OBHEASACHO LEKH 10
Tumi Bautizm Kiteak Gheunk Zai?
“Dor eklean . . . bautizm gheuncho.”—ITIHAS 2:38.
GIT 34 Walking in Integrity
KITEM XIKTOLIM a
1-2. Bautizmachea vellar choddxe pavtti kitem zata, ani hea lekhant ami kitem polloitolim?
BAUTIZMACHE umedvar ube ravon tankam vicharlolea don prosnank vhodd tallean, ‘Hoi!’ mhunn zobab ditat tem tumi kednam tori aikolam kai? Tea vellar, tanchim familintlim ani ixttam ekdom khuxal zatat. Ani uprant, bautizm ghetat tim udkantlean bhair sortat tednam soglim talleo martat, ani bautizm ghetla tim sontosbhorit zaleant tem tumi polloitat. Dor sumanak, sumar hozaramnim lok Jehovak aplem jivit somorponn korun bautizm gheta.
2 Tumche vixim kitem? Tumi bautizm gheunk chintʼtat zalear, hea noxttea sonvsarant tumi khub khas zaun asat. Karonn tumi ‘Devak sodhtat.ʼ (St. 14:1, 2) Tor tumi tornnattim vo zannttim asum, ho lekh tumchea pasot boroila. Ami bautizm ghetla zalear pasun, Jehovachi seva korit ravonk ami amcho nichov ghott korunk sodhtat. Jehovachi seva korunk amkam zaitim karonnam asat. Tantuntlim tin karonnam ami hea lekhant polloitolim.
TUMI SOTACHO ANI NITIVONTPONNACHO MOG KORTAT
Soitanan hozaramnim vorsam thaun Jehovachem nanv piddʼddear kelam ani aiz porian to toxem korit asa (Peregraf 3-4 polloiat)
3. Jehovacho lok sotacho ani nitivontponnacho mog kiteak kortat? (Stotr 19:8; 119:163)
3 Jehovan aplea lokank ‘sotacho mogʼ korunk adnea dilea. (Zek. 8:19) Toxench, Jezun pasun aplea pattlavdarank nitivontponn sodhunk urba dili. (Mt. 5:6) Hacho orth, Jehovachea nodren sarkem, nitoll ani borem asa tem korunk amkam kallzantlean itsa asonk zai. Tumi pasun fotti ani vaittacho dves korun, sotacho ani nitivontponnacho mog kortat mhunn kainch dubhav na. (Stotr 19:8; 119:163 vachat.) Karonn fott uloita to munis hea sonvsaracho odhikari Soitanachi dekh gheta. (Ju. 8:44; 12:31) Ani Jehova Devachem povitr nanv piddʼddear korop Soitanacho mukhel dhei zaun asa. Dekhun Adanv ani Eve Jehovachea add gelʼlim tednam thaun, Soitan Jehova vixim fotti sangot asa. Jehova svarthi ani munxank borem tem diunk sodhina toslo ek fottkiro odhikari zaun asa, oxem Soitanan munxanchea monant ghalunk proitn kela. (Ut. 3:1, 4, 5) Ani aiz meren to oxem korit asa. Tor munxam ‘sotacho mog’ korinant tednam, sogle torecheo onitivont ani noxtteo vostu korunk Soitan tancher probhav ghalunk xokta.—Rom. 1:25-31.
4. Jehova ek “sotacho Dev” mhunn ami kiteak mhunnonk zata? (Chitr pasun polloiat.)
4 Jehova ek “sotacho Dev.” (St. 31:5, NW) Oxem ami kiteak mhunnonk zata? Karonn apleacho mog kortoleank to udarponnan sot xikoita. Tea udexim, tim Soitanacheo fotti aikon fosonant. Toxench, Jehova tankam promannikponnan ani nitin cholonk xikoita. Hea vorvim tankam monachi xanti ani resped melltta. (Mho. 13:5, 6) Tumi Bible xikonk laglim tednam thaun tumi pasun hem onubhovlam astolem. Ani Jehovache vatten cholʼlolean tumkam ani soglea munxakullak faideak poddtta mhunn tumkam khatri zalea astoli. (St. 77:13) Tor atam tumi kitem kortolim? Jehovache nitiche vatten cholonk tumi fuddem sortolim. (Mt. 6:33) Toxench, dusreank sot kollounk ani Soitanan Jehova vixim sanglam tem fott mhunn dakhoun diunk tumi proitn kortolim. Punn hem tumi koxem korunk xoktat?
