlo mogall tem somzonk avoi-bapaimnim aplea bhurgeank koxi modot korunk zata?

¹¹ Zaitim zonvaram mogall toren aplea poranchi kallji koxi ghetat tem dakhoun, tumi tumchea bhurgeank Jehova kitlo mogall tem somzaunk zata. (Mt. 23:37) Tea bhair, amkam khuxal kortat te veg-veglle torechea rochnnecher tumi dhean diunk zata. Ami poilim uloilʼlim ti bhoinn Karina oxem sangta: “Pasoiek voitana fulam dixtti poddttalim thoim thambon, dor ek ful koxe toren vegllem asa ani tachea sobitkaientlean Jehovacho mog koso dison ieta tacher dhean diunk mummy mhaka urba ditali. Zaitea vorsam uprant, aiz pasun hanv bariksannen fulancher dhean ditam. Ani dor ek ful ani tacho rong, dusrea fulam poros vegllo koso asa tem hanv polloitam. Hea toren, Jehova amcho kitlo mog korta tem sodanch ugddas dovrunk mhaka modot zata.”

12. Jehovak kitli zannvai asa tem somzonk avoi-bapaimnim aplea bhurgeank koxi modot korunk zata? (Stotr 139:14) (Chitr pasun polloiat.)

¹² Jehovak amche poros ekdom chodd zannvai asa. (Rom. 11:33) Hem somzonk avoi-bapaimnim tanchea bhurgeank koxi modot korunk zata? Udkacho baf zaun kupam koxim toiar zatat, ani uprant tim kupam sompeponnim eka zagear thaun dusrea zagear koxim voitat, tem avoi-bapaimnim aplea bhurgeank sangonk zata. (Job 38:36, 37, NW) Toxench, Jehova Devan munxachi kudd ojapache ritin koxi toiar kelea, tea vixim avoi-bapaimnim tanchea bhurgeam lagim ulounk zata. (Stotr 139:14 vachat.) Oxench, Vladimir nanvachea eka bapain kelem. To mhunntta: “Ek dis mhozo put cycle gheun poddlo, ani taka mar laglo. Punn thoddea disamnim tacho ghavo peklo. Tea vellar hanvem ani mhojea bailen, Jehovan amchi kudd apxinch pekonk koxi rochlea tem taka somzailem. Punn munxamnim kelʼli khoinchich vost apxinch sarki zaina, zoxem opghat ghoddlea uprant ek gaddi apunnuch sarki zaina mhunn ami taka sanglem. Tor hantuntlean, Jehovak kitli zannvai asa tem somzonk amchea putak modot zali.”

13. Jehovak kitli xokti asa tem zannam zaunk avoi-bapaimnim aplea bhurgeank koxi modot korunk zata? (Izaias 40:26)

¹³ Jehova amkam, dolle voir ubarun mollbak pollounk, ani to apli xokti uzar korun soglea noketrank koxe toren zagear dovorta tacher dhean diunk urba dita. (Izaias 40:26 vachat.) Tumi pasun tumchea bhurgeank mollbak polloun, tim jem polloitat tea vixim chintunk urba diunk zata.  Taiwan-ant ravpi bhoinn Tingting, aplea bhurgeponnacho ugddas korun oxem mhunntta: “Ek dis mhojea mummy-n mhaka xara thaun pois aslolea eka zagear vhelem. Thoim ami tombunt ravlim, ani ratchea vellar mollbantlim noketram polloilim. Tea vellar mhoji poristhiti oxi asli, ki mhaka ixttam koddlean khub dobhav aslo. Ani hanv Jehovak visvaxi ravonk xoktolem kai na, mhunn mhaka usko zalʼlo. Punn Jehovan rochlolea noketrancher dhean diun, taka kitli xokti asa tea vixim chintunk mummy-n mhaka urba dili. Ani hich xokti uzar korun, to mhaka pasun kosle-i oddchonnecho fuddo korunk modot korunk xokta mhunn tinnem mhaka ugddas dovrunk sanglem. Tea bhonvdde vellar, noketram polloun Jehovak anik bore toren vollkhonk, ani tachi seva korunk mhozo nichov hanv ghott korunk pavlem.”

