1. Amchea modlea zaitea zannank kitem korunk kotthin zata?

 AMI soglim Jehova pasot amchi seva vaddounk, ani taka khuxal korunk sodhtat. Oxem korunk ami umkech dhei dovrunk zatat. Zoxem, ek Kristi gunn vaddovop, chukonastana Bible vachop, svotacho obheas anik bore toren korop vo porgottnnechea kamant amchi kola vaddovop. Tumi pasun osloch ek dhei dovorla zait, punn to melloun gheunk tumkam kotthin zalam astolem. Ani oxem zaitea bhav-bhoinnank ghoddlam. Udharonnak Philip-an, chodd pavtti, ani anik bore toren magnnem korunk dhei dovorlolo. Punn taka magnnem korunk velluch kaddunk kotthin zatalem. Toxench Erika-n, porgottnni mittingo suru zaunchea poilim, thoim pavcho dhei dovorlolo. Punn tem chodd korun dor ek porgottnni mittingek late pavtalem. Tea bhair Tomas-an, ek vorsa bhitor akʼkho Bible vachunk dhei dovorlolo. Punn to sangta: “Mhaka Bible vachunk avddoch naslem. Hanvem to vachunk suru kelo tem khorem, punn tinui pavtti hanv Levi-Xastr pustokachea fuddem vachunk pavonkuch na.”

2. Tumi dovorlolo dhei tumi azun poriant melloun gheunk pavonk nant zalear, tumi kiteak niraxi zaunchem nhoi?

² Tumi dovorlolo dhei, tumi azun poriant melloun gheunk pavonk nant zalear, niraxi zainakat. Ek sadho dhei melloun gheunk pasun, vell ani khub vavr lagta. Tumi tumcho dhei melloun gheunk vavr kortat, hem dakhoun dita ki Jehova sangata tumchi ixttagot tumi khub moladik mhunn lekhtat, ani taka tumi boreantlem-borem diunk sodhtat. Jehova tumchea vavracho khub valor korta. Punn Jehova tumchean zata tachea poros chodd opekxa korina. (St. 103:14; Mik. 6:8) Tor tumche poristhiti pormonnem, tumi melloun gheunk xoktat tosle dhei dovrat. Tumi tumcho dhei koso melloun gheunk zata, tacheo thoddeo suchounneo polloum-ia.

3. Itsa asop kiteak gorjechem?

³ Tumcho dhei melloun gheunk tumkam ghott itsa asop gorjechem. Karonn tednanch tumi to melloun gheunk vavr kortolim. Itsa ami vareak sor korunk zata, jem eke boat-ik fuddem vochonk modot korta. Varem marit ravta tednam, tea boat choloupeak taka vochonk zai, tea zagear pavonk modot zatoli. Ani varem nettan marta zalear, to thoim anikui begin pavonk xokta. Teach bhaxen, amchi itsa ghott asa zalear, ami amche dhei melloun gheunk pavtolim. El Salvador-ant ravpi, David nanvacho ek bhav mhunntta: “Jitli tumchi itsa ghott asta, titlim tumi anikui vavr kortat. Tumi dovorlolo dhei melloun gheunk tumi konnakuch addaunk dinant.” Tor tumchi itsa vaddounk tumi kitem korunk zata?

4. Ami kitea pasot magnnem korunk zata? (Filipkarank 2:13) (Chitr pasun polloiat.)

⁴ Tumchi itsa vaddounk Jehova lagim magnnem korat. Aple povitr xokte udexim, tumi dovorlolo dhei melloun gheunk, Jehova tumchi itsa vaddounk xokta. (Filipkarank 2:13 vachat.) Dhei dovrop borem dekhun, thodde pavtti ami dhei dovortat astolim. Punn to melloun gheunk amkam khoreaninch itsa na zait. Oxench Uganda-nt ravpi, Norina nanvache eke bhoinnik ghoddlem. Tinnem Bible obheas suru korunk dhei dovorlolo. Punn toxem korunk, tichi itsa titli ghott nasli. Karonn apunn ek bori xikoupi nhoi, oxem tika distalem. Tor tinnem kitem kelem? Ti sangta: “Bible obheas korunk mhoji itsa vaddounk, hanv sodanch Jehova lagim magnnem kortalem. Ani mhojea magnnea pormonnem hanvem mhoji xikounchi kola vaddounk pavlam ghetlim. Thoddea mhoineamnim, mhoji itsa anikui ghott zali mhunn mhaka kollon ailem. Ani teach vorsa, hanvem don Bible obheas suru kele.”

