1-2. Zaitea Sakxeank koslea oddchonneancho fuddo korcho poddtta?

PORGOTTNNENT apleachean zata titlem korunk Paulun Timotak urba dili. (2 Tim. 4:5) Ani soglea Kristanvamnim pasun oxench korunk zai. Punn oxem korunk amkam ghoddie thoddea oddchonneancho fuddo korcho poddttolo. Zoxem, zaitea bhav-bhoinnank porgottnnent bhag gheunk dhirachi goroz asta. (2 Tim. 4:2) Udharonnak, amchea kamacher bondi aslolea desamnim, amchim bhav-bhoinnam porgottnnent gelear tankam odhikari bondkhonnint ghalunk xoktat. Tori astana, tim dhiran porgott’ttat!

² Tea bhair, veg-vegllea somosiank lagon Jehovache sevok thodde pavtti nirax zatat. Udharonnak, aplea familicheo gorzo purnn korunk zaiteank chodd voram kam korchem poddtta, zaka lagon tim thoktat. Tor tankam itsa asa zalear pasun tim porgottnnent chodd vell korunk pavonant. Toxench, thoddim khub duent ani zanttim asat dekhun tim ghora thaun bhair soronk xokonant ani porgottnnent thoddench korunk pavtat. Ani thoddeank, apunn Jehovachea nodren valorachim nant oxem dista. Hea vixim Gulfant ravpi Mary * nanvachi ek bhoinn mhunntta: “Oslim chintnam pois korunk mhaka khub vavr korcho poddtta ani haka lagon, porgottnni korunk mhaka vell mellona. Tednam mhojem ontoskornn mhakach khata.”

3. Hea lekhant ami kitem xiktolim?

³ Amkam kosleo-i oddchonneo aslear pasun, amchean zata  titli tachi seva korit ravonk Jehova amkam xokti dita. Hem to koxem korta tem ami polloum-ia. Punn poilim, oddchonneo aslear pasun, Jehovan Pauluk ani Timotak porgottnni korit ravonk koxi modot keli tem ami polloum-ia.

4. Paulun koslea oddchonneancho fuddo kelo?

⁴ Pauluk zaiteo oddchonneo asleo. Taka marlo, fatrailo ani bondkhonnint ghatlo tea vellar, Devachea modotichi taka chodd goroz asli. (2 Kor. 11:23-25) Toxench, niraxiponnachim bhavnam pois korunk taka zhuzchem poddlem mhunn Paulun ukteponnim sanglem. (Rom. 7:18, 19, 24) Tea bhair, taka ‘kuddint romblolea eka kanttea’ sarkea duensancho fuddo korcho poddlo ani Devan to kantto rokddoch kaddlolo taka zai aslo.—2 Kor. 12:7, 8.

5. Pauluk zaiteo oddchonneo asleo tori astana to kitem korunk pavlo?

⁵ Pauluk zaiteo oddchonneo asleo hem khorem. Punn Jehovan taka porgottnni korunk xokti dili. Udharonnak, Romant to ghorant koidi aslo tednam to kitem-kitem korunk pavlo tem atam ami polloum-ia. Tannem Judevanchea fuddareank, ghoddie sorkari odhikareank, rakhonddarank, taka mellonk ietale tankam ani herank porgottlem. (Itihas 28:17, 30, 31; Filp. 1:13; 4:21,22) Heach vellar, tannem Devachea preronnan, chitteo boroileo. Tanchea thaun aiz pasun Kristanvank faido zata. Toxench, Pauluchea udharonnantlean, Romi sobhentlea bhav-bhoinnankui urba mell’lli ani tim “odik dhiran ani bhiranti vinnem Devachem utor porgottunk” laglim. (Filp. 1:14) Tor thodde pavtti Paulu apleak zai titli porgottnni korunk xokonaslo. Punn tannem apleachean zata titlem kelem. Hea toren tachi poristhiti “Xubhvortomanache porgottnnek odik faideachi zali.”—Filp. 1:12.

