OBHEASACHO LEKH 12
GIT 77 Light in a Darkened World
Kallokh Pois Korun Uzvaddant Cholot Ravat!
“Eka vellar tumi-i kallkhant aslim, punn atam tumi . . . uzvaddant asat.”—EF. 5:8.
MUKHEL MUDʼDO
Efezkarank odheai 5-ant, Paulun uzar kel’lea ‘kallokh’ ani ‘uzvadd’ hea utrantlean ami kitem xikonk zata tem polloum-ia.
1-2. (a) Paulun Efezkarank chitt boroili tednam tachi poristhiti koxi asli, ani tannem ti chitt kiteak boroili? (b) Ami khoinchea prosnanche zobab polloitolim?
APOSTL Pauluk Romant eka ghorant koidi korun dovorlolo. Tor to bhav-bhoinnank mellonk xokonaslo. Punn to tankam urba diunk sodhtalo dekhun tannem tankam chitti boroileo. Hantuntli ek chitt tannem Efezantlea Kristanvank sumar 60 vo 61 K.X.-ant boroilʼli.—Ef. 1:1; 4:1.
2 Sumar dha vorsam poilim, Paulun thoddo temp poriant Efezant bori khobor porgottpachem ani xikoupachem kam kel’lem. (D.I. 19:1, 8-10; 20:20, 21) To bhav-bhoinnancho khub mog kortalo ani tannim visvaxiponnan Jehovachi seva korunk tankam modot korunk sodhtalo. Punn tannem hea makhlolea Kristanvank kallokh ani uzvadda vixim kiteak boroilem? Ani tannem tankam dil’lea sol’leantlean soglea Kristanvamnim kitem xikonk zata? Hea prosnanche zobab ami fuddem polloum-ia.
KALLKHA THAUN UZVADDANT
3. Efezkarank boroilʼlea chittint, Paulun khoinchim utram uzar kelim?
3 Efezantlea Kristanvank Paulun oxem boroilem: “Eka vellar tumi-i kallkhant aslim, punn atam tumi . . . uzvaddant asat.” (Ef. 5:8) Efezantlea Kristanvamnim tanchea jivitant khub vhoddle bodlav kelʼle mhunn dakhounk, Paulun ‘kallokh’ ani ‘uzvadd’ him utram uzar kelim. Tor tim ‘eka vellar kallkhant aslim’ oxem Paulun kiteak mhunnttlem tem ami polloum-ia.
4. Dhormachea babtint Efezkaram kallkhant koxim aslim?
4 Khottea dhormachea kallkhant. Sot xikon Kristanv zaunche poilim Efezkaram khotto dhorm pallttalim ani ondh-visvas mantalim. Efez xarant, Artemis devichem ek famad mondir aslem. Ani tem mondir tea tempar sonvsarantlea seven wonders-am modlem ek aslem. Lok tea mondirant murteanchi bhokti korunk voitalim. Toxench veapar-dhondo korpi, Artemis devicheo ani mondiracheo murteo korun viktale, ani khub poixe zoddttale. (D.I. 19:23-27) Tea bhair thoincho zaito lok jadu kortale.—D.I. 19:19.
5. Noitikponnachea babtint Efezkaram kallkhant koxim aslim?
5 Onoitikponnachea kallkhant. Efezantle lok khub onoitik kamam kortale. Ani tanchea vaitt kamanchi tankam lozui disonasli. Tanche theater-amnim zatale te khell, toxench festam-porbo pasun choddxe sex-a vixim astale. (Ef. 5:3) Zaitea Efezkaramnim “vaitt kamanchi sogli loz soddun” dilʼli. Mhunnche koslem-i vaitt kam kelea uprant, tanchem ontoskornn tankam sotainaslem. (Ef. 4:17-19) Heach pasot Paulun, “te kallkhant asat ani Dev dita tea jivita thaun pois asat” oxem mhunnttlem. Jehovache dorje xikchea poilim Efezantlea Kristanvanchem-i ontoskornn tankam sotainaslem ani Jehovak koxem bhogta tachi tankam porva nasli.
