Sara mhunntta, “Hanv ek lojetam toslem cheddum. * Taka lagon lojena toslea vo ragixtt sobhav aslolea lokam modem ravonk mhaka borem disona. Punn jim konn dulob ani khalti asat, tanchea modem ravonk mhaka borem dista. Toslea lokam lagim mhojim bhavnam ani mhoji somosia sangonk sompem zata. Ani osle sobhavache lok mhoje boreantle bore ixtt zaun asat.”

Tor, ami dulob asat zalear dusrim amchim ixtt zaunk sodhtat mhunn Sarachea hea utrantlean amkam kolltta. Tea bhair, ami dulob astat tednam Jehova pasun khuxal zata. Ami “dulob monxam” zaunk tachem Utor amkam urba dita. (Kol. 3:12) Dulobai mhunnttlear kitem? Jezun dulobai koxi dakhoili? Ani ho gunn aslear amchem jivit chodd khuxalkaiechem koxem zaunk xokta?

Xant sobhavachim munxam, dulobai ho gunn dakhounk pavtat. Ek dulob kallzacho munis dusream lagim doiall-movall toren vagta ani dusrim taka sotaitat tednam to xant ravta.

Eka dulob kallzachea munxak oskot mhunnop chukichem. ‘Dulobai,’ hea utrak uzar kelolem Grek utor, proxikxonn dilolea eka ranvotti ghoddea vixim sangonk uzar kortale. Oslea ghoddeak khub xokti astali, punn apli xokti tabeant dovrunk taka xikoilolem. Teach bhaxen, ami dulob kallzachim munxam zatat tednam ami amcho opurnn sobhav tabeant dovortat ani dusream sangata xanti sambhallttat.

‘Hanv dulob kallzacho nhoi,’ oxem amkam disonk puro. Ami jietat tea sonvsarant choddxe lok ragixtt ani pasiens naslole asat, dekhun amkam dulob kallzachim zaunk kotthin zaunk puro. (Rom. 7:19) Tor ami dulob kallzachim zatolim zalear, ami proitn korchi goroz asa. Ani Jehovachi povitr xokti amkam dulob zaunk modot kortoli. (Gal. 5:22, 23) Ami dulob kallzachim zaunk kiteak proitn korunk zai?

Ami dulob kallzachim zatat tednam lok amchea lagim soronk sodhtat. Saran sanglolea bhaxen, dulob kallzachea lokam sangata ravonk amkam borem dista. Dulob ani doiall, he gunn dakhoun Jezun amkam ek ekdom borem udharonn dovorlam. (2 Kor. 10:1) Taka vollkhonant tim bhurgim pasun tachea lagim soronk sodhtalim.—Marku 10:13-16.

Ami dulob kallzachim astat tednam amkam ani herank boreak poddtta. Dulob kallzachim aslear ami rokddinch bejar vo ragar zaunchim nant. (Mho. 16:32) Hea toren ami herank ani khas korun ami mog kortat tankam dukhounchim nant. Tor tankam dukhoun, guneanvkari zaunchem dukh ami onnbhonvchimnant. Ani ami amchim bhavnam ani sobhav tabeant  dovortat dekhun herank ami dukhoinant ani tankam tem boreak poddtta.

Apleak zaiteo zobabdareo ani kamam aslim tori punn, Jezu sogleam sangata dulobaien vaglo. Tachea disamnim jietale tea lokanchem jivit kotthin aslem ani uskeamnim tim cheplolim aslim dekhun tankam somadhan zai aslem. Tor, “mhoje-xim ieiat, . . . kiteak hanv dulob ani lhanvik kallzacho,” him tachi utram aikon tea lokank kitli buzvonn mell’lli astoli tem chintat!—Mt. 11:28, 29.

Jezu bhaxen ami dulob kallzachim koxim zaunk xoktat? Jezu lokam sangata koso vaglo ani tannem kotthin poristhitincho koso fuddo kelo, hea vixim ami Devachea utrantlean xikonk zai. Oxem kelolean amkam dulobaien vagonk kotthin zata tednam ami Jezuchi dekh gheunk pavtolim. (1 Ped. 2:21) Dulob kallzacho zaunk Jezuk modot kel’le tin vixoi ami atam polloum-ia.

