1-2. Bautizm gheunchea poilim eka munxan kitem korunk zai?

 GELʼLEA panch vorsamnim, dha lakʼkham poros chodd lok bautizm gheun Jehovachim Sakxi zaleant. Choddxea zannank, Timota bhaxen ‘lhan astananchʼ sot mell’llem. (2 Tim. 3:14, 15) Punn thoddim Jehova vixim vhoddlim zaun, ani thoddim zanntte piraier xiklim. Kaim vorsam fatti, eke bailen Jehovachea Sakxeam lagim Bible xikon 97 vorsanche piraier bautizm ghetlo!

² Tum Sakxeam sangata Bible xikta vo Sakxi aslolea eke familint vaddla zalear, tum bautizm gheunchea vixim chintʼta kai? Hoi zalear, tunvem ek boro dhei dovorla. Punn bautizm gheunchea poilim tunvem tujem jivit Jehovak somorpit korunk zai. Tor somorponn mhunnttlear kitem, ani tum somorponn korun bautizm gheunk purto asa zalear tunvem kiteak fattim sorchem nhoi, tem ami hea lekhant polloitolim.

SOMORPONN MHUNNTTLEAR KITEM?

3. Jehovak somorponn kelʼlim Bible-antlim thoddim udharonnam diat.

³ Bible-a pormonnem, somorponn kelʼlo ek munis eke khas toren Jehovachi seva korunk bhettoilʼlo astalo. Izrael raxttr  Jehovak somorpit kelʼlem raxttr aslem. Punn tantunt aslolea thoddeank, eke khas toren Jehovachi seva korunk vinchun kaddlolim. Zoxem, Aaron. Tachea muddaxeacher ‘bhettounnecho bhangaracho toktto vo pott’tti’ asli. (Lev. 8:9) Hantuntlean, taka eke khas toren, mhunnche Izraelacho mha-iadnik mhunn seva korunk vinchun kaddlolo mhunn dison ietalem. Toxench Nazarit pasun eke khas toren Jehovachi seva korunk bhettoilʼlim aslim. “Nazarit” hem utor, nazirʹ hea Hebrev utrantlean ghetlam, zacho orth, “Kuxin Kaddlolo,” vo “Ek Khas Torechi Seva Korunk Bhettoilʼlo.” Ani Nazaritamnim Moizesa udexim dilʼlea Kaideant aslole thodde khas kaide pallunk zai asle.—Lok. 6:2-8.

4. (a) Ami Jehovak amchem jivit somorpit kortat tednam ami kitem kortat? (b) Apnnakuch ‘nakarop’ mhunnttlear kitem? (Chitr pasun polloiat.)

⁴ Ami Jehovak amchem jivit somorpit kortat tednam, ami Jezuchim xis zatat ani Jehovachi khuxi korop amchea jivitant poilea zagear dovortat. Oxem korunk ami kitem korunk zai? Jezun sanglolem: ‘Konnui mhojea fattlean ieunk sodhta zalear, tannem apnnakuch nakarcho.’ (Mt. 16:24) ‘Apnnakuch nakarcho’ mhunn bhaxantor kelʼlea Grik utrancho orth, “svota pasot jieunchem nhoi” oso zaun asa. Tor Jehovak manvonant tosleo sogleo vostu ami nakartat. (2 Kor. 5:14, 15) Hantunt “kuddichim kamam” pasun mellon asat, zoxem onoitik kuddicho sombond. (Gal. 5:19-21; 1 Kor. 6:18) Tor ami Jehovacho mog kortat ani tache dorje amcheach borea pasot asat mhunn amkam khatri asa zalear, amkam te pallunk addkholl zaunchina. (St. 119:97; Iz. 48:17, 18) Hea vixim Nicholas nanvacho ek bhav oxem sangta: “Xinv pinzreant asat zalear tanchea thaun amchi rakhonn zata. Tor Jehovache dorje tea pinzrea sarke asat mhunn ami chintʼtat zalear dhokea thaun amchi rakhonn zata. Punn oxem ami chintinant zalear Jehovache dorje eka bondkhonni sarke asat mhunn ami chintunk xoktat, je ami korunk sodhtat tem korunk addaita.”