6. Efezkaram ‘atam uzvaddant asat’ oxem Paulun kiteak mhunnttlem?
6 Punn thoddim Efezkaram kallkhantuch ravonk nant. ‘Tim atam Somia sangata ekvottant asat dekhun uzvaddant asat’ mhunn Paulun sanglem. (Ef. 5:8) Mhunnche tim atam Jehovachea Utra pormonnem jieunk laglolim, jem uzvadda porim tankam margdorxon ditalem. (St. 119:105) Toxench, tannim khottea dhormancheo chali ani onoitik vagnnuk soddun dil’li. Hea toren, Jehovachi bhokti korunk ani taka manvota tem korunk tannim apleachean zata tem soglem kelem, ani tim ‘Devachi dekh gheunk laglim.’—Ef. 5:1.
7. Amchea modem ani zaitea Efezantlea Kristanvam modem kitem ek sarkem asa?
7 Efezkaram bhaxen, sot xikchea poilim ami pasun khottea dhormachea ani onoitikponnachea kallkhant aslim. Amchea modlim thoddim zannam khottea dhormachea sombondit festam-porbo monoitalim vo onoitik jivit jietalim. Punn borea-vaitta vixim Jehovache dorje ami xiklim tednam ami bodlav kele, ani Jehovak manvota tea toren jieunk xiklim. Haka lagon amkam zaitim besanvam mell’lleant. (Iz. 48:17) Punn kallokh soddun ‘uzvaddachim bhurgim koxim cholot ravop’ sodanch sompem asona. Tor oxem korit ravonk ami kitem korunk zata?
Image digitally reproduced with the permission of the Papyrology Collection, Graduate Library, University of Michigan, P.Mich.inv. 6238. Licensed under CC by 3.0
Paulun Efezkarank mogan dilʼlo solʼlo aiz amkam pasun faideak poddonk xokta (Peregraf 7 polloiat) b
KALLOKH POIS KORAT
8. Efezkarank 5:3-5-a pormonnem, Efezkaramnim kosleo vostu nakarunk zai asleo?
8 Efezkarank 5:3-5 vachat. Onoitik kallkhantlean pois ravonk Efezantlea Kristanvamnim Devak avoddnant teo vostu nakarit ravonk zai asleo. Zoxem tannim fokot onoitik kuddicho sombonduch nhoi, punn burxem ulovop pasun soddun diunk zai aslem. Osleo vostu tannim pois korunk nant zalear, tankam “Kristachea ani Devachea Rajeant koslench daiz mellchem na” mhunn Paulun tanchea ugddasak haddlem.
9. Amkam onoitik kamam korunk pavoitat toslea vostum thaun ami pois kiteak ravonk zai?
9 Ami pasun “kallkhachim upeog naslolim kamam” pois korit ravonk vavrunk zai. (Ef. 5:11) Hem kitlem khorem zaun asa ki ek munis kosli-i onoitik vost vo kitem-i burxem polloit, aikot vo tache vixim uloit ravta tednam to sompeponnim tem korunk pavta. (Ut. 3:6; Jak. 1:14, 15) Eka desant oxench ghoddlem. Thoinchim zaitim bhav-bhoinnam social media-cher ek grup korun eka-mekak message-o dhaddunk laglim. Poilim-poilim tanchem ulovop Jehova vixim ani tankam mellʼllolea sota vixim aslem. Punn sovkas-sovkas korun, Jehovak avoddna tea vostum vixim tim ulounk laglim. Ani uprant, tanchem ulovop choddxem sex-a vixim astalem. Hea grupantlea zaitea zannamnim uprant oxem sanglem ki heach burxea ulovpak lagon tim onoitik kuddicho sombond dovrunk pavlim.
10. Ami kitem chintlolem Soitanak zai? (Efezkarank 5:6)
10 Jehovachea nodre mukhar jem onoitik ani burxem asa tantunt kainch vaitt na, oxem ami chintlolem Soitanak zai. (2 Ped. 2:19) Soitanachi hi chal novi nhoi! Karonn to adim thaun lokank fosoit asa. Dekhun lokank kitem borem ani kitem vaitt, tache modem ontor vollkhonk kollona. (Iz. 5:20; 2 Kor. 4:4) Tea pasot choddxea pichʼcheramnim, serial-amnim ani website-imnim Jehovachea dorjeam add vochonk urba ditat tosleo vostu amkam pollounk mellttat. Toxench heo vostu kelʼlean mouza ieta, ani tem kelear kainch vaitt zaunchem na mhunn ami manlolem Soitanak zai.—Efezkarank 5:6 vachat.
11. Angela-chea onnbhovantlean Efezkarank 5:7-ant dilʼlo solʼlo apnnavop gorjecho mhunn amkam koxem kolltta? (Chitr pasun polloiat.)
