1. Jehovachea thoddea visvaxi sevokank koxem disonk xokta?

 BIBLE sangta: “Jehovak tacho lok khub manvota.” (St. 149:4, NW) Hem kitlem borem zaun asa nhoi! Punn thodde pavtti thoddim itlim niraxi zatat ki tim chintunk lagtat: ‘Hanv Jehovak manvotam kai?’ Adlea kalla voilim Jehovachim zaitim visvaxi sevokam pasun itlim niraxi zalʼlim ki tankam-i oxench bhoglem.—1 Sam. 1:6-10; Job 29:2, 4; St. 51:11.

2. Jehovak konn manvololim zaunk xoktat?

² Bible spoxttponnim dakhoun dita ki opurnn munxam Jehovak manvololim zaunk xoktat. Koxim? Tannim Jezucher bhavarth dovrunk zai ani bautizm gheunk zai. (Ju. 3:16) Oxem korun, tannim poschatap kela ani Jehovachi khuxi kortolim mhunn taka bhas dilea, hem tim dusream hujir dakhoun ditat. (D.I. 2:38; 3:19) Ani Jehova lagim ixttagot zoddunk tim him panvlam ghetat tednam Jehova khub khuxal zata. Tor ami amchi somorponnachi bhas pallttat tea meren, amkam Jehovachi maniotai asta ani ami tachim lagxilʼlim ixttam zaun astat.—St. 25:14.

3. Ami khoinchea prosnanche zobab zannam zatolim?

³ Thodde pavtti apunn Devak manvonant oxem thoddeank kiteak dista? Ami Devak manvoleant mhunn Dev koso dakhoun dita? Ani ami Devak manvoleant hi khatri ami koxi ghott korunk zata?

APUNN DEVAK MANVONANT OXEM THODDEANK KITEAK DISTA?

4-5. Tumi kainch valorachim nant oxem tumkam dista zalear tumi kitem ugddas dovrunk zai?

⁴ Bhurgeponnar thaun amchea modlea zaitea zannank, ami kainch valorachim nant oxem dislam zait. (St. 88:15) Oxench bhav Adrian-an onnbhovlem. To mhunntta: “Hanv kainch valoracho nhoi mhunn hanv sodanch chintʼtalom. Lhan astana, mhoji famil Sobit Bagent jietoli, oxem hanv magnnem kortalom mhunn mhaka  ugddas asa. Punn thoim jieunk hanv svota purto asa mhunn mhaka disonaslem.” Toxench Tony, zachim avoi-bapui Sakxi naslim, to oxem sangta: “Mhojim mummy daddy mhozo mog kortat vo mhoje vixim tankam gorv bhogta mhunn tannim mhaka kednanch sangonk na. Tor hanvem kitlem-i kelear pasun, hanv tankam kednanch khuxal korunk pavchona mhunn hanv chintʼtalom.”

⁵ Tor tumi pasun kainch valorachim nant oxem tumkam thodde pavtti dista zalear, Jehovan svota tumkam aplea lagim voddun haddleant mhunn ugddas dovrat. (Ju. 6:44) To tumche bore gunn polloita, jea vixim tumkanch khobor na astoli. Ani sogleam poros to tumkam boro vollkhota. (1 Sam. 16:7; 2 It. 6:30) Tor tumi taka moladik asat mhunn Jehova tumkam sangta tednam, tumi tacher visvas dovrunk zata.—1 Ju. 3:19, 20.

6. Apnnem adim kelʼlea patkam vixim apostl Pauluk koxem bhoglem?

⁶ Sot xikchea poilim apnnem kelʼlea chukink lagon thoddeanchem ontoskornn tankam khata astolem. (1 Ped. 4:3) Toxench, visvaxiponnan Jehovachi seva korit asat tim pasun aplea oskotaiam add zhuztat astolim. Tumchea vixim kitem? Jehova tumkam kednanch bhogxicho na oxem thodde pavtti tumkam dislam kai? Toxem zalear, adlea visvaxi sevokank pasun oxench bhoglolem mhunn ugddas dovrat. Udharonnak, apostl Paulun aplea chukim vixim chintlem tednam, to khub niraxi zalo. (Rom. 7:24) Tannem poschatap korun bautizm ghetlolo tem khorem. Tori astana, apunn “apostlam modem kainch mhotv naslolom” ani “sogleant vhoddlo patki” oxem tannem mhunnttlem.—1 Kor. 15:9; 1 Tim. 1:15.

