OBHEASACHO LEKH 14
“Tumi Mhoje Xis Mhunn Sogleank Kollon Ietolem”
“Tumi eka-mekacho mog kortat zalear tumi mhoje xis mhunn sogleank kollon ietolem.”—JUANV 13:35.
GIT 106 Mog Vaddoum-ia
KITEM XIKTOLIM a
Jehovachea Sakxeam modem aslolo mog polloun her lokancher koslo porinnam zala? (Peregraf 1 polloiat)
1. Mittingek poilech pavtti ietat tim zaitim zannam kitem polloun ojap zatat? (Chitr pasun polloiat.)
EK ZODDPEM poilech pavtti, Jehovachea Sakxeanchea Raj-ghorant mittingek ailam mhunn chintat. Bhav-bhoinnamnim tankam urben ieukar dilo, ani tanche modem aslolo mog polloun, tim khub ojap zalim. Mittinge thaun porot ghora voitana, ti bail aplea ghovak sangta, ‘Ho lok, her lokam poros khub vegllo, ani tanchea sangata vell sarun mhaka khub borem dislem.’
2. Thoddeamnim Jehovachi seva korop kiteak bond kelea?
2 Jehovachea lokam modem aslolo mog khorench khub khas zaun asa. Punn ami opurnn asat. (1 Ju. 1:8) Tor jitlim ami amchea bhav-bhoinnank zannam zatolim, titleoch chodd amkam tancheo chuki dison ietoleo. (Rom. 3:23) Ani dukhachem mhunnttlear, thoddea zannamnim bhav-bhoinnanchea chukink lagon, Jehovachi seva korop bond kelea.
3. Khorim Kristanvam konn tem koxem kollon ieta? (Juanv 13:34, 35)
3 Hea lekhachea mukhel versacher porot ek pavtti dhean diat. (Juanv 13:34, 35 vachat.) Khorim Kristanvam konn tem koxem kollon ieta? Bible-ant tim poripurnn astolim oxem sangonk na, punn tanche modem aslolea moga vorvim tim khorim Kristanvam mhunn kollon ieta. Toxench Jezun, ‘Tumi mhoje xis mhunn tumkam kollon ietolem’ oxem mhunnonk na. Tachea bodlek, tannem mhunnttlem: “Tumi mhoje xis mhunn sogleank kollon ietolem.” Tor khorea Kristanvam modem aslolea svarth naslolea mogak lagon, tachea pattlavdarankuch nhoi, punn Kristi sobhecho bhag naslolea lokank pasun, hinch khorim Kristanvam mhunn kollon ietolem oxem Jezun sanglem.
4. Khorea Kristanvam vixim thoddim kitem chintunk xoktat?
4 Jehovachim Sakxi nant te thodde lok ghoddie oxem chintunk xoktat: ‘Mog amkam Jezuchea khorea pattlavdarank vollkhonk koso modot korta? Jezun aplea apostlank koso mog dakhoilo? Ani ami aiz Jezuchi dekh koxi gheunk zata?’ Hea prosnam vixim ami pasun chintunk zai. Karonn oxem kelolean, amchea bhav-bhoinnamnim chuki kelear pasun, tankam anik bore toren mog dakhounk amkam modot zatoli.—Ef. 5:2.
MOG AMKAM JEZUCHEA KHOREA PATTLAVDARANK VOLLKHONK KOSO MODOT KORTA?
5. Juanv 15:12, 13-nt Jezun sanglolea utrancho orth kitem aslo?
5 Aplea xisam modem ek khas torecho mog astolo mhunn Jezun sanglolem. (Juanv 15:12, 13 vachat.) Tannem tankam oxi adnea dilʼli: “Hanvem zoso tumcho mog kela tosoch tumi eka-mekacho mog korat.” Jezuchea utrancho orth kitem aslo? Jezu sangonk sodhtalo ki tache xis svota poros dusreancho chodd mog kortole, vo hea mogak lagon ek Kristanv aplea bhav-bhoinnam pasot, goroz poddlear jiv pasun diunk toiar astolo. b
6. Mog asop ekdom gorjechem mhunn Bible-antlean koxem kollon ieta?
6 Mog asop ekdom gorjechem mhunn Bible xikoita. Bible-antlea thoddea versamnim oxem sanglam: “Dev mhollear Moguch!” (1 Ju. 4:8) “Tuzo mog korta toso tujea xezareacho mog kor.” (Mt. 22:39) “Pritimog khub-khub patkam kaddun uddoita.” (1 Ped. 4:8) “Pritimog ekuch kodinch sompcho na.” (1 Kor. 13:8) Ani him zaitea lokanchim avddichim versam zaun asat. Tor oslea ani Bible-ant aslolea her versam udexim, mog asop kitlem mhotvachem tem amkam kollon ieta.