5. Tumi sotacho ani nitivontponnacho mog kortat mhunn koxem dakhounk zata?
5 Tumi tumchem jivit oxe toren jieunk zata jea vorvim tumi Soitanacheo fotti nakartat, ani sotak tenko ditat mhunn spoxtt dison ieta. Toxench, tumi Jehovak tumcho Raza mhunn manun ghetat, ani to sarkem mhunn sangta tench korunk sodhtat mhunn tumi dakhounk zata. Oxem korunk, tumi Jehova lagim magnnem korun sodankal tachi seva korunk toiar asat mhunn taka bhas diunk zata, ani tumi Jehovak ti bhas dilea mhunn dakhounk bautizm gheunk zata. Tor tumi sotacho ani nitivontponnacho mog kortat zalear, tumi bautizm gheunk fattim sorchimnant.
TUMI JEZU KRISTACHO MOG KORTAT
6. Stotr 45:4-ant, Jezucho mog korunk amkam koslim karonnam mellttat?
6 Tumi Jezu Kristacho mog kiteak kortat? Tumi Stotr 45:4-ant dilʼlea thoddea borea karonnancher dhean diunk zata. (Vachat. b) Thoim sanglam ki Jezu sot, nitivontponn ani khaltikaiecho mog korta. Tumi sot ani nitivontponnacho mog kortat zalear, tumi Jezucho pasun mog kortolim. Jezu sot ani nitivontponna pasot dhiran koso zhuzlo tea vixim chintat. (Ju. 18:37) Punn tannem khalti asonk koxem xikoilem?
7. Jezuche khaltikaie vixim tumkam kitem chodd avoddtta?
7 Jezu aplea udharonnantlean amkam khaltim ravonk xikoita. Zoxem, tannem kednanch apleak nhoi, punn sodanch tachea Bapak mhoima dili. (Mk. 10:17, 18; Ju. 5:19) Tor Jezuche khaltikaie vixim tumkam koxem dista? Jezucho mog korunk ani tachi dekh gheunk tumi fuddem sortat nhoi! Punn Jezu kiteak khalti asa? Karonn khalti aslolea aplea Bapaicho to mog korta ani tachi dekh gheta. (St. 18:35; Heb. 1:3) Tor ekdom purnn toren aplea Bapaichea gunnanchi dekh gheta tea Jezu pasot tumcho mog anikui vaddtta nhoi?
8. Amchea Raza Jezucho ami kiteak mog kortat?
8 Toxench, Jezu boreantlo-boro Raza zaun asa dekhun ami tacho mog kortat. Jehovan svota zaun Jezuk proxikxonn dilam ani taka raz cholounk nemla. (Iz. 50:4, 5, NW) Tea bhair, Jezun amche pasot aplo jiv diun amkam svarth naslolo mog dakhoila. (Ju. 13:1) Amchea Raza Jezuk amcho mog favo asa. Tor ami ho mog koso dakhounk zata? Jezun sanglem ki aplo khoreponnim mog kortat tim apleo adnea pallttat ani tankanch to aplim ixttam mhunntta. (Ju. 14:15; 15:14, 15) Tor Jehovachea Putachim ixttam zaunk amkam kitlo vhoddlo sueog asa nhoi!
