OBHEASACHO LEKH 22
Jivita Pasot Zannvaieche Solʼle
“Sorvesporuch zannvai dita.”—MHO. 2:6.
GIT 89 Devak Aikon Pallo Di
KITEM XIKTOLIM *
1. Amkam sogleank Jehova thaun ieta tea zannvaiechi kiteak goroz asa? (Mhonnʼnneo 3:13, 15)
TUMKAM tumchea jivitant ek mhotvacho nirnnoi gheunk poddlo tednam tumi Jehova lagim magnneant zannvai magli astoli. Karonn tumkam tachi goroz asli mhunn tumi zannant. (Jak. 1:5) Zannvaie vixim Raza Solomonan oxem boroilem: “Zannvai sogllea mannkam poros vorti.” (Mhonnʼnneo 3:13, 15 vachat.) Solomon hanga munxam thaun ieta tea zannvaie vixim uloinaslo. Tachea bodlek, Jehova thaun ieta tea zannvaie vixim uloitalo. (Mho. 2:6) Punn Jehova thaun ieta ti zannvai, aiz amcher ietat tea trasancho fuddo korunk modot korunk xokta kai? Hoi! Hea vixim ami hea lekhant polloitolim.
2. Zannvaien bhorlolim munxam zaunk ek vatt khoinchi?
2 Ami zannvaien bhorlolim munxam koxim zaunk xoktat? Oxem korunk ek vatt mhunnttlear, khub zannvai aslolea don munxamnim kitem xikoilem tea vixim obheas korop ani tem apnnavop. Hantuntlo ek munis zaun aslo, Solomon. Tache vixim Bible-ant oxem sanglam: ‘Solomonak Devan zaitem ginean ani somjikai dili.’ (1 Raz. 4:29) Ani dusro munis zaun aslo, Jezu Krist. Taka prithumer jielolea khoinchea-i munxa poros chodd zannvai asli. (Mt. 12:42) Jezu vixim Bible-ant oxem sanglolem asa: ‘Tacher denvtolo Sorvesporacho atmo: zannvaiecho ani vivekacho vo somjikaiecho atmo.’—Iz. 11:2.
3. Hea lekhant ami kitem polloitolim?
3 Devan Solomonak ani Jezuk khub zannvai dilʼli. Tea pasot, zaitea mhotvachea vixoi-am vixim te boro solʼlo diunk pavle. Hantuntlea tin vixoi-am vixim ami hea lekhant polloum-ia. Te mhunnttlear poixe, kam ani amche vixim sarkem chintop dovrop.
POIXEAM VIXIM SARKEM CHINTOP DOVROP
4. Solomon ani Jezu modem koslo ontor aslo?
4 Solomon ekdom girest aslo ani to eka sobit ghorant susegad jivit jietalo. (1 Raz. 10:6, 14, 15) Punn Jezu lagim thoddeoch vostu asleo ani taka aplem svotachem ghor pasun naslem. (Mt. 8:20) Punn poixeam vixim tannim dogaimnim sarkem chintop dovorlem. Karonn tankam dogaim-kui Jehova koddlean zannvai mellʼlloli.
5. Poixeam vixim Solomonachem chintop kitem aslem?
5 Poixe munxachi “rakhonn” korta mhunn Solomonan manun ghetlem. (Up. 7:12) Karonn poixeamnim amkam goroz teo vostu ani amkam zai teo thoddeo vostu ami vikteo gheunk xoktat. Punn Solomon itlo girest asonui, poixeam poros anikui mhotvacheo vostu asat mhunn tannem vollkhon ghetlem. Udharonnak, tannem boroilem: “Bhangara, rupea ani girestkaie poros, borem nanv vinchun kadd.” (Mho. 22:1) Toxench, poixeancho mog kortat tim munxam aplea lagim asa tantunt dhadoxi asonant mhunn tannem polloilʼlem. (Up. 5:9, 11b) Tea bhair, poixe sogleam-von chodd mhotvache oxem ami chintchem nhoi, mhunn tannem xittkaunni dilʼli. Karonn aiz amche lagim asat te poixe, faleam ghoddie nanch zait.—Mho. 23:4, 5.
Poixe ani her vostum vixim aslolea amchea chintpak lagon Devachem Raj poilea zagear dovrunk amkam kotthin zata kai? (Peregraf 6-7 polloiat) *
6. Poixe ani her vostum vixim Jezuchem chintop kitem aslem? (Matev 6:31-33)
6 Jezun pasun poixe ani her vostum vixim sarkem chintop dovorlem. Taka khaunk-pieunk avoddttalem. (Lukas 19:2, 6, 7) Ek pavtti tannem udkacho ekdom boro soro kelo. Ani tem tachem poilem vizmit zaun aslem. (Juanv 2:10, 11) Toxench, tachea mornnachea disa tannem unch molachem angvostr ghatlolem. (Juanv 19:23, 24) Punn tannem hea vostunk sogleam-von chodd mhotv diunk na. Tannem aplea xisank oxem sanglem: “Konnacheanuch borabor dogam dhoniancho gulam’ zaum nozo . . . Tumchean Devachim ani borabor Girestkaiechim gulamam zaum nozo.” (Mt. 6:24) Tor ami Devachem Raj poilea zagear dovorlear, Jehova Dev amkam goroz teo sogleo vostu ditolo mhunn Jezun xikoilem.—Matev 6:31-33 vachat.
