1. Khoro mog koso asta mhunn Bible sangta?

 MOGACHO ‘loklok ujeacho, Jehovachoch uzo to. Hunvrachea udkan mog palounk zaina, Nodinchea lottan taka buddounk zaina.’ b (Git. 8:6, 7) Khorea moga vixim him kitlim sobit utram nhoi! Ani kazari zoddpeank hea utrantlean khatri melltta ki tannim eka-mekacho khoro mog korunk zata zo kednanch kabar zaunchona.

2. Kazari zoddpeamnim tanche modem aslolo mog palvona zaunk kitem korunk zai?

² Kazari zoddpim jivitbhor eka-mekacho mog kortolim zalear, tachea pasot tannim vavrunk zai. Chintat, tumi ujea lagim boson xektat. Punn to uzo zollot ravonk, tumkam tantunt lakddam ghalit ravonk poddttolem. Toxench, kazari zoddpeam modem mog jivitbhor uronk, tankam tancho sombond ghott korunk vavrit ravonk poddttolem. Thodde pavtti, poixeanchem unnemponn asta, bholaiki bori asona, vo bhurgeanchi zobabdari asta. Dekhun kazari zoddpeank, tanche modem aslolo mog thondd poddtta oxem disonk xokta. Tor tumi kazari zalear, tumchea kazari jivitant ‘Jehovacho uzo’ palvona zaunk kitem korunk zata? Hea lekhant ami tin vatto polloitolim, jea vorvim tumche modem aslolo sombond ghott korunk, ani tumchea kazari jivitant khuxal ravonk tumkam modot zatoli. c

3. Ghov-bailam modem mog sodanch ghott uronk lagon Jehova sangata tanchi ixttagot ghott aslolean tankam koxi modot zata? (Upodexok 4:12) (Chitr pasun polloiat.)

³ Kazari jivitant, ‘Jehovacho uzo’ palvona zaunk, ghov-bailamnim, Jehova sangata tancho sombond ghott korunk vavr  korit ravonk zai. Oxem kelolean, tanchea kazari jivitant tankam koxi modot zaunk xokta? Jehova sangata tanchea ixttagoticho tim valor kortat tednam, tache solʼle apnnaunk tim rokddinch toiar astolim, ani oslea zaitea somosiam thaun pois ravonk xoktolim, zankam lagon tancho mog thondd poddonk xokta. (Upodexok 4:12 vachat.) Jehova sangata zanchi ghott ixttagot asta, tim Jehovachi dekh gheunk ani tache gunn apnnaunk khub proitn kortat. Zoxem tim dusreank doia toxench pasiens dakhoitat, ani dusreancheo chuki bhogxitat. (Ef. 4:32–5:1) Kazari zoddpim osle gunn dakhoitat tednam, eka-meka pasot tancho mog vaddounk tankam sompem zata. Lena nanvachi ek bhoinn, zaka kazar zaun 25-am poros chodd vorsam zaleant, ti mhunntta: “Jehova sangata zachi ixttagot ghott asta, taka mog ani resped dakhounk sompem zata.”

4. Jehovan Juze ani Mariek, Mesiasachim avoi-bapui zaunk kiteak vinchlim?

⁴ Ami Bible-antlea eka udharonnacher dhean dium-ia. Mesiasachim avoi-bapui zaunk, Davidachea sonstintlean Jehova konnakui vinchunk xoktalo. Punn tannem Juzek ani Mariek kiteak vinchlim? Karonn Juzechi ani Mariechi Jehova sangata ghott ixttagot asli. Ani tanchea kazari jivitant, tim apleak poilo zago ditolim mhunn Jehova zannam aslo. Tor kazari zoddpeamno, tumi Juze ani Marie thaun kitem xikonk zata?

