1. Jehovachea songottnnecho bhag asop amkam ek vhodd besanv kiteak zaun asa?

 AMI nimannea disamnim jietat. Ani jivit disan-dis kotthin zait asa. Punn Jehovachea songottnnecho bhag asop amkam ek vhodd besanv zaun asa. Karonn Jehova amkam mogall bhav-bhoinnam dita, jim ekvottan jietat ani amkam modot korunk toiar astat. (St. 133:1) Toxench, famili modem ekvott samballunk to amkam modot korta. (Ef. 5:33–6:1) Tea bhair, to amkam zannvai dita, jea udexim amkam chodd usko korina zaunk modot zata ani khuxalkai melltta.

2. Ami kitem korunk zai, ani kiteak?

² Tori astana, visvaxiponnan Jehovachi seva korit ravonk ami khub vavr korunk zai. Karonn thodde pavtti dusreanchea utrank vo korneank lagon ami niraxi zaunk xoktat. Itlench nhoi, amchea chukink lagon, ani khas korun ami tich chuk porot-porot kortat zalear, ami bejar zaunk xoktat. Tor hea lekhant, (1) bhav-bhoinnam amkam dukhoitat tednam, (2) amcho kazari sangati amkam niraxi korta tednam ani (3) amchea chukink lagon ami bejar zatat tednam Jehovachi seva korit ravonk amkam koxi modot zatoli tem polloum-ia. Ani oxem kortana visvaxiponnan Jehovachi seva korit ravlim toslea tin Bible-antlea udharonnancher dhean dium-ia.

BHAV-BHOINNAM AMKAM DUKHOITAT TEDNAM

3. Ami kiteak niraxi zaunk xoktat?

³ Ami kiteak niraxi zaunk xoktat? Thoddea bhav-bhoinnanche gunn amkam tiddok haddunk xoktat, vo thoddim tanchea utramnim ani korneamnim amkam dukhounk xoktat. Toxench, vhoddil pasun chuki korunk xoktat. Hea soglea karonnank lagon,  ‘hem khorench Jehovachem songotton kai’ mhunn thoddim dubhavtat. Tor “ekchitan” bhav-bhoinnam sangata Jehovachi seva korit ravchea bodlek, tankam dukhoilam tanche lagim ulovop vo mittingek vochop pasun tim bond korit. (Zef. 3:9) Oslea poristhitint Bible-antlea eka udharonnantlean amkam modot zaunk xokta.

4. Apostl Pauluk niraxi zaunk koslim karonnam aslim?

⁴ Amkam konnachem udharonn asa? Bhav-bhoinnam opurnn asat mhunn apostl Paulu zannam aslo. Udharonnak, to ek xis zala mhunn Jeruzalemantlea sobhent aslolea thoddea bhav-bhoinnamnim manun gheunk na. (D.I. 9:26) Uprant, thoddea bhav-bhoinnamnim tacheo chaddio keleo. (2 Kor. 10:10) Toxench eka vhoddilan, bhav-bhoinnank addkholl zaunk xoktali tosli ek chuk keli tem Paulun polloilem. (Gal. 2:11, 12) Tea bhair, tacho ek lagxilʼlo ixtt Markun taka dukhoilo. (D.I. 15:37, 38) Tor apleak dukhoilʼlim tea bhav-bhoinnam sangata Paulun ulovop bond korunk zatalem. Tori astana, to aplea bhav-bhoinnancho mog korit ravlo ani visvaxiponnan Jehovachi seva korit ravlo. Oxem korunk taka koxi modot zali?

