1-2. Bautizma uprant koslim besanvam mellttat?

 BAUTIZM gheun Jehovache familicho bhag zaunk amkam khub khuxalkai bhogta. Ani ho amkam ek vhodd man zaun asa. Davidak bhoglolem toxench amkam bhogta. Tannem mhunnttlem: “Zaka Tunvem venchun kaddlai, zaka Tujea khaxelea angnnant jieunk apoilai, to monis bhagi!”—St. 65:4.

² Tor Jehova aplea angnnant konnank apoita? Ami fattlea lekhant polloilem toxem, jim tachea lagim ek lagxilʼlo sombond zoddunk sodhtat mhunn aplea korneamnim dakhoitat tankanch to aplea lagim voddun haddtta. (Jak. 4:8) Tor tumi Jehovak tumchem jivit somorpit korun bautizm ghetat tednam, tumi taka anik lagim sortat. Ani bautizma uprant Jehova “tumcher bhorpur axirvad votoitolo” mhunn tumi khatri dovrunk zata.—Mal. 3:10, NW; Jer. 17:7.

3. Somorponn korun bautizm ghetlolea Kristanvamnim kitem korop ekdom mhotvachem? (Upodexok 5:3, 4)

³ Tor bautizm fokot ek survat zaun asa. Karonn hachea uprant tumchea jivitant oddchonneo vo tallnneo ailear pasun Jehovak visvaxi ravonk ani taka dilʼli somorponnachi bhas pallunk tumchean zata tem soglem tumi kortolim. (Upodexok 5:3, 4 vachat.) Toxench, Jezuchim pattlavdaram zalʼlean tachi dekh gheunk ani tannem dilʼleo adnea pallunk tumi khub vavr kortolim. (Mt. 28:19, 20; 1 Ped. 2:21) Ani oxench korunk ho lekh tumkam modot kortolo.

 TRAS ANI TALLNNEO ASLEARUI JEZUCHO PATTLAV KORIT RAVAT

4. Aple xis “trasancho khambo” ubartole mhunn Jezun sanglolea utrancho orth kitem? (Lukas 9:23)

⁴ Bautizma uprant, tumkam koslech tras aschenant mhunn chintinakat. Karonn Jezun sanglolem ki tache xis ‘dor disa trasancho khambo’ ubartole. (Lukas 9:23 vachat.) Tor Jezuchea xisank sodanch dukh-tras astole mhunn to sangonk sodhtalo kai? Na. Tankam besanvam mellttolim tem khorem, punn tankam oddchonneancho-i fuddo korcho poddttolo, ani tantuntlea thoddea oddchonneancho fuddo korop khub kotthin astolem mhunn Jezu sangonk sodhtalo.—2 Tim. 3:12.

5. Teag kortat tankam koslim besanvam mellttolim mhunn Jezun sanglem?

⁵ Tumkam ghoddie tumchea famili thaun virodh sosunk poddla zait, vo Devachem Raj poilea zagear dovrunk, khub poixe zoddchi sondhi tumi nakarli zait. (Mt. 6:33) Tumi kelʼle sogle teag Jehova bore bhaxen zannam mhunn khatri dovrat. (Heb. 6:10) Ani he teag kelʼlean, Jezun mhunnttlolim him utram tumi onnbhovlim astolim. Tim mhunnttlear: “Oso konn na zannem mhojea pasot ani bore khobre pasot ghor vo bhav vo bhoinno vo bapui vo avoi vo bhurgim vo bhattam-besam soddun dileant ani taka hea kallant dhumallea sangata 100 pavtti chodd—ghoram, bhav, bhoinno, avoio, bhurgim, ani xetam-bhattam—ani fuddlea sonvsarant sasnik jivit mellonastana urchem na.” (Mk. 10:29, 30) Hem kitlem khorem zaun asa nhoi! Tumi jitle teag keleat tachea poros chodd tumkam besanvam mellʼlleant.—St. 37:4.

