1. Jehovan Abrahamak koslem mhotvachem lisanv xikoilem?

 ZAITIM vorsam poilim, Jehovan eka dutak uzar korun Abrahamak sanglem ki to Sodom ani Gomora xaracho nas korcho asa. Abrahamak Jehovacher ghott bhavarth aslo. Tori astana, Jehovachim him utram aikon to chintunk poddlo ani tannem vicharlem: “Khottea borabor promannik monxacho-i Tum khorench ibadd kortoloi? . . . Akʼkhe prithumecho Monsubidar nit korcho na?” Tednam Jehovan pasiensan aplea mogall ixttak ek mhotvachem lisanv xikoilem, jem zannam zalʼlean amkam pasun khub bhuzvonn melltta. Tem lisanv mhunnttlear, to nitivont munxancho kednanch nas korchona!​—Ut. 18:23-33.

2. Jehova lokancho neai korta tednam to sodanch sarkem tem korta ani doia dakhoita mhunn ami kiteak khatri dovrunk zata?

² Jehova lokancho neai korta tednam, to sodanch sarkem tem korta ani doia dakhoita mhunn ami kiteak khatri dovrunk zata? Karonn “Sorvespor kalliz polleta” mhunn Bible-ant sanglam. (1 Sam. 16:7) Khorem mhunnttlear, to dor eka ‘munxachem kalliz vollkhota.’ (1 Raz. 8:39; 1 It. 28:9) Toxench Jehovak asa titli zannvai anik konnankuch na. Tor, to ek umkoch nirnnoi kiteak gheta tem ami purnn toren somzonk pavchimnant. Tea pasot, apostl Paulun mhunnttlolem: “Tacheo vatto amkam somzonk zainant toxeo asat!”—Rom. 11:33.

3-4. Amchea monant kosle prosn ieunk xoktat, ani hea lekhant ami kitem polloitolim? (Juanv 5:28, 29)

 ³ Punn hem soglem zannam zaun pasun, amchea monant Abrahamak ailʼle tosle prosn ieunk xoktat. Ami ghoddie chintit: ‘Jehovan thoddeancho nas kelo, zoxem Sodom ani Gomorantlea munxancho. Tor tim porot jivont zatolim kai? ‘Dev jivont kortolo tea onitivont munxam’ modem tim-ui astolim kai?’​—D.I. 24:15.

⁴ Hem zannam zaunk jivontponna vixim ami kitem zannant tacher dhean dium-ia. “Jivit mellonk . . . jivont zatolim” ani ‘zhoddtti vo neai zaunk jivont zatolim,’ hea vixim halinch amchea somzonnent bodol zalʼlo. a (Juanv 5:28, 29 vachat.) Ani hea bodlavak lagon her vixoi-anchea somzonnent pasun bodol korunk poddla, jea vixim amkam hea ani fuddlea lekhant kollttolem. Tor poilim, Jehova jea toren neai korta tea vixim amkam kitem khobor na ani kitem khobor asa tem polloum-ia.

AMKAM KITEM KHOBOR NA?

5. Sodom ani Gomorant nas zalʼlea lokam vixim amchea adlea prokaxonamnim kitem sanglolem?

⁵ Jehovan onitivont mhunn neai kelʼlea lokanchem kitem zatolem tea vixim amchea adlea prokaxonamnim sanglolem asa. Oslim munxam, zoxem Sodom ani Gomorant nas zalʼlim tim fuddarak anik jivont zaunchimnant oxem ami chintʼtalim. Punn hea vixoi-acher anik bariksannen obheas ani magnnem kelea uprant, ami hem khatren sangonk zaina mhunn amkam kollon ailam. Kiteak?

6. Jehovan onitivont munxancho neai kelo tea vixim Bible-ant amkam koslim udharonnam asat, ani amkam kitem khobor na?

⁶ Jehovan onitivont munxancho neai kelo tea vixim Bible-ant zaitim udharonnam asat. Zoxem, Jehovan Noah-chea kallar buddtti haddli tednam fokot Noah-k ani tache familik soddun, Jehovan her sogleam munxancho nas kelo. Toxench Jehovan Izraelitkarank uzar korun, Bhasailʼlea Desant aslolea sat raxttranchea soglea lokancho nas kelo. Tea bhair, Jehovan eka dutak uzar korun, ekuch rati bhitor 1,85,000 Asiriechea soinikank jivexim marle. (Ut. 7:23; D.S. 7:1-3; Iz. 37:36, 37) Tor, hea lokam modlea dor ekleacho Jehovan sasnak nas kelo ani tantuntlo konnuch jivo zaunchona mhunn Bible spoxttponnim sangta kai? Na. Oxem ami kiteak mhunnonk zata?