5. Amchi itsa ghott korunk ami kitea vixim niall korunk zai?

⁵ Jehovan tumchea pasot jem kelam tacher niall korat. (St. 143:5) Jehovan apleak favo nasloli doia koxi dakhoilea tea vixim apostl Paulun niall kelo. Tea pasot, Jehovache sevent anikui chodd vavr korunk tachi itsa ghott zali. (1 Kor. 15:9, 10; 1 Tim. 1:12-14) Teach bhaxen, Jehovan amchea pasot jem kitem kelam tacher niall kelear, ami dovorlolo dhei melloun gheunk anikui vavr korunk amchi itsa ghott zatoli. (St. 116:12) Honduras-ant ravtolea eke bhoinnik, niemit pioneer zauncho ticho dhei melloun gheunk koxi modot zali tem polloum-ia. Ti sangta: “Jehova mhozo khub mog korta, kallji gheta ani rakhonn korta. Toxench, tannem mhaka tacho mog kortolea lokam lagim haddlem. Hea soglea vixim niall kelolean, Jehova pasot mhozo mog anikui vaddlo ani niemit pioneer zauncho mhozo dhei melloun gheunk mhoji itsa ghott zali.”

6. Amchi itsa vaddounk ami anik kitem korunk zai?

⁶ Tumcho dhei melloun ghetlolean, tumkam kitem faido zatolo tea vixim chintat. Ami survatek uloilʼlea bhoinn Erika-k, ticho dhei melloun gheunk koxi modot zali tacher dhean diat. Ti sangta: “Porgottnni mittingek late ailolean, mhaka zaitem kitem chuktalem mhunn mhaka kollon ailem. Punn thoim begin hajir zalolean, hanv bhav-bhoinnank zap korunk ani tanchea sangata vell sarunk pavtolem aslem. Toxench, mittingek sanglolea suchounneantlean, anik bore  toren porgottnni korunk ani khuxalkai melloun gheunk, mhaka modot zatoli asli. Tor Erika-n tika kitem faido zatolo tacher dhean dilolean, ti aplo dhei melloun gheunk pavli. Tor ami kitem korunk zata? Tumi tumchem Bible vachop, vo magnneant sudharnni korcho dhei dovorla zalear, toxem kelolean Jehova sangata tumchi ixttagot koxi ghott zatoli tea vixim chintat. (St. 145:18, 19) Vo tumi ek Kristi gunn vaddouncho dhei dovorla zalear, toxem kelolean bhav-bhoinnam sangata tumcho sombond koso ghott zatolo tea vixim chintat. (Kol. 3:14) Tumi ek umkoch dhei kiteak melloun gheunk sodhtat, tea vixim aslolea soglea karonnanchem tumi ek list korunk zata kai? Uprant porot-porot tea list-acher nodor marat. Ami survatek uloilʼlo bhav Tomas sangta: “Mhozo dhei melloun gheunk mhaka jitlim chodd karonnam astat, titlo hanv anikui chodd vavr kortam.”

7. Julio ani tache bailek tancho dhei melloun gheunk koxi modot zali?

⁷ Tumcho dhei melloun gheunk tumkam urba ditolim, tanchea sangata vell sarat. (Mho. 13:20) Bhav Julio ani tachea bailen, porgottnnaranchi chodd goroz asa tea zagear vochon seva korunk dhei dovorlolo. Tor ho dhei melloun gheunk tankam koxi modot zali? Bhav mhunntta: “Amcho dhei melloun gheunk amkam urba ditolim, toslim ixttam ami vinchun kaddlim. Ani ami amchea dhei-a vixim tanche lagim uloitalim. Tanche modlea zaiteamnim oslech dhei melloun ghetlole. Taka lagon tim amkam boreo suchounneo diunk pavlim. Ami tharailʼlea pormonnem, soglem koxem cholta tea vixim tim amkam vella-vellar vichartalim, ani goroz tea vellar tim amkam urba ditalim.”

