1-2. Amchi poristhiti bodolta toxi, ami poilim zannam aslolim Bible-antlim totvam amkam chodd valorachim kiteak zaunk puro tem somzaiat.

 APLEA kazara disa, ek zoddpem, kazarachem bhaxonn dhean diun aikota. Kiteak? Tea bhaxonnant sanglolim totvam tannim poilim kednanch aikonk na mhunnon kai? Na. Toxem nhoi. Punn tea totvancho atam tim chodd valor korunk lagtat. Karonn tea disa thaun, tim totvam tim aplea kazari jivitant apnnaitolim.

² Hem Kristi avoi-bapaim vixim pasun khorem zaun asa. Bhurgeank vaddounche vixim tannim hache poilim zaitim bhaxonnam aikoleant astolim. Punn tankam bhurgim zatat tednam tea totvancho tim anik chodd valor korunk lagtat. Karonn aplea bhurgeank vaddounchi hi vhodd zobabdari purnn korunk tim him totvam apnnaitolim. Hantuntlean ami kitem xiktat? Amchi poristhiti bodolta toxi, poilim ami zannam aslolim totvam amkam chodd valorachim zaunk xoktat. Taka lagon, adlea tempar Israelit razank sanglolem toxem, Jehovache Sakxi aplea ‘akʼkhea jivitant vo jivitbhor’ Devachem Utor vachtat ani tacher niall kortat.—D.S. 17:19.

3. Hea lekhant ami kitem polloitolim?

³ Avoi-bapaimno, tumkam ek vhoddli zobabdari asa. Ti mhunnttlear, tumchea bhurgeank Jehova Deva vixim xikounk. Punn tumi tumchea bhurgeank fokot Jehova Deva vixim gineanuch diunk sodhinant. Tumi tankam Jehovacho mog korunk xikounk sodhtat. Tor hea lekhant, oxem korunk tumkam Bible-antlim khoinchim char totvam modot korunk xoktat tacher ami dhean dium-ia. (2 Tim. 3:16) Toxench Bible-antlim totvam apnnailolean, thoddea avoi-bapaink koso faido zala tem-ui ami polloum-ia.

4. Aplea bhurgeank Jehovacho mog korunk xikounk, avoi-bapaink khoinchem totv modot korunk xokta? (Jakob 1:5)

⁴ Poilem Totv: Jehovachem margdorxon gheiat. Tumchea bhurgeank Jehovacho mog korunk xikounk Jehova lagim zannvai magat. (Jakob 1:5 vachat.) Jehova tumkam ekdom bore solʼle diunk xokta. Oxem mhunnonk zaitim karonnam asat. Tantuntlea don karonnam vixim chintat. Poilem mhunnttlear, Jehova zaitea tempa thaun ek Bapui zaun asa. (St. 36:9) Ani dusrem mhunnttlear, to dita to solʼlo sodanch faideak poddtta.—Iz. 48:17.

5. (a) Jehova aplea songottnne udexim avoi-bapaink koso modot korta? (b) Video polloun, bhav ani bhoinn Amorim-an aplea bhurgeank koxim vaddoilim tantuntlean tumi kitem xiklim?

⁵ Aplem Utor ani songottnne udexim, Jehova avoi-bapaink Bible-antlean solʼle dita. (Mt. 24:45) Udharonnak, Awake! masikent, zaitea vorsam thaun, “Help for the Family,” ho lekh ietalo, zo atam jw.org website-icher melltta. Toxench, website-icher zaite video asat je avoi-bapaink aplea bhurgeank vaddoitana Jehovache solʼle koxe apnnaunk zatat tem somzonk modot kortat. Hea udexim tanchea bhurgeank Jehovacho mog korunk modot zata. *—Mho. 2:4-6.

6. Jehovache songottnne thaun melltta tea margdorxona vixim eka bhavak ani tache bailek koxem dista?

⁶ Jehova aple songottnne udexim dita tea margdorxona pasot zaitim avoi-bapui khub upkari asat. Bhav Joe ani tache bailen aplea bhurgeank Jehovacho mog korunk modot kortana hem onbhovlam. Bhav Joe mhunntta: “Mhojea tinui bhurgeank Jehovacho mog korunk xikounk sompem naslem. Hanv ani mhoji bail sodanch Jehovachi modot magtalim. Ani amkam goroz asli tednam sarkea vellar, eka lekha udexim vo video udexim amchea bhurgeank xikounk Jehovan amkam margdorxon dilem. Tor ami sodanch margdorxonak lagon Jehovacher patieun ravtat.”

