1-2. Stotr 40:5-a pormonnem, Jehova Devan amkam koslim dennim dileant, ani ami hea denneam vixim kiteak bhasabhas kortolim?

JEHOVA ek udar kallzacho Dev. Tannem amkam dilolea thoddea denneam vixim chintat: sobit ani khas ghor zaun asloli amchi prithum; ojapvont toren rochlolo amcho mendu; ani tachem moladik Utor, Bible. Jehovan him tin dennim dilolean amkam ravonk ek zago asa, chintunk ani eka-meka lagim ulounk tank asa ani sogleam-von mhotvachea prosnanche zobab amchea lagim asat.—Stotr 40:5 vachat.

² Hea lekhant, hea tin denneam sombondit aslolea thoddea vixoi-ancher ami dhean ditolim. Jitlim ami tea vostum vixim niall kortolim, titlem tacher amchem upkariponn vaddttolem, ani amchea mogall rochnnar Jehovak khuxal korchi amchi itsa anik vaddttoli. (Prok. 4:11) Toxench, sogleo vostu apxinch aileat mhunn sangtat toslea lokam lagim bhasabhas korunk amkam modot zatoli.

3. Prithum khas kiteak asa?

³ Devan jea toren prithum rochlea, tantuntlean tachi zannvai amkam dison ieta. (Rom. 1:20; Heb. 3:4) Prithume sangata zaite groh suria bhonvtonnim ghunvtat. Punn fokot prithum khas asa, karonn ticheruch munxank jieunk zai tem soglem asa.

4. Eka boat-i poros prithum kiteak vorti zaun asa?

⁴ Ho vixv ek vhoddlo doria zalear, prithum tantunt aslolem ek hoddem vo boat-i sarki asa. Punn lokamnim bhorlolea eka boat-i poros, amchi prithum thoddea khas ritimnim veglli asa. Udharonnak, tea boat-int aslolea lokank apleak zai to oxygen, jevonn ani udok svota toiar korchem poddot zalear, anik tankam kainch kochro bhair uddounk mellona  zalear, tea boat-int te kitlo temp poriant jieunk xoktole? Te chodd temp jieunk xokchenant. Punn prithum polloit zalear, tantunt lak’khamnim lokank ani zonavorank jieunk zai tem soglem asa. Prithumer amkam zai to oxygen, jevonn ani udok sodanch asa, ani tem kednam kabar zaina. Ani prithume-voilo kochro bhair vixvant konn uddoina punn prithumeruch urta. Tori astana, prithum sobit urta ani ami tantunt jieunk xoktat. Hem koxem zaunk xokta? Prithumer zata to kochro porot uzar korun borea vostumnim bodlunk, Jehovan prithumer manddavoll kelea. Atam ami Jehovan zannvaien kelolea oslea don manddavolli vixim polloum-ia. Ti mhunnttlear, oxygen-achi manddavoll ani udkachi manddavoll.

5. Oxygen-achi manddavoll mhunnttlear kitem, ani tantuntlean kitem khatri zata?

⁵ Oxygen vo prannvai ho oslo ek vai vo varo zaun asa zo munxank ani zonavorank jivim uronk ekdom gorjecho. Eka vorsak lak’khamnim kotti kilo oxygen jive prannim svas ghetat mhunn sodh korpeamnim sanglam. Ani hech pranni apleak naka to varo mhunnche carbon dioxide bhair soddttat. Tori astana soglo oxygen kabar zaina ani prithumechea bhonvtonnicho varo, carbon dioxide-an bhorona. Kiteak? Karonn Jehovan vhodd toxim lhann zhaddam rochleant, jim carbon dioxide bhitor ghetat ani oxygen bhair soddttat. Hea oxygen-achea manddavollik lagon, amkam svas gheunk goroz to varo sodanch asta. Tor Ithias 17:24, 25-ant sanglolim utram kitlim khorim mhunn kollta: “Dev, . . . soglleank jivit ani svas . . . dita.”

6. Udkachi manddavoll mhunnttlear kitem ani tantuntlean amkam kitem kollon ieta? ( Udkachi Manddavoll, Jehovan Dilolem Dennem hem boks polloiat.)

⁶ Amchi prithum suria thaun jitli pois asonk zai titlich pois asa. Ti suriak matxi lagim asloli zalear, soglem udok gorom zaun vaf zatli asli ani konnuch jieunk xokcho naslo. Ani ti suria thaun matxi pois asloli zalear, soglem udok borof zaun prithum borof-acho ek gullo zatlo aslo. Jehovan hi prithum sarkea zagear dovorlea dekhun hi udkachi manddavoll chalu urta ani haka lagon prithume voile pranni jive uronk xoktat. Suriak lagon doriantlem ani zomni voilem udok vaf zaun voir voita ani tanchim kupam zatat. Dor vorsak, suriak lagon zaitem litre udok vaf zata. Hem udok paus vo borof zaun poddchea adim, sumar dha dis kupamnim urta. Hem udok porot doriant ani zomni voilea veg-vegllea tolleamnim voita ani hi manddavoll portun-portun ghoddtta. Hea manddavolle udexim prithumer udok sodanch urta ani tantuntlean Jehova Devak kitli zannvai ani xokti asa hem kollon ieta.—Job 36:27, 28; Up. 1:7.