6. 2 Korintkarank 12:9, 10 pormonnem, Pauluk apli seva bore toren korunk koxi modot zali?

⁶ Devachea sevent apunn jem kitem korta tem aplea bollan nhoi, punn Jehovachea xokten mhunn Paulu zannam aslo. Tannem mhunnttlem, hanv ‘osokt aslear pasun Devachea xokte udexim Mhojem boll sopurnnaien porzollta.’ (2 Korintkarank 12:9, 10 vachat.) Pauluk dhumallo aslo, taka bondkhonn favo zali ani her oddchonneancho pasun taka fuddo korcho poddlo. Punn,  Jehovan taka aplea povitr xokte udexim apli seva bore toren korunk modot keli.

7. Devachi seva kortana Timotak koslea oddchonneancho fuddo korcho poddlo?

⁷ Timotak pasun Paulu bhaxen seva korunk Devachea adarachi goroz asli. To Paulu sangata mixinori bhonvddent khub provas kortalo. Tea bhair, bhav-bhoinnank urba diunk Paulu Timotak sobhank bhett diunk dhaddttalo. (1 Kor. 4:17) Tor, hem soglem korunk apunn purto na oxem taka dislem astolem. Taka lagon, Paulun taka mhunnttlem: “Tum tornne piraiecho mhonn konnench tuji beporva korum noie.” (1 Tim. 4:12) Tea bhair, tea vellar Timotachea kuddint pasun romblolo ek kantto aslolo, mhunnche ‘taka ek pidda asli vo to porot-porot duent’ poddttalo. (1 Tim. 5:23) Punn bori khobor porgottunk ani aplea bhav-bhoinnachi seva korunk, Jehova apli povitr xokti apnnank ditolo mhunn Timotak khatri asli.—2 Tim. 1:7.

8. Jehova aplea lokank aiz xokti koxi dita?

⁸ Aiz apli seva korit ravonk, Jehova aplea lokank ‘vorti podvi vo xokti’ dita. (2 Kor. 4:7) Jehova amkam hea char vostum udexim koxi xokti dita tem atam ami polloum-ia. Teo mhunnttlear: Magnnem, Bible, bhav-bhoinnam ani porgottnni.

9. Magnnea udexim amkam koxi modot zata?

⁹ Magnnem. Efezkarank 6:18 pormonnem, Paulu amkam “sogllea somoiar” magnnem korunk urba dita. Tor ami toxem kortat zalear, Dev amkam xokti ditolo. Bolivia-nt ravpi Jonnie zaitea somosiancho fuddo kortalo tednam, taka Devachi hi modot mell’lli. Tachi bail ani avoi-bapui, ekach borabor duent poddlim. Tanchea sogleanchi kallji ghevop Jonnie-k sompem naslem. Uprant, tachi avoi bhair poddli ani tachea bailek ani bapaik boro zaunk zaito vell laglo. Tea vella vixim Jonnie mhunntta: “Mhaka khub usko zatalo tednam mhaka koxem dista tem hanv magnneant Devak sangtalo. Tea udexim mhaka modot zali.” Jehova Devan Jonnie-k tache tras sosunk goroz ti xokti dili. Bolivia-nt ravpi Ronald nanvachea vhoddilak, aplea avoi-k cancer zalam mhunn koll’llem. Ani eka mhoinea uprant, ti bhair poddli. Hea kotthin vellar, taka koxi modot zali? To mhunntta: “Hanv magnnem korun mhaka koxem dista tem soglem Jehovak sangta. To mhaka sogleam poros ani mhojea poros pasun bore toren somzota.” Thodde pavtt amkam amchea somosiancho fuddo korunk kotthin zait vo kitem magnnem korchem tem pasun somzona zait. Punn oxea poristitint pasun, ami magnnem kelolem Jehovak zai.—Rom. 8:26, 27.