7. Poixeam vixim sarkem chintop dovorlolean eka bhavak koso faido zalo?
7 Poixeam vixim Jehovan dilʼlo solʼlo apnnailolean amchea zaitea bhav-bhoinnank faido zala. Hea vixim, Daniel nanvachea eka ankvar bhavachem udharonn polloum-ia. To sangta: “Hanv tornnatto aslo tednam, Jehovache sevek hanv mhojea jivitant poilo zago ditolo mhunn hanvem nirnnoi ghetlolo.” Ani tannem aplem jivit sadem dovorlem dekhun tacho vell ani kola, odruxttak sampoddleank modot korunk ani Bethel-ant seva korunk to uzar korunk xoklo. To mhunntta: “Hanvem Jehovachi seva korunk vinchun kaddlem mhunn mhaka kainch dukh na. Hem khorem, ki hanvem poixe korunk tharailʼlem zalear, hanv zaite poixe korunk pavtolo aslo. Punn, aiz mhaka mellʼlleant tim ixttam ani khuxalkai mhaka mellchi nasli. Jehovan mhaka itli khuxalkai dilea ki poixeamnim hanv ti kednanch vikti gheunk xokcho naslo!” Khorench, poixeam pasot nhoi, punn Jehova Deva pasot ami vavurtat tednam amkam khub faido zata!
KAMAM VIXIM SARKEM CHINTOP DOVROP
8. Kamam vixim Solomonachem chintop sarkem aslem mhunn ami koxim zannant? (Upodexok 5:17, 18)
8 Kam korun eka munxak melltta ti khuxalkai ‘Devachem ek dennem’ mhunn Solomonan sanglem. (Upodexok 5:17, 18 vachat.) Tannem mhunnttlem: “Mottea koxttanchea vaurak sodanch faido zata.” (Mho. 14:23) Ani hem khorem zaun aslem mhunn Solomon zannam aslo. Karonn to svota khub vavr kortalo. Tannem ghoram bandlim, dakanche molle roile ani zaiteo bag, tollio, toxench xaram bandlim. (1 Raz. 9:19; Up. 2:4-6) Hantunt khub vavr mellon aslo. Ani Solomonak hantuntlean khuxalkai mellʼlli. Punn khori khuxalkai mellonk, tannem anik kitem korunk zai aslem mhunn Solomon zannam aslo. Taka lagon, tannem Jehova pasot-ui kam kelem. Udharonnak, tannem Jehovache bhokte pasot ek sobit devmondir bandpachem kam korun ghetlem. Hem kam korunk taka sat vorsam laglim. (1 Raz. 6:38; 9:1) Tor veg-vegllea torechim kamam kelea uprant, Jehovachi seva korop sogleam-von chodd mhotvachem kam mhunn Solomonak kollon ailem. Tea pasot tannem oxem boroilem: “Xekim, hachea uprant, hanv tuka ekuch sangtam. Devachi bhirant dhor ani tache updes pall.”—Up. 12:13.
9. Jezun aplea kama vixim sarkem chintop koxem dovorlem?
9 Jezun pasun khub vavr kelo. To tornnatto aslo tednam tannem ek thovoi mhunn kam kelem. (Marku 6:3) Ani tanchea vhoddle familichea gorzam pasot to vavr korta tem polloun, tachim avoi-bapui tache upkari aslim. Jezu poripurnn aslo dekhun, to hem thovoi-achem kam ekdom bore toren korunk xoklo. Tor zaite lok to korta teo vostu gheunk ietale astole. Jezu hem kam korunk khub vavurlo tem khorem. Tori astana, Jehovachi seva korunk pasun tannem vell kaddlo. (Juanv 7:15) Karonn uprant to purnn vell porgottnni korunk laglo tednam tannem lokank sanglem: “Khaun sorta toslea khanna khatir tras gheum nakat, punn Sasnnik Jivitak togta toslea khanna khatir tras gheiat.” (Juanv 6:27) Toxench, Dongra Voilea Updesant tannem mhunnttlem: “Tumkam theve sorgar zomoun dovrat.”—Mt. 6:20.