7. Soitan lokank ekvottan jieunk ani eka-mekacho khoro mog korunk kiteak xikounk xokona?
7 Punn zaito lok mhunntta, ‘Soglech dhorm apunn sot xikoitat mhunn sangtat. Punn dor eka dhormant, Deva vixim veg-veglli xikounn ditat. Tor khoro dhorm khoincho tem mhaka koxem kollttolem?’ Soitanan itle khotte dhorm toiar keleat, ki khoro dhorm khoincho tem zannam zaunk lokank kotthin zata. Punn Soitan sonvsarbhorchea lokank ektthaim haddun, tankam eka-mekacho khoro mog korunk xikounk xokona. Oxem fokot Jehova korunk xokta. Karonn khoro mog fokot Jehova thaun ieta. Jehovachi povitr xokti ani besanvam zancher asat, teach munxam modem khoro mog asta. (1 Ju. 4:7) Heach karonnak lagon, fokot aplea xisam modem khoro mog astolo oxem Jezun mhunnttlolem.
8-9. Jehovachea Sakxeam modem aslolo mog polloun zaitea zannancher koslo porinnam zala?
8 Jezun sanglolem toxem, khorea Kristanvam modem aslolo mog polloun, tinch Jezuchim khorim pattlavdaram mhunn zaitea lokank kollon ailam. Hea vixim amkam Yan nanvachea eka bhavacho onubhov asa. Tachea ghora laginch aslolea eka stadium-ant, to poilech pavtti eka odhivexonak hajir zalʼlo. Ani thoddea mhoineam poilim, to teach stadium-ant game pollounk gelʼlo. Tea odhivexonacho ugddas korun to oxem sangta: “Game-ik ailʼlea lokam modem, ani odhivexonak hajir zalʼlea Sakxeam modem khub ontor aslo. Sakxi ekdom bore toren nheslolim ani eka-meka sangata bore toren uloitalim. Toxench, tanchim bhurgim pasun borim korun vagtalim. Tim khorench dhadoxi aslim, ani tankam monachi xanti asli mhunn hanvem polloilem. Mhaka mhojea jivitant hench zai aslem. Tea disa aikolʼlem ekui bhaxonn mhaka ugddas na. Punn Sakxi koxe toren vaglim tem mhaka aiz porian ugddas asa.” c Hoi, amche modem khoro mog asa dekhun ami eka-meka sangata doiall toren ani respedan vagtat.
9 John nanvachea eka bhavak pasun, to mittingek hajir zaunk laglo tednam oxench bhoglem. To sangta: “Thoim hajir aslolim . . . soglim, eka-meka sangata itle bore toren vagtalim ki hanv ojap zalom. Tim khorench poripurnn asat oxem mhaka dislem. Tanche modem aslolo khoro mog polloun, hoch khoro dhorm mhunn mhaka kollon ailem.” d Oslea ani her onubhovam vorvim, fokot Jehovachim Sakxi khorim Kristanvam mhunn amkam kollon ieta.
10. Ami khorench bhav-bhoinnancho mog kortat vo na tem kednam kollon ieta? (Futtnott pasun polloiat.)
10 Ami survatek polloilʼlem toxem, ami soglim opurnn asat dekhun thodde pavtti bhav-bhoinnam, tanchea utram vo kornneam vorvim amkam dukhounk xoktat. e (Jak. 3:2) Oxem zata tednam, ami tanchea sangata koxe toren uloitat vo vagtat tea vorvim ami khorench tancho mog kortat vo na tem kollon ieta. Hea vixim ami Jezu thaun kitem xikonk zata?—Ju. 13:15.
JEZUN APLEA APOSTLANK KOSO MOG DAKHOILO?
Jezuchea xisamnim zaiteo chuki keleo. Tori astana Jezu tanchea sangata mogan vaglo (Peregraf 11-13 polloiat)
11. Jakob ani Juanvan kitem dakhoun dilem? (Chitr pasun polloiat.)
11 Aple xis poripurnn asonk zai, oxem Jezun kednanch chintunk na. Tachea bodlek, te chuki kortat mhunn tannem vollkhon ghetlem, ani sudharnni korun Jehovak manvota tem korunk, tannem mogan tankam modot keli. Ek pavtti, Jezuche don apostl, Jakob ani Juanvan, tankam Devachea Rajeant ek vhodd podvi di mhunn aplea avoi udexim Jezuk sanglem. (Mt. 20:20, 21) Oxem korun, tankam gorv, toxench dusream poros vhodd zauncho sobhav aslo mhunn tannim dakhoun dilem.—Mho. 16:18.