7. Tumi adim kelʼlea patkam vixim kitem ugddas dovrunk zai?

⁷ Tumi poschatap kelo zalear, tumcho mogall Bap Jehova tumkam bhogxitolo mhunn bhas dita. (Ne. 9:17b) Tor tumi adim kelʼlea patkam pasot tumkam kallzan thaun dukh bhogta zalear, Jehovan sanglolea bhaxen tannem tumkam bhogxileant mhunn tumi khatri dovrunk zata.—Kol. 2:13.

8-9. Kitlem-i kelear pasun ami Jehovak manvonant hem chintop ami koxem pois korunk xoktat?

⁸ Jehovache sevent ami amchem boreantlem-borem korunk sodhtat. Punn ami kitlem-i kelear pasun Jehovachi maniotai melloun gheunk xokonant oxem amkam disot. Amanda nanvache eke bhoinnik oxench dislem. Ti sangta: “Jehovak mhojem boreantlem-borem divop mhunnttlear, tache sevent anikui chodd vavr korit ravop oxem hanv chintʼtalem. Tea pasot, mhojean korunk zaina tem korunk hanv vavurtalem. Punn hanv tem korunk pavonaslem tednam, hanv niraxi zatalem ani Jehova pasun niraxi zata mhunn hanv chintʼtalem.”

⁹ Tor ami kitlem-i kelear pasun ami Jehovak manvonant, hem chintop ami koxem pois korunk xoktat? Jehova ek somjikaiecho Dev mhunn ami ugddas dovrunk zai. Amchean korunk zaina tachi to opekxa korina. Punn amchea poristhiti pormonnem ami amchem boreantlem-borem kortat tednam to khuxal zata. Toxench, ami Bible-antlea udharonnam vixim niall korunk zai. Zoxem apostl Pauluchem. Tannem zaitim vorsam poriant Jehovache sevent khub vavr kelo. Tannem pois-pois provas kelo ani zaiteo sobha pasun stapon keleo. Punn tachi poristhiti bodolʼli tednam, to adim kortalo titli porgottnni korunk xokonaslo. Hea karonnak lagon tannem Jehovachi maniotai hogddaili kai? Na. Apleachean zata tem to korit ravlo ani Jehovan taka besanvam dilim. (D.I. 28:30, 31) Teach bhaxen, ami Jehovache sevent thodde pavtti chodd vo unnem korunk pavtat astolim. Punn ami hem ugddas dovrunk zai ki ami Jehovache sevent kitlem kortat tem nhoi, punn tem kiteak lagon kortat tem taka chodd mhotvachem. Tor ami Jehovak manvoleant mhunn to koso dakhoun dita tem atam polloum-ia.

 AMI JEHOVAK MANVOLEANT MHUNN TO KOSO DAKHOUN DITA?

10. Ami Jehovak manvoleant mhunn to koso sangta? (Juanv 16:27)

¹⁰ Bible-a vorvim. Jehova aplea lokancho mog korta ani tim taka manvololim asat mhunn sangonk taka khub khuxi bhogta. Bible-ant amkam osleo don ghoddnneo vachunk mellttat, jednam Jehovan Jezuk to aplo opurbaiecho Put ani to apleak manvola mhunn sanglem. (Mt. 3:17; 17:5) Tor heach bhaxen tumi pasun Jehovak manvololim asat mhunn tannem tumkam mhunnttlolem zai kai? Aiz Jehova sorgar thaun amche lagim uloina tem khorem. Punn to amche lagim Bible-a vorvim uloita. Xubhvortomanamnim ami Jezuchim utram vachtat tednam, eka orthan tim utram Jehovan amkam mhunnttlolea sarkem zaun asa. (Juanv 16:27 vachat.) Karonn Jezun ekdom bore toren aplea Bapachi dekh ghetli. Tor aplea opurnn, punn visvaxi apostlank apli maniotai asa mhunn Jezun sanglolim utram Jehova amkam mhunntta oxem ami chintunk zata.—Ju. 15:9, 15.

11. Amcher dukh-tras ietat hacho orth ami Jehovachi maniotai hogddaunk na oxem ami kiteak mhunnonk zata? (Jakob 1:12)

¹¹ Aplea korneam vorvim. Jehova amkam modot korunk axeta, zoxem to amcheo gorzo purnn korta. Punn thodde pavtti, Joba bhaxen amkam vaitt ghoddtta tednam Jehova tem addaina. (Job 1:8-11) Amcher dukh-tras ietat hacho orth ami Jehovachi maniotai hogddailea oxem nhoi. Khorem mhunnttlear, tea vorvim ami Jehovacho kitlo mog kortat ani tacher visvas dovortat tem dakhounk amkam ek sondhi melltta. (Jakob 1:12 vachat.) Ani dukh-trasanchea vellar, Jehova amcho kitlo mog korta ani modot korta tem ami pollounk xoktolim.