8. Amkam itsa asa zalearuch ami amcho dhei melloun ghetolim, oxem ami chintlem zalear kitem zatolem? (Chitr pasun polloiat.)

⁸ Khorem mhunnttlear, amchea jivitant osle dis astat, jednam amkam kitench korunk itsa asona. Punn hacho orth, ami amche dhei melloun gheunk kainch korunk xokonant, oxem kai? Na, toxem nhoi. Hem somzonk hea vixim chintat. Ek boat fuddem vochonk varea vorvim modot zata. Punn thodde dis nettan varem marta, ani thodde dis varench asona. Tor varem marina tednam to boat choloupi fuddem vochonk xokona, oxem kai? Na, toxem nhoi. Karonn thoddea boat-imnim motor astat ani thoddea boat-imnim ti tanddunk vhole vo dandde astat. Amchi itsa, ami tea vareak sor korunk zata. Thodde pavtti amcho dhei melloun gheunk, amkam khub itsa asta. Punn thodde pavtti amkam itsach asona. Tor amkam itsa asa zalearuch ami amcho dhei melloun ghetolim, oxem ami chintlem zalear, ami toxem kednanch korunk pavchimnant. Tea boat choloupea bhaxen, amkam itsa na tednam pasun, amcho dhei melloun gheunk ami anikui vatto sodhunk zai. Oxem korop sompem aschem na tem khorem. Punn ami amcho dhei melloun gheunk pavlim mhunn ami khuxal astolim. Tor ami kitem korunk zata tem zannam zaunchea poilim, ami eka mhotvachea prosnacher dhean dium-ia.

9. Jehovache sevent ami dovorlolo dhei melloun gheunk amkam itsa na zalear pasun, ami tacher vavr korit ravonk zai kai? Somzaiat.

⁹ Ami ap-khuxen ani khuxalkaien apli seva keloli  Jehovak zai. (St. 100:2; 2 Kor. 9:7) Tor amkam itsa na zalear pasun, Jehovache sevent ami dovorlole dhei melloun gheunk ami vavr korit ravonk zai kai? Hea vixim amkam apostl Pauluchem ek borem udharonn asa. Tannem mhunnttlem: “Mhoji kudd donddvonnun, gulama vori tika hanv domavun dhortam.” (1 Kor. 9:25-27, vers 27-acher aslolo study note polloiat) Jehova aplea thaun kitem opekxa korta tem korunk Pauluk itsa nasli zalear pasun, tannem apnnakuch force korun tem kelem. Tor Paulun aplea pasot jem kitem kelʼlem, tantunt Jehova khuxal zalo kai? Hoi. Hantunt kainch dubhav na. Ani tachea vavra pasot Jehovan taka inam dilo.—2 Tim. 4:7, 8.

10. Amkam itsa na zalear pasun ami dovorlole dhei melloun gheunk ami vavr kortat tednam amkam koso faido zata?

¹⁰ Heach bhaxen, Jehovache sevent dovorlole dhei melloun gheunk amkam itsa na zalear pasun, ami te melloun gheunk vavr kortat tednam, Jehova khuxal zata. Karonn ami tachea sevent jem kam kortat tem amkam avoddna zalear pasun, ami tachea moga pasot tem kortat mhunn to polloita. Ami oxem kelem zalear, tannem Pauluk besanvam dilim toxim, to amchea-i vavracher besanv ghaltolo. (St. 126:5) Ani Jehova amkam koxim besanvam dita tem ami polloitat tednam amchi itsa vaddonk xokta. Poland-ant ravpi Lucyna nanvachi ek bhoinn oxem sangta: “Thodde pavtti mhaka porgottnnek vochonkuch disona, khas korun hanv khub thokloli asta tednam. Tori astana, hanv porgottnnek voitam tednam, mhaka khub khuxalkai melltta.” Tor amkam itsa na tednam ami kitem korunk zata, tem ami fuddem polloum-ia.