12. Jezuchea apostlam modem, fokot Jakob ani Juanvuch chukle kai? Somzaiat.
12 Punn fokot Jakob ani Juanvuch chukle oxem nhoi. Her apostlank hi khobor mellʼlli tednam tannim kitem kelem? Hea vixim Bible-ant oxem sanglam: “Urlolea dha zannamnim hem aikolem tednam tankam hea donui bhavancho khub rag ailo.” (Mt. 20:24) Tor Jakob, Juanv ani her apostl, eka-meka sangata kitle krur toren vagle astole tea vixim chintat. Her apostlamnim ghoddie oxem mhunnttlem astolem: ‘Devachea Rajeant tumkam vhodd podvi mellonk, tumi svotak konn mhunn somzotat? Tumchea bhaxen, Jezu sangata ami pasun khub vavr kela. Tor vhodd podvi mellonk ami-i purte asat!’ Apostl koxe-i toren vagle asum, punn tea vellar te eka-mekak mog dakhounk ani doiall toren vagonk chukle.
13. Jezuche apostl chukle tednam to koso vaglo? (Matev 20:25-28)
13 Hea poristhitint Jezu koso vaglo? To aplea xisancher ragar zaunk na. Ani tanchea poros anikui khalti asat, toxench eka-meka sangata sodanch mogan vagtat tosle xis apunn vinchun kaddttolo, oxem Jezun mhunnonk na. To aplea xisam sangata pasiensan vaglo. Karonn te sarkem tem korunk sodhtat mhunn Jezu zannam aslo. (Matev 20:25-28 vachat.) Toxench, tanche modem konn vhodd hea vixim tannim zaite pavtti vad-vivad kelo. Tori astana, Jezu sodanch tanchea sangata doiall toren vaglo.—Mk. 9:34; Luk. 22:24.
14. Jezuche apostl kosle sonskrutint vaddlole?
14 Aple apostl kosle sonskrutint vaddlole tem Jezun ugddas dovorlem. (Ju. 2:24, 25) Te vaddlole thoim, lokank vhodd podvi aslearuch tankam valor asta, oxem dhormik fuddari xikoitale. (Mt. 23:6; toxench, Matev 23:6-achea study note-ant aslolo, The Front Seats in the Synagogue [Inglez bhaxent] ho video sor korat.) Tea bhair, Judev dhormik fuddari, dusream poros apunnuch chodd bore mhunn somzotale. f (Luk. 18:9-12) Tor Jezuche apostl, svotak toxench dusreank koxe toren lekhtat, tacher hea chintpacho probhav poddonk xoktalo mhunn Jezun somzon ghetlem. (Mho. 19:11) Aplea xisamnim kednanch chuki korunk zainant oxem Jezun chintunk na. Tachea bodlek, te chukle tednam to tanchea sangata pasiensan vaglo. Te sarkem tem korunk sodhtale mhunn Jezu zannam aslo. Dekhun tankam anikui khalti zaunk, ani heram poros apunn vhodd mhunn chintchea bodlek dusreank mog dakhounk, tannem pasiensan tankam modot keli.
AMI JEZUCHI DEKH KOXI GHEUNK ZATA?
15. Jakob, Juanv ani her xisam modem kitem ghoddlem tantuntlean amkam kitem xikonk melltta?
15 Jakob, Juanv ani her xisam modem kitem ghoddlem tantuntlean amkam zaitem xikonk melltta. Devachea Rajeant ek vhodd podvi magon, Jakob ani Juanvan chuk keli tem khorem. Punn tanche modem aslolo ekvott piddʼddear korun, her xisamnim pasun chuk keli. Tori astana, Jezu aplea soglea 12 apostlam sangata mogan ani doiall toren vaglo. Tor ami kitem xiktat? Lok amchea sangata koxe toren vagtat tench nhoi, punn tim chuki kortat tednam ami koxe toren vagtat tem pasun mhotvachem asa. Ami eka bhava vo bhoinnicher ragar zatat tednam, ami amkanch he prosn vicharunk zatat: ‘Tea bhavan vo bhoinnin jem kitem kelem, tea pasot hanv tacher itlo bejar kiteak zalom? Hache voilean, hanvem kam korunk zai toslem khoinchem-i unnemponn mhoje bhitor asa, mhunn dison ieta kai? Tea bhavak vo bhoinnik kosle tore oddchonnecho fuddo korunk poddtta dekhun tim oxim vaglim kai? Tacher bejar zaunk karonn asa zalear pasun, hanv tankam mog dakhoun bhogsunk xoktam kai?’ Dusreank mog dakhoitat tednam ami Jezuchim khorim pattlavdaram mhunn dakhoun ditat.
16. Jezuchea udharonnantlean ami anik kitem xikonk zata?
16 Jezuchea udharonnantlean, bhav-bhoinnank somzon gheunk pasun ami proitn korunk zai mhunn ami xiktat. (Mho. 20:5) Jezu bhaxen, dusreanchea kallzant kitem asa tem ami zannam zaunk xokonant tem khorem. Punn bhav-bhoinnam, amkam rag haddtta toxem kitem-i kortat vo mhunnttat tednam, ami pasiens dakhounk zata. (Ef. 4:1, 2; 1 Ped. 3:8) Ami tankam anik bore toren zannam zaunk proitn kortat tednam, oxem korunk amkam sompem zata. Hea vixim ek onubhov polloum-ia.