11 Toxench, Jehovachea dorjeam pormonnem jienant tanchea sangata ami ixttagot kelʼli Soitanak zai. Tea pasot, apostl Paulun Efezkarank oxem sanglolem: “Tanchea sangata bhagidar zainakat.” (Ef. 5:7) Punn aiz ami Efezkaram poros chodd chotrai dovrunk zai, karonn ami social media vorvim pasun ixttam korunk xoktat. Ani social media kitlem dhokeachem zaunk xokta tea vixim Asia-nt ravpi Angela-cho amkam onnbhov asa. a Tem sangta: “Sovkas-sovkas korun, mhojem chintop bodolʼlem. Bible-antlea totvam pormonnem jienant toslim ‘ixttam’ kelear, toxench Jehovak manvona toslem jivit jielear pasun, tantunt kainch vaitt na oxem hanv chintunk laglem.” Punn mogall vhoddilamnim Angela-k goroz tem bodlav korunk modot keli. Tem sangta: “Atam hanv social media-cher nhoi, punn Jehova ani tachem chintop kitem tem zannam zaunk chodd vell sartam.”
Borim ixttam vinchun kaddlolean Jehovache dorje pallunk amkam sompem zatolem (Peregraf 11 polloiat)
12. Jehovache dorje pallunk amkam koxi modot zatoli?
12 Tor onoitik kamam kelear tantunt kainch vaitt na, oslem sonvsarachem chintop pois korunk ami vavrunk zai. Karonn tem chukichem mhunn ami zannant. (Ef. 4:19, 20) Ami amkanch vicharum-ia: ‘Jehovache dorje pallinant toslea munxam sangata ixttagot korop hanv pois korunk vavurtam kai? Zoxem iskolantlim, kamachea zagea voilim vo her zannam borabor gorje bhair vell sarina zaunk hanv chotrai dovortam kai? Hanv dusreanchem chintop ani vagnnuk sosun ghena oxem konnem-i mhunnttlear pasun, Jehovache dorje pallunk hanv dhir dakhoitam kai?’ Toxench, sobhent pasun ixttam vinchun kaddttana ami dhean diunk zai mhunn 2 Timotak 2:20-22-antlean amkam kolltta. Karonn soglinch ghoddie amkam Jehovak visvaxi ravonk modot korchimnant.
“UZVADDACHIM BHURGIM KOXIM” CHOLOT RAVAT
13. ‘Uzvaddachim bhurgim koxim cholot ravop’ hacho orth kitem? (Efezkarank 5:7-9)
13 Efezantlea Kristanvamnim kallokh soddun ‘uzvaddachim bhurgim koxim cholot ravchim’ mhunn Paulun tankam urba dili. (Efezkarank 5:7-9 vachat.) Hacho orth, khorim Kristanvam zalʼlean amchi vagnnuk sodanch bori asonk zai. Hem ami koxem korunk zata? Ek vatt mhunnttlear, ami sodanch Bible ani Bible-acher adarit prokaxonam vachun tacher obheas korunk zai. Oxem kortana, ami Jezuchi dekh gheunk zai ani tannem kitem xikoilam tem ami pallunk zai, karonn Jezu “sonvsaracho uzvadd” zaun asa.—Ju. 8:12; Mho. 6:23.
14. Povitr xokti amkam koxi modot korunk xokta?
14 Hea onoitik sonvsarant nitoll ravop khub kotthin asa dekhun, “uzvaddachim bhurgim koxim” cholot ravonk amkam Devachea povitr xoktechi pasun goroz asa. (1 Tes. 4:3-5, 7, 8) Hi povitr xokti amkam, Devachem chintop apnnainant toslea lokanchem chintop nakarunk, toxench ‘sogle torechem boreponn ani nitivontponn’ vaddounk modot korta.—Ef. 5:9.
15. Povitr xokti amkam koxi melltta? (Efezkarank 5:19, 20)
15 Povitr xokti mellonk ek vatt mhunnttlear, ami ti magonk zai. Karonn Jehova ‘aplea lagim magtoleank povitr xokti ditolo’ mhunn Jezun sanglolem. (Luk. 11:13) Toxench, ami mittingent Jehovak vakhannttat tednam pasun amkam povitr xokti melltta. (Efezkarank 5:19, 20 vachat.) Hea toren povitr xoktechea modotin, Jehovak manvota tea ritin jieunk amkam modot zatoli.
