1. Sorginchea theveam vixim Jezun kitem sanglem?

SOGLE theve amchea dolleank dixtti poddonant. Khorem mhunnttlear, sogleant moladik theve amkam disonant. Dongrar dil’lea updesant Jezu sorginchea theveam vixim uloilo je girestkai vo poixe, oslea vostum poros ekdom chodd vorte zaun asat. Tannem fuddem mhunnttlem: “Tuzo thevo asa thoich tujem kalliz-ui astolem.” (Mt. 6:19-21) Amkam ek vost khub moladik dista zalear, ami ti melloun gheunk proitn kortolim. Ami Deva sangata ek borem nanv zoddttat tednam, ami ‘sorgar theve’ zomoun dovortat. Ani osle sorgar zomoun dovorlole theve kednanch ibadd zaunche nant vo konnuch chorun vhorcho na mhunn Jezun somzailem.

2. (a) 2 Korintkarank 4:17, 18 pormonnem, Paulu amkam koslea vostuncher dhean diunk urba dita? (b) Hea lekhant ami kitem xiktolim?

² Apostl Paulun amkam ‘dixtti poddonant toslea vostuncher amchem dhean-mon lavunk’ urba dili. (2 Korintkarank 4:17, 18 vachat.) Heo dixtti poddonant tosleo vostu theve zaun asat. Tea theveam modem Devachea novea sonvsarant onnbhovunk mellttolim tim besanvam mellon asat. Aiz ami onnbhovtat tea char dixtti poddonant toslea theveam vixim hea lekhant bhasbhas kortolim. Teo mhunnttlear, Deva sangata ixttagot, magnnem korchem dennem, Devachea povitr xoktecho adar, ani amchea porgottnnent Jehovacho, Jezucho ani ainzacho tenko. Hea disonant toslea theveam pasot ami upkari asat mhunn koxim dakhoitolim, tea vixim pasun ami bhasabhas kortolim.

3. Dixtti poddona tea theveam modlo sogleant vorto thevo khoincho, ani ho amkam koso mellonk xokta?

³ Dixtti poddona tea thevea modlo sogleant vorto thevo  mhunnche, Jehova Deva lagim ixttagot. (St. 25:14) Opurnn munxa sangata Dev ixttagot korun koso povitr uronk xokta? Jezuchem soddvonnechem bolidan “sonvsarachem pap kaddta” dekhun to hem korunk xokta. (Juanv 1:29) Jezu morosor visvaxi ravtolo ani munxakullak soddvonn ditolo mhunn Jehovak, Jezu morche adinch khobor asli. Taka lagon Jezu morchea poilim pasun to munxam sangata ixttagot korunk xoklo.—Rom. 3:25.

4. Jezu morchea poilim Devache ixtt aslolea thoddea dadleanchim udharonnam diat.

⁴ Jezu morchea poilim Devache ixtt zal’lea thoddea daddleam vixim ami bhasabhas korum-ia. Abraham ekdom ghott bhavarth dakhoil’lo ek munis zaun aslo. To moron 1,000 vorsam von chodd vorsam uprant, Jehovan taka ‘aplo ixtt’ mhunnttlo. (Iz. 41:8) Tor, munxam melear pasun Jehova tankam aplim ghott ixttam mhunn lekhta. Abraham Jehovachea ugddasant azun poriant jivo asa. (Lukas 20:37, 38) Anik ek udharonn Job-achem zaun asa. Sorgar ektthaim zalolea ainzam mukhar, Jehova Job-a vixim khatren uloilo. Tannem taka ‘apleak bhieta ani vaittak patt korta toslo boro ani promannik munis’ mhunnttlo. (Job 1:6-8) Ani lok khori bhokti korinaslolea eka desant, sumar 80 vorsam visvasan seva kelolea Daniel-a vixim Jehovak koxem dislem? Ho zantto dadlo Devak “chodd opurbaiecho” aslo mhunn, tin pavtti ainzamnim taka khatri dili. (Dan. 9:23; 10:11, 19) Aplea mogachea ixttank porot jivont kednam kortolo kai mhunn Jehova axeun ravla mhunn ami khatri dovrunk zata.—Job 14:15.

5. Jehova sangata ghott ixttagot zoddunk kiteachi goroz asa?

⁵ Aiz kitlim oporipurnn munxam Jehovachim ghott ixttam zaun asat? Lak’khamnim lok. Sonvsarbhor zaite dadle, bailo, ani bhurgim Devachim ixtt zaunk sodhtat mhunn tanchea korneamnim dakhoitat dekhun ami oxem mhunnonk xoktat. Jehova neai-nitin cholta tanchea sangata laginchi ixttagot dovorta. (St 15:1, 2) Jezuchea soddvonnechea bolidanacher bhavarth dovortat dekhun ami Jehovache ixtt zaunk xoktat ani amchem jivit somorponn korun bautizm gheunk xoktat. Ami him mhotvachim pavlam ghetat tednam, Devak apleak somorponn korun bautizm ghetlolea lak’khamnim Kristanvam modem ek zatat. Vixvant sogleant vortea Deva sangata tanchi ghott ixttagot asa!

