1-2. Eka boroupean kitem sanglem, ani ami hea lekhant kitem xiktolim?

AIZ lak’khamnim lok apunn Jezuk mantat mhunn sangtat. Punn tannem xikoilolem tem tim pallinant. (2 Tim. 4:3, 4) Eka boroupean ek pavtti oxem sanglolem: “Jezu bhaxen ek munis aiz aslo zalear ani tannem xikoilam tea bhaxen to xikoita zalear . . .  jea toren lokamnim taka don hozar vorsam poilim nakarlolo teach toren aiz ami pasun tea munxak nakartolim aslim.”

² Jezu prithumer astana zaiteamnim tachi xikounn aikol’li ani tannem kel’lim vizmitam polloil’lim. Tori astana, tannim taka nakarlo. Kiteak? Tachim char karonnam ami fattlea lekhant xiklolim ani anik char karonnam ami hea lekhant xiktolim. Hem ami xiktat tednam aiz lok Jezuchea pattlavdarank kiteak nakartat ani ami amcho bhavarth koso ghott dovrunk zata tem amkam kollttolem.

3. Khoinchea karonnak lagon thoddeamnim Jezuk nakarlo?

³ Jezu prithumer aslo tednam, tannem soglea torechea lokam sangata vell sarlo. To girest ani odhikareant aslolea sangata jielo. Toxench, gorib ani odhikara khala cheplolea lokam sangata pasun vell sarlo. Tea bhair, jea konnank “patki” mhunn lok lekhtalim tosleank tannem doia dakhoili. Hem polloun thoddea gorvixtt lokamnim Jezuk nakarlo ani tachea xisank vicharlem: “Donddvosuldaram ani patkiam borabor tumi kiteak khata-pietat?” Tednam Jezun zobab dilo: “Borim asloleank nhoi, punn vaittakarank ki voizachi goroz. Tumi  promannik mhonn dhortat tankam apounk Hanv ailom na, punn tumi patki mhonn lekhtat tannim aplem jivit bodolche khatir, osleank Hanv apounk ailam.”—Lukas 5:29-32.

4. Izaiasachea bhasaunne pormonnem Judevank Mesiasa vixim kitem khobor asonk zai asli?

⁴ Devachea Utrant kitem sanglolem? Mesias ieunchea thoddea vorsam poilinch Izaias provadean lok taka apnnauche nant mhunn boroun dovorlolem. Tannem mhunnttlolem: “Konn tachi porva korina, monxamnim taka poro ghala! . . . zancher ami nodor porian ghalinanv, tosloch eklo! Monxam tachi beporva kortat, aminch taka lekhunk na!” (Iz. 53:3) “Munxam” Mesiasachi porva korchim nant mhunn adinch sanglolem. Tor, lok Jezuk nakartole mhunn Judevank khobor asonk zai asli.

5. Aiz zaito lok Jehovachea sevokank koxim lekhtat?

⁵ Aiz lok amkam kiteak nakartat? Aiz dhormik fuddari oslea lokank aplea igorjecho bhag kortat jim famad, girest ani sonvsarachea nodren xannim asat. Hea lokanche noitik dorje ani jivit, Devachea dorjeam pormonnem na zalear pasun tankam forok poddona. Ani hech dhormik fuddari Jehovachea noitik dorjeam pormonnem jietolea tachea urbebhorit sevokank sonvsarachea dorjeam pormonnem unnea molachim mhunn lekhtat. Punn Paulun sanglolem toxem Devan ‘mol naslolea lokank’ aple sevok mhunn vinchun kaddleat. (1 Kor. 1:26-29) Tor, Jehova aplea visvaxi sevokancho khub valor korta.

6. Jezun Matev 11:25, 26-ant kitem sanglem tantuntlean ami kitem xiktat?

⁶ Ami Jehovachi seva korit ravtolim zalear ami kitem korunk zai? (Matev 11:25, 26 vachat.) Sonvsaracho lok Devachea lokank koso lekhta tea toren ami tankam lekhchem nhoi. Apli khuxi korunk Jehova fokot khaltea lokank uzar korta mhunn ami vollkhun gheunk zai. (St. 138:6) Ani toslea lokank uzar korun tannem kitem soglem kelam tacher ami niall korunk zai.