Jezu khalto aslo. Apunn “dulob ani lhanvik vo khaltea kallzacho,” mhunn Jezun sanglem. (Mt. 11:29) Bible-ant dulobai ani khaltikai, he gunn sangata dileat karonn he gunn eka-meka sangata mellon asat. (Ef. 4:1-3) Kiteak?

Ami khaltim asat zalear, dusrim amchea vixim kitem-i sangtat tednam ami rokddinch ragar zainat. Lokamnim apnnank “pottio ani bebdo” mhunnttlem tednam Jezun kitem kelem? Jezu khalto aslo dekhun, apunn sarko asa mhunn tankam sangchea bodlek aplea korneamnim apunn koslo tem tannem dakhoilem ani “zannvaiechim kamam tika sakxi ditat” mhunn tannem dulobaien sanglem—Mt. 11:19.

Amcho kull, ling, ganv vo bhaxe vixim konnem-i chintinastana kitem-i sanglem zalear, ami tanchea sangata dulobaien vagonk zai. Dokxinn Afrikecho, Peter nanvacho ek Kristi vhoddil oso mhunntta: “Mhaka bejar haddtta toslem kitem-i, konnem-i mhaka mhunnttlem zalear, hanv mhakach vichartam, ‘Jezu mhojea zagear aslo zalear to koso vagta aslo?’” To fuddem mhunntta: “Dusrim mhaka kitem-i mhunnttat tednam hanvem rokddench ragar zaunchem nhoi mhunn hanv xiklom.”

Munxam opurnn asat mhunn Jezun ugddas dovorlo. Jezuche xis sarkem tem korunk sodhtale, punn opurnn aslolean te sodam toxem korunk pavonk nant. Udharonnak, Jezu morchea adlea rati tannem Pedru, Jakob, ani Juanvak zage rav mhunn sanglolem, punn te toxem korunk pavonk nant. Tea vellar tancho “otmo raji asa khoro, punn kudd osokt” asa mhunn Jezun somzon ghetlem. (Mt. 26:40, 41) Te opurnn asat mhunn Jezun ugddas dovorlolean, to aplea apostlancher ragar zaunk na.

Mandy nanvachi ek bhoinn poilim sodanch dusreanchi khoddi kaddttali, punn atam ti Jezuchi dekh gheun dulobaien vagonk khub proitn korta. Ti mhunntta, “soglim munxam opurnn asat mhunn hanv ugddas dovortam, ani hea toren Jehova bhaxen hanv tanchea borea gunnancher dhean diunk pavtam.” Munxam opurnn asat dekhun Jezu tanchea sangata dulobaien vaglo. Tachem udharonn tumkam dusream sangata dulobaien vagonk modot korunk xokta kai?

Jezun nit korchem kam Devacher soddun dilem. Prithumer astana Jezun on’neai sosle. Lok Jezuk chukichea toren somzole, taka nakarlo, ani taka voll-vollailo. Tori astana, tannem dulobaien “nitivont Monsubidarachea hatant visvasan Aplem jivit soddlem.” (1 Ped. 2:23) Apnnacher zatat te on’neai sosunk aplo sorgincho Bap modot kortolo ani to apleacher on’neai kortat tankam khast laitolo mhunn Jezu zannam aslo.

Amcher on’neai zatat tednam, ami ragar zatat zalear amchi poristhiti anik bigddonk xokta. Taka lagon ‘munxam ragan kitem-i kortat tednam, Devachi mogachi manddavoll te pallunk pavonant’ mhunn Bible amchea ugddasak haddtta.’ (Jak. 1:20) Ragar zaunk karonn aslear pasun, opurnn aslolean ami chukichea toren vagonk xoktat.