7. Stotr 115:16-ant sanglolea dennea pasot ami upkari asat mhunn ami khoinchea vattamnim dakhounk xoktat?

⁷ Jehovan rochloli hi prithum ani her vostunk lagon ami amchem upkariponn koxem vaddounk zata? (Stotr 115:16 vachat.) Ek vatt mhunnttlear, ami tannem kel’lea vostum vixim niallop. Oxem ami korit zalear, tannem amchea pasot kel’lea borea vostunk lagon dor disa Jehovak ami upkar attounk fuddem sortolim. Tea bhair, ami ravtat to zago zata titlo nitoll dovortat tednam ami prithume pasot taka upkari asat mhunn dakhoitat.

8. Amcho mendu ojapvont ritin rochla mhunn ami kiteak sangonk zata?

⁸ Munxacho mendu ojapvont ritin rochla. Tumi tumchea avoichea kusveant aslim tednam, tumcho mendu jea bhaxen rochunk manddavoll keloli teach toren vaddlo ani tantunt dor minnttak hozaramnim nove menduche konn vo cells toiar zale. Eka vaddlolea munxachea mendu bhitor, neuron nanvache 10,000 kotti khas toreche konn asa  mhunn sodh korpi sangtat. Itle konn aslolea amchea menduchem vozon sumar dedd kilo asta (1.5 kg). Amchea menduk ojapachi tank asa. Tachim ami thoddim udharonnam polloum-ia.

9. Amkam asloli uloupachi tank Deva thaun ek dennem zaun asa mhunn tumkam kiteak dista?

⁹ Amchi uloupachi tank hem ek vizmit zaun asa. Chintat, ami uloitat tednam kitem zata. Tumi dor utor mhunnttat tednam tumchi jib, gollo, vontt, dhaddmonn ani hodd’ddeachem, sumar 100 snaiu vo muscle-amnim koxem kam korunk zai tem mendu sangta. Ami sarke toren utram mhunnttolim zalear, hea soglea snaiumnim manddavollin kam korunk zai. Bhurgeancher dhean dilear, bhurgim zolmak ietat tednanch tim utram vollkhonk xoktat mhunn bhaso ulounchea tanke vixim 2019-ant chaplolo ek sodh sangta. Ho sodh kel’lea udexim zaitea sodh korpeanchem hem chintop sarkem asa mhunn kolltta. Tem mhunnttlear, bhaso vollkhunchi ani xikchi tank amkam zolma thaunuch asa. Khorench, amkam asloli ulounchi tank Deva thaun ek dennem zaun asa.—Sutt. 4:11.

10. Devan dilolea uloupachea denneacho valor kortat mhunn ami koxim dakhoitolim?

¹⁰ Devan dilolea ulounchea tankecho ami valor kortat mhunn dakhounk ek vatt mhunnttlear sogleo vostu apxinch aileat mhunn sangtat tea lokank Dev asa mhunn sangonk hi tank uzar korop. (St. 9:1; 1 Ped. 3:15) Soglem apxinch ailem mhun sangpi lok hi prithum ani tantunt aslole sogle jiv Devan rochunk nant mhunn mantat. Tor, sorg ani prithum rochpi Jehova zaun asa mhunn ami kiteak mantat tea vixim aikunk sodhtat tosleank ami somzaunk xokta. Hem korunk, ami Bible ani hea lekhant aslole mud’de uzar korun amchea sorginchea bapa vixim sangonk zata.—St. 102:25; Iz. 40:25, 26.

11. Amchea menduk lagon ojap zaunk khoinchem ek karonn asa?

¹¹ Amkam asloli ugddas dovorchi tank ojapachi asa. Adim eka boroupean munxachea menduk 2 kotti pustokant ghalunk zata titli mahiti ugddas dovorchi tank asa mhunn sanglolem. Punn amchi ugddas dovorchi tank hachea poros ekdom chodd asa mhunn atam kollon ailam. Ami ugddas dovrunk xoktat dekhun amkam khoinchi ek khas tank asa?

12. Amkam noitik dorje xikchi tank aslolean ami zonvaram thaun koxim vegllim asat?

¹² Prithumer aslolea soglea rochnne modem fokot munxank aplea jivitant adim kitem ghoddlolem tem ugddas dovrun tacher niall korunk zata dekhun tankam noitik dorje xikchi tank asa. Haka lagon ami bore dorje xikon amchea chintpant ani jivitant bodlav korunk zata. (1 Kor. 6:9-11; Kol. 3:9, 10) Khorem mhunnttlear, sarkem kitem ani chukichem kitem hanche modem aslolo ontor vollkhonk amchea ontoskornnak ami proxikxonn diunk zata. (Heb. 5:14) Ami mog, doia-maia ani kakllutt dakhounk xikonk zata. Ani Jehova zoso neai-nitin vagta, tachi ami dekh gheunk zata.