5. Ghovamnim Juze thaun kitem xikonk zata?

⁵ Jehovachem margdorxon Juzen rokddench apnnailem, ani tea pasot to ek boro ghov zaunk pavlo. Zoxem tin pavtti tori, tachea famili sombondit Jehovan taka nirdexon dilem. Tem pallop Juzek sompem naslem. Tori astana, dor ek pavtt tannem tem rokddench apnnailem. (Mt. 1:20, 24; 2:13-15, 19-21) Oxem korun, to Mariechi rakhonn korunk, tika tenko diunk ani tichi kallji gheunk pavlo. Ani Juzen jem kitem kelem taka lagon, tache pasot Mariecho mog ani resped kitlo vaddlo astolo tea vixim chintat. Tor ghovamno, tumchea familichi kallji ghetana, Jehovachem margdorxon apnnaun tumi Juzechi dekh gheunk zata. d Oxem korunk thodde pavtti sompem aschem na. Tori astana, tumi Jehovachem margdorxon apnnaitat tednam, tumi tumchea bailecho mog kortat mhunn kollon ietolem, ani tumchem kazari jivit anikui ghott zatolem. Kazar zaun 20-am poros chodd vorsam zalʼlim, Vanuatu-nt ravpi ek bhoinn oxem sangta: “Mhozo ghov Jehovachem margdorxon zannam zaunk ani tem apnnaunk proitn korta tednam, tachea pasot mhozo resped anikui vaddtta. Toxench, to gheta tea nirnnoi-ancher mhaka bhorvonso asta ani mhaka kosloch usko zaina.”

6. Bailamnim Marie thaun kitem xikonk zata?

⁶ Jehova sangata apli ixttagot ghott korunk Marie Juzecheruch patieun ravonk na, punn svota zaun vavr kelo. Tika Devachea Utrachi bori vollokh asli. (Luk. 1:46-acho study note polloiat.) Ani tacher niall korunk ti vell pasun  kaddttali. (Luk. 2:19, 51) Dekhun ti ek bori bail zaunk pavli mhunn kainch dubhav na. Aiz zaiteo bailo Mariechi dekh gheunk khub vavr kortat. Udharonnak, Emiko nanvachi ek bhoinn mhunntta: “Hanv ankvar aslem tednam, hanv svota zaun Jehova sangata mhoji ixttagot ghott korunk vavr kortalem. Punn kazar zalea uprant, mhozo ghov amchea pasot magnnem korta ani Jehovachi bhokti korunk fuddakar gheta dekhun, hem soglem korunk hanv tacheruch patieun aslem. Tor hanvem svota zaun Jehova sangata mhoji ixttagot ghott korunk zai mhunn mhaka kollon ailem. Tea pasot, atam hanv eklem astana, Jehovak magnnem korunk, Bible vachunk ani tacher niall korunk vell kaddttam.” (Gal. 6:5) Bailamno, Jehova sangata tumchi ixttagot ghott korunk tumi vavr korit ravtat tednam, tumchea ghovak tumchi tokhnnai korunk ani tumcho mog korunk anikui karonnam astolim.—Mho. 31:30.

7. Sangata mellon bhokti korchea vixim, Juze ani Marie thaun kazari zoddpeamnim kitem xikonk zata?

⁷ Juze ani Marien, Jehova sangata tanchi ixttagot ghott korunk, sangata mellon pasun kam kelem. Ek famil zaun Jehovachi bhokti korop kitlem mhotvachem tem tim zannam aslim. (Luk. 2:22-24, 41; 4:16) Tankam uprant anikui bhurgim zalim toxim, oxem korunk tankam kotthin zalem astolem. Tori astana, tim sangata mellon Jehovachi bhokti kortalim. Aiz kazari zoddpeank, Marie ani Juzechem ekdom borem udharonn asa. Tanchea bhaxen tumkam bhurgim asat zalear, mittingek hajir zaunk vo kuttumbik bhokti korunk vell kaddunk, tumkam khub kotthin zata astolem. Toxench, tumchea kazari sangatea borabor magnnem ani obheas korunk vell kaddop, titlem sompem na astolem. Tori astana, tumi sangata mellon Jehovachi bhokti kortat tednam, tumi Jehovak toxench eka-mekak anikui lagim soronk pavtolim mhunn ugddas dovrat. Tor Jehovachi bhokti tumchea jivitant sodanch poilea zagear dovrat.

8. Tumchea kazari jivitant kosli-i somosia asa zalear, kuttumbik bhokte thaun purnn faido mellonk tumi kitem korunk zata?

