Tumi Zannam Aslim?
Adim lok hoddim bandunk papyrus-achim zhaddam uzar kortale kai?
Papyrus plant
Adlea tempar Ejiptkar papyrus uzar korun kel’lea kovlleancher boroitale mhunn zaito lok zannam aslo. Toxench, Grek ani Romi lok pasun borounk osle kovlle uzar kortale. * Tea bhair, papyrus uzar korun hoddim pasun bandtale. Punn, choddxea lokank hea vixim khobor na.
Ejiptkaranchea somadhint mell’llolea papyrus-achea hoddinchem don nomune
Sumar 2,500 vorsam adim, provadi Izaiasan boroilem ki ‘Ethiopiechea nodim-poltoddchea lokamnim Loveanchea hoddeamnim vo papyrus-achea hoddeamnim udkam voir, doriantlean razdut dhaddle.’ Uprant, Mediani ani Parsi Babilon xaracher akromonn korunk ietole tednam Babilonkaramnim pollon voichem nhoi mhunn tanchi “papyrus-achi hoddim” te lasun uddoitole mhunn provadi Jermiasan bhakit kelolem.—Iza. 18:1, 2; Jer. 51:32 NW.
Tor, papyrus uzar korun hoddim bandtale mhunn Bible-ant poilinch sanglolem. Punn Ejiptant papyrus uzar korun hoddim bandtale mhunn pornea vostuncher sodh korpeamnim atam sodhun kaddlam. Tem polloun Bible vidhearthi ojap zainant, karonn Bible Devachea preronnan boroilam mhunn tem zannant. (2 Tim. 3:16) Tor, pornea vostuncho sodh korpeamnim kitem sodhun kaddlam tem polloum-ia.
PAPYRUS-ACHI HODDIM KOXE KORTALE?
Papyrus ektthaim korun lok hoddim koxe toiar kortale tem Ejiptkaranchea somadhinchea vonttincher kaddlolea ani kantoilolea chitrantlean kolltta. Lok papyrus-ache khande katortale ani sangata bandtale. Ani uprant, sangata bandlole bhore ektthaim korun ghott bandtale. Papyrus-acho khando katorlear addve vatten tacho akar trikona sarko asta. Tor, te khande sangata bandtale tednam to bhoro ekdom ghott ani mozbut zatalo. A Companion to Ancient Egypt, pustoka pormonnem papyrus-achim hoddim 55 futt (17 metr) lamb astalim ani tantunt 10 te 12 lokank eka-fattlean-ek boson tannunk zago astalo.
Ejiptkar papyrus-achi hoddim koxe kortale tem fattracher kattoil’lem asa
HODDIM BANDUNK PAPYRUS KITEAK UZAR KORTALE?
Ejiptachea Nile nodi deger papyrus-achim zaitim zhaddam zatalim. Ani tim uzar korun hoddim bandunk sompem aslem. Lokamnim vhoddlim hoddim bandunk lakddam uzar korunk suru kelem tednam pasun nustekar ani xikari lhan hoddim bandunk papyrus uzar kortale.
Apostlanchea kallar pasun thodde lok papyrus-achim hoddim bandtale mhunn ek Grek boroupi Plutarch sangta. Hachea voilean lok zaito temp meren papyrus-achim hoddim bandtale mhunn kollon ieta.
^ per. 3 Papyrus-achi zhaddam rebeant ani udok vhavonastana santton urta thoim zatat. Tem zhadd sumar 5 metr lamb (16 futt) vaddtta ani tachi rundai sumar 15 cm (ordo futt) asta.