6. Ami Deva lagim aslolea ixttagoticho valor kortat mhunn koxim dakhounk xoktat?

⁶ Jehovachea ixttagoticho valor kortat mhunn ami koxem dakhounk zata? Xembora poros chodd vorsam, Abraham ani Job, Jehovak visvaxi ravle. Ami hea sonvsarant kitlim-i vorsam Jehovachi seva korit aslearui, tanchea bhaxen ami pasun Devak visvaxi ravonk zai. Daniel-a sarkim ami amchea jiva poros Jehova sangata aslolea amchea ixttagoticho chodd valor korunk zai. (Dan. 6:8, 11, 16, 22) Jehovachea modotin, ami koslea-i trasancho fuddo korunk xoktat ani hea toren ami sodanch tache ixtt zaun uronk xoktat.—Filp. 4:13, Povitr Pustok - Novo Korar.

7. (a) Mhonn’nneo 15: 8-a pormonnem Jehovak amchea magnneam vixim koxem dista? (b) Jehova amchea magnneancho zobab koso dita?

⁷ Dixtti poddona toslo anik ek thevo mhunnttlear, magnnem. Ghott ixttank aplim chintnam ani bhavnam eka-mekak sangonk avoddtta. Amcho ixtt, Jehova vixim pasun amkam oxench dista kai? Hoi! Jehova aplea Utra vorvim aplim chintnam ani bhavnam amkam kolloita. Ani ami magnnea vorvim tachea lagim uloun amchea kallzantlim chintnam ani bhavnam taka sangonk xoktat. Ani Jehovak amchim magnnim aikonk avoddtta. (Mhonn’nneo 15:8 vachat.) Eka mogall Ixtta sarko, Jehova amchim magnnim fokot aikona, punn tacho zobab pasun amkam  dita. Thodde pavtt to zobab rokddoch diunk puro. Punn, thodde pavtti amkam zaite pavtt magnnem korit ravonk poddot. Tori astana, to amchea magnneacho zobab sarkea vellar ani sogleam-von bore ritin ditolo mhunn ami khatri dovrunk zata. Punn tacho zobab ami chint’talim tachea poros vegllo asonk puro. Udharonnak, amkam asloli ek somosia kaddun uddounchea bodlek, “ti sosunk” to goroz ti zannvai ani xokti diunk puro.—1 Kor. 10:13.

8. Ami magnnem korchea denneak upkari asat mhunn koxem dakhounk zata?

⁸ Magnnem korchea hea moladik dennea pasot ami upkari asat mhunn koxem dakhounk zata? Ek vatt mhunnttlear, ‘thambonastana magnnem korat,’ ho Devan dil’lo sol’lo pallop. (1 Tes. 5:17) Aplea lagim magnnem korunk Jehova amcher dobhav ghalina. Bodlek, magnnem korchem vo na, tem to amcher soddun dita. Punn, dor disak zata titlea pavtti ami magnnem kortat tednam hea denneak ami upkari asat mhunn dakhoun ditat. Toxench, amchea magnneant tache upkar attounk ani tachi vak’khanni korunk ami visorchim nhoi.—St. 145:2, 3.

9. Eka bhavak magnneam vixim koxem dista, ani tumkam magnneam vixim koxem dista?

⁹ Jitlo temp ami Jehovachi seva kortat ani jitle pavtti to amchea magnneancho zobab koso dita tem ami onnbhovtat, titlem magnneam pasot amchem upkariponn vaddttolem. Gel’lea 47 vorsam thaun, purnn vellachi seva kortolea Chris nanvachea bhavachem udharonn gheum-ia. To mhunntta: “Sokallim fuddem utton magnnem korunk mhaka khub avoddtta. Dovachea thembeacher suriachim kirnnam poddon te chokchoktat tednam, Jehova lagim ulovop kitlem khuxalkaiechem! Hem polloitana, tannem dil’lea soglea denneam pasot, zoxem magnneam pasot, upkar attounk hanv fuddem sortam. Uprant, disachea xevottak magnnem korun eka nitoll ontoskornnan nhidonk vochop kitlem borem.”

