1. Ami kitem kelʼlem Jehovak zai? (Chitr pasun polloiat.)

 AMKAM bhuzvonn ani margdorxon zai tednam ami konna lagim modot magonk zata? Hacho zobab ami zannant. Ami Jehova lagim magnnem korun tachi modot gheunk zata. Ani ami oxench kelʼlem Jehovak zai. Bible-ant “thambonastana magnnem korat” mhunn amkam urba dilea. (1 Tes. 5:17) Hantuntlean, ami Jehova lagim zaite pavtti magnnem kelolem taka zai mhunn amkam kollon ieta. Ami tache lagim ukteponnim ulounk zata, ani khoinchea-i vixoi-acher tachem margdorxon magonk zata. (Mho. 3:5, 6) Jehova ek udar kallzacho Dev aslolean, ami zai title pavtti ani khoinchea-i vellar tachea lagim magnnem korunk zata.

2. Hea lekhant ami kitem zannam zatolim?

² Jehovan amkam tache lagim magnnem korunk sueog dila mhunn ami tache khub upkari asat. Punn dis-bhor amkam itlim kamam astat, ki magnnem korunk vell kaddunk amkam kotthin zaunk xokta. Toxench, ami anikui bore toren magnnem korunk zai oxem amkam disot. Hem koxem korunk zata, tea vixim Jehova amkam Bible-antlean margdorxon ani urba dita dekhun ami kitlim upkari nhoi! Tor hea lekhant ami Jezuchea udharonnacher dhean ditolim ani tache bhaxen magnnem korunk koso vell kaddunk zata tem zannam zatolim. Toxench, ami anikui bore toren koxem magnnem korunk zata, tem zannam zaunk ami panch mhotvache mudʼde polloitolim.

3. Magnnea vixim Jezu kitem zannam aslo?

³ Jehova amchea magnneancho valor korta mhunn Jezu zannam aslo. Hea prithumer ieunchea zaitea vorsam poilim, Jehovan aplea visvaxi sevokank tanchea magnneancho koso zobab dilo tem tannem polloilʼlem. Zoxem, David, Anʼna, Elija ani her  visvaxi sevokanchea magnneank Jehovan zobab dilo tednam Jezu tachea sangata aslo. (1 Sam. 1:10, 11, 20; 1 Raz. 19:4-6; St. 32:5) Tea pasot, aplea xisamnim magnnem korit ravonk ani tanchea magnneancho Jehova zobab ditolo mhunn khatri dovrunk, Jezun tankam modot keli.—Mt. 7:7-11.

4. Magnnem korchea vixim ami Jezu thaun kitem xikonk zata?

⁴ Magnnea vixim Jezun svota zaun aplea xisank ek dekh dovorli. Hea prithumer Jehovachi seva kortana tannem khub pavtti Jehova lagim magnnem kelem. To choddso bizi astalo ani tache bhonvtonnim sodanch lokanchi gordi astali. (Mk. 6:31, 45, 46) Tea pasot, magnnem korunk tannem ek vell tharailo. To sokallim fuddem kallokh astanach uttʼttalo ani magnnem kortalo. (Mk. 1:35) Toxench, Bible-ant sanglam ki ek pavtti taka ek ekdom mhotvacho nirnnoi gheuncho aslo tednam, tannem akʼkhi rat Jehova lagim magnnem kelem. (Luk. 6:12, 13) Tea bhair taka dilʼli sogleam-von vhoddli zobabdari purnn korunk lagon morchea adlea rati tannem zaite pavtti Jehova lagim magnnem kelem.—Mt. 26:39, 42, 44.