5. (a) Tumi Jehovak tumchem jivit koxem somorpit korunk zata? (b) Somorponn ani bautizm, hanchea modem kitem ontor asa? (Chitr pasun polloiat.)

 ⁵ Ami amchem jivit Jehovak koxem somorpit kortat? Hem ami magnnea udexim kortat. Tea magnneant ami Jehovak bhas ditat ki ami fokot tachich bhokti kortolim ani tachi khuxi korop amchea jivitant poilim dovortolim. Khorem mhunnttlear, ami ‘soglea kallzan, soglea jivan, soglea monan ani soglea bollan’ tacho mog korit ravtolim mhunn bhas ditat. (Mk. 12:30) Somorponn, Jehova ani amchea modem asta. Dusrim tem pollounk xokonant. Punn ami bautizm ghetat tednam, ami Jehovak somorponn kelam mhunn bhav-bhoinnam pollounk xoktat. Somorponnachea vellar ami Jehovak bhas ditat ti ekdom gombhir zaun asa. Tor ami hi bhas samballunk sodhtat ani Jehovak pasun ami toxench kelʼlem zai.—Up. 5:3, 4.

AMI JEHOVAK SOMORPONN KITEAK KORTAT?

6. Ami Jehovak somorponn kiteak kortat?

⁶ Ami Jehovak somorponn korunk mukhel karonn mhunnttlear, ami tacho mog kortat. Ho mog bexttoch vaddona. Punn tache vixim ani tachea udʼdhexa vixim ‘sarkem ginean’ ghetlolean ho mog vaddtta. (Kol. 1:9) Ami Bible-acho bore toren obheas kortat tednam amkam hea vostum vixim khatri zata: (1) Jehova khoreponnim asa, (2) Bible Devachea preronnan boroila, ani (3) Jehova apli khuxi purnn korunk aplem songotton uzar korta.

7. Jehovak amchem jivit somorpit korchea poilim ami kitem korunk zai?

⁷ Jehovak aplem jivit somorpit kortat tim Bible-antlim mullavim sotam zannam zatat, ani Devachea dorjeam pormonnem jietat. Toxench, tim jem kitem xikleant tea vixim dusreank  sangonk apleachean zata tem soglem kortat. (Mt. 28:19, 20) Jehova pasot tancho mog vaddla ani tim atam fokot tachich bhokti korunk sodhtat. Tumchea vixim kitem? Tumi hea toren Jehovacho mog kortat zalear, tumchea Bible xikoupeak vo tumchea avoi-bapaik khuxal korunk, toxench tumchim ixttam kortat mhunn tumi somorponn korun bautizm gheunchimnant. Punn tumi purnn kallzan Jehovacho mog kortat dekhun tumi hem panvl ghetolim.

8. Kitea vixim chintlolean ami ap-khuxen Jehovak amchem jivit somorpit korunk fuddem sortolim? (Stotr 116:12-14)

⁸ Jehovan amchea pasot jem kitem kelam tea vixim ami chintʼtat tednam, ami ap-khuxen amchem jivit taka somorpit korunk fuddem sortat. (Stotr 116:12-14 vachat.) Bible-ant, “dor ek borem ani poripurnn dennem” Jehova koddlean ieta mhunn sanglam. (Jak. 1:17) Ani hantuntlem sogleam-von vhoddlem dennem mhunnttlear, soddvonn. Karonn soddvonne vorvim ami Jehovachim ixttam zaunk xoktat, ani amkam sasnachea jivitacho bhorvonso melltta. (1 Ju. 4:9, 10, 19) Tor Jehovan amkam dakhoun dilʼlea vortea moga pasot ani tannem amkam dilʼlea her besanvam pasot, ami kitlim upkari asat tem dakhounk ami amchem jivit taka somorpit kortat. (D.S. 16:17; 2 Kor. 5:15) Hea vixim Sasnak Khuxalkaien Jieiat! pustokachea odheai 46, mudʼdo 4-ant anik mahiti asa. Toxench, hantunt tin minttancho ek video asa, zachem nanv Tumi Devak Kitem Diunk Zata?

SOMORPONN KORUN BAUTIZM GHEUNK TUMI TOIAR ASAT?