11. Jehova amkam svotacher tabo dovrunk koso modot korunk xokta?

¹¹ Svotacher tabo dovrunk magnnem korat. Svotacher tabo asop mhunnttlear, aplea bhavnancher ani aplea korneancher tabo dovrop. Choddxe pavtti, vaitta thaun pois ravonk svotacher tabo dovrop ho gunn amkam dakhounk poddtta. Punn sarkem asa tem korunk pasun, amkam ho gunn gorjecho asa, khas korun, jednam tem kam kotthin asta vo tem korunk amkam itsa asona. Ugddas dovrat ki ho gunn povitr xoktechea follacho bhag zaun asa. Tor to tumchea bhitor vaddounk Jehova lagim povitr xokti magat. (Luk. 11:13; Gal. 5:22, 23) Ami poilim uloilʼlea bhav David-ak, chukonastana svotacho obheas korunk zai aslo. Tor magnnem kelolean taka koxi modot zali, tea vixim to sangta: “Svotacher tabo dovrunk mhaka modot kor mhunn hanv Jehova lagim magnnem korit ravlom. Tachea adaran hanvem svotacho obheas korunk bori manddavoll keli, ani chukonastana hanv to korit ravonk pavlom.”

12. Upodexok 11:4-ant dilʼlem totv amkam amche dhei melloun gheunk koxem modot korunk xokta?

¹² Soglem borem astolem tednanch tumi suru kortolim mhunn ravonakat. Hea sonvsarant soglem sarkem astolem, oxem kednanch zaunchem na. Ami oslea vellachi vatt polloit ravlear, ami amcho dhei ghoddie kednanch mellon gheunk pavchimnant. (Upodexok 11:4 vachat.) Dayniel nanvacho bhav oxem mhunntta: “Poristhiti ekdom bori asa, oxem kednanch zaina. Ami jednam kam korunk suru kortat, tednam poristhiti bori zata.” Toxench, ami faleam pasot kiteak ravchem nhoi, hea vixim Uganda-nt ravpi Paul nanvacho bhav anik ek karonn sangta: “Kotthin poristhiti aslear pasun ami jednam kam suru kortat tednam amcher besanvam ghalunk Jehovak ami sondhi ditat.”—Mal. 3:10.

13. Lhan-lhan dhei dovrun suru kelolean amkam koso faido zaunk xokta?

¹³ Lhan-lhan dhei dovrun suru korat. Ami dovorlolo dhei melloun ghevop ekdom kotthin, oxem amkam dista astolem. Tea pasot to melloun gheunk, amkam vavruch korunk disona zait. Tumkam-i oxem dista zalear, tumi lhan-lhan dhei dovrun suru korunk zata kai? Udharonnak, tumi ek Kristi gunn vaddouncho dhei dovorla zalear, tumi lhan-lhan vattamnim ho gunn dakhounk proitn korunk zata kai? Vo tumi akʼkho Bible vachpacho dhei dovorla zalear, tumi poilim to  thoddeach vella pasot vachunk suru korunk zata kai? Ami survatek uloilʼlim tea bhav Tomas-ak, ek vorsa bhitor Bible vachpacho tacho dhei melloun gheunk khub kotthin zatalem. To sangta: “Hanv begin-begin Bible vachun sompounk sodhtalom mhunn mhaka kollon ailem. Punn uprant hanvem porot suru kelem, ani hea pavtti hanv eka odheai-acho thoddo-so bhag vachtolom ani tacher niall kortolom mhunn hanvem tharailem. Oxem kelolean, Bible vachunk mhaka avddonk laglem.” Tomas-achi umed vaddli toxi, to anikui chodd vell Bible vachunk laglo. Ani oxe toren tannem akkʼho Bible vachun kaddlo. b

14. Koslea karonnank lagon amcho dhei melloun gheunk amkam kotthin zaunk xokta?

¹⁴ Punn dukhachem mhunnttlear, amchi itsa kitli-i ghott asum vo ami dovorlolo dhei melloun gheunk ami khub vavr kortat zalear pasun, amkam addkholleo ieunk xoktat. Udharonnak, “okosmat” zatat tea ghoddnneank lagon ami dovorlolo dhei melloun gheunk amkam ghoddie velluch mellona astolo. (Up. 9:12) Vo amchea oddchonneank lagon ami ghoddie niraxi zaunk xoktat ani amchean kainch korunk zaina, oxem amkam dista. (Mho. 24:10) Vo amchea opurnntaiek lagon ami chukeo korunk xoktat, jea karonnak lagon amcho dhei melloun gheunk amkam kotthin zaunk xokta. (Rom. 7:23) Vo ami thoklolim asonk xoktat. (Mt. 26:43) Tor oslea addkholleancho fuddo korunk amkam koxi modot zaunk xokta?