5. Magnnem kortana ami Jezuchi dekh koxi gheunk zata?

⁵ Jezuchea udharonnantlean ami xiktat ki ami kitlim-i bizi aslear pasun, magnnem korunk ami vell tharaunk zai. Zoxem, ami sokallim fuddem begin utthonk zata vo rati nhidchea poilim ami thoddo vell kaddun magnnem korunk zata. Ami oxem kortat tednam, magnnem, hea moladik dennea pasot Jehovache ami upkari asat mhunn dakhoitat. Lynne nanvachea eke bhoinnik magnnem korchea sueoga vixim poilech pavtti kollʼllem tednam ti kitli upkari asli tea vixim ti sangta. Ti mhunnta: “Jehova lagim hanvem khoinchea-i vellar ulounk zata mhunn mhaka kollʼllem tednam, hanv taka mhozo ek lagxilʼlo Ixtt mhunn lekhunk lagli, ani tachea sangata anik bore toren ulounk sodhtali.” Amchea modlea zaitea zannank oxench dista nhoi! Tor magnnem kortana ami khoinche panch mudʼde ugddas dovrunk zai tem polloum-ia.

6. Prokasovnni 4:10, 11 pormonnem, Jehovak kitem mellonk favo?

⁶ Jehovak vakhannʼnni diat. Apostl Juanvan eka ojapachea dorxonant, 24 zanntte sorgar Jehovachi bhokti kortat tem polloilem. Te Jehovak vakhannʼnni diun oxem mhunnttale: “Tuji podvi vollkhun, soglleamnim Tuka mhoima ani bhovman diunk favo.” (Prokasovnni 4:10, 11 vachat.) Jehovachea visvaxi devdutank pasun,  taka mhoima ani vakhannʼnni diunk zaitim karonnam asat. Karonn te Jehova borabor sorgar asat ani taka bore bhaxen vollkhotat. Jehovachea kamam vorvim taka kosle gunn asat tem tankam kollon ieta, ani Jehova koxe toren kam korta tem polloitana te taka vakhannʼnni diunk fattim soronant.—Job 38:4-7.

7. Ami koslea karonnank lagon Jehovak vakhannʼnni diunk zai?

⁷ Ami pasun amchea magnneamnim Jehovak vakhannʼnni diunk zai. Amkam Jehova vixim kitem avoddtta, vo ami taka kiteak resped ditat tem ami taka sangonk zata. Ami Bible vachtat ani tacho obheas kortat tednam, tantunt sanglole Jehovache khoinche gunn amkam chodd avoddttat tea vixim ami chintunk zata. (Job 37:23; Rom. 11:33) Ani uprant magnneant tea gunnam pasot Jehovak vakhannunk zata. Itlench nhoi, Jehova amkam, toxench amchea bhav-bhoinnank modot korta, amchi kallji gheta ani rakhonn korta hea karonnank lagon pasun ami taka vakhannunk zata.—1 Sam. 1:27; 2:1, 2.

8. Ami koslea karonnank lagon Jehovache upkar attounk zatat? (1 Tesalonikekarank 5:18)

⁸ Jehovache upkar attoiat. Magnneant Jehovache upkar attounk amkam zaitim karonnam asat. (1 Tesalonikekarank 5:18 vachat.) Amche lagim aslole dor eke bore vostu pasot ami tache upkar attounk zai. Karonn soglim borim dennim Jehova Devuch amkam dita. (Jak. 1:17) Udharonnak, tannem amchea pasot sobit prithum ani ojapacheo rochnna keleat. Toxench tannem amkam jivit, famil, ixttam ani ek boro bhorvonso dila dekhun ami tache upkar attounk zai. Itlench nhoi, tachea sangata ixttagot zoddunk tannem amkam sueog dilʼlea pasot ami taka dhinvasnni diunk zai.