7. Avoi-bapaimnim aplea bhurgeank ek bori dekh dovrop kiteak gorjechem? (Romkarank 2:21)

⁷ Dusrem Totv: Ek borem udharonn dovrat. Bhurgim avoi-bapaik bariksannen polloitat ani tanchi dekh ghetat. Khoinchim-i avoi-bapui poripurnn nant tem khorem. (Rom. 3:23) Tori astana, avoi-bapaimnim aplea bhurgeank ek bori dekh dovrunk apleachean zata tem soglem  korunk zai. (Romkarank 2:21 vachat.) Bhurgeam vixim ek bapui oxem sangta: “Bhurgim sponge-a bhaxen zaun asat. Sponge soglem oddun gheta tea bhaxen, bhurgim jem kitem polloitat tem soglem xiktat. Tor ami tankam xikoitat tem, ami svota korinant mhunn tim polloitat tednam tim rokddinch amkam sangtat.” Tor ami amchea bhurgeank Jehovacho mog korunk xikounk sodhtat zalear, ami Jehovacho mog kortat mhunn amchea bhurgeank dison ieunk zai.

8-9. Andrew ani Emma-chea udharonnantlean ami kitem xiktat?

⁸ Avoi-bapaimnim aplea bhurgeank, zaitea vattamnim Jehovacho mog korunk xikounk zata. Punn aplim avoi-bapui Jehovacho kitlo mog kortat tem bhurgim polloitat tednam tancher ek boro porinnam zaunk xokta. 17 vorsanchea Andrew nanvachea eka bhavachem udharonn polloum-ia. To mhunntta: “Magnnem khub mhotvachem mhunn mhojim avoi-bapui mhaka sodanch xikoitalim. Dor ratik, hanvem magnnem kelʼlem zalear pasun, mhozo daddy mhojea sangata magnnem kortalo. Ani tim mhaka ani mhoje bhoinnik sodanch oxem sangtalim: ‘Tuka zai title pavtti tunvem Jehova lagim ulounk zata.’ Taka lagon, aiz mhojea jivitant hanv magnneank khub mhotv ditam. Jehova lagim ulounk ani to mhozo mog korpi Bapui mhunn somzonk mhaka sompem zata.”

⁹ Emma nanvache eke bhoinnichem amkam anik ek udharonn asa. Ticho bapui tanche familik soddun gelo, ani tannem dusream koddlean ghetlolem zaitem rinn tanche avoik farik korchem poddlem. Emma mhunntta: “Zaite pavtti, mhoje avoik poixeanchem unnemponn aslem. Tori astana ti sodanch, Jehova aplea sevokanchi koxi kallji gheta ani tancheo gorzo koso purnn korta tea vixim uloitali. Ani hem ti fokot utramnich sangonasli, punn ti tem patietali ani kornneamnim korun dakhoitali mhunn hanvem polloilem.” Hantuntlean ami kitem xiktat? Kotthin poristhiti aslear pasun, avoi-bapaimnim aplea bhurgeank ek borem udharonn dovrunk zata.—Gal. 6:9.

10. Aplea bhurgeam lagim ulounk Israelitkar avoi-bapui khoincheo sondheo uzar korunk xoktalim? (Dusri Somurt 6:6, 7)

¹⁰ Tisrem Totv: Tumchea bhurgeam lagim sodanch uloiat. Adlea kallar, Jehovan Israelitkarank tanchea bhurgeam lagim sodanch ulounk sanglolem. (Dusri Somurt 6:6, 7 vachat.) Tor avoi-bapui hem koxem korunk xoktalim? Oxem korunk tankam zaiteo sondheo asleo. Udharonnak, ek Israelitkar bhurgo, xetant bim rovunk vo pik ghora haddunk aplea bapai sangata khub vell porian kam kortalo. Toxench, ek Israelitkar cheddum, xinvonk, vinnunk vo ghorantlim her kamam korunk aplea avoik modot kortalem. Tor hea vellar, avoi-bapaimnim aplea bhurgeam lagim mhotvachea vixoi-am vixim ulounk zatalem. Zoxem, Jehova kitlo boro ani to tanche familichi koxi kallji gheta tea vixim tannim aplea bhurgeank sangonk zatalem. Hea toren, avoi-bapaimnim veg-veglleo sondheo uzar korun aplea bhurgeank Jehovacho mog korunk xikounk modot korunk zatali.