Amchem kam ani Jehovache bhokte sombondit aslolim kamam ami tea-tea zagear koxim dovrunk xoktat? (Peregraf 10-11 polloiat) *
10. Kamam vixim thoddeank kosleo oddchonneo ieunk puro?
10 Ami Jehovacho solʼlo apnnaitat tednam kamam vixim ami sarkem chintop dovrunk pavtolim. Kristanvamnim “koxtt korun . . . boro vavr” korunk zai mhunn Bible-ant sanglolem asa. (Ef. 4:28) Tor ho solʼlo apnnaun ami amchea kamachea zagear promannikponnan koxtti vavr kortat. Hacher dhean diun, amcho patranv amchea kamacho valor korunk puro. Punn oxem zaunk xokta, ki amchea patranvan Jehovachea Sakxeam vixim borem chintunk zai mhunn ami chodd vell kam korunk puro. Ani haka lagon, Jehovachi seva korunk ani amchea familicheo zobabdareo samballunk amkam vell mellona zait. Tor oxem zata zalear, kamam vixim amchea chintpant ami bodol korunk zai.
11. Kamam vixim eklean koslem chintop dovrunk zai mhunn ek bhav xiklo?
11 William nanvacho ek tornnatto bhav eka vhoddila pasot kam kortalo. Ani kama vixim sarkem chintop koxem dovrunk zata tem to tea vhoddila thaun xiklo. William sangta: “Ho bhav khub koxtti vavr korta. Ani tachea borea kamak lagon, tachea customer-am sangata tacho sombond boro asa. Punn disachea xevottak, to aplem kam bond korta ani aplo vell ani takot aplea famili pasot, ani Jehovachi seva korunk uzar korta. Hea pasot, to ekdom khuxal asa ani herankui ek borem udharonn zaun asa.” *
AMCHE VIXIM SARKEM CHINTOP DOVROP
12. Solomonan poilim aplea vixim sarkem chintop dovorlem mhunn amkam koxem kolltta, punn uprant kitem zalem?
12 Solomon Jehovacho visvaxi sevok aslo tednam tannem aplea vixim sarkem chintop dovorlem. To tornnatto aslo tednam apleak unnemponnam asat mhunn tannem manun ghetlem, ani Jehovachem margdorxon maglem. (1 Raz. 3:7-9) Toxench, to raza zalo tednam gorvixtt zalear tacho porinnam vaitt zata mhunn to zannam aslo. Karonn tannem mhunnttlem: “Gorv nisonttonak pavoita, ani gorvixtt otmo dhortorer apttota.” (Mho. 16:18) Punn dukhachem mhunnttlear, apnnench dilʼlo solʼlo apnnaunk Solomon chuklo. Karonn uprant, to gorvixtt zalo ani Devachea kaideam add gelo. Udharonnak, “Patxaiak chodd bailo ascheo nhoi, kiteak teo taka Sorvespora sorxileo pois kortoleo” mhunn Devan kaido dilʼlo. (D.S. 17:17) Punn Solomon tea kaidea add gelo ani to zaitea bailam lagim kazar zalo. Taka 700 bailo ani 300 dovorloleo bailo asleo. Ani tanchea modlim choddxim zannam khotti bhokti kortalim. (1 Raz. 11:1-3) “Hacho mhojer kainch porinnam zauncho na!” oxem Solomonan ghoddie chintlem astolem. Punn Devachea kaideanchi beporva kelolean zata to vaitt porinnam Solomonak bhogcho poddlo.—1 Raz. 11:9-13.
13. Jezuchea khaltikaiecher niall kelolean ami kitem xiktat?
13 Punn Jezun aplea vixim sodanch sarkem chintop dovorlem ani to khalto aslo. Prithumer ieunchea poilim tannem aplea Bapa sangata zaitim vhoddlim-vhoddlim kamam kelʼlim. “Sorgar prithver soglleo rochnna . . . Tachech vorvim rochun aileat” mhunn Bible-ant sanglolem asa. (Kol. 1:16) Jezun bautizm ghetlo tednam aplea Bapa sangata apnnem kelʼlea hea vostum vixim taka ugddas ailo astolo. (Mt. 3:16; Juanv 17:5) Punn hea vellar to gorvan fulonk na. Tea bhair, apunn dusream poros chodd boro, oxem-i tannem kednanch chintunk na. Tachea bodlek, tannem aplea xisank sanglem ki apunn “herank Aple chakrek launk ieunk na bogor heranchi chakri korunk ani somestanche soddvonne pasot Aplo jiv diunk aila.” (Mt. 20:28) Toxench, to apleak zai tem nhoi, punn Jehovak zai tem korta mhunn Jezun sanglem. (Juanv 5:19) Tor hea toren Jezun amkam ekdom borem udharonn dovorlem!