⁸ Tumchea kazari jivitant aslolea koslea-i somosiank lagon, tumkam sangata mellon kuttumbik bhokti korunk disona zalear kitem? Tumi thoddo vell sangata mellon, tumkam avoddtta toslem kitem korunk zata. Oxem korit ravlolean, eka-meka pasot tumcho mog vaddttolo, ani sangata mellon Jehovachi bhokti korunk tumchi itsa vaddttoli.

9. Ghov-bailamnim eka-meka sangata vell sarop kiteak gorjechem?

⁹ Kazari zoddpeamno, tumi eka-meka sangata vell sartat tednam, tumchea modem aslolo mog anikui vaddttolo. Toxench, tumi tumchea kazari sangateachem chintop ani bhavnam somzonk pavtolim. (Ut. 2:24) Lilia ani Ruslan nanvachea eka zoddpeak, kazar zaun 15 poros chodd vorsam zaleant. Kazara uprant rokddench, tankam kitem tori kollon ailem. Lilia sangta: “Ami eka-meka sangata sarunk sodhtalim titlo vell, sarunk pavonaslim mhunn amkam kollon ailem. Ami dogaim kamank voitalim toxench amkam ghorchem-i kam astalem. Tor ami sangata velluch sarunk pavonaslim. Ani bhurgim zalea uprant, vell koso voitalo tem khoboruch asonaslem. Tor ami sangata mellon vell sarinant zalear, amche modem aslolo mog unno zatolo mhunn amkam kollon ailem.”

10. Kazari zoddpeamnim Efezkarank 5:15, 16-ntlem totv koxem apnnaunk zata?

¹⁰ Kazari zoddpeamno, tumi eka-meka sangata vell sarunk kitem korunk zata? Tumi sangata mellon kednam vell sartolim tem poilench tharaunk zata. (Efezkarank 5:15, 16 vachat.) Nigeria-nt ravpi bhav Uzondu mhunntta: “Hanv khoinchem kam kednam kortolom tem tharaitana, mhoje baile sangata hanv kednam vell sartolom tem pasun hanv tharaitam. Ani tea vellar, hanv dusrem khoinchench kam korina.” (Filp. 1: 10) Moldova-nt ravpi sorkittachi dekhrekh korpeachi bail, Anastasia, aplo vell bore toren koxi uzar korta tacher dhean diat. Ti sangta: “Mhozo ghov tacheo zobabdareo samballunk bizi asta tednam, hanv mhojim gorjechim kamam korunk proitn kortam. Oxem kelolean, uprant amkam sangata vell sarunk melltta.” Punn tumchea kamank lagon, sangata vell sarunk kotthin zata zalear tumi kitem korunk zata?

11. Akuila ani Prisila, sangata mellon koslim kamam kortalim?

¹¹ Kazari zoddpim, Akuila ani Prisila thaun zaitem xikonk xoktat. Poilea xekddeantlim zaitim bhav-bhoinnam tankam khub resped ditalim. (Rom. 16:3, 4) Tanchea kazari jivita vixim Bible-ant chodd kainch sangonk na tem khorem, punn tim sangata mellon kam kortalim, porgottʼttalim, ani herank modot kortalim mhunn amkam kollon ieta. (D.I. 18:2, 3, 24-26) Khorem mhunnttlear, Bible-ant tanche vixim sanglam title-i pavtti, tancho dogaincho-i sangata ulʼlekh kela.

12. Eka-meka sangata anikui vell sarunk kazari zoddpeamnim kitem korunk zata? (Chitr pasun polloiat.)

¹² Kazari zoddpeamno, tumi Akuila ani Prisilachi dekh koxi gheunk zata? Tumkam dogainkui koslim-koslim kamam korchi goroz asa, ani tantuntlim khoinchim kamam ekttinch korchea bodlek, tumi sangata mellon korunk zatat tea vixim chintat. Zoxem Akuila ani Prisila sangata mellon porgottnni kortalim. Tor tumchea kazari sangatea borabor tumi vella-vellar porgottnni kortat kai? Toxench Akuila ani Prisila, sangata mellon kam kortalim. Tumi dogaim ghoddie ekuch zagear sirvis korinant astolim. Punn tumi ghorchim kamam borabor korunk zatat kai? (Up. 4:9) Tumi sangata mellon eka-mekak modot kortat zalear, tumi ek team zaun asat mhunn tumkam kollon ietolem, ani eka-meka lagim ulounk tumkam anikui sondhi mellttoli. Hea vixim, amkam Robert ani Linda nanvachea eka zoddpeacho onubhov asa. Tankam kazar zaun 50-am poros chodd vorsam zaleant. Bhav Robert sangta: “Khorem mhunnttlear, monoronjonant sangata mellon vell sarunk amkam titlo vell mellona. Punn hanv aidonam dhuitam ani mhoji bail tim pusta, vo hanv garden-ant kam kortam ani mhoji bail mhaka modot korunk ieta tednam, mhaka khub borem dista. Oxe toren ami sangata mellon kam kelolean, ami eka-mekak anik lagim soronk pavtat ani amchea modem aslolo mog anikui vaddtta.