6. Bautizma uprant pasun tumkam tumchea ‘kuddichea itsam’ add zhuzot kiteak ravonk poddttolem?

⁶ Tori astana, bautizma uprant pasun tumkam tumchea ‘kuddichea itsam’ add zhuzot ravonk poddttolem. (1 Ju. 2:16) Karonn bautizma uprant konnuch poripurnn zaina. Thodde pavtti tumkam ghoddie apostl Paulu bhaxen disot. Tannem mhunnttlolem: “Devachea kaideak lagon hanv khoreanich kallzantlean khuxal zatam. Punn hanv mhojea kuddint dusro ek kaido kam korta mhunn polloitam. To mhojea chintnancher raz kortolea kaidea add zhuzta ani mhojea kuddint aslolea patkachea kaideacho mhaka gulam korta.” (Rom. 7:22, 23) Tor Paulu bhaxen tumkam pasun tumchea kuddichea itsam add zhuzot ravonk poddtta dekhun tumi niraxi zait. Punn somorponnachea vellar tumi Jehovak kitem bhas dilʼli tea vixim niall kelear, tallnneo pois korunk tumi tumcho nichov ghott korunk pavtolim. Khorem mhunnttlear, somorponnachi bhas amkam tallnneo pois korunk modot korta. Koxi?

7. Somorponn kelʼlean Jehovak visvaxi ravonk tumkam koxi modot zatoli?

⁷ Tumi Jehovak tumchem jivit somorpit kortat tednam tumi tumkam nakartat. Hacho orth, Jehova dves korta teo sogleo itsa ani anvdde tumi pois kortat. (Mt. 16:24) Tor tumkam tallnni ieta tednam vo tumi ek kotthin poristhiticho fuddo kortat tednam, kitem korchem hea vixim tumkam chintunk poddchem na. Karonn Jehovak visvaxi ravonk ani taka manvota tench korunk tumi poilinch ghott nichov kela. Tor eka orthan, tumi Joba bhaxen zatolim. Taka khub kotthin poristhitincho fuddo korcho poddlo. Tori astana, tannem khatren oxem mhunnttlem: “Moro porian mhojem visvaxiponn kednanch soddun diuncho na.”—Job 27:5, NW.

8. Tumi somorponna vellar Jehovak ji bhas dilʼli tacher niall kelʼlean tallnni pois korunk tumkam koxi modot zatoli?

⁸ Tumcher kosli-i tallnni ailear pasun tumi somorponna vellar Jehovak kitem bhas dilʼli tea vixim niall kelear, ti tallnni pois korunk tumkam modot zatoli. Hea vixim chintat. Tumi dusreachea kazari sangatea borabor mirtolim vo flirt kortolim kai? Kednanch na nhoi! Karonn tumi oslem kainch korchimnant mhunn Jehovak utor dilʼlem. Tor tumi kosleoch vaitt  itsa tumchea kallzant rigonk diunchimnant, jeo uprant bhair kaddun uddounk tumkam kotthin zatolem. Hea vorvim tumi ‘khotteanchea rosteak fatt kortolim.ʼ—Mho. 4:14, 15.

9. Tumi somorponna vellar ji bhas dilʼli tacher niall kelʼlean Jehovachi bhokti poilea zagear dovrunk tumkam koxi modot zatoli?

⁹ Toxench hea vixim chintat. Tumkam ek oslem kam melltta, jem kelem zalear tumkam sobhecheo mittingo chukounk poddttoleo. Hea vellar tumi oxem mhunnttolim kai: ‘Sodʼdheak hanv hea kamak voitolom, ani Jehovachi bhokti poilea zagear koxi dovorchi tem hanv magir polloitolom.’ Na nhoi? Karonn somorponna vellar tumi poilench tharailʼlem, ki tumkam Jehovachi bhokti korunk addaita toslem kainch tumi korchimnant. Jezun pasun aplea Bapak manvota tench korunk ghott nichov kelʼlo. Ani tachea udharonnancher niall kelʼlean, tumi pasun Jehovak manvona tem rokddench nakarunk ghott nichov korunk pavtolim.—Mt. 4:10; Ju. 8:29.

10. Jezucho pattlav korit ravonk Jehova tumkam modot kortolo mhunn tumi kiteak khatri dovrunk zata?

¹⁰ Tras ani tallnneo ietat tednam, Jezucho pattlav korit ravonk tumcho nichov kitlo ghott asa tem tumi dakhoun diunk xoktat. Ani Jezucho pattlav korit ravonk Jehova tumkam modot kortolo mhunn tumi khatri dovrunk zata. Karonn Bible-ant sanglam: “Dev visvaxi, ani tumchean sosunk zaina tosli koslich porikxa to tumcher ieunk diuncho na. Punn, porikxechea vellar tantuntlean bhair soronk to vattui toiar kortolo, jea udexim tumi ti sosunk pavtolim.”—1 Kor. 10:13.