10. Devachi povitr xokti ami moladik mhunn kiteak lekhunk zai?

¹⁰ Devachi povitr xokti anik ek dixtti poddona toslem moladik dennem zaun asa.  Povitr xokti di mhunn magot ravonk Jezun amkam urba dili. (Lukas 11:9, 13) Aplea povitr xokte udexim Jehova amkam xokti, mhunnche ‘amchea thaun upzona tosli vorti podvi vo xokti’ dita. (2 Kor. 4:7; Itihas 1:8) Tachea povitr xoktechea adaran, ami kosle-i torechea trasancho fuddo korunk xoktat.

11. Povitr xokti amkam khoinchea toren modot korunk xokta?

¹¹ Devachea sevent amkam asloleo zobabdareo purnn korunk, povitr xokti amkam modot korunk xokta. Povitr xokti, amkam asloleo kola ani tank vaddoita. Tor, Devachea sevent amkam mell’llolo ies amkam lagon nhoi, punn Devachea povitr xoktechea modotik lagon mhunn ami mhunnonk xoktat.

12. Stotr 139:23, 24-a pormonnem, ami kitem korunk modot kor mhunn povitr xokti magonk zata?

¹² Devachea povitr xoktecho ami valor kortat mhunn dakhounk anik ek vatt mhunnttlear, amchea kallzant koslim-i chukichim chintnam vo itsa asa zalear ti sodhun kaddunk modot kor mhunn magnnem korop. (Stotr 139:23, 24, vachat.) Ami oxem magnnem kortat tednam, Jehova aplea povitr xokte udexim amkam tim chukichim chintnam vo itsa vollkhonk modot korta. Ani amkam aslolim chukichim chintnam vo itsa ami vollkhotat tednam, tim pois korunk boll di mhunn Jehovachea povitr xokte pasot ami magonk zai. Oxem kelolean, Jehova apli povitr xokti amkam dinastana ravonk ami taka koslench karonn diunk sodhinant mhunn dakhoitat.—Ef. 4:30.

13. Povitr xokte pasot amchem upkariponn ami koxem vaddounk xoktat?

¹³ Amchea disamnim povitr xokte udexim kitlem kam purnn zait asa tea vixim ami niall kortat tednam tachea pasot amchem upkariponn ami vaddounk xoktat. Sorgar voichea poilim, Jezun aplea xisank sanglem: “Tumcher denvun ietolo tea povitr atmeachem boll tumi ghetoleat . . . ani sonvsarachea ximam porian tumi mhoje govai zatoleat.” (Itihas 1:8) Him utram aiz sarkim purnn zait asat. Povitr xoktechea adaran, sonvsarbhor sumar ponchianxim lakh lok Jehovachi bhokti korunk pavleat. Tea bhair, ami Jehovachea povitr xokte udexim bore gunn, zoxe mog, khuxalkai, xanti, pasiens,  doiallai, boremponn, bhavarth, dulobai, ap-domaunni pallunk pavleant. Hea udexim Devachea lokam modem ami ekvott ani xanti samballunk xokleant. He gunn ‘povitr xoktechem foll’ zaun asat. (Gal. 5:22, 23) Khorench, povitr xokti kitlem vortem dennem zaun asa!

14. Ami porgottnnent bhag ghetat tednam amkam disona toslo khoincho adar asa?

¹⁴ Jehova, Jezu ani ainzam sangata ‘sohokari vo sangata kam korop,’ ho amkam ek dixtti poddona toslo moladik thevo zaun asa. (2 Kor. 6:1) Ami xis korchea kamant bhag ghetat tednam tem korunk pavtat. Paulun aplea vixim ani hea kamant bhag ghetoleam vixim sanglem: “Ami Devache sohokari.” (1 Kor. 3:9, Povitr Pustok–Novo Korar) Ami porgottnnent bhag ghetat tednam, ami Jezu sangata pasun kam korpi zatat. Ugddas korat, Jezun aplea pattlavdarank “sogllea raxttrank Mhoje xis korat,” mhunn adnea dilea uprant tannem sanglolem: “Hanv tumchea sangata asam!” (Mt. 28:19, 20) Ainzam vixim kitem? “Prithumer jietoleank . . . Sasnnachem xubhvortoman” ami porgottunk voitat tednam, ainz amkam margdorxon ditat mhunn ami kitlim upkarim asat!—Prok. 14:6.

15. Amchea porgottnnent Jehova kitem mhotvachem kam korta tem dakhounk Bible-antlem ek udharonn diat.

¹⁵ Ho sorgincho tenko aslolean, ami kitem korunk pavleant? Devachea Rajeacho sondex eka bim-a sarko asa. Tem ami vompit astat tednam, thodde pavitti tem borea kallzacher poddtta ani tem vaddtta. (Mt. 13:18, 23) Tem sotachem bim vaddounk ani foll diunk konn modot korta? “Bapan . . . oddun haddlea xivai” konnuch aplo pattlavdar zaunk xokona mhunn Jezun sanglolem. (Juanv 6:44) Hea vixim Bible-antlem ek udharonn asa. Filipi xarachea bhair bailanchea eka zomeak Paulun porgottlem tem tumchea ugddasak haddat. Tanchea modli ekli bail, Lidia vixim Bible kitem sangta tacher dhean diat: “Paulu sangtalo tem aikunk Somian [“Jehovan,” NW] tichem kalliz ugoddlem.” (Itihas 16:13-15) Lidia sarkea lak’khamnim lokank Jehovan aiz oddun haddleant.

