1. Jezun aplea xisank kosli dekh dovorli, ani tannim kitem kelem? (Masikachem fuddlem chitr polloiat.)

JEZU prithumer aslo tednam lok aplo sondex aikotolo mhunn opekxa dovrun to porgottit ravlo ani tachea xisamnim pasun hench kel’lem taka zai aslem. (Juanv 4:35, 36) Jezu tanchea sangata aslo tednam tache xis urben porgott kortale. (Lukas 10:1, 5-11, 17) Punn, Jezuk dhorun jivexim marlo tednam thoddea vella pasot tanchi urba unni zali. (Juanv 16:32) Tor, Jezu porot jivont zalea uprant aplea xisank porgottnni korit ravonk tannem urba dili. Ani Jezu sorgar gelea uprant tannim itlea urben porgottnni keli ki dusmanamnim mhunnttlem: “Polleiat, tumche xikovnnen tumi Jeruzalem bhorlam.”—Itihas 5:28.

2. Porgottnnechea kamacher Jehovan koxem besanv ghatlam?

² Poilea xekddeantlea Kristanvank Jezun porgottnnechem kam korunk margdorxon dilem. Ani Jehovan modot keli dekhun zaiteamnim tancho sondex aikolo. Udharonnak, 33 K.X.-ant Pon’nasavea Disa sumar 3,000 lokamnim bautizm ghetlo. (Itihas 2:41) Ani tea uprant, chodd ani chodd lok Jezuche xis zait gele. (Itihas 6:7) Punn, xevottachea disamnim hache poros chodd lok aple xis zatole mhunn Jezun sanglolem.—Juanv 14:12; Itihas 1:8.

3-4. Thoddea vattaramnim porgottnni korit ravonk kiteak kottin zaunk xokta, ani ami hea lekhant kitem xikchim asat?

³ Porgottnnechem kam ami soglim khuxalkaien korunk xoktat ani oxem korop thoddea desamnim sompem asa.  Karonn thoddea desamnim lokank Bible xikonk itli avodd asa ki apleak Bible xikonk eklo Jehovacho Sakxi mellot kai mhunn lok vatt polloitat. Punn thoddea desamnim porgottnni korunk kotthin zata, karonn lok chodd korun ghora asonant vo tankam Bible xikonk avodd asona.

⁴ Oslea eka zagear tumi ravtat zalear, hea lekhant dilolea suchounneam udexim tumkam modot zaunk xokta. Oslea vattaramnim zaitea lokank mellonk porgottnnaramnim kitem kelam ani lok amcho sondex aikum vo nakarum, ami amchem porgottnnechem kam khuxalkaien korit ravonk koslim karonnam asat tem ami hea lekhant polloitolim.

5. Zaitea Sakxeank koslea oddchonneancho fuddo korcho poddtta?

⁵ Lokam lagim ulounk mellona dekhun zaitea Sakxeank porgottnni korunk kotthin zata. Zoxem thoddea building-amnim security guard aslolean khoinchea-i munxak porvangim aslea xivai bhitor ieunk dinant ani toslea flat-amnim porgottnnarank vochonk mellona. Thoddim porgottnnaram kainch addkoll nastana ghor-ghoramnim vochonk xoktat, punn choddxea ghoramnim lok asonant. Anik thoddim porgottnnaram kheddea ganvamnim porgott’ttat, zoim khub unno lok ravtat ani tanchim ghoram eka-meka thaun khub pois asat. Ani titlo vell provas korun pasun lok ghoddie ghora mellonant. Ami oslea oddchonneancho fuddo kortat zalear porgottnnechem kam ami soddun diunchem nhoi. Hea oddchonneancho fuddo korunk ani chodd lokank mellonk ami kitem korunk zata?

6. Nustem dhortat ani porgottnni kortat tanchea modem kitem ek-sarkench asa?

⁶ Jezun porgottnnechem kam nustem dhorpachea kamak sor kelem. (Marku 1:17) Thoddea nustekarank, thodde pavtti nustench mellona mhunn te nusteak vochpachem soddun dinant. Punn te dusrea vellar, dusrea zagear, ani dusreo vatto uzar korun nustem dhortat. Ami amchea porgottnnent osle bodol koxe korunk xoktat tem atam ami polloum-ia.