JEZUCHO PATTLAV KORIT RAVONK TUMI KITEM KORUNK ZATA?

11. Jezucho pattlav korit ravonk ekdom bori vatt khoinchi? (Chitr pasun polloiat.)

¹¹ Jezu purnn kallzan Jehovachi seva kortalo ani sodanch Jehovak magnnem kortalo. (Luk. 6:12) Tor bautizma uprant pasun Jezucho pattlav  korit ravonk ek ekdom bori vatt mhunnttlear, Jehovak lagim soronk amkam modot kortat tosleo vostu korit ravop. (St. 26:1) Hea vixim Bible sangta: “Atam meren, ami jitli vaddavoll kelea teach vatten ami mukhar nitt cholot ravom-ia.” (Filp. 3:16) Thodde pavtti tumkam oslea bhav-bhoinnancho onnbhov aikonk mellttolo, zannim apli seva vaddoili. Ghoddie tim Raj-porgottnnarank aslolea Korsak gelim, vo porgottnnaranchi chodd goroz asa toslea eka zagear seva korunk gelim. Tumchea poristhiti pormonnem tumi toxem korunk zata zalear, toxem korunk dhei dovrat. Karonn Jehovache lok tache sevent anik chodd vavr korunk sodhtat. (D.I. 16:9) Punn sodʼdheak tumi toxem korunk xokonant zalear kitem? Tumi valorachim nant mhunn chintinakat. Tumche poristhiti pormonnem tumi korunk xoktat tem soglem tumi kortat tednam, Jehova khuxal zata mhunn visornakat. Khorem mhunnttlear, Kristanvamnim xevott meren thir ravop ekdom gorjechem mhunn ugddas dovrat.—Mt. 10:22.

12-13. Tumchi urba unni zata zalear tumi kitem korunk zata? (1 Korintkarank 9:16, 17) (“ Tumchi Dhanvodd Soddun Dium Nakat,” hem boks pasun polloiat.)

¹² Punn atam tumi kallzantlean Jehova lagim magnnem korinant, vo porgottnnechea kamant tumkam poilim mellttali titli khuxalkai mellona, vo Bible vachop korunk tumchi umed unni zalea oxem tumkam dista zalear kitem? Jehovan tumkam apli povitr xokti divop bond kelea oxem chintinakat. Opurnn aslolean, amchim bhavnam bodlot ravtat mhunn ugddas dovrat. Tor tumchi urba unni zata zalear apostl Pauluchea udharonnacher niall korat. To Jezuchi dekh gheunk vavr kortalo tem khorem. Punn toxem korunk taka sodanch ghott itsa aschina mhunn to zannam aslo. (1 Korintkarank 9:16, 17 vachat.) Tea pasot tannem oxem mhunnttlem: “Mhaka hem kam korunk khuxi na zalear pasun, hi mhoji zobabdari zaun asa ji mhaka Devan dilea.” Tor taka koxem-i dislear  pasun, porgottnnechem kam korit ravonk tannem ghott nichov kelʼlo.

¹³ Tor Pauluchi dekh gheun tumchea bhavnanchea adarit nirnnoi ghenakat. Tumkam koxem-i disom, tumi sarkem tench kortolim mhunn nichov korat. Tumi oxem korit ravtat tednam, vell voita toso sarkem tem korunk tumkam avoddttolem. Tor magnnem, svotacho obheas, porgottnni ani mittingek hajir zavop chukoinakat. Hea vorvim tumi Jezucho pattlav korit ravonk pavtolim, ani Jehovachi seva korunk tumi vavr kortat to polloun bhav-bhoinnank pasun urba mellttoli.—1 Tes. 5:11.

“TOPAXIT RAVAT . . . PURAVO DI-IT RAVAT”

14. Bautizma uprant pasun tumi kiteachi topasnni korit ravonk zai, ani kiteak? (2 Korintkarank 13:5)

¹⁴ Bautizma uprant pasun tumi tumchich topasnni korit ravlear tumkam modot zatoli. (2 Korintkarank 13:5 vachat.) Magnnem korop, Bible vachop ani tacho obheas korop, mittingek hajir zavop ani porgottnnent bhag ghevop tumi chukonastana kortat kai na mhunn dhean diat. Toxench hea kamamnim anik khuxalkai mellonk ani faido zaunk tumi kitem korunk zata tem zannam zaunk proitn korat. Udharonnak, tumi tumkanch osle prosn vicharunk zatat: ‘Hanv dusreank Bible-antlim mullavim sotam somzaunk xoktam kai? Porgottnnent anik khuxalkai mellonk hanvem kitem korunk zata? Hanv kallzantlean magnnem kortam kai, ani tantuntlean hanv purnn toren Jehovacher patietam mhunn dison ieta kai? Hanv chukonastana mittingek hajir zatam kai? Mittingek anik dhean diunk ani zobab diunk hanvem kitem korunk zata?’