11. Aplea bhurgeam lagim ulounk avoi-bapaimnim khoinchi sondhi uzar korunk zata?

¹¹ Punn aiz poristhiti bodolʼlea. Zaitea desamnim avoi-bapaink ani bhurgeank eka-meka lagim ulounk velluch mellona. Karonn avoi-bapui kamak voitat ani bhurgim iskolak voitat. Tor aplea bhurgeam lagim ulounk avoi-bapaimnim sondhi sodhunk zai. (Ef. 5:15, 16; Filp. 1:9-10) Oxem korunk ek bori vatt mhunnttlear, Kuttumbik Bhokti. Alexander nanvacho ek tornnatto bhav oxem sangta: “Mhozo daddy dor sumanak kuttumbik bhokte pasot manddavoll korta. Ani hea vellar, her koslem-i kam to modem ieunk dina. Ani kuttumbik bhokti zalea uprant, ami eka-meka lagim uloitat.”

12. Kuttumbik bhokti kortana familichea vhoddilan kitem ugddas dovrunk zai?

¹² Familicho vhoddil aslolean, kuttumbik  bhokte vellar tumi eka-meka sangata sartat to vell, tumchea bhurgeank avoddtta toso korunk tumi kitem korunk zata? Tumi ghoddie, Sasnak Khuxalkaien Jieiat!, hea pustokantlean obheas korunk zata. Karonn hem pustok tumkam eka-meka lagim ulounk sompem korta. Tumchea bhurgeanchea kallzant ani monant kitem asa tem tumi zannam zaunk sodhtat zalear, ani tannim tumkam aple uske sanglole zai zalear, kuttumbik bhoktecho ho vell, tankam tapounk vo lamb-rund bhaxonnam diunk uzar korinakat. Toxench, tumchim bhurgim Bible-achea totvam add voita toslem kitem-i tumkam sangtat zalear tancher ragar vo bejar zainakat. Punn tim khorench, tanchea kallzant ani monant kitem asa vo tankam koxem bhogta tem tumkam sangtat mhunn khuxal zaiat. Ani tankam tumche lagim ukteponnim ulounk urba diat. Tumchea bhurgeank koxem bhogta tem tumi zannant zalearuch tumi tankam modot korunk pavtolim mhunn ugddas dovrat.

13. Avoi-bapaimnim aplea bhurgeank Jehova vixim xikounk anik kosleo sondheo uzar korunk zatat?

¹³ Punn avoi-bapaimno, tumi tumchea bhurgeank fokot Bible obheasa vellaruch Jehova vixim xikounk zata oxem chintinakat. Tumchea bhurgeank Jehovak lagim soronk, tumkam melltta ti dor ek sondhi tumi uzar korunk zata. Liza nanvachi ek avoi hem koxem korta tem ti sangta. Ti mhunntta: “Amchea bhonvtonnim asloli rochnna uzar korun, ami amchea bhurgeank Jehova vixim xikoitat. Udharonnak, amchem sunnem amchea bhurgeank hanso-xem korta toxem kitem-i korta tednam Jehova vixim xikounk ami ti sondhi uzar kortat. Ami tankam sangtat ki Jehova ek khuxal Dev ani ami amchem jivit hanson-khellon sarlolem taka zai.”

14. Avoi-bapaimnim aplea bhurgeank bore ixtt vinchun kaddunk modot korop kiteak gorjechem? (Mhonnʼnneo 13:20)

¹⁴ Chovtem Totv: Tumchea bhurgeank bore ixtt vinchun kaddunk modot korat. Amchea ixttancho, amcher boro vo vaitt porinnam zaunk xokta mhunn Bible-ant sanglolem asa. (Mhonnʼnneo 13:20 vachat.) Tor avoi-bapaimno, tumi tumchea bhurgeanchea ixttank vollkhotat? Tumi kednam-i tankam mellʼlleant ani tanchea sangata vell sarla? Jehovacho mog kortat toslim ixttam vinchun kaddunk tumi tumchea bhurgeank koxi modot korunk zata? (1 Kor. 15:33) Oxem korunk, Jehova sangata  ghott ixttagot aslolea bhav-bhoinnank tumchea ani tumchea bhurgeam sangata vell sarunk tumi apounk zata. Hea toren, borim ixttam korunk tumi tumchea bhurgeank modot korunk pavtolim.—St. 119:63.