7. Buddttent vo Kanan desant nas zalʼlea lokam vixim amkam kitem khobor na? ( Chitr polloiat.)

⁷ Ami atanch polloilʼlea udharonnamnim, tea dor eklea munxacho Jehovan kiteacher adarit neai kelo tem amkam khobor na. Toxench, tankam Jehova vixim xikonk ani poschatap korunk sondhi mellʼlli vo na tem-ui ami nokllo. Zoxem buddtte vixim sangtana, Bible-ant Noah-k “nitivontponn porgott korpi” mhunnttla. (2 Ped. 2:5) Punn ti vhoddli arkpett bandtana, Noah-n prithumer jietolea dor eka munxak porgottlem mhunn Bible-ant sangonk na. Toxench, Kanan desant nisonntton kelʼlea vaitt lokam modlea dor ekleak, Jehova vixim xikonk ani apli vaitt vagnnuk bodlunk sondhi mellʼlli vo na tem-ui amkam khobor na.

8. Sodom ani Gomorachea lokam vixim amkam kitem khobor na?

⁸ Sodom ani Gomorant nas zalʼlea lokam vixim kitem? Tea lokam modem, Lot nanvacho ek nitivont munis jietalo tem khorem. Punn Lotan thoim ravtolea soglea lokank porgottlem vo na tem amkam khobor na. Thoincho lok noxtto aslo. Punn tanchea modlea dor ekleak sarkem kitem ani chukichem kitem ti khobor asli kai? Ugddas korat, Lot-ager ailʼlea soireancho bolotkar korunk bhair zo zomo ektthaim zalʼlo, tanchea modem ‘zanntte toxech nenntte’ asle. (Ut. 19:4; 2 Ped. 2:7) Hacho orth, tantunt khub torne piraieche bhurge pasun asle, zankam  ghoddie borea-vaitta modem ontor khobor naslo. Tor tantuntlea konnankuch Jehova doia dakhouncho na ani jivont korchona mhunn ami khatren sangonk xoktat kai? Tea xarant dha pasun nitivont munis nant mhunn Jehovan Abrahamak sanglolem tem khorem. (Ut. 18:32) Tor thoincho lok onitivont aslo mhunn neai korun Jehovan tancho nas kelo. Punn “onitivont munxank Dev jivont kortolo” tednam, hea munxam modlo eklo-i jivo zaunchona mhunn ami khatren sangonk xoktat kai? Na. Ami khatren sangonk xokonant.

9. Solomona vixim amkam kitem khobor na?

⁹ Toxench, amkam Bible-ant oslea nitivont munxam vixim vachunk melltta, je uprant onitivont zale. Zoxem, Raza Solomon. Jehova vixim ani tachi bhokti koxi korchi tem to bore bhaxen zannam aslo. Ani Jehovan taka zaitim besanvam dilʼlim. Punn uprant Solomon khottea devanchi bhokti korunk laglo. Hea pasot Jehovak khub rag ailo ani tachea patkancho porinnam akʼkhea Izrael raxttrak xemboramnim vorsam porian bhogcho poddlo. Punn Solomon melea uprant, taka tachea “purvozam sangata purlo” mhunn Bible-ant sanglam. (1 Raz. 11:43, NW) Ani hea purvozam modem Jehovacho visvaxi sevok Raza David pasun aslo. (1 Raz. 11:5-9; 2 Raz. 23:13) Hea karonnak lagon to jivont zatoloch mhunn ami khatren mhunnonk xoktat kai? Hea vixim Bible kainch sangona. Punn thoddim ghoddie mhunnot ki “zo munis morta taka tachea patkantlean suttka melltta.” (Rom. 6:7) Hem khorem zaun asa. Punn hacho orth, mela to dor ek munis jivont zatolo oso nhoi. Karonn, ek munis melea uprant taka apxinch jivontponnacho hokʼk mellona. Khorem mhunnttlear, jivontponn, amchea mogall Deva koddlean ek dennem zaun asa. Ani to jea munxak sasnak apli bhokti korchi sondhi diunk sodhta, takach to hem dennem dita. (Job 14:13, 14; Ju. 6:44) Tor Solomonak hem dennem mellttolem kai? Hacho zobab fokot Jehova zannam. Punn ami khatri dovrunk zata ki Jehova sodanch sarkem tem kortolo.