17. Eka bhavak anik bore toren zannam zaun ghetlolean, sorkittachi dekhrekh korpeak koso faido zalo?
17 Sorkittachi dekhrekh korpi ek bhav East Africa-nt seva kortalo tednam, thoinchea sobhent aslolea eka bhava vixim ugddas korta. Survatek to bhav doiall naslo oxem sorkittachi dekhrekh korpeak dislem. Tor tannem kitem kelem? To sangta: “Tea bhava thaun pois ravchea bodlek, hanvem taka anik bore toren zannam zaunk nichov kelo.” Oxem kelolean, to bhav kosle sonskrutint vaddlolo ani to oxe toren kiteak vagtalo, tem taka kollon ailem. To fuddem sangta: “Tea bhavak aplea sobhavant bodol korunk kitlem kotthin aslem, ani oxem korunk tannem kitlo vavr kelʼlo tem mhaka kollʼllem tednam, hanv tacho valor korunk pavlo ani ami bore ixtt zale.” Tor bhav-bhoinnank anik bore toren vollkhonk ami proitn kortat tednam, tanchea sangata mogan vagonk amkam chodd korun sompem zatolem.
18. Eka bhavan vo bhoinnin amkam dukhoilam zalear, ami amkanch kitem vicharunk zata? (Mhonnʼnneo 26:20)
18 Punn thodde pavtti, amkam dukhoila tea bhava vo bhoinni lagim ami ulounk zai, oxem ghoddie amkam disot. Punn toxem korchea poilim, ami amkanch vicharunk zata: ‘Kitem ghoddlem tea vixim mhaka soglench khobor asa kai?’ (Mho. 18:13) ‘Tannem mudʼdom zaun mhaka dukhounk na oxem zaunk xokta kai?’ (Up. 7:20) ‘Hanvem pasun kednam-i oslich chuk kelea kai?’ (Up. 7:21, 22, NW) ‘Tea bhava vo bhoinni lagim uloilolean, ti poristhiti suttavi zaunchea bodlek anikui bigoddttoli kai?’ (Mhonnʼnneo 26:20 vachat.) Oslea prosnam vixim chintunk ami vell ghetat tednam, ami tea bhava vo bhoinnicho mog kortat dekhun ami chodd korun tankam bhogxitolim.
19. Tumi kitem korunk ghott nichov kela?
19 Ami Jehovachim Sakxi zalʼlean eka-mekak mog dakhoitat. Toxench bhav-bhoinnam amkam dukhoitat tednam pasun, ami tanchea sangata mogan vagtat. Hea toren, ami Jezuchim khorim pattlavdaram mhunn dakhoun ditat. Ami oxem kortat tednam, ami khoro dhorm pallttat mhunn vollkhon gheunk, toxench amchea sangata amcho mogall Dev Jehovachi bhokti korunk, her lokank modot zaunk xokta. Tor eka-mekacho mog korun, ami khorim Kristanvam mhunn dakhoit ravonk ghott nichov korum-ia.
GIT 17 “I Want To”
a Amche modem aslolo khoro mog polloun, zaitim zannam sot xikonk fuddem sortat. Punn ami opurnn asat dekhun, thodde pavtti eka-mekacho mog korunk amkam kotthin zaunk xokta. Tor hea lekhant, eka-mekacho mog korop gorjechem kiteak asa, ani dusrim chuki kortat tednam pasun ami Jezuchi dekh gheun tankam mog koso dakhounk zata tem ami polloitolim.
c Novembr 1, 2012-chea Pahrogopur-ant, p. 13-14-cher, “At Last, My Life Has a Purpose,” (Inglez bhaxent) ho lekh polloiat.
d May 1, 2012-chea Pahrogopur-ant, p. 18-19-acher, “My Life Seemed Good,” (Inglez bhaxent) ho lekh polloiat.
e Ho lekh, vhoddil polloun ghetat tea gombhir patkam vixim, zoxem 1 Korintkarank 6:9, 10-nt sanglolim patkam, hache vixim uloina.
f Zaitea tempa uprant, eka Rabbi-n oxem mhunnttlolem mhunn sanglam: “Sonvsarant, Abrahama bhaxen, unneant-unnem tis promannik munis astole. Tis asat zalear, tantuntle don, hanv ani mhozo put; dha asat zalear, tantuntle don, hanv ani mhozo put; panch asat zalear, tantuntle don, hanv ani mhozo put; don asat zalear, to hanv ani mhozo put; punn fokot ek asa zalear, to hanv.”