15. Aplea bhurgeank bore ixtt vinchun kaddunk avoi-bapaimnim koxi modot korunk zata?

¹⁵ Aplea bhurgeank bore ixtt mellonk, Tony nanvachea eka bhavan ani tache bailen kitem kelem tem to sangta: “Zaitim vorsam porian, mhoje bailen ani hanvem, veg-veglle piraiechea ani sonskrutichea bhav-bhoinnank jevnnak ani amchea sangata kuttumbik bhokti korunk apoilim. Oxem kelolean, Jehovacho mog ani khuxalkaien tachi seva kortat tea bhav-bhoinnanchi ami bori vollokh korun gheunk pavlim. Toxench, sorkittachi dekhrekh korpi, mixinori ani her bhav-bhoinnank ami amchea ghora ravonk apoitalim. Tor tanchea onubhovantlean, tanchi urba polloun ani Jehovache sevent tim kortat to vavr polloun amchea bhurgeank zaitem xikonk mellʼllem. Toxench, Jehova Devak lagim soronk amchea bhurgeank modot zali.” Tor avoi-bapaimno, bore ixtt vinchun kaddunk tumchea bhurgeank modot korunk nichov korat.

16. Tumcho put vo dhuv Jehovachi seva korunk sodhina zalear tumi kitem ugddas dovrunk zata?

¹⁶ Punn tumi tumchea bhurgeank Jehovacho mog korunk xikounk khub vavr kelea uprant pasun, tumcho put vo dhuv Jehovachi seva korunk sodhina zalear kitem? Hea pasot tumi zobabdar oxem chintinakat. Jehovan sogleank, tumchea bhurgeank pasun, tim Jehovachi seva kortolim kai na tem vinchun kaddunk svotontrtai dilea mhunn ugddas dovrat. Tor tumcho put vo dhuv Jehovak soddun voita zalear tim porot ietolim mhunn bhorvonso dovrun ravat. Jezun sangloli sanddlolea putachi vopar ugddas korat. (Lukas 15:11-19, 22-24) Tea putan zaitim vaitt kamam kelim punn xevottak to porot ailo. Punn tumi ghoddie chintit, “Ti tor ek vopar. Oxem khoreaninch zaunk xokta?” Hoi, zaunk xokta! Karonn oxench Elie nanvachea eka tornnatteak ghoddlem.

17. Elie-chea udharonnantlean tumkam koxi urba mellʼlli?

¹⁷ Aplea avoi-bapai vixim Elie sangta: “Mhaka Jehovacho ani tachem Utor, Bible-acho mog korunk xikounk mhojea avoi-bapain apnnachean zata tem soglem kelem. Tori astana, hanv  sumar 15 vorsancho zalo tednam, hanv tanchea add vochonk laglo.” Elie lipon chukicheo vostu korunk laglo. Jehovak lagim ravonk tachim avoi-bapui taka khub modot kortalim. Punn to tanchem kainch aikona zalo. Uprant to ghor soddun gelo ani vaitt kamam korunk laglo. Punn thodde pavtti, to aplea eka ixtta sangata Bible-a vixim uloitalo. Elie sangta: “Hanv mhojea ixtta lagim Jehova vixim jitlo chodd uloitalo, titlo chodd hanv Jehova vixim chintʼtalo. Mhojea avoi-bapain koxtt korun mhojea kallzant roilolem sotachem bim, atam sovkas-sovkas korun vaddonk laglolem.” Uprant Elie porot sotant ailo. * Tea vellar, lhan piraier thaun Jehovacho mog korunk taka xikoilʼlo mhunn, tachim avoi-bapui kitlim khuxal zalim astolim tem chintat!—2 Tim. 3:14, 15.

18. Aplea bhurgeank Jehovacho mog korunk xikounk khub vavr kortat tea avoi-bapaim vixim tumkam koxem dista?

¹⁸ Avoi-bapaimno, Jehovan tumkam ek vhoddlo sueog dila. To mhunnttlear, eke nove pinddkek tache vixim xikounk. (St. 78:4-6) Hem ek sompem kam nhoi! Tori astana, hem kam korunk tumi khub vavr kortat dekhun ami tumkam xabaski ditat. Tor tumchea bhurgeank Jehovacho mog korunk ani tachem utor pallunk xikounk, tumchean zata tem soglem tumi korit ravtat tem polloun, tumcho mogall Sorgincho Bapui, Jehova, khub khuxal zata mhunn tumi khatri dovrunk zata.—Ef. 6:4.