9. Jehova amchea khatir jem kitem korta tea pasot ami amchem upkariponn kiteak vaddounk zai?

⁹ Jehovan amchea pasot kelʼlea khoinchea vostum pasot ami upkar attounk zata, tea vixim chintunk ami anikui vavr korunk zai. Karonn ami aiz oslea sonvsarant jietat zoim choddso lok onupkari asat. Aplea lagim jem kitem asa tea pasot upkar attounche bodlek, lokanchem dhean tankam kitem zai ani tim koxim melloun gheunk xoktat tacher asta. Ami chotur nant zalear ami pasun toxinch zaunk xoktat, ani amchea magnneamnim Jehovache upkar attounche bodlek, ami fokot amkam kitem-kitem zai tem magot ravtolim. Oxem zaina zaunk, Jehova amchea khatir korta tea soglea vostum pasot ami amchem upkariponn vaddoit ravonk zai.—Luk. 6:45.

10. Upkari aslolean eke bhoinnik tiche tras sosunk koxi modot zali? (Chitr pasun polloiat.)

¹⁰ Ami upkari astat tednam amcher ietat teo oddchonneo sosunk amkam modot zata. Hench bhoinn Kyung-sook-an onubhovlem. Ticho onubhov amkam, Janer 15, 2015-chea, Pahrogopur-ant melltta. Tika pulmancho cancer zalʼlo ani to ekdom chodd vaddlolo. Bhoinnik hea vixim kollʼllem tednam tika koxem bhoglem tea vixim ti mhunntta: “Oxem zatolem mhunn hanvem sopnant pasun chintunk na. Atam soglem kabar zalem mhunn hanvem chintlem ani hanv ekdom bhielem.” Punn hea trasancho fuddo korunk tika koxi modot zali? Ti sangta ki dor rati nhidonk voichea poilim ti aplea terrace-ar vochon,  tea disa, ti khoinchea panch vostunk lagon upkari asa tem vhoddlean magnnem korun Jehovak sangtali. Oxem kelolean ticho usko unno zatalo, ani ti Jehovacho kitlo mog korta tem ti taka sangonk pavtali. Gombhir trasanchea vellar pasun Jehova aplea visvaxi sevokank koso modot korta tem tinnem onubhovlem. Ani amchea jivitant aslolea trasam poros, Jehovachim besanvam chodd astat mhunn tika kollon ailem. Bhoinn Kyung-sook-a bhaxen ami pasun trasancho fuddo kortat astolim. Tori astana, Jehovache upkar attounk amkam zaitim karonnam asat. Jehova jem kitem korta tea pasot ami kitlim upkari asat tem ami taka magnneant sangtat tednam, amche tras sosunk, toxench amchi monachi xanti ani khuxalkai hogddaina zaunk amkam modot zata.

11. Jezu sorgar gelea uprant tachea xisank dhirachi kiteak goroz asli?

¹¹ Porgottnni korunk Jehova lagim dhir magat. Jezu sorgar voichea poilim tannem aplea xisank tankam dilʼlea eka mhotvachea kamacho ugddas kelo. Tem mhunnttlear, tannim “Jeruzalemant, ani akʼkhea Judeiant ani Samariant, toxench prithumechea sogleant poisulʼlea vattarant” vochon tachea vixim govai diunk zai asli. (D.I. 1:8; Luk. 24:46-48) Punn to sorgar vochon thoddeach vella uprant, Judevanchea fuddareamnim apostl Pedruk ani Juanvak dhorun vhele. Tannim tankam Mha-sobhent vhoron porgottnni bond korunk sanglem ani toxench dhomki pasun dili. (D.I. 4:18, 21) Tor Pedrun ani Juanvan kitem kelem?

12. Itihas 4:29, 31-a pormonnem, Jezuchea xisamnim kitem kelem?

¹² Judevanchea dhormik fuddareamnim dhomki dili tednam, Pedrun ani Juanvan oxem mhunnttlem: “Ami Devachem aikochem soddun, tumchem aikochem hem Devachea nodren sarkem zalear tuminch tharaiat. Punn amchean zalear jem ami kitem polloilam ani aikolam, tea vixim ulounchem bond korunk zaunchem na.” (D.I. 4:19, 20) Magir tankam dogainkui soddlea uprant tannim vhoddlea tallean Jehovak magnnem kelem jem tachi khuxi purnn korchea vixim aslem. Tannim oxem maglem: “Tujea chakrank tujem utor bhienastana sangot ravonk dhir di.” Tannim kallzantlean kelʼlea magnneacho Jehovan zobab dilo.—Itihas 4:29, 31 vachat.