9. Jezucho bautizm ani tachea pattlavdarancho bautizm eksarko koso asa?
9 Jezun aplea pattlavdarank bautizm gheunk adnea dili. (Mt. 28:19, 20) Ani tannem svota ek udharonn dovorlem. Jezucho bautizm ani tachea pattlavdarancho bautizm vegllo asa tem khorem. (“ Jezucho Bautizm Ani Tachea Pattlavdaranchea Bautizma Modem Kitem Ontor Asa?” hem boks polloiat.) Punn thoddea vattamnim tancho bautizm eksarko asa. Zoxem, Jezun bautizm ghetlo tednam, tannem Devachi khuxi korunk aplem jivit bhettoilam mhunn dakhoun dilem. (Heb. 10:7) Teach bhaxen, aiz Jezuche xis bautizm ghetat tednam, tannim aplem jivit Jehova Devak somorponn kelam mhunn tim dakhoun ditat. Hacho orth, tim aplea jivitant svotachi khuxi nhoi, punn Jehovachi khuxi poilea zagear dovortat ani Jezuchi dekh ghetat mhunn dakhoun ditat.
10. Tumi koslea karonnank lagon Jezucho mog kortat, ani ho mog tumkam kitem korunk fuddem kaddttolo?
10 Jezu, Jehovacho opurbaiecho Put mhunn tumi manun ghetlam, ani Jehovan taka amcher raj cholounk nemla mhunn tumi khuxal asat. Toxench, Jezu khalti asa ani to purnn toren aplea Bapaichi dekh gheta mhunn tumi zannant. To hea prithumer aslo tednam tannem bhukelʼleank jevonn dilem, niraxi zaloleank bhuzvonn dili, ani duentank borim kelim mhunn tumi xikleant. (Mt. 14:14-21) Tea bhair, to aiz sobhek koso margdorxon dita tem tumi polloilam. (Mt. 23:10) Ani Devachea Rajeacho Raza zaun to fuddarak anikui boreo vostu kortolo mhunn tumkam khatri asa. Tor Jezuchi dekh gheun, tumi tacho mog kortat mhunn dakhounk zata. (Ju. 14:21) Ani oxem korunk tumi gheunk zata tem poilem panvl mhunnttlear, tumchem jivit Jehovak somorponn korun bautizm ghevop.
TUMI JEHOVACHO MOG KORTAT
11. Bautizm gheunk sogleam-von mhotvachem karonn kitem, ani kiteak?
11 Bautizm gheunk sogleam-von mhotvachem karonn kitem? Devache sogleant vhoddle adnea vixim sangtana, Jezun kitem mhunnttlem tacher dhean diat. Tannem mhunnttlem: “Tunvem tuzo Dev Jehovacho tujea soglea kallzan, tujea soglea jivan, tujea soglea monan ani tujea soglea bollan mog korunk zai.” (Mk. 12:30) Tumi oxech toren Jehovacho mog kortat kai?
Amkam aiz meren khuxal kortat ani fuddarak khuxal kortoleo teo sogleo boreo vostu Jehova thaun mellttat (Peregraf 12-13 polloiat)
12. Tumi Jehovacho mog kiteak kortat? (Chitr pasun polloiat.)
12 Jehovacho mog korunk amkam zaitim karonnam asat. Udharonnak, to amchea “jivitachi zhor” zaun asa ani “borem asa titlem, ek-ek sopurnn vordan” tachea thaun melltta mhunn amkam kollon ailam. (St. 36:9; Jak. 1:17) Tor amkam khuxal korta ti dor ek vost, amcho mogall ani udar kallzacho Dev Jehovan amkam dilea.
