1. Prokasovnni pustokant Devachea visvaxi sevokam vixim kitem sanglam?

 PROKASOVNNI pustokant, Devachem Raj sorgar stapon zalam ani Soitanak sorgar thaun hea prithumer xevttila mhunn sanglam. (Prok. 12:1-9) Hea vorvim, sorgar xanti zalea punn amkam tras sosunk poddttat. Karonn Soitan hea prithumer visvaxiponnan Jehovachi seva kortat tancher ragar asa ani tancher akromonn korta.—Prok. 12:12, 15, 17.

2. Amkam visvaxi ravonk koxi modot zatoli?

² Tor Soitanan amcher akromonn kelear pasun Devak visvaxi ravonk amkam koxi modot zaunk xokta? (Prok. 13:10) Ek mhunnttlear, fuddarak kitem zatolem tem zannam zalolean amkam modot zaunk xokta. Udharonnak, Prokasovnni pustokant, apostl Juanvan fuddarak amkam mellttolim tea thoddea besanvam vixim sanglam. Tantuntlem ek besanv mhunnttlear, Devachea dusmanancho nas zatolo. Tor Prokasovnni pustokant Devachea dusmana vixim kitem sanglam ani tanchem kitem zatolem tem ami atam polloum-ia.

3. Prokasovnni pustokant Devachea dusmanam vixim sangonk kosleo khunnam uzar keleat?

³ Prokasovnni pustokant sanglam tem “khunnamnim” sanglam, mhunn hea pustokachea poileach versant mhunnttlolem  asa. (Prok. 1:1, NW) Zoxem, hea pustokant amkam zaitea savzam vixim vachunk melltta, jim Devachea dusmanank suchit kortat. Udharonnak, ‘dha xingam ani sat tokleo aslolem ek savoz somdirantlean voir sorta’ mhunn sanglam. (Prok. 13:1) Tea uprant, ‘anik ek savoz zomnintlean voir sorta’ mhunn sanglam. Tem eka ara bhaxen uloita ani ‘sorgar thaun uzo prithumer denvo-so’ korta. (Prok. 13:11-13) Tachea uprant ‘eka tambddea savza’ vixim sanglam zacher ek xindoll bail bosloli asa. Tim tinui savzam khub temp porian, Jehova Dev ani tachea Rajea add zhuztolea dusmanank suchit kortat. Hea pasot, tim konn tem zannam zavop khub gorjechem.—Prok. 17:1, 3.

4-5. Prokasovnni pustokant sangloleo khunnam somzonk, Daniel 7:15-17 amkam koxi modot korta?

⁴ He dusman konn te zannam zaunche poilim, tim savzam ani xindoll bail konnank suchit kortat tem zannam zavop gorjechem. Hea vixim amkam Bible-antleanuch somzonni melltta. Karonn Prokasovnni pustokantlea zaitea khunnam vixim Bible-antlea her pustokamnim somzailolem asa. Udharonnak, provadi Danielan sopnant ‘somdirantlim char vhoddlim ani veg-vegllim zonvaram vo savzam bhair sorlim’ tim polloilim. (Dan. 7:1-3) Ani tim char zonvaram ‘razank’ vo sorkarank suchit kortat mhunn tannem sanglem. (Daniel 7:15-17 vachat.) Tor hantuntlean, Prokasovnni pustokant sanglolim savzam pasun sorkarank suchit kortat mhunn ami mhunnonk zata.

⁵ Tor atam ami Prokasovnni pustokant sangloleo thoddeo khunnam polloum-ia. Ani tea khunnancho orth kitem tem zannam zaunk Bible amkam koxi modot korta tem zannam zaum-ia. Tor poilim, him savzam konnank suchit kortat, tanchem kitem zatolem, ani hem zannam zalolean amkam koso faido zatolo tem ami polloitolim.

6. Prokasovnni 13:1-4-ant sanglolem sat toklechem savoz konn zaun asa?

⁶ Sat toklechem savoz konn zaun asa? (Prokasovnni 13:1-4 vachat.) Hem sat toklechem savoz bibttea vaga bhaxen dista, tache paim vanxela sarke asat, tachem tondd xinvachea tondda sarkem asa, ani taka dha xingam asat. Oslech gunn aslolea char savzam vixim Daniel pustokachea odheai 7-ant sanglam. Punn Prokasovnni pustokant, he sogle gunn ekuch savzak asat ani taka “sogllea kullancher, porzancher, bhasancher, ani raxttrancher” odhikar dilʼlo asa mhunn sanglam. (Prok. 13:7) Tor hantuntlean, hem savoz fokot ekuch raxttrachea sorkarak nhoi, punn atam meren sonvsaracher raj choloitolea soglea sorkarank suchit korta mhunn amkam kollon ieta. *—Up. 8:9.