10. Hebrevank 4:12-ant sanglolea pormonnem, Bible vachun tacher niall korop kiteak gorjechem?

¹⁰ Bible. Paulu Devachem Utor vachtalo dekhun taka xokti ani buzvonn mell’lli. (Rom. 15:4) Toxench ami Devachem Utor vachun tacher niall korunk zai. Toxem kelem zalear, Jehovachea povitr xoktechea modotin Devachem Utor somzunk ani tem ami amchea jivitant lagu korunk amkam modot zatoli. (Hebrevank 4:12 vachat.) Ronald zachea vixim ami poilim uloil’lim, to mhunntta: “Dor eke ratik mhaka Bible vachpachi sonvoim asa. Ani to vachta tednam Jehovache gunn ani jea ritin to aplea lokanchi kallji gheta tacher hanv khub niall korta. Oxem kel’lean mhaka xokti melltta.”

11. Bible-acher niall kelolean eke dukhi bhoinnik koxi modot zali?

¹¹ Ami Devachea Utracher niall kortat tednam amchea somosia vixim sarkem chintop dovrunk modot zata. Ek onnbhov  polloum-ia. Eke bhoinnicho ghov bhair poddlo dekhun ti khub dukhest zali. Tika modot zaunk eka vhoddilan tika Jobachem pustok vachunk sanglem. Ti toxem korunk lagli ani Jobachea chukichea chintpa vixim vachunk lagli. Tednam ti monantuch oxem mhunnonk lagli: “Job! Tum tujea somosia vixinch chintit ravonaka.” Tednam apunn pasun Job-a sarki chintali mhunn tika somzolem. Hea toren niall kelolean ti aplem chintop bodlunk pavli ani tichem dukh sosunk tika modot zali.

12. Jehova amkam bhav-bhoinnam udexim koso modot korta?

¹² Bhav-bhoinnam. Jehova amkam bhav-bhoinnam udexim pasun modot korta. Bhav-bhoinnank ‘dhir diunk’ apun axetalo mhunn Paulun boroilem. (Rom. 1:11, 12) Mary, zachea vixim ami poilim uloilolim, tika bhav-bhoinnam sangata vell sarunk borem dista. Ti mhunntta: “Mhojea somosia vixim khobor naslolea thoddea bhav-bhoinnank pasun uzar korun Jehovan mhaka modot kelea. Karonn tanchea utram ani karddam udexim mhaka goroz ti modot mell’llea. Mhojea sarkea somosiancho fuddo kelolea bhoinnam lagim uloun ani tanchea thaun xikon pasun mhaka modot mell’llea. Tea bhair, hanv sobhent valorachi asa mhunn vhoddil mhaka lekhtat.”

13. Ami mittingent eka-mekak koxi urba diunk zata?

¹³ Ami mittingek voitat tednam amkam eka-mekak urba diunk sondhi melltta. Tor, bhav-bhoinnank ami mellttat tednam ami tancho kitlo mog kortat ani tannim kel’lea kamacho ami kitlo valor kortat tem ami sangonk zata. Eke bhoinnicho ghov sotant naslo. Punn ti aplea sov bhurgeank gheun mittingek ietali. Ek dis mitting suru zaunchea poilim Peter nanvachea vhoddilan tika oxem sanglem: “Tum tujea sov-ui bhurgeank mittingek ieunk ani zobab diunk borea bhaxen toiar korun haddtta tem polloun mhaka khub urba melltta.” Hem aikon tichea dolleant dukham ailim. Tinnem mhunnttlem: “Tujea hea utrantlean mhaka kitli urba mell’lli tem tum nokllo.”

14. Porgottnnechea kama udexim amkam koxi modot zata?

¹⁴ Porgottnni. Lok amchem aikum vo na aikum, jednam ami Bible-antlim sotam dusreank sangtat, amkam urba melltta. (Mho. 11:25) Hem koxem mhunn Stacy nanvachea bhoinnichea udharonnantlean amkam kollon ieta. Tichea familichea ekleak sobhentlean bhair kaddlolem. Taka modot korunk apnnem kitem korunk zata aslem mhunn chintit ravon ti nirax zali. Tor Stacy-k porgottnne udexim koxi modot zali? Porgottnnent bhag ghetlolean ti aplea khonticher nhoi, punn dusreanchea gorzancher dhean diunk pavli. Ti mhunntta: “Jehovan mhaka ek boro Bible obheas gheunk sondhi dili. Ti bail bori vaddavoll korta tem polloun mhaka khub urba mell’lli. Tor tea vellar porgottnnechea kama udexim mhaka sogleam-von chodd modot zali.”