13. Soddvonn sogleam-von moladik dennem kiteak zaun asa?
13 Jehovan amkam dilʼlem sogleam-von moladik dennem mhunnttlear, soddvonn. Oxem ami kiteak mhunnonk zata? Jehova ani Jezu modem aslolea natea vixim chintat. Tea vixim Jezun oxem mhunnttlem: “Bap mhozo mog korta” ani “hanv Bapacho mog kortam.” (Ju. 10:17; 14:31) Ani itlim-i vorsam meren, tanchea modem aslolem natem anikui ghott zalam. (Mho. 8:22, 23, 30) Tor Jehovan aplea Putak hea prithumer munxakulla pasot moronk dhaddlo tednam, taka sosunk poddle te tras polloun Jehovak kitlem dukh zalem tea vixim chintat. Jehovan oxem kiteak zaunk dilem? To soglea munxakullacho ani tumcho pasun khub mog korta dekhun, tumkam toxench herank, sasnak jieunchi sondhi mellonk, to aplea ekleach Putak bolidan korunk toiar zalo. (Ju. 3:16; Gal. 2:20) Khorench, Jehovacho mog korunk hache poros vortem anik koslench karonn na!
14. Ami amchea jivitant dovrunk xoktat to sogleam-von boro dhei khoincho?
14 Ami Jehova vixim xiktat toxim, tache pasot amcho mog vaddtta. Hea pasot atam, toxench sasnak, ami tachea sangata amchi ixttagot anikui ghott korunk sodhtat, hantunt kainch dubhav na. Ani ami oxem korunk xoktat! Tachem kalliz khuxal korunk Jehova amkam mogan urba dita. (Mho. 23:15, 16) Ani hem, ami amchea utramninch nhoi punn kornneamnim pasun korunk zata. Amchem jivit ami koxe toren jietat tantuntlean ami khoreanich Jehovacho mog kortat mhunn dakhounk zata. (1 Ju. 5:3, 4) Ami amchea jivitant dovrunk xoktat tantuntlo ho sogleam-von boro dhei zaun asa.
15. Tumi Jehovacho mog kortat mhunn koxem dakhounk zata?
15 Tumi Jehovacho mog kortat mhunn dakhounk tumi eka khas magnnea vorvim ekleach khorea Devak tumchem jivit somorponn korunk zata. (St. 40:8) Uprant, tumi Jehovak tumchem jivit somorponn kelam mhunn dakhounk bautizm gheunk zata. Hea lekhant ami poilim polloilʼlem toxem, ho ekdom khuxalkaiecho ani mhotvacho vell zaun asa. Karonn ami amchea pasot nhoi, punn Jehova pasot jivit jieunk suru kortat. (Rom. 14:8; 1 Ped. 4:1, 2) Tor bautizm ghevop ek vhoddlo nirnnoi oxem amkam disot, ani tem khorem zaun asa. Punn oxem kelolean ami boreantlem borem jivit jieunk pavtat. Tem koxem?
16. Stotr 41:12 pormonnem, aplem jivit Jehovachi seva korunk bhettoitat tankam Jehova koslo inam ditolo?
16 Jehova poros udar kallzacho anik konnuch na. Ami Jehovak kitlem-i dilear pasun, to sodanch tachea poros odik chodd amkam dita. (Mk. 10:29, 30) Taka zai toxem ami jielim zalear, hea noxttea sonvsarant atam pasun to amkam ek ekdom borem, dhados ani khuxalkaiechem jivit dita. Punn hi tor fokot survat! Karonn bautizm ghetlea uprant pasun, ami sasnachea sasnak Jehovachi seva korit ravonk xoktat. Hea toren, Jehova ani amchea modem aslolo mog vaddot voitolo ani ami Jehova bhaxen sasnak jietolim.—Stotr 41:12 vachat.
17. Ami Jehovak kitem diunk zata jem tache lagim na?
17 Ami amchem jivit Jehovak somorponn korun bautizm ghetat tednam, Jehovak kitem tori khas diunk amkam ek sondhi melltta. Ami sartat to khuxalkaiecho vell ani amche lagim asloli dor ek bori vost Jehovanuch amkam dilea. Tor hea soglea pasot, sorg ani prithumecho Odhikari zaun asa, tea Jehova Devak ami upkari asat mhunn dakhounk, ami taka oxem kitem tori diunk zata, jem tache lagim na. Tem mhunnttlear, ami ap-khuxen ani visvaxiponnan tachi seva korunk zata. (Job 1:8; 41:11, NW; Mho. 27:11) Hoi, Jehova pasot amcho mog, bautizm gheunk sogleam-von borem karonn zaun asa. Ani amchem jivit jieunk hi boreantli bori vatt zaun asa!