15. Addkholleo ietat hacho orth, tumi harlim oxem kai? Somzaiat. (Stotr 145:14)

¹⁵ Tumcho dhei melloun gheunk addkholleo ietat tednam tumi harlim oxem nhoi, mhunn ugddas dovrat. Amcho dhei melloun gheunk amkam porot-porot addkholleo ieunk xoktat mhunn Bible-ant sanglam. Punn ami Jehovachea modotin porot utthonk xoktat, oxem-i tantunt sanglam. (Stotr 145:14 vachat.) Ami poilim uloilʼlo bhav Philip sangta: “Hanv mhoje dhei melloun gheunk kitle pavtti chuklom tacher nhoi, punn te melloun gheunk hanvem porot kitle pavtti vavr  kelo tacher dhean ditam.” Toxench, ami poilim uloilʼlo to bhav David mhunntta: “Mhoje dhei melloun gheunk ietat teo addkholleo, hanv oddchonneo koxeo lekhina. Punn hanv Jehovacho kitlo mog korta tem dakhounk, heo sondheo mhunn hanv lekhtam.” Khorench, addkholleo aslear pasun ami amcho dhei melloun gheunk vavr kortat tednam, ami Jehovak manvota tem korunk sodhtat mhunn ami dakhoitat. Ani amcho vavr polloun Jehova khub khuxal zata.

16. Tumchea mukhar ietat tea addkholleam thaun tumi kitem xikonk zata?

¹⁶ Tumchea mukhar ietat tea adkholleam thaun tumi kitem xikonk zata tea vixim chintat. Ti addkholl kiteak aili tea vixim chintat ani tumkanch vicharat, ‘Hi addkholl porot iena zaunk hanvem kitem korunk zata?’ (Mho. 27:12) Thodde pavtti tumchea addkholleam thaun tumkam kollon ieunk xokta, ki tumi melloun gheunk xokonant, tosle dhei tumi dovorleat. Tumchea vixim oxench asa zalear, tumi khoreaninch to dhei melloun gheunk pavtolim kai na tea vixim porot chintat. c Tumi dovorlolo dhei tumi melloun gheunkuch xokonaslim zalear, tumi kainch valorachim nant oxem Jehova lekhchona.—2 Kor. 8:12.

17. Ami Jehovache sevent atam poriant kitem korunk pavleant tem ami kiteak ugddas dovrunk zai?

¹⁷ Jehovache sevent tumi kitem melloun gheunk pavlim tem ugddas korat. Bible sangta: “Dev onit korina . . . tumi kelam tem Tachean visrunk zaina.” (Heb. 6:10) Tor tumi pasun tem visorchem nhoi. Tumi dovorlole khoinche dhei tumi melloun gheunk pavlim, tem ugddas korat. Ghoddie tumi Jehova sangata ixttagot zoddlea, vo tache vixim dusreank sanglam, vo tumi bautizm ghetla astolo. Tumi vavr korun poilim dovorlole dhei melloun gheunk pavlim toxim, vavr korit ravlolean tumi atam dovorlolo dhei pasun melloun gheunk pavtolim.—Filp. 3:16.

18. Dhei melloun gheunk proitn kortana ami kitem ugddas dovrunk zai? (Chitr pasun polloiat.)

¹⁸ Ek boat choloupi apleak pavonk zai tea zagear pavta tednam khuxal zata. Teach bhaxen Jehovache modotin tumi dovorlole dhei tumi melloun gheunk pavtat tednam, tumi khuxal zatolim. Punn ugddas dovrat, ek boat choloupeak taka pavonk zai tea zagear pavonk zo provas korunk poddtta, tednam pasun to khuxal asta. Teach bhaxen, tumcho dhei melloun ghetana, Jehova tumkam koso modot korta ani besanvam dita tea vixim chintun khuxal zaiat. (2 Kor. 4:7) Ani tumi soddun dinant zalear, Jehova tumkam anikui besanvam ditolo.—Gal. 6:9.