‘Dusrim tujer on’neai kortat tednam, tum portem kitem-i korina zalear dusre konn tujea pasot kainch korcho na,’ oxem Cathy nanvachea Germany-ntlea eke bhoinnik poilim distalem. Punn, Jehovacher visvas dovrunk tem xiklem tednam, tacho sobhav bodol’lo. Tem mhunntta, “Hanvem sodanch kitem tori korunkuch zai, oxem na. Sonvsarant zata tem sogle on’neai Jehova sarke kortolo mhunn hanv zannam zalolean hanv dulobaien vagonk xoktam.” Tumcher kednam-i on’neai zala zalear, Jezuchi dekh gheun Devacher visvas dovrat. Tednam, tumi dulobaien vagonk pavtolim.

Ami jivitant khuxal asonk zai zalear ami dulob kallzachim asonk zai mhunn Jezun sanglem. Tannem mhunnttlem: ‘Bholim vo dulob kallzachi tim subhagi.’ (Mt. 5:5) Hea fuddlea poristhitimnim, dulobai ho gunn aslolean koxi modot zata tem polloum-ia.

Dulobai aslear kazari jivitant ietat teo somosia suttaveo zatat. Australia-ntlo Robert nanvacho ek bhav oso mhunntta: “Hanvem mhojea bailek, dukhoita toslim zaitim utram mhunnttlolim. Punn, ek pavtt ragan mhunnttlolim utram fattim gheunk zaina. Mhojea utramnim tika hanvem kitlem dukhoilem tea vixim hanvem chintlem tednam mhaka khub vaitt dislem.”

‘Ami soglim amchea uloupant chuki kortanv,’ tor ami dukhoitat toslim utram uzar kelear, kazari jivitant somosia vaddttat. (Jak. 3:2) Tor toslea vellar, ami dulob asat zalear ami xant ravonk xoktolim ani amchi jib tabeant dovrunk pavtolim.—Mho. 17:27.

Xant ravonk ani svotacher tabo dovrunk, Robert-an zaito proitn kelo. Hacho porinnam kitem zalo? “Atam, mhojea ani mhojea baile modem somosia ietat tednam, hanv tichem kan diun aikonk proitn kortam, dulobaien uloitam, ani ragar zaina,” oxem to mhunntta. “Poilim poros mhojea baile sangata mhozo sombond anik ghott zala.”

Ami dulob astat tednam dusream sangata amchi ixttagot bori urta. Dusrim kitem-i sangtat mhunn rokddinch ragar zatat tankam chodd ixtt asonant. Dulobai ho gunn, amkam “ektthaim dovorta ti xanti samballunk” modot korta. (Ef. 4:2, 3) Cathy, zachea vixim ami poilim uloilolim, tem mhunntta, “Thoddeam sangata vagop kotthin zata tednam pasun, dulobai ho gunn hanv dakhoita zalear tanchea sangata vagonk mhaka sompem zata.”

Dulobai aslolean amkam monachi xanti melltta. Dulobai ani xanti ‘sorgar thaun ieta te zannvaiek’ mellon asa mhunn Bible sangta. (Jak. 3:13, 17) Eka dulob munxachem “kalliz xant” asta. (Mho. 14:30) Dulobai, ho gunn vaddounk khub proitn kel’lo Martin, oso mhunntta, “soglech pavtt mhaka zai toxench soglem zaunk zai mhunn atam hanv dusreancher dobhav ghalina. Ani atam mhaka monachi xanti ani khuxalkai asa.”

Ami dulob kallzachim zatolim zalear, khub proitn korop gorjechem. Ek bhav sangta, “khorem mhunnttlear, aiz pasun kednam-kednam hanv bhitorlean ragan xiztam. Punn, dulob kallzachim zaunk sangta to Jehova amkam ho gunn vaddounk modot kortolo.” (Iz. 41:10; 1 Tim. 6:11) To amkam ‘proxikxonn diunk xokta,’ to amkam ‘ghott korunk’ xokta. (1 Ped. 5:10 NW) Uprant vell sorta toso, apostl Paulu bhaxen, ami ‘Kristachea dulobaiechi’ ani doiallaiechi dekh gheunk pavtolim—2 Kor. 10:1.