13. Ghov-bailamnim, eka-mekak lagim soronk kitem korunk zai?

¹³ Punn ugddas dovrat, ki ghov-bail ekuch ghorant ravtat dekhun, tim apxinch eka-mekak lagim sortolim oxem nhoi. Brazil-ant ravpi ek bail mhunntta, “Aichea kallar, amchem jivit itlem bizi zalam, ki ghov-bail ekuch ghorant ravtat dekhun, tim eka-meka sangata vell sartat oxem disonk xokta. Ami ekuch ghorant ravlearuch puro nhoi. Punn hanvem mhojea ghovak vell pasun diunk zai mhunn mhaka kollon ailem.” Bruno ani tachi bail Tays, eka-meka sangata vell sarunk kitem kortat tacher dhean diat. Bruno sangta: “Ami sangata vell sartana, amche  fon pois dovortat. Oxem kelolean, ami eka-mekak boro vell diunk pavtat.”

14. Eka zoddpeak eka-meka sangata vell sarunk avoddna zalear, tannim kitem korunk zata?

¹⁴ Punn tumkam eka-meka sangata vell sarunk avoddna zalear kitem? Tuka jem avoddtta tem ghoddie tujea sangateak avoddna astolem, vo tumi eka-mekacher rokddinch bejar zatat astolim. Tor tumi kitem korunk zata? Ami porot ek pavtti ujea lagim xekpachea udharonnacher dhean dium-ia. Uzo poilinch vhodd asona. Punn uzo vhodd zaunk, survatek lhan-lhan lakddam ghaltat ani uprant vhoddlim lakddam ghalunk lagtat. Teach bhaxen, tumi pasun dor disa eka-meka sangata thoddo-thoddo vell sarunk zata. Punn oxem kortana, tumkam rag haddunk xokta toslem nhoi, punn tumkam dogainkui avoddtta toslem kam korat. (Jak. 3:18) Oxe toren, survatek thoddo-thoddo korun eka-meka sangata vell sarlolean tumcho mog porot vaddonk xokta.

15. Ghov-bailen eka-mekak resped divop kiteak mhotvachem?

¹⁵ Ghov-bailen eka-mekak resped divop mhotvachem. Resped, uzo pettot uronk goroz aslolea oxygen-ak sor korunk zata. Oxygen na zalear, uzo palvota tea bhaxen, ghov-bail eka-mekak resped dinant zalear, tanche modem aslolo mog rokddoch thondd poddttolo. Punn dusrea vatten, tim dogaim eka-mekak resped ditat zalear, tancho mog tea ujea bhaxen chaluch urtolo. Teach borabor, tumi hem pasun ugddas dovrop mhotvachem: Tumi tumchea sangateak resped ditat oxem tumkam ghoddie disot. Punn gorjechi vost mhunnttlear, tumchea sangateak taka resped melltta mhunn dison ieunk zai. Penny ani Aret nanvachea zoddpeak, kazar zaun 25-am poros chodd vorsam zaleant. Bhoinn Penny mhunntta: “Ami eka-mekak resped ditat dekhun amchea ghorabeant mog asa, ani amkam koxem bhogta tem ami eka-mekak ukteponnim sangonk xoktat. Karonn ami eka-mekache vichar mhotvache mhunn lekhtat mhunn ami zannant. Tor tumi tumchea sangateak khorench resped ditat mhunn taka dison ieunk, tumi kitem korunk zata? Hem zannam zaunk ami Abraham ani Sarachem udharonn polloum-ia.