TUMI BAUTIZM GHEUNK TOIAR ASAT KAI?
18. Tumi tumkanch kosle prosn vicharunk zatat?
18 Tor tumi bautizm gheunk toiar asat kai? Hacho zobab tumich diunk xoktat. Punn hea prosna vixim chintlear tumkam modot zaunk xokta. To mhunnttlear, ‘Bautizm gheunk mhaka kosli addkholl asa?’ (D.I. 8:36) Hea lekhant polloilʼlim tin karonnam tumi ugddas dovrunk zatat. Poilem, tumi sotacho ani nitivontponnacho mog kortat. Tor tumkanch vicharat, ‘Zonn-eklo sot uloitolo ani sarkem tem kortolo, tea disa pasot hanv axeun ravlam kai?’ Dusrem, tumi Jezucho mog kortat. Tor tumkanch vicharat, ‘Devacho Put mhozo Raza zalʼlo mhaka zai kai? Ani hanv tachi dekh gheunk sodhtam kai?’ Ani tisrem sogleam-von mhotvachem karonn mhunnttlear, tumi Jehovacho mog kortat. Tor tumkanch vicharat, ‘Jehovachi seva korun tachem kalliz khuxal korunk hanv sodhtam kai?’ Hea prosnanche zobab hoi zaun asat zalear, bautizm gheunk tumkam kosli addkholl asa?—D.I. 16:33.
19. Bautizm gheunk tumi kiteak fattim soronk zaina? Udharonn diat. (Juanv 4:34)
19 Tumi bautizm gheunk fattim sortat zalear, Jezun dilolea udharonna vixim chintat. (Juanv 4:34 vachat.) Devachi khuxi korop tannem jevnnak sor kelem. Karonn jevonn jevop amkam faideachem. Teach bhaxen, Jehova amkam sangta tem kelolean amkanch faideak poddtta mhunn Jezu zannam aslo. Amkam boreak poddona toslem kitench korunk Jehova amkam sangona. Tor ami bautizm ghetlolo Jehovak zai kai? Hoi! (D.I. 2:38) Bautizm gheunchi adnea pallʼllolean tumkanch faideak poddttolem mhunn tumi khatri dovrunk zata. Tumchea mukhar ekdom borem jevonn dovorlem zalear tem khaunk tumi fattim sorchimnant nhoi? Tor bautizm gheunk tumi kiteak fattim soronk zai?
20. Fuddlea lekhant ami kitem polloitolim?
20 Punn thoddim zannam oxem mhunnot: “Hanv azun bautizm gheunk toiar na.” Tumchem jivit Jehovak somorponn korun bautizm ghevop, ekdom mhotvacho nirnnoi zaun asa tem khorem. Hea pasot purtim zaunk bariksannen chintunk poddtta, vavr korit ravcho poddtta ani vell lagta. Punn tumkam bautizm gheunk khoreanich itsa asa zalear, tea pasot purtim zaunk tumi atanch kitem korunk zata? Hea vixim ami fuddlea lekhant polloum-ia.
GIT 28 Jehovachi Ixttagot Zhoddat!
a Bautizm dor eka Bible vidʼdheartheak mhotvachem asa. Punn ek vidʼdhearthi kiteak lagon bautizm gheunk fuddem soronk xokta? Mogak lagon. Kitea pasot ani konna pasot mog? Hea lekhant, ami hea prosnanche zobab polloitolim. Toxench, bautizm ghetlolean amchem jivit koxem astolem tem pasun ami polloitolim.
b St. 45:4 (NW): “Tujea mhoimen zoit melloun ghe; Sot, khaltikai ani nitivontponnachea vatten fuddem sor, Ani tujea uzvea hatan tum vhodd-vhodd kamam kortolo.”