13. Stotr 77:11, 12-ant sanglolea pormonnem amkam aslolem ugddas dovorpachem dennem ami koxem uzar korunk zai?

 ¹³ Ugddas dovorchea denneacho ami valor kortat mhunn dakhounk ek vatt mhunnttlear, Jehovan amkam adim dor ek pavtt koxi modot kelea ani buzvonn dilea tea vixim amchea ugddasant dovrunk proitn korop. Oxem kelolean, fuddarak pasun to amkam modot kortolo mhunn amchi khatri ghott zata. (Stotr 77:11, 12 vachat; 78:4, 7) Anik ek vatt mhunnttlear, dusrim amchea pasot jem kitem borem kortat tem ugddas dovrop ani tanchea pasot upkari asop. Dusreank upkari astat te lok chodd korun jivitant khuxal astat mhunn sodh korpi sangtat. Tea bhair, ami thoddeo vostu mud’dom visortat tednam, Jehovachi dekh ghetat. Udharonnak, Jehova kednanch visronk xokona. Punn ami kel’lea chukim pasot poschatap kortat tednam, to amkam bhogxita ani amchim patkam mud’dom visorta. (St. 25:7; 130:3, 4) Ani dusrim amchea add kel’lea chukim pasot amchea lagim bhogsonnem magtat tednam ami toxench korunk zai mhunn to amchea thaun axeta.—Mt. 6:14; Lukas 17:3, 4.

14. Amchem ojapvont dennem, mhunnche mendu pasot ami upkari asat mhunn koxem dakhounk zata?

¹⁴ Mendu Devan amkam dilolo ojapvont dennem zaun asa. Ami hem dennem taka man diunk uzar kortat tednam, tachea pasot ami upkari asat mhunn dakhoitat. Thodde lok aplo mendu aplea svarthak, mhunnche kitem sarkem ani kitem chukichem tem svota tharaunk uzar kortat. Punn Jehova amcho rochnnar zal’lean, fokot tannem tharailole dorje ami tharailolea dorjeam-von bore zaun asat. (Rom. 12:1, 2) Ami tachea dorjeam pormonnem jietat tednam amchea jivitant xanti asta. (Iz. 48:17, 18) Ani amkam amchea jivitant ek ud’dhex mellta. To mhunnttlear, amchea rochnnar Bapak man haddop ani taka khuxal korop.—Mho. 27:11.

15. Bible hea dennea udexim Jehova munxakullacho mog korta mhunn koxem dison ieta?

¹⁵ Bible hem dennem, Devan mogan amchea  pasot dilam. Amcho sorgincho Bap prithumer aslolea aplea bhurgeancho chodd mog korta dekhun, tannem munxank prerit korun hem boroilem. Bible-a udexim Jehova jivitachea ekdom gorjechea prosnanche zobab dita. Zoxem: Ami khoim thaum aileant? Jivitacho ud’dhex kitem? Fuddarak kitem ghoddttolem? Hea prosnanche zobab aplea soglea bhurgeamnim zannam zalole Jehovak zai. Taka lagon tannem zaitea xekddeam thaun munxank uzar korun Bible veg-vegllea bhasamnnim bhaxantor korunk modot keleat. Aiz ak’kho Bible vo tacho bhag 3,000 poros chodd bhasamnim asa. Itihasant khoinchea-i pustoka poros Bible chodd bhasamnim bhaxantor kela ani vanttla. Lok khoinsor-ui ravum vo khoinchi-i bhas uloum, tankam sogleank Bible-ant aslolo sondex aplea mai-bhaxen vachchi sondhi asa.—“ Afrikechea Bhasamnim Bible,” hem box polloiat.

16. Matev 28:19, 20-a pormonnem ami Bible-a pasot upkari asat mhunn koxem dakhounk zata?

¹⁶ Ami Bible dor disa vachun, tacher niall korun ani tantunt aslolem tem apnnaunk amchean zata titlo proitn kortat tednam Bible-a pasot ami upkari asat mhunn dakhoitat. Tea bhair tantunt aslolo sondex zata titlea lokank sangtat tednam, Devak ami upkari asat mhunn dakhoitat.—St. 1:1-3; Mt. 24:14; Matev 28:19, 20 vachat.

17. Hea lekhant ami khoinchea denneam vixim bhasabhas kelea, ani fuddlea lekhant ami kitem bhasabhas kortolim?

¹⁷ Atam poriant hea lekhant ami Devan dil’lea denneam vixim xikleant. Zoxem amchem ghor, mhunnche hi prithum, ojapvont ritin rochlolo amcho mendu ani Devan prerit korun dilolem aplem Utor, Bible. Punn amkam dixtti poddonant toslim her dennim pasun Jehovan amkam dileant. Oslea denneam vixim ami fuddlea lekhant bhasabhas kortolim.