5. Paulun bhav-bhoinnank kiteak bhogxilim? (Koloskarank 3:13, 14) (Chitr pasun polloiat.)

⁵ Pauluk bhav-bhoinnancho khub mog aslo dekhun tannem tanchea chukincher nhoi, punn borea gunnancher dhean dilem. Toxench tannem dusreank bhogxilim. Ani oxem korunk tannem amkam-i urba dilea. (Koloskarank 3:13, 14 vachat.) He gunn tannem koxe dakhoile tacher dhean diat. Poilea mixinori bhonvdde vellar Marku taka soddun gelo tednam, to tacher bejar zaun ravonk na. Hem amkam koxem kolltta? Tannem Koloskarank boroilʼlea chittint, Markuchea borea gunnancher dhean dilem ani ‘Marku udexim apleak khub bhuzvonn mellʼllea’ mhunn sanglem. (Kol. 4:10, 11) Toxench, Romant bondkhonnint astana apleak modot korunk, khas korun Markuk dhadd mhunn tannem sanglem. (2 Tim. 4:11) Hoi, Paulun bhav-bhoinnank bhogxilim ani tancho mog korop soddun diunk na. Tor ami Paulu koddlean kitem xikonk zata?

6-7. Bhav-bhoinnamnim chuki kelear pasun tancho mog korit ravonk amkam koxi modot zatoli? (1 Juanv 4:7)

⁶ Ami kitem xiktat? Ami amchea bhav-bhoinnancho mog korit ravlolim Jehovak zai. (1 Juanv 4:7 vachat.) Tor tannim amkam dukhoilear pasun, tannim mudʼdom toxem korunk na ani tim Bible-antlea totvam pormonnem jieunk vavr korit asat mhunn ami ugddas dovrunk zai. (Mho. 12:18) Toxench, ami chuki kelear pasun Jehova amcho rag gheun bosona, punn to amcho mog korta dekhun amkam bhogxita. (St. 103:9) Tor ami-i Jehovachi dekh  gheun amchea bhav-bhoinnank bhogsunk zai.—Ef. 4:32–5:1.

⁷ Tea bhair ugddas dovrat, xevott lagim pavta toso amkam anikui dhumallo sosunk poddot vo amchea bhavarthak lagon amkam bondkhonnint ghalit. Oslea vellar, amkam bhav-bhoinnanchi anikui chodd goroz poddttoli. (Mho. 17:17) Hea vixim, Spain-ant vhoddil mhunn seva kortolea, bhav Josep-acho amkam onnbhov asa. a Military-nt bhag gheunk na dekhun, taka toxench anik thoddea bhavank bondkhonnint ghatle. Bhav sangta: “Ami sogloch vell borabor astale mhunnttoch, thodde pavtti ami eka-mekak rag haddttale. Punn ami eka-mekak sosunk ani bhogxit ravonk zai aslem. Oxem kelʼlean, ami ekvott samballunk ani eka-mekachi rakhonn korunk xokle. Karonn amchea bhonvtonnim, Jehovachi seva korinant tosle herui koidi asle. Ek pavtti, mhojea hatak mar laglolo dekhun to bandun dovorlolo. Hea pasot, hanv kainch korunk xokonaslom. Punn eka bhavan mhoje kopdde dhuile ani her vattamnim pasun mhoji kallji ghetli. Tor mhaka khorench goroz asli tednam, hanvem bhavancho mog onnbhovlo.” Khorench, ami amchea bhav-bhoinnank bhogsunk ani eka-meka sangata xanti samballunk atanch vavr korop kitlem gorjechem asa nhoi?