9. Dusrim bautizm ghetat mhunn ami bautizm gheunk kiteak fuddem soronant?

⁹ Punn somorponn korun bautizm gheunk tumi toiar nant oxem tumkam disot. Karonn Jehovachea dorjeam pormonnem tumi tumchea jivitant anik bodlav korche asat, vo tumcho bhavarth ghott korunk tumkam anik vell zai astolo. (Kol. 2:6, 7) Toxem zalear ugddas dovrat, thoddim rokddinch vaddavoll kortat punn thoddeank vell lagta. Ani soglinch tornnattim ekuch piraier somorponn korun bautizm ghenant. Tor tumi tumkanch dusream sangata sor korinakat. Punn tumi tumchea jivitant kosle bodlav korunk zai te zannam zaiat, ani tea pormonnem bodlav korat.—Gal. 6:4, 5.

10. Somorponn korun bautizm gheunk tumi toiar nant oxem tumkam dista zalear tumi kitem korunk zata? (“ Sotant Vaddoileant Tanchea Pasot,” hem boks pasun polloiat.)

¹⁰ Tori astana, tumi Jehovak somorponn korunk toiar nant oxem tumkam dista zalear, niraxi zainakat. Ho dhei melloun gheunk vavr korit ravat. Tumchea jivitant goroz te bodlav korunk, magnneant Jehova lagim modot magat. (Filp. 2:13; 3:16) Ani to tumchem magnnem aikotolo ani tacho zobab ditolo mhunn khatri dovrat.—1 Ju. 5:14.

THODDIM KITEAK FATTI SORTAT?

11. Apleak visvaxi ravonk Jehova amkam koso modot korta?

¹¹ Thoddim zannam somorponn korun bautizm gheunk toiar aslear pasun, toxem korunk fattim sortat. Karonn bautizm ghetlea uprant tanchea lagim ek gombhir patok ghoddot ani tankam sobhentlean bhair kaddit mhunn tim bhietat zait. Tumkam-i oslich bhirant dista zalear, Jehova tumkam taka ‘sobta vo manvota toxem vagon taka purnn toren khuxal korunk’ modot kortolo mhunn khatri dovrat. (Kol. 1:10) Toxench tannem aplea zaitea sevokank sarkem tem korunk boll dilam tea bhaxen, to tumkam-i boll ditolo mhunn ugddas dovrat. (1 Kor. 10:13) Ani Jehova oso korta dekhun fokot thoddeankuch sobhentlean bhair kaddunk poddtta.

12. Gombhir patkant poddona zaunk ami kitem korunk zai?

¹² Opurnn aslolean amkam tallnneo ieunk xoktat. (Jak. 1:14) Punn tallnni ieta tednam  tumi kitem kortolim tem tumi tharaunk zai. Karonn tumi kitem kortolim vo koslem jivit jietolim tem tumchea hatant asa. Punn thoddo lok mhunntta ki amkam koxem bhogta, vo ami kitem kortat tea vixim ami kainch korunk xokonant. Punn hem sarkem nhoi. Karonn amkam chukicheo vondovnneo ietat tednam ami teo pois korunk xoktat. Toxench, patkant poddona zaunk tumkam thoddeo vostu modot kortoleo. Zoxem, tumi dor disak Jehova lagim magnnem korunk zai, chukonastana Devachea Utracho obheas korunk zai, mittingek hajir zaunk zai ani tumchea bhavartha vixim dusreank sangonk zai. Oxem kelear, Jehovak dilʼli somorponnachi bhas samballunk tumkam modot zatoli. Punn hem visornakat ki hem soglem korunk Jehova tumkam modot kortolo.—Gal. 5:16.

13. Juzen amkam koslem borem udharonn dovorlam?

¹³ Tallnni ieta tednam tumi kitem kortolim tem poilinch tharailear, tumchi somorponnachi bhas samballunk tumkam sompem zatolem. Ani oxench kelʼlea adlea sevokanchim udharonnam amkam Bible-ant mellttat, jim amcheach bhaxen opurnn aslim, zoxem Juzechem udharonn. Bible-ant sanglam ki Potifarache bailen Juzek porot-porot tallnnent ghalcho proitn kelo. Punn tannem ‘sapuch nakarlem’ ani mhunnttlem: “Iedem vhoddlem noxtteponn korun kiteak mhonn Deva add hanv pap adarum?” (Ut. 39:8-10) Tor apleak tallnnent ghalche poilinch apunn kitem kortolo tem Juzen tharailʼlem. Tea pasot tallnni aili tednam, sarkem tem korunk taka sompem zalem.