15-16. Tallnni nakarche vixim bhav Robert-achea onnbhovantlean tumi kitem xiklim?

¹⁵ Toxench, tumi tumcheo oskotaieo pasun zannam zavop ekdom gorjechem. Hea vixim amkam bhav Robert-acho onnbhov asa. To sangta: “Hanv sumar 20 vorsancho aslom tednam, hanv part-time kam kortalom. Ek dis kama uprant, mhojea sangata kam korpi ek bail, mhaka tichea ghora apounk lagli. Tinnem mhunnttlem, ‘Ami dogaim ekttinch astolim, tor amkam zai tem korum-ia.ʼ Hanvem survatek tika thoddim nimitam dilim. Punn uprant hanvem tika na mhunn sanglem ani tachem karonnui somzailem.” Bhav Robert-an hi tallnni nakarun borem kelem! Punn tachea sangata kitem ghoddlem tea vixim bhavan uprant chintlem, ani te poristhiticho tannem anik bore toren fuddo korunk zatalo mhunn taka kollʼllem. To sangta: “Potifarache bailen Juzek tallnnent ghatlo tednam, tannem thir ravon tika rokddich nakarli te bhaxen hanvem korunk na. (Ut. 39:7-9) Khorem mhunnttlear, te bailek na mhunnonk mhaka kotthin zalem mhunn chintun hanv ojap zatam. Tor jem kitem ghoddlem tea  vorvim hanvem Jehova sangata mhoji ixttagot anikui ghott korunk zai mhunn mhaka kollon ailem.”

¹⁶ Bhav Robert-a bhaxen tumi pasun tumchich topasnni kortat tednam tumkam modot zatoli. Tumi tallnneo nakartat zalear pasun tumkanch vicharat: ‘Ti tallnni nakarunk mhaka kitlo vell laglo?’ Hea babtint tumi khoim tori sudharnni korunk zai mhunn tumkam kollon ailem zalear niraxi zainakat. Punn tumi tumcheo oskotaieo vollkhon gheunk pavlim mhunn khuxal zaiat. Tea oskotaiencher zoit vhoronk Jehova lagim magnnem korat, ani tachea noitik dorjeam pormonnem jieuncho tumcho nichov ghott korunk goroz tim panvlam gheiat.—St. 139:23, 24.

17. Robert-an ghetlolea nirnnoi-a udexim Jehovachea nanvak man koso mell’llo?

¹⁷ Bhav Robert-achea onnbhovantlean amkam anikui xikonk melltta. To sangta: “Hanvem te bailek na mhunnttlea uprant tinnem mhaka sanglem, ‘Tum pass zalo!ʼ Tor ti kitem mhunnonk sodhtali mhunn hanvem vicharlem. Tednam tinnem sanglem ki ticho ek ixtt, zo adim ek Sakxi aslo, tannem tika sanglolem ki Jehovachim Sakxi aslolim soglim tornnattim don torechem jivit jietat ani sondhi mellʼllear lipon vaitt kamam kortat. Tor hanv-ui tosloch zalear ti check kortoli mhunn tinnem tichea ixttak sanglolem. Tor hanvem Jehovachea nanvak man dilo hem zannam zaun hanv khub khuxal zalom.”

18. Bautizma uprant pasun tumi kitem korcho nichov kela? (“ Tumkam Modot Kortole Tosle Lekh” hem boks pasun polloiat.)

¹⁸ Tumi Jehovak tumchem jivit somorpit korun bautizm ghetat tednam, tachem nanv povitr korop tumkam sogleam-von chodd mhotvachem mhunn tumi dakhoun ditat. Tumkam kosleo tallnneo ani tras sosunk poddttat tem Jehova bore bhaxen zannam, ani to tumkam aple povitr xokte udexim visvaxi ravonk modot kortolo mhunn khatri dovrat. (Luk. 11:11-13) Tor bautizma uprant pasun, Jehovache modotin tumi Jezucho pattlav korit ravonk pavtolim mhunn kainch dubhav na!