7. Jezun Farizevank ddhongi kiteak mhunnttle, ani tankam koxem dislem?

⁷ Jezun dhiran dhormik fuddareanchem ddhongiponn dakhoun dilem. Udharonnak, Farizev avoi-bapaichi kallji gheunchea poros hat koxe dhuvunk zai tacher chodd dhean ditale. (Mt. 15:1-11) Jezun tanche hem ddhongiponn ugddapem kelem mhunn tache xis ojap zale. Tannim Jezuk vochun vicharlem: “Hem Tujem utor aikun Farizevank opman zalo mhonn zannoi tum?” Jezun tankam zobab dilo: “Mhojea sorginchea Bapan lavunk nant tim sogllim zhaddam umtton vetolim. Tanchi khoboruch naka. Te apunnuch kudd’dde ani dusrea kudd’ddeank vatt dakhounk sodtat; tor kudd’ddo kudd’ddeak vatt dakhoit zalear, dog-ui fonddant poddtole.” (Mt. 15:12-14) Tor, Jezun kitem sanglem tacher dhormik fuddari ragar zale. Punn, Jezun sot ulounchem bond korunk na.

8. Sogleoch dhormik xikounneo Jehovak manvonant mhunn Jezun koxem dakhoun dilem?

⁸ Toxench, Jezun tancheo thoddeo xikounneo khotteo ani Devak manvonant mhunn pasun dakhoun dilem. Zaite lok rund darvontteantlean bhitor sortole ani nisonttonak pavtole, punn thoddech lok sasnik jivitak pavoita tea oxir rostean voitole mhunn Jezun sanglolem. (Mt. 7:13, 14) Toxench, thoddim Devachi seva korcho ddhong kortole mhunn pasun tannem sanglem. Tannem xittkailem: “Fottkirea provadiam vixim chotraien ravat; menddreanchem rupnnem gheun tumche-xim  ietat, punn bhitorlean krur landdge te. Tanchim follam polleun tumi tankam vollkhun kaddtoleat.”—Mt. 7:15-20.

9. Khoincheo thoddeo xikounneo Jezun fott mhunn dakhoun dileo?

⁹ Devachea Utrant kitem sanglolem? Jehovachea mondira pasot Mesiasachem kalliz urben bhortolem mhunn Bible-ant bhasaunnim kel’li. (St. 69:9; Juanv 2:14-17) Ani hea urbek lagon tannem dhormik xikounneo ani chali riti khotteo mhunn dakhoun dileo. Udharonnak, ek munis melea uprant tacho otmo jivo urta mhunn Farizev mantale, punn Jezun moronn nhidek sor kelem. (Juanv 11:11) Ani Saduki punorjivontponn na mhunn mantale. Punn Jezun, aplo ixtt Lazarak jivont kel’lo. (Juanv 11:43, 44; Itihas 23:8) Ghoddtta tem soglem noxibak lagon vo Devak lagon zata mhunn Farizev mantale. Punn Devachi seva korchi vo na tem dor-ekleamnim vinchun kaddunk zata mhunn Jezun xikoilem.—Mt. 11:28.

10. Aiz zaite lok ami xikoitat tem kiteak nakartat?

¹⁰ Aiz lok amkam kiteak nakartat? Karonn ami Bible-a udexim dhormik fuddareanchi xikounn chukichi mhunn dakhoitat. Udharonnak, vaitt lokank Dev ifernant zolloita mhunn dhormik fuddari xikoitat. Osli xikounn diun lokanchea monant bhirant ghalun tankam aplea tabeant dovortat. Punn Jehova ek mogall Dev mhunn xikoun tanchi hi xikounn fott asa mhunn ami dakhoitat. Toxench, ek munis melea uprant, tacho otmo jivo urta mhunn dhormik fuddari xikoitat. Punn ti xikounn khori asa zalear, Devan amkam purnorjivontponnacho bhorvonso diun kainch faido na mhunn sangon ti xikounn fott asa mhunn ami dakhoitat. Tea bhair, ghoddtta tem soglem noxibak lagon vo Devak lagon zata mhunn zaite dhorm xikoitat. Punn dor-ek munxak borem ani vaitt vinchun kaddchi tank Devan dilea mhunn ami xikoitat. Hoi, ami oxem xikoitat tednam dhormik fuddari ragan bhortat!