14. Tallnni ieta tednam patkant poddona zaunk ami kitem korunk zata?

¹⁴ Tor ami Juzechi dekh koxi gheunk zata? Tallnni ieta tednam ami kitem kortolim tem ami atanch tharaunk zai. Zoxem, Jehova dves korta teo vostu ami rokddeoch nakarunk zai. Tea vostum vixim ami chintunk pasun zaina. (St. 97:10; 119:165) Oxem kelear, tallnni ieta tednam ami patkant poddchimnant. Karonn tea vellar ami kitem korunk zai tem amkam adim fuddench khobor astoli.

15. Ami ‘kallzantlean Jehovak sodhtatʼ mhunn koxem dakhounk zata? (Hebrevank 11:6)

¹⁵ Amkam mellʼllam tem sot mhunn amkam khatri asa. Ani ami purnn kallzan Jehovachi seva korunk sodhtat. Tori astana, amchem jivit taka somorpit korun bautizm gheunk ami fattim sortat zalear ami kitem korunk zata? Raza Davidan jem kelem tench ami korunk zata. Tannem Jehova lagim oxi vinoti keli: “Deva,  mhoji choukoxi kor ani mhojem ontoskornn topasun kadd, mhoji porikxa kor ani mhojim chintna vollkhun ghe. Vankddea margan hanv cholona mhonn polle, ani sasnanchea jivitachea margar mhojim panvlam ghal.” (St. 139:23, 24) Tor ‘kallzantlean Jehovak sodhtatʼ tancher to besanv ghalta. Ani ami somorponn korunk ani bautizm gheunk vavr kortat tednam ami oxench kortat mhunn dakhoitat.—Hebrevank 11:6 vachat.

JEHOVAK LAGIM SOROT RAVAT

16-17. Sotant vaddoileant tankam pasun Jehovan voddun haddleant mhunn ami koxim zannant? (Juanv 6:44)

¹⁶ Aplea soglea xisank Jehovan voddun haddleant mhunn Jezun sanglem. (Juanv 6:44 vachat.) Hem kitlem borem nhoi! Ani hem tumche vixim pasun khorem zaun asa. Karonn Jehova dor eka munxa bhitor kitem tori borem polloita, ani taka aplea lagim voddun haddtta. Tor aplea lagim voddun haddlolea munxak, tem mhunnttlear, tumkam pasun Jehova ek ‘vinchun kaddlolem vo moladik daiz’ mhunn lekhta.—D.S. 7:6.

¹⁷ Punn tumkam ghoddie tumchea avoi-bapain sotant vaddoileant zait. Tor tumchea avoi-bapaik lagon tumi-i sotant asat oxem tumi chintʼtat astolim. Punn Bible kitem sangta tem ugddas dovrat: “Devak lagim sorat, ani to tumchea lagim sortolo.” (Jak. 4:8; 1 It. 28:9) Tor Devak lagim soronk tum poilem panvl ghetat tednam, to-ui tuka lagim sortolo. Hacho orth Jehovan tujea avoi-bapaik sotant voddun haddleant dekhun tum-ui apxinch ailo oxem nhoi. Punn Jehovan dor ekleak, mhunnche tuka pasun aplea lagim voddun haddla. Tor konnui Jehovak lagim soronk poilem panvl gheta tednam, Jakob 4:8-ant sanglam toxem Jehova pasun taka lagim sortolo.—2 Tes. 2:13 sor korat.

18. Ami fuddlea lekhant kitem polloitolim? (Stotr 40:8)

¹⁸ Tor tumi tumchem jivit Jehovak somorpit korun bautizm ghetat tednam, Jezun kelʼlem toxench tumi kortat. Jehovachi khuxi korunk to ap-khuxen toiar zalo vo fuddem sorlo. (Stotr 40:8 vachat; Heb. 10:7) Tor bautizm ghetlea uprant pasun, visvaxiponnan Jehovachi seva korit ravonk tumkam koxi modot zatoli tem fuddlea lekhant polloum-ia.