13. Bhav Jin-hyuk-achea onubhovantlean ami kitem xiktat?

¹³ Aiz sorkari odhikari amkam porgottnni korinakat mhunn sangtat tednam, ami pasun Jezuchea apostlanchi dekh gheun porgottnni korit ravtat. Oxench, Jin-hyuk nanvachea eka bhavan kelem. To military-nt bhorti zaunk na dekhun taka bondkhonnint ghatlolo. Ani bondkhonnint ekttech dovorlole, tea thoddea koideanchi dekh rekh korpachem taka kam dilʼlem. Punn taka tanche lagim tankam goroz asloleo vostu soddun, her khoinchea-i vixoi-ancher, ani Bible-a vixim pasun ulounk porvangi nasli. Tor bhavan kitem kelem? Apleak melltta ti sondhi uzar korun, tankam sota vixim sangonk apleak dhir ani xanneponn di mhunn tannem Jehova lagim magnnem kelem. (D.I. 5:29) To mhunntta: “Jehovan mhojea magnneancho zobab dilo. Tannem mhaka dhir ani zannvai dili dekhun, hanv bondkhonnichea dararuch ravon panch minttache zaite Bible obheas suru korunk pavlom. Hanv ratcho chitti boroitalom ani dusrea disa vochon tea koideank ditalom.” Tor porgottnnechem kam korunk, Jehova amkam pasun modot kortolo mhunn ami khatri dovrunk zata. Bhav Jin-hyuk-a bhaxen, ami Jehova lagim dhir ani zannvai magonk zata.

14. Amcher jednam tras ietat, tednam ami kitem korunk zai? (Stotr 37:3, 5)

¹⁴ Trasancho fuddo korunk Jehova lagim modot magat. Amchea modlim zaitim zannam, duent asat vo koslea karonnank lagon dukhi vo niraxi asat zait. Vo amchea mogacheank ami mornnant sanddleant astolim. Vo familint kosli oddchonn asa zait vo dhumallo vo her koslea-i trasancho ami fuddo kortat astolim.  Voilean pidda ani zhuzank lagon, amkam hea oddchonneancho fuddo korunk anikui kotthin zata astolem. Tor ami kitem korunk zai? Amchea kallzant asa tem soglem ami Jehovak sangonk zai. Eka lagxilʼlea ixtta lagim uloitat tea bhaxen amche poristhiti vixim ami Jehovak sangonk zai, ani Jehova ‘goroz tem kortolo’ mhunn khatri dovrunk zai.—Stotr 37:3, 5 vachat.

15. Magnnem kelolean ‘sonkoxttachea vellar thir ravonk’ amkam koxi modot zata? Ek udharonn diat.

¹⁵ Magnnem korit ravlolean ‘sonkoxttachea vellar thir ravonk’ amkam modot zata. Tem mhunnttlear, amcher ietat te tras ami sosunk pavtat. (Rom. 12:12) Aplea sevokanchea jivitant kitem ghoddtta tem soglem Jehova zannam, ani to “tanchi bob aikota.” (St. 145:18, 19) Hench 29 vorsanchea Kristie nanvache eke bhoinnin onubhovlem. Tem pioneer seva kortalem. Punn okosmat tachi bholaiki samki bigddonk lagli. Tea pasot tem ekdom niraxi zalem. Uprant taka kollon ailem ki tachea avoik ek oslem duens zalam, jea vorvim ticho jiv voitolo. Bhoinn Kristie sangta: “Dor disa, mhaka goroz ti ghottai di mhunn hanvem Jehova lagim roddon vinoti keli. Jehovachea bhokte sombondit aslolim kamam, zoxem mittingek hajir zavop ani svotacho obheas korop hanvem bond korunk na.” Tem fuddem mhunntta: “Magnnea vorvim hea ekdom kotthin poristhiticho fuddo korunk mhaka modot zali. Jehova sodanch mhojea sangata asa hem hanvem ugddas dovorlem. Ani oxem kelolean mhaka khub bhuzvonn mellʼlli. Mhoji bholaiki rokddich bori zaunk na tem khorem. Punn Jehovan mhojea magnneancho zobab dilo, ani mhojem kalliz ani mon xant dovrunk mhaka modot keli.” Khorench, “bhoktivont monxank porikxentlim nivarunk Sorvesporak tank asa” mhunn ami sodanch ugddas dovrum-ia.”—2 Ped. 2:9.