7. Hea savzachi dor ek tokli konnank suchit korta?

⁷ Hea savzachi dor ek tokli konnank suchit korta? Hea vixim zannam zaunk Prokasovnni odheai 17 amkam modot korta. Karonn hea odheai-ant, Prokasovnni odheai 13-nt sanglolea savzachea murte vixim sanglam. Prokasovnni 17:9, 10 oxem mhunntta: “Tech bhaxen sat patxai; tantle panch sorun gele, eklo atam raj choloita, ani nimanno eklo ozun ieunk na. To ietolo tednam ilo-so vell sodrer urtolo.” Soitanan uzar kelʼlea soglea sorkaram modem sat sorkarank ‘toklek’ sor keleat. Karonn te sonvsarantle sogleam-von vorixtt razvottki asat ani tannim Devachea lokancher odhikar choloila. Apostl Juanvachea disam meren panch sorkar, te mhunnttlear, Ejipt, Assiria, Babilon, Medie-Persie ani Gres, hanchi razvottki soron kabar zalʼli. Ani apostl Juanv Prokasovnni boroitalo tednam, sovo sorkar, to  mhunnttlear Rom, azunui razvottki choloitalo. Tor satvi tokli vo sonvsarachi nimanni vorixtt razvottki konn zaunchi asli?

8. Hea savzachi satvi tokli konnak suchit korta?

⁸ Ami atam polloitolim toxim, Daniel pustokant asloleo bhasaunneo, hea savzachi satvi ani nimanni tokli konn, tem zannam zaunk amkam modot kortat. Tor ‘Somiachea disant vo xevottachea disamnim’ sonvsarachi vorixtt razvottki konn zaun asa? (Prok. 1:10) Sangata mellon raj choloupi don raxttram, tim mhunnttlear, United Kingdom ani United States of America, zankam Anglo-America mhunnttlolem asa, hi aiz Sonvsarachi Vorixtt Razvottki zaun asa. Tor Prokasovnni 13:1-4-ant sangloli satvi tokli, hich razvottki mhunn ami mhunnonk zata.

9. “Menddrea vori don xingam” aslolem savoz konnak suchit korta?

⁹ Toxench, Prokasovnni odheai 13-nt, he satve toklek, mhunnche Anglo-America-k, anik eka savzak sor kelam, zaka “menddrea vori don xingam aslim, ani tem eka ara bhaxen uloitalem.” Tea bhair, tem savoz ‘mottim vizmitam kortalem ani sogleanchea dolleam mukhar tannem sorgar thaun uzo porian prithumer denvo-so kelo’ mhunn sanglam. (Prok. 13:11-15) Ani Prokasovnni odheai 16 ani 19-ant, hea savzak ‘khotto vo fottkiro provadi’ mhunnttla. (Prok. 16:13; 19:20) Toxench Daniel pustokant pasun, Anglo-America, hi Sonvsarachi Vorixtt Razvottki, ‘chintunk zainant tosleo mosloti ievzun kaddttoli vo chintunk zaina toslem nisonntton haddttoli’ mhunn sanglam. (Dan. 8:19, 23, 24) Ani Dusrea Vixv Zhuza vellar oxench ghoddlem! Britain ani America-chea vidneanikamnim mellon, don atom bomb toiar kele ani te uzar kelolean Dusrem Vixv Zhuz somplem. Khorench, te don atom bomb toiar korun, Anglo-America-n “sorgar thaun uzo porian prithumer denvo-so” kelo mhunn ami mhunnonk zata.

10. ‘Poilea savzachi murti’ konnak suchit korta? (Prokasovnni 13:14, 15; 17:3, 8, 11)

¹⁰ Prokasovnni odheai 13-nt anik eka savza vixim sanglam. Hea savzak ‘poilea savzachi murti’ oxem mhunnttlam. Hem savoz sat toklechea savza sarkench dista, punn tem tambddea rongachem asa. Ani Prokasovnni odheai 17-nt, hea savzak, “atthvo patxai” mhunnttla. * (Prokasovnni 13:14, 15; 17:3, 8, 11 vachat.) Ho ‘patxai vo raza’ poilim dixtti poddtta, uprant nanch zata ani magir porot dixtti poddtta. Tor Prokasovnni pustokant sanglolim him utram United Nations-ak ekdom bore bhaxen lagu zatat! Karonn tem poilim League of Nations mhunn dixtti poddlem. Uprant, Dusrea Vixv Zhuza vellar tem nanch zalem. Ani atam ami taka United Nations mhunn vollkhotat, jem songotton sonvsarbhor aslolea sorkarank tenko dita.