AMCHO KAZARI SANGATI AMKAM NIRAXI KORTA TEDNAM

8. Kazari zoddpeank koslea oddchonneancho fuddo korcho poddtta?

⁸ Ami kiteak niraxi zaunk xoktat? Soglea kazari zoddpeank oddchonneancho fuddo korunk poddtta. Hea vixim Bible-ant pasun sanglam, ki kazar zatat tankam ‘kuddiche dukh-tras sosunk poddttole.’ (1 Kor. 7:28) Karonn tim opurnn astat, tankam veg-veglle gunn astat, tanchi avodd veg-veglli asta, ani tim ghoddie veg-veglle sonskrutintlim astat. Toxench kazar zalea uprant, tankam tanchea sangateache osle gunn dison ie-it, je kazar zaunchea poilim tankam khobor nasli zait. Hea karonnank lagon, tanche modem vad-vivad zaunk xokta. Toxench tanchi chuk vollkhon gheun ti poristhiti suttavi korchea bodlek, tim ghoddie eka-mekak bottam dakhoit. Ani oslea vellar kuxin ravlear vo divors ghetlear odik borem oxem tankam disot. Punn oxem kelear, tim khorench khuxal astolim kai? b Hea vixim ami Bible-ant sanglolea eke bailechea udharonnacher dhean dium-ia. Tichea kazari jivitant zaiteo oddchonneo asleo. Tori astana ti Jehovak visvaxi ravli.

9. Abigailak kosli oddchonn asli?

⁹ Amkam konnachem udharonn asa? Bible sangta ki Abigailacho ghov Nabal, ekdom krur aslo ani vaitt toren vagtalo. (1 Sam. 25:3, NW) Tor oslea dadlea sangata ravop, Abigailak kitlem kotthin zalem astolem nhoi! Aplem kazari jivit moddunk tika ek bori sondhi asli. Karonn Nabalan, David zo Izraelacho raza zauncho aslo ani tachea munxancho opman kelʼlo dekhun David taka jivexim marunk sodhtalo. (1 Sam. 25:9-13) Tor Davidan aplea ghovak marum di mhunn chintun, Abigail taka soddun pollon vochonk xoktali. Punn tinnem toxem korunk na. Tachea bodlek, Nabalak sodd mhunn tinnem Davida lagim vinoti keli. (1 Sam. 25:23-27) Tinnem oxem kiteak kelem?

10. Kotthin aslear pasun Abigailan aplem kazar kiteak moddunk na?

¹⁰ Abigail Jehovacho mog kortali ani kazara vixim Jehovachea dorjeank ti man ditali. Jehovan Adanvak ek bail dili tednam, taka kitem sanglolem tem Abigail chodd korun zannam asli. (Ut. 2:24) Tor Jehovache nodren kazar  povitr mhunn tika khobor asli. Ani Devak manvota tem ti korunk sodhtali dekhun, tichea ghorabeak, mhunnche tichea ghovak pasun salvar korunk zata tem soglem tinnem kelem. David Nabalak jivexim marunk sodhta mhunn tika kollʼllem tednam, tinnem rokddench panvl ghetlem. Ani tichi chuk nastana pasun tinnem Davida lagim bhogsonnem maglem. Tor, Abigailan apleach vixim chintinastana dhir dakhoilo mhunn Jehovak kitlem borem dislem astolem nhoi! Abigaila thaun ghov-bailamnim kitem xikonk zata?

11. (a) Kazari zoddpeamnim kitem kelʼlem Jehovak zai? (Efezkarank 5:33) (b) Aplem kazar samballunk Carmen-an jem kelem tantuntlean tumi kitem xiklim? (Chitr pasun polloiat.)

¹¹ Ami kitem xiktat? Eka-meka sangata ravop kotthin aslear pasun, kazari zoddpim sangata ravlolim Jehovak zai. Tor kazari jivitant ietat teo oddchonneo suttaveo korunk ani eka-mekak svarth naslolo mog ani resped dakhounk kazari zoddpim khub vavr kortat tednam, Jehova tem polloun khuxal zata. (Efezkarank 5:33 vachat.) Hea vixim amkam Carmen-acho onnbhov asa. Kazar zaun sumar sov vorsam uprant, ti Jehovachea Sakxeam sangata Bible xikonk lagli ani magir tinnem bautizm ghetlo. Punn hea vixim tichea ghovak koxem dislem tem ti sangta: “Mhojea ghovak mhozo nirnnoi avddonk na ani to ekdom ragar zalo. To mhaka opman kortalo ani mhaka soddun voitolo mhunn dhomki ditalo.” Tori astana, 50 vorsam meren aplem kazar samballunk, toxench aplea ghovak mog ani resped dakhounk Carmen-an khub vavr kelo. Ti fuddem mhunntta: “Vorsam soron gelim toxim, mhojea ghovak koxem bhogta tem anik bore toren somzonk ani tachea sangata doiall toren ulounk hanv xikli. Kazar Jehovache nodren khub povitr asa hem zannam zalʼlean, tem samballunk hanvem mhojean zata tem soglem kelem. Hanv Jehovacho mog kortam dekhun, mhojea ghovak soddun voichea vixim hanvem kednanch chintunk na.” c Tor tumchea kazari jivitant pasun oddchonneo ailear, Jehova tumkam tenko ditolo ani tumchem kazar samballunk tumkam modot kortolo mhunn tumi visvas dovrunk zata.