16. Xanneponnan nirnnoi gheunk amkam koxi modot zatoli? (Efezkarank 5:10, 17)
16 Amkam mhotvache nirnnoi gheunk poddttat tednam “Somiak khoincheo vostu manvotat” tem ami zannam zaunk zai ani uprant tea pormonnem kam korunk zai. (Efezkarank 5:10, 17 vachat.) Amchea poristhitik lagu zatat toslim totvam zannam zalʼlean, ami Devachem chintop zannam zaunk pavtat. Ani uprant ami him totvam apnnaitat tednam ami xanneponnan nirnnoi gheunk pavtat.
17. Ami amcho vell bore toren koso uzar korunk zata? (Efezkarank 5:15, 16) (Chitr pasun polloiat.)
17 Paulun Efezantlea Kristanvank tancho vell bore toren uzar korunk solʼlo dilo. (Efezkarank 5:15, 16 vachat.) Ani ho solʼlo amkam-i lagu zata. Karonn amcho dusman Soitan zaka ‘noxtto’ mhunnttla, to amkam hea sonvsarachea vostumnim guspaun dovrunk sodhta. (1 Ju. 5:19) Tor Jehovachi seva poilea zagear dovorchea bodlek, ami poixe, kam ani xikxonnacheruch sompeponnim dhean ditolim. Ani oxem kelear, Jehovachi seva korunk amkam velluch aschona ani ami sonvsarachea lokam bhaxen chintʼtat mhunn dakhoitolim. Heo vostu chukicheo nhoi tem khorem. Punn ami kednanch tankam amchea jivitant poilo zago diunk zaina. Tor ami “uzvaddachim bhurgim koxim” cholot ravtolim zalear ami ‘amcho vell bore toren uzar korunk zai,’ mhunnche ami chodd mhotvachea vostuncher dhean diunk zai.
Paulun Efezantlea Kristanvank tancho vell bore toren uzar korunk sanglo (Peregraf 17 polloiat)
18. Aplo vell bore toren uzar korunk Donald-an kitem kelem?
18 Jehovachi seva anik chodd korunk ami vatto sodhunk zai. Ani hench South Africa-ant ravpi Donald-an kelem. To mhunntta: “Hanvem mhojea jivitant khoim bodlav korunk zai tem hanvem chintlem ani porgottnni vaddounk mhaka modot kor mhunn hanvem Jehova lagim vinoti keli. Hanv porgottnnent anik vell sarunk pavtolo toslem ek kam sodhunk, mhaka modot kor mhunn hanvem Jehova lagim magnnem kelem. Ani Jehovan mhaka modot keli. Hea pasot uprant, hanv ani mhoji bail purnn vellachi seva korunk pavlim.”
19. “Uzvaddachim bhurgim koxim” cholot ravonk ami kitem korunk zata?
19 Paulun Efezkarank boroilʼlea chittintlean Jehovak visvaxi ravonk tankam modot zali. Tachea solʼleantlean amkam pasun modot zaunk xokta. Zoxem, monoronjon ani ixttam xanneponnan vinchun kaddunk amkam modot zata. Toxench, chukonastana Devachea Utracho obheas korunk amkam urba melltta. Karonn Devachem Utor uzvadda porim, ami kortat tea soglea vostumnim amkam margdorxon dita. Tea bhair, Devachi povitr xokti kitli mhotvachi tem amkam kolltta. Karonn povitr xoktechea modotin ami amchea jivitant bore gunn vaddounk pavtat. Toxench, Paulucho solʼlo apnnailʼlean Jehovachea chintpa pormonnem xanneponnan nirnnoi gheunk amkam modot zata. Tor heo vostu kelear, ami kallokh soddun uzvaddant cholot ravonk pavtolim!
TUMCHO ZOBAB KTIEM?
-
Efezkarank 5:8-ant sanglolo ‘kallokh’ ani ‘uzvadd’ kitem zaun asa?
-
‘Kallokh’ pois korunk ami kitem korunk zai?
-
‘Uzvaddachim bhurgim koxim cholot ravonk’ ami kitem korunk zata?
GIT 95 Sotacho Uzvadd Vaddot Voita
a Thoddim nanvam bodolʼleant.
b CHITRACHI MAHITI: Paulun Efezkarank boroilʼlea chittichi ek adli kopi hanga dakhoilea.