15. Mary-chea utrantlean tumi kitem xiktat?

¹⁵ Thoddeank aplea poristhitik lagon chodd porgottnni korunk zaina oxem disonk xokta. Tumkam oxench dista zalear, tumi tumchean zata titli seva kortat tednam, Jehova khuxal zata mhunn ugddas dovrat. Mary jichea vixim ami poilim uloilolim, ti dusri bhas uloitat tea lokank porgottunk geli tednam, apunn heram poros bori ulounk xokona oxem tika dislem. Tim mhunntta, “Thoddo vell poriant hanv porgottnnent fokot thoddinch utram ulounk xoktali, ek Bible vers vachunk xoktali ani ek ttrektt diunk pavtali.” Taka lagon, hi bhas uloita tanchea bhaxen apunn ulounk xokona mhunn ti bejar zatali. Punn uprant tinnem  aplem chintop bodol’lem. Tika ti bhas bore toren ulounk kollona tori astana Jehova tika aplea sevent uzar korta mhunn tinnem ugddas dovorlo. Ti fuddem mhunntta, “Bible-antlim sotam sadim asat ani tinch lokanchem jivit bodlunk xoktat.”

16. Ghorantlean bhair soronk zaina tannim porgottnni koxi korunk zata?

¹⁶ Thoddim ghorantlean bhair soronk xokonant mhunn tim porgottnnent chodd korunk pavonant. Punn Jehova tankam somzon gheta ani porgottnni korunk tankam sondhi dita. Zoxem dotorank, norsink vo tancho samball kortoleank tannim sakx diunk zata. Ami poilim bhaxen korunk zaina mhunn chitit ravlim zalear ami nirax zaunk xoktat. Punn Jehova aiz amkam koso modot korta tacher ami dhean dilem zalear, koslea-i oddchonneancho khuxalkaien fuddo korunk amkam xokti mellttoli.

17. Upodexok 11:6-a pormonnem, lok amchem aikona zalear-ui ami porgottnni kiteak korit ravonk zai?

¹⁷ Sotachem khoinchem bim vaddttolem tem ami noko. (Upodexok 11:6 vachat.) Hea vixim 80 poros chodd vorsam aslolea Barbara nanvachea bhoinnichem udharonn gheum-ia. Ti bhoinn fon korun ani chitti boroun sodanch sakx dita. Tinnem eke chittie sangata Mars 1, 2014 The Watchtower masik dhaddlem. Tantunt “What God Has Done for You” ho lekh aslo. Tinnem dhaddloli hi chitt, poilim Jehovachim Sakxim aslolea eka zoddpeachea hantant poddli mhunn tika khobor nasli. Tannim tem masik zaite pavtti vachlem. Jehova apnnach lagim uloita oxem tea ghovak dislem. Sumar 27 vorsam uprant tem zoddpem porot mittingek ieunk laglem ani tim porgottnnaram zalim. Khorench, tea eke chittie vorvim kitlo boro porinnam zalo tem polloun Barbarak kitli urba mell’lli astoli nhoi!

18. Deva thaun xokti ani urba mellonk ami kitem korunk zata?

¹⁸ Jehova amkam urba ani xokti diunk zaitea vattamnim modot korta. Zoxem magnnem, Bible, bhav-bhoinnam, ani porgottnni. Ami heo char vatto uzar kortat tednam Jehova Devak xokti asa ani to amkam modot korunk sodhta hachi amkam khatri asa mhunn ami dakhoun ditat. Tor, ami sodanch amchea sorginchea Bapacher visvas dovrum-ia, zo ‘soglea kallzan apnnak sodtoleank ghottai diunk’ khuxal zata.—2 It. 16:9.