7. Veg-vegllea vellar porgottnni kelolean koso faido zata?

⁷ Lokank veg-vegllea vellar mellonk proitn korat. Lok chodd korun ghora astat tednam mhunnche donparam vo sanjer, zaitim bhav-bhoinnam porgottunk voitat. Karonn tea vellar, lok aplea kamant bizi asonant ani aikonk toiar astat. Vo thoddim David nanvachea vhoddila sarkim kortat. Eka vattarant thoddo vell porgottnni kelea uprant, to ani tacho vangddi zannim daram ugddunk naslim tea darancher porot martat. To mhunntta, “Dusre pavtti bhett dilolean zaite lok ghora mellttat.” *

8. Upodexok 11:6-ant sanglolim utram ami amchea porgottnnechea kamant koxim lagu korunk xoktat?

⁸ Hea lekhachea mukhel versa pormonnem, lokank tanchea ghora mellonk ami proitn korit ravonk zai ani oxem korop ami soddun diunk zaina. (Upodexok 11:6 vachat.) David, zachea vixim ami poilim uloilolim tacho ho onnbhov polloum-ia. Eka ghorant konnuch mellonaslo mhunn tannem soddun dinastana zaite pavtti bhett diunk proitn kelo. Xevottak, tea ghorant taka ek munis mell’llo zaka Bible xikonk itsa asli ani tannem mhunnttlem, “Hanv gel’lea att vorsam thaun hea ghorant ravta. Punn Jehovache Sakxi  mhaka hanga kednanch mellonk nant.” David fuddem mhunntta, “Khub proitn kelea uprant amkam lok ghora mellttat tednam chodd korun tim aikonk toiar astat mhunn mhaka kollon ailem.”

9. Lok ghora mellona tednam thoddea Sakxeamnim kitem kelam?

⁹ Veg-vegllea zagear porgottnni korat. Lok ghora mellona dekhun thoddea porgottnnaramnim vegllea zagear porgottnni korunk suru kelea. Udharonnak, rostea deger kartt dovrun porgottnni kelolean porgottnnaram zaitea lokam lagim ulounk pavleant. Hea lokank ghoddie ghora mellonk kotthin zata astolem. Karonn chodd korun tim ghora asonant vo tanchea ghoramnim vochonk amkam porvangi asona. Tea bhair, garden-amnim, bazarant, ani veapar dhondeachea zagear lok ulounk ani prokaxonam gheunk toiar astat mhunn zaitea porgottnnaramnim onnbhovlam. Floiran nanvacho Bolivia-cho sorkittachi dekhrekh korpi mhunntta: “Ami donparchim 1 tem 3 hea vellar bazarant ani veapar dhondeachea zagear porgottnni kortat. Hea vellar, chodd giraik naslolean dukandar ulounk toiar astat. Ani ami Bible obheas pasun suru keleat.”

10. Lokank Sakx diunk tumi anik kitem korunk zata?

¹⁰ Veg-vegllea toren porgottnni korunk proitn korat. Tumi zaitea pavtti eka ghora bhett diunk proitn kelear pasun thoim tumkam konnuch mellona tednam tumi kitem korunk xoktat? Katarína mhunntta, “Mhaka ghora mellona toslea lokank hanv chitti boroitam. Tankam hanv mell’llem zalear kitem sangta aslem tench hanv boroitam.”  Tor, tumi kitem korunk xoktat? Tumchea vattarant aslolea dor ekleak Sakx diunk veg-veglleo vatto apnnaiat.

11. Thoddo lok amcho sondex kiteak aikonant?

¹¹ Thoddo lok veg-vegllea karonnak lagon amcho sondex aikonant. Zoxem, tankam Deva vixim vo Bible-a vixim zannam zaunchi goroz na mhunn dista. Tim sonvsarant itle dukh-tras polloitat dekhun Dev asa mhunn tim patienant. Toxench, thoddim dhormik fuddari Bible-achea totvam pormonnem jienant tem polloitat dekhun tim Bible xikonk sodinant. Tea bhair, thoddim aplea kamamnim, familimnim, somosiamnim itlim buddlolim astat ki Bible tankam modot korunk xokta mhunn tankam disona. Tor, oslea lokank ami porgott kortat tednam ami sodanch koxim khuxal ravonk xoktat?