11. Juanv 8:45-47-a pormonnem, Devak aplea lokamnim kitem kel’lem zai?

¹¹ Ami amcho bhavarth koso ghott korunk zata? Ami sotacho mog korunk zai ani  Devacheo adnea pallunk zai. (Juanv 8:45-47 vachat.) Ami Soitana bhaxen zaunchem nhoi. Ami sotant ghott ravtolim ani amchea patienni add asa tem ami korchimnant. (Juanv 8:44) Jezu bhaxen aplea lokamnim ‘vaittacho dves dhorun borem tench korit ravlolem’ Devak zai.—Rom. 12:9; Heb. 1:9.

12. Anik khoinchea karonnak lagon zaitea Judevamnim Jezuk nakarlo?

¹² Anik khoinchea karonnak lagon Judevamnim Jezuk nakarlo? Paulun sanglem: “Ami porgott’ttanv tea Kristak khambear marlolo, hem Judevank bhavarth dhorunk ek addkoll zaun asa.” (1 Kor. 1:23, NW) Jezu jea toren melo tem polloun tannim Jezuk nakarlo. Karonn to Mesias nhoi, punn ek guneanvkari ani patki mhunn tankam dislem.—D.S. 21:22, 23.

13. Jezuk nakarlolea Judevamnim tachea vixim kitem vollkhon gheunk na?

¹³ Jezu guneanvkari naslo, tacher khotto arop ghatlolo ani tachea sangata on’neai zal’lo. Hem vollkhun gheunchea bodlek Judevamnim Jezuk nakarlo. Tacho neai kaidea pormonnem korunk naslolo. Judevanchea Mha-dhormsobhen goddbodd korun ani kaidea bhair vochon tacho neai kelo. (Lukas 22:54; Juanv 18:24) Tacher ghatlolea aropa vixim sodh korchea bodlek, neai korpi “tachea add firiad korunk konn-ui lottik aropi melltit kai mhonn sodtale.” Tantunt tankam ies mellonk na dekhun Jezuchea tondda thaun kitem tori chukichim utram bhair kaddun taka guneanvkari tharaunk tannim proitn kelo. Hem soglem korop kaidea add aslem. (Mt. 26:59; Marku 14:55-64) Tea bhair, Jezu porot jivont zalea uprant, tachi somadhi khali zaunk kitem karonn aslem tem dusreank kollona zaunk tannim rakhonddarank “borech poixe” dile.—Mt. 28:11-15.

14. Mesiasachea mornna vixim Devachea Utrant kitem sanglolem?

¹⁴ Devachea Utrant kitem sanglolem? Mesiasak moronk poddttolem mhunn zaitea Judevamnim chintunk naslem. Punn Devachea Utrant tachea vixim oxi bhasaunni  kel’li: “Tannem ap-khuxen moronn apnnacher ghetlem ani patkiam modlo ek patki koso apnnak lekhunk dilo. Khorem mhollear, somest monxanchea patkancho bhar to apnnacher gheun aslo ani patkiam pasot vinoti korit aslo.” (Iz. 53:12) Jezuk eka patkia bhaxen marlo. Hem Jezuk nakarunk Judevank ek karonn naslem.

15. Jehovachea Sakxeancher ghatlolea koslea aropank lagon lok tankam nakartat?

¹⁵ Aiz lok amkam kiteak nakartat? Jezu bhaxen aiz Jehovachea Sakxeancher khotto arop ghalun te guneanvkari mhunn lok sangtat. Hea vixim ami thoddim udharonnam polloum-ia. 1930 tem 1940 hea vorsam modem Jehovachi bhokti korunk amkam svotontrtai mellonk United States-achea korttamnim ami zaiteo kesi zhuzlim. Thoddea neai korpeank amchea vixim chukichem chintop aslem mhunn sarkem dison ietalem. Canada-achea Quebec-ant, thoinchea sorkaran igorzam sangata mellon amchea kamacho virodh kelo. Devachea Rajea vixim dusreank sangtat mhunn zaitea bhav-bhoinnank bondkhonnint ghatlim. Toxench, Germany-int Nazi-chea hukuma khala zaitea visvaxi tornnattea bhavank jivexim marle ani halinchea vorsamnim Russia-ntlea zaitea bhav-bhoinnank bondkhonnint ghatleant. Tim “hinvsa uzar korun sorkara add voitat” mhunn tancher arop ghatla, punn khorem mhunnttlear tim fokot dusreank Bible-a vixim sangtat. Toxench, Russia-nt aslolea New World Translation of the Holy Scriptures hacher bondi ghatlea. Tantunt Devachem nanv Jehova asa dekhun tem “sorkara add aslolem pustok” mhunn tannim tharailam.