AMCHEA CHUKINK LAGON AMI BEJAR ZATAT TEDNAM

12. Ami gombhir patok kelem zalear kitem zaunk xokta?

¹² Ami kiteak niraxi zaunk xoktat? Ami ek gombhir patok kelem zalear ami ekdom niraxi zaunk xoktat. Ani amchea patkank lagon ‘amchem kalliz dukhovta khontovta ani mon kollvollta vollvollta’ mhunn Bible sangta. (St. 34:18) Oxench bhav Robert-ak ghoddlem. Tannem zaitim vorsam poriant sobhecho sevok zaunk khub vavr kelʼlo. Punn tannem ek  gombhir patok kelem tednam tannem Jehovak ghat kelo mhunn taka kollʼllem. To sangta: “Hanvem kitli vhoddli chuk kelʼli tem mhaka kollʼllem tednam, mhojem ontoskornn mhaka khaunk laglem ani hanvem mhoji monachi xanti hogddaili. Hanv roddon-roddon Jehova lagim magnnem kortalom. Punn hanvem Jehovak ekdom niraxi kela dekhun to mhojim magnnim atam aikochona oxem hanv chintʼtalom.” Ami pasun ek gombhir patok kelem zalear ami itlim niraxi zaunk xoktat ki Jehovan amkam soddun dileant, ani atam tachi seva korun kainch faido na oxem ami chintunk xoktat. (St. 38:4) Tumkam toxench dista zalear, Bible-antlea eka udharonnantlean tumkam modot zatoli. Tannem-i ek gombhir patok kelʼlem, punn uprant to visvaxiponnan Jehovachi seva korit ravlo.

13. Apostl Pedrun koslem gombhir patok kelem, ani tachea poilim tannem anikui kosleo chuki keleo?

¹³ Amkam konnachem udharonnam asa? Jezu morchea adlea ratik apostl Pedrun zaiteo chuki kelʼleo, ani taka lagon to uprant ek gombhir patok korunk pavlo. Poilem mhunnttlear, taka svotacher chodduch visvas aslo. Tor, dusrea apostlamnim Jezuk soddlear pasun, apunn kednanch soddchona mhunn tannem boddai marli. (Mk. 14:27-29) Uprant Gethsemaniche bagent astana, zagrut ravchea bodlek to nhidon poddlo. (Mk. 14:32, 37-41) Magir ek zomo dandde ani tolvari gheun Jezuk dhorunk ailo tednam, Pedru Jezuk soddun pollon gelo. (Mk. 14:50) Ani xevottak tannem Jezuk tin pavtti nakarlo ani apunn taka vollkhona mhunn soput pasun ghetlo. (Mk. 14:66-71) Hem gombhir patok kelea uprant, Pedruk koxem bhoglem? Ghoddie tachem ontoskornn taka sotaunk laglem. Dekhun to ekdom khontin bhoron dukhamnim roddonk laglo. (Mk. 14:72) Tor tachea ixtt Jezuk jivexim marlea uprant, Pedruk kitli khont bhogli ani to samkoch tuntton gelo astolo nhoi!