12. Bhav Dmitrii-chea onnbhovantlean tumi kitem xiklim?

¹² Hea vixim Asia-ntlo bhav Dmitrii-cho amkam onnbhov asa. Tachem kam gelem ani zaite mhoine poriant taka dusrem kam mellona zalem. Tori astana, porgottnnechea kamant anik chodd vavr korunk tannem tharailem. Hea vorvim taka Jehovacher kitlo visvas asa tem to dakhounk sodhtalo. Punn zaito temp poriant taka dusrem kam mellonk na. Ani uprant taka ek gombhir duens zalem, zaka lagon to hantrunnar poddlo. Tor apunn ek boro ghov vo bapui nhoi ani apnnem Jehovachi maniotai hogddailea oxem to chintunk laglo. Punn ek dis sanjechea vellar tachi dhuv ek paper gheun aili. Tea paper-acher Izaias 30:15-ntlim utram boroilʼlim aslim, zoim mhunnttlam: “Xant ravun Mhojer visvas tthevxat tor, Hanv tumkam bollixtt kortolom.” Tache dhuven tachea khatti legim ieun oxem sanglem:  “Daddy, tum niraxi zata tednam hem vers ugddas kor.” Tor gorjecheo vostu zoxem jevonn, kopdde ani ravonk ek zago, hea babtint Jehovan tankam soddun diunk nant mhunn bhav Dmitrii-k kollon ailem. To sangta: “Hanvem xant ravon Jehovacher visvas dovrit ravonk zai aslem.” Tor tumi-i ek oddchonn sostat zalear, Jehovak tumchi kallji asa ani ti sosunk to tumkam modot kortolo mhunn khatri dovrat.

13. Ami Jehovak manvololim asat mhunn dakhounk to konnank uzar korta, ani koso?

¹³ Bhav-bhoinnam vorvim. Jehova bhav-bhoinnam vorvim ami taka manvololim asat mhunn dakhoun dita. Udharonnak, amkam goroz tea vellar, bhav-bhoinnam tanchea utram vorvim amkam urba di-it. Ani oxench Asia-ntle eke bhoinnin onnbhovlem. Tika zaitea trasancho fuddo korcho poddlo. Tichem kam gelem ani ti khub duent poddli. Uprant tichea ghovan ek gombhir patok kelem ani taka asloli vhoddilachi zobabdari hogddaili. Hea vellar tika koxem bhoglem tem ti sangta: “Hem soglem kiteak ghoddtta tem hanv somzonk xokonaslem. Hanvem ghoddie kosli tori chuk kelea ani Jehovachi maniotai hogddailea mhunn hanv chintʼtalem.” Jehovachi maniotai apleacher asa mhunn apleak khatri di mhunn tinnem Jehova lagim modot magli. Ani Jehovan hem koxem kelem tea vixim ti sangta: “Sobhentle vhoddil mhoje lagim uloile ani Jehova mhozo mog korta mhunn tannim mhaka khatri dili.” Toxench, thoddea vella uprant, tinnem porot Jehova lagim modot magli. Hea vellar kitem zalem tem ti sangta: “Teach disak sobhentlea bhav-bhoinnam koddlean mhaka ek chitt mellʼlli. Ani tea chittint aslolim bhuzvonnechim utram vachlea uprant, Jehovan mhojea magnneancho zobab dilo oxem mhaka dislem.” Khorench, dusreanchea doiall utram vorvim Jehovachi maniotai amcher asa mhunn to amkam khatri dita.—St. 10:17.

14. Amkam Jehovachi maniotai asa mhunn to anik koxe toren dakhoun dita?

¹⁴ Jehova bhav-bhoinnam vorvim amkam  goroz tednam solʼlo dita. Hea udexim pasun amkam tachi maniotai asa mhunn to dakhoun dita. Udharonnak poilea xekddeant, Jehovan apostl Pauluk 14 chitti borounk prerit kelo. Tea chittim vorvim, Paulun bhav-bhoinnank mogan ani ukteponnim solʼle dile. Tor Jehovan Pauluk oxem kiteak korunk lailem? Jehova amcho Bap zaun asa, amchem borem zalʼlem taka zai ani ‘to zancho mog korta’ tankam xist dita. (Mho. 3:11, 12) Tor amkam solʼlo melltta tednam, Jehova amcher bejar asa oxem ami chintchem nhoi. Khorem mhunnttlear, tea solʼlea vorvim amkam Jehovachi maniotai asa mhunn amkam khatri melltta. (Heb. 12:6) Jehova anik khoinchea vattamnim amkam tachi maniotai asa mhunn dakhoun dita?