16. Amkam porgottnnent ies melltta tednam ami konnak man diunk zai?

¹⁶ Amkam porgottnnent ies melltta tednam, khoro man konnak vochonk zai? Hacho zobab Paulun Korint sobhent boroil’lea utram thaun melltta: “Hanvem roilem, Apolon ximplem, punn Devan vaddoilem. Tor roitat vo ximptat tim mhotvachim nhoi; vaddoita To ki mhotvacho, ani Ho mhollear Dev.” (1 Kor. 3:6, 7) Tor Paulu bhaxen, porgottnnent amkam kosle-i ies mellom, tacho man ami sodanch Jehovak diunk zai.

17. Jehova, Jezu ani ainzam sangata “sohokari vo sangata kam korpi” mhunn aslolea hea sueoga pasot ami amchem upkariponn koxem dakhounk zata?

¹⁷ Jehova, Jezu ani ainzam sangata “sohokari vo sangata kam korpi” aslolea hea sueoga pasot ami upkari asat mhunn koxem dakhounk zata? Ami urben bori khobor herank sangonk amchean zata titlem kortat tednam, ami hem dakhounk pavtat. Hem zaitea vattamnim korunk xoktat, zoxem ‘sobhe mazar vo jahir zagear ani . . . ghoram ghoramnim’ porgottun. (Itihas 20:20) Zaitea zannank, sondhi melltta thoim pasun porgottunk avoddtta. Tankam ek onvollkhi munis melltta tednam, te bore bhaxen taka zap ditat vo hoddkitat ani uprant ulounk suru korunk proitn kortat. To munis ulounk toiar asa zalear tache vichar monant dovrun taka Devachea Rajeachi bori khobor sangtat.

18-19. (a) Sotachea bim-ancher ami udok koxim ximptat? (b) Eka Bible videartheak Jehovan koxi modot keli tea vixim ek onnbhov sangat.

¹⁸ Devache “sohokari vo sangata kam korpi” zalolean, ami sotachem bim fokot roinant,  punn tacher udok pasun ximptat. Ek munis, ami sangtat to sondex aikonk itsa dakhoita zalear taka porot mellon tachea sangata Bible obheas suru korunk ami zata titlo proitn kortat vo anik konnak taka mellonk ami manddavoll kortat. Bible obheas fuddem voita toso, tea Bible videartheachea chintpant ani bhavnant bodlav korunk Jehova koso modot korta tem polloitana ami khuxal zatat.

¹⁹ Dokxinn Afrikentlea Raphalalani-chem udharonn polloiat. To ghaddiponn korun duentank borem kortalo. Bible obheasant to jem xiktalo tem taka avoddlem. Punn moron gel’lea purvozam vixim Bible jem kitem sangta tem taka kollon ailem tednam tem manun gheunk taka khub kotthin zalem. (D.S. 18:10-12) Hollu-hollu, tannem Devachem chintop apnnailem, ani jea udexim tachem ghor-dhar choltalem tem ghaddiponnachem kam, tannem soddun dilem. Raphalalani atam 60 vorsam piraiecho asa, ani to mhunntta: “Jehovachea Sakxeamnim mhaka kam sodhunk ani her ritin mhaka khub adar kelo, mhunn hanv tancho khub upkari. Punn mhojem jivit bodlunk modot kel’lea, Jehovak, hanv sogleam poros chodd upkari zaun asam. Karonn, atam hanv bautizm gheun tacho Sakxi zaun porgottnnent bhag gheunk pavlom.”

20. Tumi kitem korcho nichov kela?

²⁰ Hea lekhant, ami char dixtti poddonant tosle theve polloileat. Sogleam poros vorto sueog mhunnttlear, Jehova sangata amkam asloli ghott ixttagot. Hi ixttagot aslolean amkam dixtti poddonant toslea her thevea thaun faido melltta. Zoxe tachea lagim magnneam vorvim ulovop, tachea thaun povitr xoktecho adar onnbhovop, ani porgottnnent tacho, Jezucho, ani ainzancho tenko melloun ghevop. Disona toslea hea theveam pasot amchem upkariponn vaddoit ravcho nichov korum-ia. Ani amcho ekdom boro ixtt, Jehovak dhinvaxit ravum-ia.