12. Filipkarank 2:4-ant sanglolim utram lagu kelear amkam amchea porgottnnechea kamant koxi modot zata?

¹² Tumkam dusreanchi kallji asa mhunn dakhoiat. Survatek, zaito lok amcho sondex aikonant. Punn ami tankam kallji dakhoitat tednam te amcho sondex aikonk lagtat. (Filipkarank 2:4 vachat.) Udharonnak, David, zache vixim ami poilim uloilolim, to mhunntta, “Konnui ‘mhaka aikonk naka’ oxem mhunntta zalear, Bible-a vixim sangon prokaxonam diunchea bodlek to amcho sondex kiteak aikonk sodhina, hem hanv zannam zauncho proitn korta.” Tor amkam lokanchi kallji asa kai na tem tankam rokddench kolltta. Tumi tankam kitem sanglolem tem ti ek vell visrot. Punn tumi tanchea lagim koxim vaglolim tem tim ugddas dovortolim. Lok amchea sondexak kan dina zalear pasun amchea sobhavantlean ani vagnnukentlean amkam tanchi kallji asa kai na tem tankam kolltta.

13. Amcho sondex amchea aiknnareak faideak poddtta toso ami koso korunk xoktat?

¹³ Bible-antlo sondex amchea aiknnareak koso faideak poddonk xokta tea vixim chintun uloitat tednam amkam tanchi kallji asa mhunn ami dakhoitat. Udharonnak, amchea aiknnareak bhurgim asat mhunn kolltta zalear, Bible-antlim totvam bhurgeank vaddounk ani familint khuxalkai mellonk koxim modot kortat tea vixim ami tanchea lagim ulounk xoktat. Vo tumi uloitat tea ghora aiknnarean aplem ghor surokxit dovrunk zaitem kelam mhunn tumkam dista zalear fuddarak Devachea Rajeant aiz asa toxi bhirant aschina ani sompurnn surokxa mellttoli hea vixim ami tanchea lagim ulounk  xoktat. Katarína zachea vixim ami poilim uloilolim tem hench korta. Tem mhunntta, “Bible-antlem sot zannam zalolean mhaka koxem faideak poddlam tea vixim hanv chinta.” Oxem kelolean Katarína khatren ulounk pavta ani hem lokank dixtti poddtta.

14. Mhonn’nneo 27:17-a pormonnem, ami amchea bhav-bhoinnam sangata porgottnni kortat tednam amkam koxi modot zaunk xokta?

¹⁴ Dusream thaun modot gheiat. Poilea xekddeant, Paulun Timotak koxem porgottop ani xikovop tem dakhoilem. Ani aplea thaun xiklolem tem dusreankui xikoi mhunn tannem Timotak sanglem. (1 Kor. 4:17) Tor, Timota bhaxen porgottnnent onnbhov aslolea bhav-bhoinnam thaun ami xikonk zata. (Mhonn’nneo 27:17 vachat.) Atam ami Shawn nanvachea bhavachem udharonn polloum-ia. To poixil’lea eka ganvant pioneering korunk gel’lo. Thoim choddxe lok dusrea dhorma vixim zannam zaunk sodhinasle. Tor, oslea zagear apli porgottnni khuxalkaien korunk tannem kitem kelem? To mhunntta, “Hanv zata tednam konna eklea borabor seva kortalo. Ami eka ghora thaun dusrea ghora voitana, poilinchea ghora ami kitem uloil’lem ani kitem uloil’lean anik bore zata aslem tea vixim ami uloitat.”

15. Magnnem korop kiteak gorjechem?

¹⁵ Magnnem korun Jehovachi modot gheiat. Tumi dor ek pavtt porgottnnent voitat tednam Jehova lagim magnnem korat. Karonn Jehovachea povitr xoktechi modot na zalear ami kainch korunk xokonant. (St. 127:1; Lukas 11:13) Tumkam umkench korunk modot zai mhunn Jehovak sangat. Udharonnak, Jehova vixim xikonk sodhtat toslea munxam lagim ulounk modot kor mhunn tumi magonk zata ani tumi maglam tea pormonnem, melltta tea soglea lokank porgott korat.