AMI JEHOVAK MANVOLEANT MHUNN HER PURAVE

15. Jehova apli povitr xokti konnank dita ani hantuntlean amkam kiteak khatri melltta?

¹⁵ Jehovak jim manvotat tankam to apli povitr xokti dita. (Mt. 12:18) Tor ami amkanch vicharunk zata: ‘Povitr xokte udexim vaddounk zatat tosle gunn hanv dakhoitam kai?ʼ Sotant ieunchea poilim tumi jitlem pasiens dakhoitalim, tachea poros atam tumi chodd pasiens dakhoitat kai? Khorem mhunnttlear, jitle chodd ami povitr xokteche gunn vaddoitat titlech chodd ami taka manvololim asat mhunn amchi khatri ghott zatoli.—“ Povitr Xoktechem Foll Mhunnttlear . . . ” hem boks polloiat.

16. Bori khobor porgottunk Jehova konnank uzar korta, ani hem zannam zalʼlean tumkam koxem bhogta? (1 Tesalonikekarank 2:4)

¹⁶ Jehovak jim manvotat tankam to bori khobor porgottchi zobabdari dita. (1 Tesalonikekarank 2:4 vachat.) Bhoinn Jocelyn-a sovem kitem ghoddlem tacher dhean diat. Dusreank bori khobor porgottlolean tika faido zalo. Ek dis bhoinn Jocelyn khub niraxi asli. Ti sangta: “Hanv kainch kamachem na oxem mhaka dislem. Punn hanv pioneer seva kortalem, ani to mhozo sevent vochpacho dis aslo. Tor hanvem magnnem kelem ani porgottnni korunk bhair sorlem.” Tea sokallim Jocelyn-ak, Mary nanvachi ek bail mellʼlli. Ti tachea sangata Bible-acho obheas korunk toiar zali. Thoddea mhoineam uprant Mary-n sanglem ki apleak modot kor mhunn tinnem Deva lagim magnnem kelʼlem tednanch, Jocelyn-an tichea darar marlolem. Hea onnbhovantlean Jocelyn kitem xikli tem ti sangta: “Jehovan mhaka oxem mhunnttlolea sarkem zaun aslem, ‘Tum mhaka manvolam.’” Tor ami porgottnni kortat tim soglinch amchem aikonant tem khorem. Punn dusreank bori khobor  porgottunk ami amchean zata tem soglem kortat tednam, ami Jehovak khuxal kortat mhunn ami khatri dovrunk zata.

17. Bhoinn Vicky-chea utrantlean soddvonne vixim tumi kitem xiktat? (Stotr 5:12)

¹⁷ Jehovak jim manvotat tankam to soddvonnechea dennea vorvim faido melloun gheunk modot korta. (1 Tim. 2:5, 6) Punn Jezuchea bolidanacher bhavarth dovrun bautizm ghetlea uprant pasun, ami Jehovak manvonant oxem amkam dista zalear kitem? Toxem zalear, amkam koxem dista tacher nhoi, punn ami Jehovacher visvas dovrunk zai. Karonn soddvonnecher bhavarth dovortat tankam Jehova nitivont mhunn lekhta ani tankam besanvam ditolo mhunn bhas dita. (Stotr 5:12 vachat; Rom. 3:26) Soddvonnechea dennea vixim niall kelʼlean, Vicky nanvache eke bhoinnik koxi modot zali tem polloum-ia. Ti sangta: “Jehova khub tempa thaun mhozo mog korta mhunn dakhounk proitn kortalo. Punn hanv eka orthan taka oxem sangtalem, ‘Mhojea oslea munxacho tum mog korunk xokona, ani tujea Putachea bolidana vorvim mhojim patkam bhogsonant.’” Tor soddvonne vixim niall kelʼlean, Jehova aplo mog korta mhunn ti vollkhon gheunk pavli. Ami pasun oxench kortat tednam, Jehova amcho-i mog korta ani amkam tachi maniotai asa mhunn ami zannam zaunk pavtolim.

18. Ami Jehovacho mog korit ravlim zalear ami kiteachi khatri dovrunk zata?

¹⁸ Ami Jehovak manvololim asat mhunn hea lekha udexim amkam khatri mellʼlli. Tori astana ami thodde pavtti niraxi zaunk xoktat, ani ami khorench Jehovak manvotat kai na mhunn dubhavunk xoktat. Tumkam-i oxem dista zalear, “aplo mog korit ravtat tankam” Jehova apli maniotai dita mhunn ugddas dovrat. (Jak. 1:12) Tor Jehovak lagim sorot ravat ani tumi taka manvoleant mhunn khoinchea vattamnim dison ieta tem zannam zaiat. Toxench, Jehova “amchea modlea konna thaunuch pois na” mhunn ugddas dovrat.—D.I. 17:27.