14. Pedru Jehovachi seva kiteak korit ravonk pavlo? (Masikachem fuddlem chitr polloiat.)

¹⁴ Tori astana, Pedru Jehovachi seva korit ravlo. Oxem to kiteak korunk pavlo? Poilem mhunnttlear, to eksuro ravonk na. To her xisank mellonk gelo ani tanchea udexim taka khub urba mellʼlli astoli. (Luk. 24:33) Dusrem mhunnttlear, Jezu jivont zalea uprant to Pedruk mellʼllo. Karonn to chodd korun taka urba diunk sodhtalo. (Luk. 24:34; 1 Kor. 15:5) Toxench uprant, Jezu aplea xisam sangata aslo tednam, tannem Pedruchea chukink lagon taka tapounk na. Punn taka anikui vhodd zobabdareo ditolo mhunn sanglem. (Ju. 21:15-17) Tor Jezu apleacho azunui mog korta mhunn Pedruk khatri asli ani her xisamnim taka modot keli dekhun, to Jehovachi seva korit ravonk pavlo. Tor ami Pedru koddlean kitem xikonk zata?

15. Amkam kosli khatri asloli Jehovak zai? (Nehemias 9:17b; Romkarank 8:38, 39) (Chitr pasun polloiat.)

 ¹⁵ Ami kitem xiktat? Jehova kallzantlean amcho mog korta, ani to amkam bhogsunk toiar asa hi khatri amkam asloli taka zai. (Nehemias 9:17b; Romkarank 8:38, 39 vachat.) Ami patok kortat tednam amchem ontoskornn amkam sotaita. Ani oxem zavop borem zaun asa. Punn Jehovan amcho mog korop bond kela ani to amkam kednanch bhogxicho na oxem ami chintchem nhoi. Ami rokddich modot gheunk zai. Bhav Robert-an oxench kelem. To sangta: “Tallnni nakarunk hanv svotacher patieun ravlom dekhun hanvem patok kelem.” Punn uprant, tannem vhoddilanchi modot gheunk zai mhunn taka kollʼllem. To fuddem sangta: “Hanvem oxem kelem tednam Jehova azunui mhozo mog korta, ani to mhaka bhogsunk toiar asa mhunn mhaka kollon ailem. Toxench vhoddilank pasun mhoji kallji asa mhunn hanv zannam zalom. Ani Jehovan mhaka soddun diunk na mhunn tannim mhaka khatri dili.” Tor ami poschatap kelear, goroz ti modot ghetlear, ani amcheo chuki porot korina zaunk khub vavr kelear, Jehova amkam bhogxitolo ani amcho mog korop kednanch soddun diuncho na mhunn ami khatri dovrunk zata. (1 Ju. 1:8, 9) Hi khatri aslolean, amchea lagim gombhir chuk ghoddlear pasun ami visvaxiponnan Jehovachi seva korit ravonk pavtolim.

16. Jehovachi seva korit ravonk tumi kiteak nichov kela?

¹⁶ Hea kotthin vellar Jehovachi seva korunk ami zo vavr kortat, tacho Jehova khub valor korta. Tor niraxiponn ailearui, ami Jehovache modotin tachi seva korit ravonk xoktat. Bhav-bhoinnamnim amkam dukhoilear pasun, ami tankam bhogsun tancho mog korit ravonk zata. Toxench kazari jivitant oddchonneo ailearui, teo suttaveo korunk amchean zata tem korun, ami Jehovacho mog kortat ani tannem kelʼlea kazarachea manddavollik resped ditat mhunn dakhounk zata. Tea bhair, ami gombhir patok kelem zalear ami Jehovachi modot gheunk zata, to amcho mog korta ani amkam bhogsunk toiar asa mhunn ami khatri dovrunk zata, ani tachi seva korit ravonk zata. Tor hea toren ‘ami borem kam korop soddun dinant’ tednam Jehova amkam zaitim besanvam ditolo mhunn ami khatri dovrunk zata.—Gal. 6:9.