11. Hea sonvsarache sorkar kitem kortat, ani ami tankam bhieupachi kiteak goroz na?

¹¹ Aplea khobram udexim hea sonvsarache sorkar, lokank Jehova ani tachea sevokancho virodh korunk uksaitat. Juanvan sanglem toxem, eka orthan, te “Sorpodvedar Devachea Vhoddlea Disachea zhuzak sonvsarantlea razank ektthai kortat.” (Prok. 16:13, 14, 16) Ani hea zhuzak Armageddon mhunnttlam. Punn amkam bhieupachi goroz na. Karonn amcho bollixtt Dev Jehova, tachea razvottkek tenko ditolea aplea sevokank salvar korunk rokddoch pavl ghetolo.—Ez. 38:21-23.

12. Hea soglea savzanchem kitem zatolem?

¹² Hea soglea savzanchem kitem zata? Prokasovnni 19:20 sangta: “Savzak dhorlem, ani tache borabor fottkirea provadiak; savzachea nanvan tannem vismitam kelʼlim tanche vorvim  tea savzacho xikʼko ghetloleank ani tache murtik bhozloleank tannem fosoilʼlim. Ani savzak ani khottea provadiak zolltea gondhokachea ujeachea konddant jivinch xevttun uddoilim.” Tor razvottki choloita astanach, Devache dusman aslolea hea soglea sorkarank Dev sasnak nas korun uddoitolo.

13. Hea sonvsarache sorkar Devachea sevokancher kitem korunk dobhav ghaltat?

¹³ Ami kitem korunk zai? Devache sevok zalolean ami Jehovak ani tachea Rajeak visvaxi ravonk zai. (Juanv 18:36) Oxem korunk, ami rajkaronnant bhag gheunk zaina. Punn hem korunk amkam khub kotthin zaunk xokta. Karonn hea sonvsarache sorkar utramnim ani kornneamnim tankam tenko diunk amcher dobhav ghaltat. Ani ami tanchea dobhava khala ailim zalear, savzacho xikʼko ami ghetolim. (Prok. 13:16, 17) Ani jim konn hea savzacho xikʼko ghetat, tim Jehovachi maniotai ani sasnik jivit pasun hogddaitolim. (Prok. 14:9, 10; 20:4) Tor hea sonvsarache sorkar amcher kitlo-i dobhav ghalum, ami khoinchech toren rajkaronnant bhag gheunk zaina. Ani hem korop khub gorjechem!

14. Prokasovnni 17:3-5-ant sanglolea pormonnem, apostl Juanv kitem polloun sarkoch thottaklo?

¹⁴ Apostl Juanv anik kitem polloun ‘sarkoch thottaklo.’ Tannem kitem polloilem? Tannem ek bail tambddea savzacher boson asa ti polloili. (Prok. 17:1, 2, 6) Ti ek “xindoll-bail” ani tichem nanv, ‘Podvedar Babilonia vo Vorixtt Babilon.’ Ti ‘prithumechea soglea razam sangata kamchar vo onoitik kamam’ korta.—Prokasovnni 17:3-5 vachat.

15-16. ‘Vorixtt Babilon’ konn zaun asa, ani ami hem koxem zannant?

¹⁵ ‘Vorixtt Babilon’ konn zaun asa? Hi bail, hea sonvsarache sorkar zaunk xokona. Karonn ti tanchea sangata onoitik kamam korta mhunn Bible sangta. (Prok. 18:9) Ani Bible-ant ti tambddea savzacher boslea mhunn sanglolem asa. Tor hantuntlean, ti sonvsarantlea sorkarancher odhikar cholounk sodhta mhunn kollon ieta. Toxench, ti Soitanachea sonvsarantlea veapar-dhondeankui suchit korina. Karonn tanchea vixim sangtana, Bible-ant tankam “sonvsarantle soglle veapari” mhunnttlam.—Prok. 18:11, 15, 16.