14. Jezuchea utrantlean svota vixim sarkem chintop dovrunk amkam koxi modot zata?
14 Toxench, Jezun aplea pattlavdarank svota vixim sarkem chintop dovrunk xikoilem. Eka vellar, Jezun tankam sanglem: “Tumche tokleche kens porian soglle mezlole asat.” (Mt. 10:30) Tor ami kainch valorachim nhoi oxem ami chintʼtat zalear, hea utrantlean amkam khorench bhuzvonn melltta nhoi! Karonn Jehovak amchi kallji asa ani ami taka khub moladik mhunn hea utrantlean amkam kollon ieta. Hea vixim chintat. Jehovachi bhokti korunk ani novea sonvsarant sasnak jieunk ami purtim asat mhunn Jehova lekhta. Toxem zalear, ami valorachim nant mhunn Jehovak dista oxem ami kednanch chintchem nhoi.
Ami amche vixim sarkem chintop dovornant zalear ami kosleo sondheo ani besanvam hogddaunk xoktat? (Peregraf 15 polloiat) *
15. (a) Ami amche vixim koslem chintop dovrunk zai mhunn eka Pahrogopur-ant sanglolem? (b) Pan 24-acher aslolea chitramnim ami amcheruch chodd dhean dovortat zalear koslim besanvam hogddaitolim mhunn dakhoilam?
15 Amche vixim sarkem chintop dovrunk, sumar 15 vorsam poilim eka Pahrogopur masikent oxem sanglolem: “Ami amchea vixim chodduch chintunk zaina. Karonn oxem kelear ami gorvixtt zatolim. Punn ami samkinch valorachim nhoi, oxem-i ami chintunk zaina. Karonn oxem kelear ami niraxi zatolim. Tachea bodlek, ami amche vixim sarkem chintop dovrunk zai. Tem mhunnttlear, amkam unnemponnam, toxench bore gunn asat mhunn ami somzon gheunk zai. Hea vixim eke Kristi bailen oxem mhunnttlem: ‘Hanv ekdom vaitt munis nhoi ani ekdom borem-i munis nhoi. Karonn mhaka-i heram bhaxen unnemponnam asat, toxench bore-i gunn asat.’” * Tor amche vixim sarkem chintop dovrop kitlem gorjechem zaun asa!
16. Jehova amkam zannvaien bhorlolem margdorxon kiteak dita?
16 Jehova aplea Utrantlean amkam zannvaien bhorlolem margdorxon dita. Karonn to amcho mog korta ani ami khuxal aslolim taka zai. (Iz. 48:17, 18) Tor Jehovak khuxal kortat teo vostu ami keleo zalear ami khorench khub khuxal astolim! Toxench poixeancher, kamacher ani svotacher chodd dhean dilolean ietat te tras ami pois korunk pavtolim. Tor xannim zaunk ani Jehovachem kalliz khuxal korunk ami nichov korum-ia!—Mho. 23:15.
GIT 94 Grateful for God’s Word
^ Solomonak ani Jezuk khub zannvai asli. Ani hi zannvai tankam Jehova Deva koddlean mellʼlloli. Tor hea lekhant, Solomonan ani Jezun, poixeam vixim, kamam vixim ani amche vixim amchem chintop sarkem dovrunk dilʼlea solʼleantlean ami kitem xikonk zata tem ami polloitolim. Toxench, ho solʼlo apnnailolean thoddea bhav-bhoinnank koso faido zala tem-ui ami polloitolim.
^ Febrer 1, 2015-chea Pahrogopur masikent, “How to Enjoy Hard Work” (Inglez bhaxen) ho lekh polloiat.
^ Agost 1, 2005-achea Pahrogopur masikent, “The Bible Can Help You Find Joy” (Inglez bhaxen) ho lekh polloiat.
^ CHITRACHI MAHITI: John ani Tom ekuch sobhentle don tornnatte bhav. John aplea gaddiecho samball korunk khub vell sarta. Punn Tom apli gaddi, bhav-bhoinnank porgottnnek ani mittingek vhoronk uzar korta.
^ CHITRACHI MAHITI: John aplea patranvak khuxal korunk sodhta. Tor tacho patranv taka overtime korunk laita tednam to tachem aikota. Punn teach sanjer, Tom, zo sobhecho sevok zaun asa, to eka vhoddila sangata gonvlli bhett korunk voita. Tom-an adim fuddench aplea patranvak sanglam, ki to sumanachea thoddea disamnim sanjechea vellar Jehovache bhokte sombondit kamam korta, ani hea pasot tea vellar to chodd vell kam korunk pavchona.
^ CHITRACHI MAHITI: John apleacheruch chodd dhean dita. Punn Tom Jehovache sevek aplea jivitant poilo zago dita. Hea pasot, to Sorkitt Zomatichem Hall sarkem korpachea kamant bhag gheta tednam to zaitim novim ixttam korunk pavta.