16. Tallnneo nakarunk ami Jehova lagim kiteak modot magonk zai?

¹⁶ Tallnneo nakarunk Jehova lagim modot magat. Ami opurnn aslolean, vaitt korchea tallnneam thaun pois ravonk, amkam zhuzot ravonk poddtta. Ani Soitan amchem hem zhuz anikui kotthin korta. To amchim chintnam piddʼddear korunk proitn korta. Ani tachi ek vatt mhunnttlear, onoitik monoronjon. Oslem  monoronjon amchem mon ani chintop Jehovachea nodren oxudʼdh korta, ani xevottak gombhir patkak pavounk xokta.—Mk. 7:21-23; Jak. 1:14, 15.

17. Tallnni pois korunk magnnem kelea uprant, ami kitem korunk zai? (Chitr pasun polloiat.)

¹⁷ Vaitt korchi tallnni pois korunk ami Jehovachi modot magonk zai. Jezun aplea xisank magnnem korunk xikoilʼlem tednam, tannem tankam hea vixim pasun magonk sanglolem. Tannem mhunnttlolem: “Amkam tallnneant poddonk dium naka, punn noxtteachea hatantlim vattai.” (Mt. 6:13) Jehova amkam modot korunk toiar asa tem khorem. Punn ami tachi modot magonk zai, ani tea uprant, amchea magnnea pormonnem kam korunk zai. Sonvsarantlea lokank vaitt koxem disona, punn amchea monant vaitt chintnam bhorunk xokta, toslea monoronjona thaun pois ravonk amchean zata tem soglem ami korunk zai. (St. 97:10) Tem kitem? Ami Bible vachun ani tacho obheas korun amchem mon borea chintnamnim bhorunk zai. Toxench, ami mittingek hajir zatat ani porgottnnent bhag ghetat tednam, vaitt chintnam thaun amchi rakhonn zaunk xokta. Ani Jehova amkam bhas dita ki ami toxem kelear, amchean sosunk zata tachea-von khor tallnni to amcher ieunk diuncho na.—1 Kor. 10:12, 13.

18. Amchim magnnim anikui borim zaunk ami sogleamnim kitem korunk zai?

¹⁸ Hea bhirankull disamnim Jehovak visvaxi ravonk ami sogleamnim tache lagim anikui chodd magnnem korunk zai. Tor, dor disa kallzantlean tache lagim magnnem korunk ami vell kaddum-ia. Karonn ‘amche kallzache sogle uske ami taka sanglole’ Jehovak zai. (St. 62:8) Toxench, taka vakhannʼnni dium-ia, ani to amkam lagon jem korta tea soglea pasot tache upkar attoum-ia. Porgottnnechem kam korunk tache lagim dhir magom-ia. Amcher ietat tea khoinchea-i somosiancho fuddo korunk ani tallnneam thaun pois ravonk tache lagim vinoti korum-ia. Dor disa, Jehova lagim magnnem korunk ami konnakuch vo kiteakuch addkholl korunk diunchem nhoi. Jehova amchea magnneancho zobab ditolo mhunn ami khatri dovrunk zata. To hem koxem korta tem ami fuddlea lekhant polloum-ia.