16. 1 Juanv 4:1-a pormonnem Jehovachea lokancher ghatlole khotte arop aikon ami kiteak foschim nhoi?

¹⁶ Ami amcho bhavarth koso ghott korunk zata? Ek vixoi-acher sot kitem tem zannam zaiat. ‘Soglea jinsachem vaitt tumcher add uloitolim’ oxem mhunnon Jezun aplea aiknnareank adinch xittkail’lem. (Mt. 5:11) Soitan fottincho Bapui zal’lean sotacho mog kortoleanchem nanv pidd’ddear korun tanchea vixim fott ulounk to tanchea virodheank uksaita. (Prok. 12:9, 10) Amche virodhi amchea add uloitat tednam ami tem nakarunk zai. Te amcher ghaltat tea fottkirea aropank lagon ami Devachi seva korunk bhieunchem nhoi ani amcho bhavarth unno zaunk diuncho nhoi.—1 Juanv 4:1, vachat.

17. Jezu morche poilim kitem ghoddlem tem polloun thoddo lok taka kiteak nakarunk xoktalo?

¹⁷ Jezu morchea thoddeach vella poilim 12 apostlam modlea eklean tacho ghat kelo. Eklean taka tin pavtti nakarlo ani sogle apostl taka soddun gele. (Mt. 26:14-16, 47, 56, 75) Hem polloun Jezu ojap zaunk na, karonn hea vixim tannem poilinch sanglolem. (Juanv 6:64; 13:21, 26, 38; 16:32) Tor apostlam vixim hem polloun thoddeamnim oxem chintlem astolem, ‘Jezuche xis Jezu sangata oxe vagtat zalear mhaka Jezucho xis zaunk naka!’

18. Jezu morchea thoddeach vella poilim khoincheo bhasaunneo purnn zaleo?

¹⁸ Devachea Utrant kitem sanglolem? Jezu ieunchea xemboramnim vorsam poilim Mesiasak rupeachea 30 nannea pasot tacho lagincho ixtt tacho ghat kortolo mhunn Jehovan adinch Bible-ant boroun dovorlolem. (Zek. 11:12, 13; St. 41:9) Provadi Zekaraian pasun oxem boroilem: “Gonvlliak mar ghal, xellianchi duspott kor.” (Zek. 13:7) Tor, heo bhasaunneo purnn zatat teo polloun Jezuk nakarchea bodlek lokancho bhavath ghott zaunk zai aslo.

19. Promannik kallzache lok kitem zannant?

 ¹⁹ Aiz lok amkam kiteak nakartat? Jehovache Sakxi aslole thodde, aiz dhorm-broxtt zaleat. Te media ani internet uzar korun, Jehovachea Sakxeam vixim khotti mahiti ditat ani dusreancho bhavarth halounk proitn kortat. Punn hem polloun promannik munxacho bhavarth halona, karonn oxem zatolem mhunn Bible-ant boroilolem asa mhunn tim zannant.—Mt. 24:24; 2 Ped. 2:18-22.

20. Dhorm-broxtt lokam thaun fosona zaunk ami kitem korunk zai? (2 Timotak 4:4, 5)

²⁰ Ami amcho bhavarth koso ghott korunk zata? Ami sodanch Bible obheas korunk zai, magnnem korunk zai, ani Jehovachea kamacher dhean diunk zai. (2 Timotak 4:4, 5 vachat.) Toxench, amkam Jehova pasot, tachea Utra pasot ani bhav-bhoinnam pasot mog asonk zai. Ami oxem kortat tednam Jehovachea Sakxeam vixim dhorm-broxtt ditat ti khotti mahiti aikon amcho bhavarth halcho na.—Iz. 28:16.

21. Aiz choddso lok amcho sondex nakartat zalear pasun ami kitem khatri dovrunk zata?

²¹ Jezuchea disamnim zaiteamnim taka nakarlo tem khorem punn zaiteamnim tacho pattlav pasun kelo. Zoxem, Mha-dhormsobhechea eka vangddean ani “puskoll iadnikamnim” porian tacher bhavarth dovorlo. (Itihas 6:7; Mt. 27:57-60; Marku 15:43) Tor teach bhaxen, aiz lak’khamnim lok Jezucho pattlav kortat, karonn tim Bible-antlean sot xikleant ani tea sotancho tim mog kortat. Tanchea vixim Bible sangta: “Tuje Somurticho mog kortat tim vhodd xanti bhogta; tim kiteakuch adllun poddchim nant.”—St. 119:165.