16. Svotacho obheas korop kiteak gorjecho?

¹⁶ Svotacho obheas korat. Devachem Utor sangta: “Devachi khuxi kitem ti, taka kitem borem, ani taka kitem manta tem ami khatri korun gheunk zai.” (Rom. 12:2, NW) Amchea lagim asa tea sotancher amkam khatri asa zalear dusream lagim ami uloitat tednam ami khatren uloitolim. Katarína zachea vixim ami poilim uloilolim, ti mhunntta: “Bible-antlea thoddea mullavea sotancher hanvem mhozo bhavarth ghott korunk zai mhunn mhaka halinch kollon ailem. Tor, hanvem hea vixoi-ancher bariksannem sodh kelo: Ek Rochnnar asa mhunn ami kiteak khatri dovrunk zata, Bible khorench Devachem Utor kai, ani Dev aplea vixim xikounk ek songotton uzar korta mhunn kosle purave asat.” Hea vixoi-ancher obheas kelolean aplo bhavarth ani porgottnnent apli khuxalkai vaddlea mhunn Katarína sangta.

17. Jezu kiteak khuxalkaien porgottnni korit ravlo?

¹⁷ Lok tache aikonaslem tori astana Jezu kiteak khuxalkaien porgottnni korit ravlo? Lokamnim sot zannam zavop kitlem gorjechem asa tem Jezu bore bhaxen zanna aslo ani zata titlea lokank Devachea Rajeacho sondex aikonk to sondhi diunk sodhtalo. Tea bhair, survatek jim tachem aikonaslim tim ghoddie uprant aikonk xoktalim mhunn taka khobor asli. Udharonnak, sadde-tin vorsam porgottnni keli tednam tache svotache bhav xis zaunk nant. (Juanv 7:5) Punn tachea purnorjivontponna uprant, te Kristanv zale.—Itihas 1:14.

18. Ami kiteak porgottnni korit ravonk zai?

¹⁸ Aiz vo faleam sotant konn ietolo tem ami noko. Amchea sondexak thoddim rokddinch  kan diunk puro ani thoddim khub vorsam uprant kan diunk puro. Karonn amcho sondex aikonant tim amcho boro sobhav polloun ani ami khuxalkaien porgottnni korit ravtat tem polloun “Devak vakhannunk pavtolim.”—1 Ped. 2:12.

19. 1 Korintkarank 3:6, 7-a pormonnem, ami kitem ugddas dovrunk zai?

¹⁹ Tor, ami porgottnni kortat ani xikoitat tem khorem. Punn Dev amchea kamacher besanv ghalta mhunn ami ugddas dovrunk zai. (1 Korintkarank 3:6, 7 vachat.) Getahun nanvacho Ethiopia-ntlo ek bhav mhunntta: “20-a poros chodd vorsam hanv ekttoch hea vattarant porgottnni kortalo. Punn atam hanga 14 porgottnnaram asat. Mhoji bail ani tin bhurgim mellon, 13 zannamnim bautizm ghetla ani amchea mittingent sumar 32 lok ietat.” Jehova borea monachea lokank aplea songonttnnent haddtta tea meren Getahun pasiesan porgott korit ravlo mhunn to khub khuxal!—Juanv 6:44.

20. Ami lokancho jiv salvar korpi mhunn kiteak mhunnonk zata?

²⁰ Dor ekleacho jiv Jehovachea nodre mukhar moladik zaun asa. Taka lagon, hea sonvsaracho nas zaunchea poilim aplea Puta sangata soglea desantlea lokank sot xikounk to amkam sueog dita. (Hag. 2:7) Ami amchem porgottnnechem kam ek building-ent uzo lagla to palounk ailolea munxank sor korunk zata. Tea building-entlea thoddeach lokancho jiv salvar zalear pasun, tankam salvar korunk tea soglea munxancho vavr mellon asa. Ami pasun teach munxam sarkim asat. Hea Soitanachea sonvsarant, kitlea lokank ami salvar kortolim tem amkam khobor na. Punn tankam salvar korunk, Jehova amkam konnakui uzar korunk xokta. Bolivia-nt ravpi Andreas mhunntta: “Zaitea lokancho vavr mellon asa dekhun ek munis Bible xikta ani bautizm gheunk pavta mhunn mhaka kollon ailem.” Tor, ami porgottnnechem kam korit ravlim zalear, Jehova amchea porgottnnechea kamacher besanv ghaltolo ani hea kamant ami sodanch khuxal astolim.