16. Abrahamachea udharonna thaun ghovamnim kitem xikonk zata? (1 Pedru 3:7) (Chitr pasun polloiat.)

¹⁶ Abraham Sara lagim respedan vagtalo. To tichem aikon ghetalo, ani tika koxem bhogta tem somzon ghetalo. Ek pavtti ti bejar asli dekhun, tinnem soglo rag Abrahamacher kaddlo, ani soglem takach lagon zata mhunn ti sangonk lagli. Tea vellar Abrahaman ragan bhoron tika utramnim dukhoili kai? Na. Karonn Sara khalti asli, ani ti tachea nirnnoi-ank tenko diupi mhunn to zannam aslo. Tor Abrahaman Sarachem aikon ghetlem, ani ti somosia suttavi korunk proitn kelo. (Ut. 16:5, 6) Abrahama thaun ghovamnim kitem xikonk zata? Ghovamno, familint nirnnoi gheunk tumkam odhikar asa tem khorem. (1 Kor. 11:3) Punn tumchea familint mhotvache nirnnoi gheunchea poilim, khas korun tea nirnnoi-acho tumchea bailecher probhav poddttolo  zalear, tumi tiche vichar aikon ghetle zalear, tumi tika resped dakhoitole. (1 Kor. 13:4, 5) Ghoddie thodde pavtti ti bejar asot, ani tika koxem bhogta tem ti sangonk sodhta zait. Tea vellar, tumi bore bhaxen tichem aikon ghetat kai? (1 Pedru 3:7 vachat.) Angela ani Dmitry-k kazar zaun sumar 30 vorsam zaleant. Aplo ghov apleak koso resped dita, tea vixim Angela sangta: “Hanv bejar astam vo mhaka ulounk zai tednam, Dmitry mhojem aikonk sodanch toiar asta. Ani jednam hanv itli dukhi astam, ki mhaka ulounk pasun kotthin zata, tea vellar to mhaka pasiens dakhoita.”

17. Sarachea udharonna thaun bailamnim kitem xikonk zata? (1 Pedru 3:5, 6)

¹⁷ Abrahamachea nirnnoi-ak tenko diun, Saran taka resped dakhoilo. (Ut. 12:5) Ek pavtti, tin onvollkhi munxancho poramos korunk, Abrahaman Sarak tichem kam thamboun, tanchea pasot zaitem jevonn toiar korunk sanglem. Tednam Saran rokddench tachem aikolem ani ti kamak lagli. (Ut. 18:6) Bailamno, tumi Sara thaun kitem xikonk zata? Tumchea ghovachea nirnnoi-ank sodanch tenko diat. Oxem kelear, tumchem kazari jivit ghott zaunk pavtolem. (1 Pedru 3:5, 6 vachat.) Ami fattlea peregrafant polloilʼlo bhav Dmitry, tachi bail taka koso resped dita tea vixim oxem sangta: “Thodde pavtti amche vichar veg-veglle asat zalear pasun, Angela mhojea nirnnoi-ank tenko dita tem polloun, mhaka khub borem dista. Ani hanvem ghetlolea nirnnoi-ancho porinnam vaitt zalo zalear pasun, tem mhaka thomnne marina.” Khorench, amkam resped dita tea munxacho mog korop kitlem sompem zaun asa nhoi!

18. Kazari zoddpim, tanche modem aslolo mog jivo uronk vavr kortat tednam kitem zaunk pavta?

¹⁸ Aiz Kristi zoddpeam modem zo mog asa, to Soitan kabar korunk sodhta. Karonn to zannam ki ghov-bailam modem mog kabar zalear, tim sovkas-sovkas korun Jehova thaun pasun pois vochonk xoktat. Punn khoro mog kednanch kabar zaina. Tor tumchea modem aslolo mog, Gitantlem Git, hea pustokant sanglolea moga bhaxem zaum-di. Tumchea kazari jivitant Jehovak poilo zago diunk, eka-mekak vell toxench resped diunk, ani eka-mekachim bhavnam ani gorzo somzon gheunk ghott nichov korat. Oxem kelolean, khorea mogachi Zhor zaun aslolea Jehova Devak tumi mhoima diunk pavtolim. Toxench, tumchea modem aslolo Jehovacho uzo, to mhunnttlear khoro mog, sasnak togtolo.