¹⁶ Bible-ant “xindoll” hem utor oslea munxank pasun uzar kelam, jim Devachi bhokti kortat mhunn sangtat, punn khorem mhunnttlear, tim murti puza kortat vo anik kosle-i toren sonvsarachim ixttam zatat. (Ez. 16:35, 36; Jak. 4:4) Punn dusre vatten, visvaxiponnan Devachi seva kortat tankam “nirmoll” vo “ankvar” mhunnttlolim asat. (2 Kor. 11:2; Prok. 14:4) Adlea tempar, Babilon khottea dhormachi zhor zaun aslem. Tor Vorixtt Babilon, sonvsarbhor zatolea sogle toreche khotte bhoktek vo sonvsarantlea soglea khottea dhormank suchit korta mhunn ami mhunnonk zata.—Prok. 17:5, 18; jw.org website-icher, “What Is Babylon the Great?” (Inglez bhaxen) ho lekh polloiat.

17. Vorixtt Babilonachem kitem zatolem?

¹⁷ Vorixtt Babilonachem kitem zatolem? Hea vixim Prokasovnni 17:16, 17 oxem sangta: “Tunvem polleleai tim dha xingam ani savoz xindoll-bailecho dves kortolim; tiche lagim asa titlem-i luttun kaddtolim, ani tika nagddi korun soddtolim; tichem mas khatolim ani ujean ticho bhosm kortolim. Kiteak Devachem utor pallon ie porian, Devan Aplo hetu tanchea monant ghala.” Tor tambddem savoz, tem mhunnttlear United Nations-a udexim, soglea khottea dhormancher akromonn korun tancho nas korunk Jehova Dev raxttrank uksaitolo.—Prok. 18:21-24.

18. Khoinchech toren Vorixtt Babilonak tenko dina zaunk ami kitem korunk zai?

 ¹⁸ Ami kitem korunk zai? Ami “Deva amchea Bapa mukhar xudʼdh ani nixkollonk bhoktiponn” samballunk zai. (Jak. 1:27) Toxench, Vorixtt Babilonacheo khotteo xikounneo, festam-porbo, khala poddlole noitik dorje ani ghaddiponn, hantuntlean ami pois ravonk zai. Toxench, tichea patkant lokamnim bhagidar zaina zaunk, ‘thoisorlim bhair sorat!’ mhunn ami tankam sangonk zai.—Prok. 18:4.

19. ‘Vorixtt tambddo ar’ konn zaun asa?

¹⁹ Prokasovnni pustokant ‘ek vorixtt tambddea ara’ vixim pasun sanglam. (Prok. 12:3) Ho ar, Jezu ani tachea ainzam add zhuzta. (Prok. 12:7-9) To Devachea lokancher akromonn korta ani sonvsarantlea soglea sorkarank odhikar dita. (Prok. 12:17; 13:4) Tor ho ar konn? “To adlo sorop . . . Tachem nanv Devchar ani Soitan.” (Prok. 12:9; 20:2) Ani hoch Devachea soglea dusmanancher tabo choloita.

20. Arachem kitem zatolem?

²⁰ Arachem kitem zatolem? Prokasovnni 20:1-3-ant sanglam, ki Soitanak ek ainz patallant xevttitolo ani ti taka ek bondkhonn koxi zatoli. Tor patallant astana, Soitan ‘hozar vorsam soro porian raxttrank fosounk xokchona.’ Xevottak, Soitanak ani tachea soglea vaitt dutank “zolltea gondhokachea konddant” xevttitole. Tem mhunnttlear, sasnak tancho nas zatolo. (Prok. 20:10) Tor tea vella vixim chintat, jednam Soitan ani tache vaitt dutt aschech nant. Khorench, to ek ekdom boro vell astolo!

21. Prokasovnni pustokant sanglolea khunnancho orth zannam zaun amkam khuxalkai kiteak melltta?

²¹ Prokasovnni pustokant sanglolea khunnancho orth zannam zaun amkam kitli khuxalkai melltta! Karonn Devache dusman konn ani tanchem kitem zatolem tem amkam tantunt kollon ieta. Tor khorench, jim konn ‘hi bhasaunni vachtat ani ti aikotat tim subhagi’ oxem ami mhunnonk zata. (Prok. 1:3) Punn Devachea dusmanancho nas zalea uprant, Devachea visvaxi sevokank koslim besanvam mellttolim? Hea vixim ami fuddlea lekhant polloitolim.