14. Avoi-bapaimnim rochnna uzar korun, Jehova ek khuxal Dev mhunn zannam zaunk aplea bhurgeank koxi modot korunk zata?

¹⁴ Jehovache rochnne thaun, to ek khuxal Dev, ani ami pasun khuxal aslolim taka zai mhunn kollon ieta. Choddxim zonvaram, toxench suknnim ani nustim pasun khellttat mhunn vidneanikamnim polloilam. (Job 40:20) Zonvaram khellttat tem polloun tumchea bhurgeank kednam-i hansonk ailam kai? Ghoddie mazrachem pil doriek dhorun khelltta, vo sunneache pette eka-meka lagim khellttat tem polloun tumchea bhurgeank hansonk ailam astolem. Tor hea fuddem khoinchem-i zonvar khelltta tem polloun tumchea bhurgeank hansonk ieta tednam, ami eka khuxal Devachi seva kortat mhunn tankam ugddas korat.—1 Tim. 1:11, NW.

15. Bhurgeanchea kallzant kitem asa tem zannam zaunk avoi-bapaink koxi modot zaunk xokta? (Mhonnʼnneo 20:5) (Chitr pasun polloiat.)

¹⁵ Bhurgeamnim aplea oddchonneam vixim ukteponnim ulounk tankam koxi modot korchi, tem thodde pavtti avoi-bapaink somzona. Tumchi poristhiti oxich asa zalear, tumchea bhurgeanchea kallzant kitem asa tem zannam zaunk proitn korat. (Mhonnʼnneo 20:5 vachat.) Thoddea avoi-bapaimnim aplea bhurgeank rochnna pollounk melltta thoim vhelolean, tanchea bhurgeank ukteponnim ulounk sompem zalam. Hachem ek karonn mhunnttlear, bhair astana, avoi-bapui toxench bhurgim eka-meka sangata bore toren ulounk pavtat. Karonn thoim dhean  haloitat tosleo vostu asonant. Taiwan-ant ravpi Masahiko nanvacho ek bapui, hachem anik ek karonn sangta. To mhunntta: “Ami amchea bhurgeam sangata ghora bhair astana, zoxem dongrar choddttat tednam, vo doria deger choltana, tim chodd korun susegad astat. Tor hea vellar, tanchea kallzant kitem asa tea vixim tanche lagim ulounk amkam sompem zata.” Ami poilim uloilʼlim ti bhoinn Katya sangta: “Iskola uprant, mummy mhaka eka sobit garden-ant vhortali. Ani tea xant zagear, iskolant kitem ghoddlem vo mhaka kosle uske asat, tea vixim mummy-k sangonk mhaka sompem zatalem.”

16. Jehovan rochloleo vostu polloitana familimnim mojen koso vell sarunk zata?

¹⁶ Avoi-bapui aplea bhurgeam sangata Jehovan rochloleo vostu polloun khuxal zatat tednam, tannim sangata mellon mojen vell sarunk zata. Oxem kelolean, tanchea familicho sombond anikui ghott zaunk pavta. Bible-ant pasun ‘hansonk ani nachonk ek vell asa’ mhunn sanglam. (Up. 3:1, 4) Jehovan hea prithumer sobit zage rochleat, zoim ami amkam avoddtta tea toren amcho vell sarunk zata. Zaitea familink, ganvamnim, dongrancher, zhorincher, vo doria deger vell sarunk avoddtta. Thoddea bhurgeank garden-ant dhanvonk ani khellonk, zonvarank pollounk, vo nodint, tolleant vo doriant penvonk khub avoddtta. Tor Jehovan rochloleo vostu polloun khuxal zaunk amkam zaiteo sondhi asat!

17. Avoi-bapaimnim tanchea bhurgeank rochnna polloun khuxal zaunk kiteak modot korunk zai?

¹⁷ Devachea novea sonvsarant, avoi-bapui toxench bhurgim, rochnna polloun atam poros anikui chodd khuxal zaunk pavtolim. Karonn tea vellar, munxam toxinch zonvaram eka-mekak bhieunchim nant. (Iz. 11:6-9) Ani ami sasnak Jehovachi rochnna polloun sontosbhorit zaunk pavtolim. (St. 22:26) Punn avoi-bapaimno, toxem korunk to vell ieta mhunnosor ravom nakat. Atanch thaun rochnna uzar korun tumchea bhurgeank xikoiat. Oxem kelear, tim Raza Davida bhaxen, Jehova vixim oxem mhunnonk pavtolim: “Tujim kortutvam sor-naxilʼlim!”—St. 86:8.