AMKAM KITEM KHOBOR ASA?

10. Munxancho neai korchea vixim Jehovak koxem dista? (Ezekiel 33:11) (Chitr pasun polloiat.)

¹⁰ Ezekiel 33:11 vachat. Munxancho neai korchea vixim apleak koxem dista tem Jehova sangta. Jehova vixim Ezekielan boroilem toxem, apostl Pedrun pasun boroilem. Tannem mhunnttlem: “Konnanchoch nas zalʼlo [Jehovak] naka.” (2 Ped. 3:9) Tor Jehova bexttoch konnanchoch sasnak nas korina mhunn amkam khobor asa. Punn doia dakhounk karonn asa zalear, to doia dakhoita. Hem zannam zalʼlean amkam kitli bhuzvonn melltta nhoi!

11. Konn jivont zaunchimnant, ani ami toxem kiteak mhunnonk zata?

¹¹ Punn thoddim munxam jivont zaunchimnant mhunn amkam khobor asa. Karonn Bible-ant amkam oslea thoddea munxanchim udharonnam mellttat. b Zoxem, Judas Iskariot jivont zaunchona mhunn Jezun sanglolem. (Mk. 14:21; Ju. 17:12 ani tacho study note pasun polloiat.) Karonn Judas zannam zaun Jehova ani tachea Puta add gelo. c (Mk. 3:29) Toxench Jezucho virodh kortale te thodde dhormik fuddari jivont zaunchenant mhunn Jezun sanglolem. (Mt. 23:33; Ju. 19:11 ani “the man” ho study note polloiat.) Tea bhair, apostl Paulun sanglolem ki poschatap korinant tim dhorm broxtt munxam jivont zaunchimnant.​—Heb. 6:4-8; 10:29.

12. Jehovache doie vixim ami kitem zannant? Udharonnam diat.

¹² Punn ami peregraf 10-nt polloilʼlem toxem, Jehova doien bhorlolo Dev ani “konnachoch  nas zalʼlo taka naka.” Tor gombhir patkam kelʼlea thoddeank, Jehovan koxi doia dakhoili tem ugddas korat. Zoxem, Raza Davidan gombhir patkam kelʼlim. Tannem pordvar kelʼlo ani dusreacho jiv kaddlolo. Punn tannem poschatap kelo tednam, Jehovan taka doia dakhoun bhogxilo. (2 Sam. 12:1-13) Toxench, Raza Manasen pasun tachea jivitant ekdom vaitt kamam kelʼlim. Tori astana tannem poschatap kelo tednam, Jehovan taka doia dakhoun bhogxilo. (2 It. 33:9-16) Tor doia dakhounk karonn asa tednam, Jehova doia dakhoita mhunn hea udharonnantlean amkam kollon ieta. Ani oslea munxamnim apnnem gombhir patkam kelʼlim mhunn vollkhon ghetlem ani poschatap kelo dekhun, Jehova tankam jivont kortolo mhunn ami mhunnonk zata.

13. (a) Jehovan Ninevechea lokank kiteak doia dakhoili? (b) Jezun uprant Ninevechea lokam vixim kitem sanglem?

¹³ Jehovan Ninevechea lokank pasun doia dakhoili mhunn ami ugddas korunk zata. Jehovan Jonasak sanglolem: “Tanchem noxtteponn Mhoje mukhar choddun ailam.” Punn hea lokamnim poschatap kelo tednam, Jehovan tankam doia dakhoun bhogxilim. Hem polloun Jonas provadi ekdom ragar zalo. Punn tea vellar, Ninevechea lokank “khoicho uzvo hat ani khoicho davo hat mhonn kollona” hem Jehovan Jonasachea ugddasak haddlem. (Jon. 1:1, 2; 3:10; 4:9-11) Ani Jehova sarkem tem korta ani doia dakhoita mhunn xikounk, uprant Jezun pasun Ninevechea lokanchem udharonn uzar kelem. Tannem sanglem ki poschatap kelʼle Nineveche lok “zhoddttechea vellar . . . uttʼttole.”—Mt. 12:41.

14. Ninevecho lok ‘zhoddtti zaunk jivont zatolo’ hacho orth kitem?

¹⁴ Tor Nineveche lok “zhoddttechea vellar . . . uttʼttole,” hacho orth kitem? Meleant tim fuddarak ‘jivont zatolim ani tanchi zhoddtti vo neai zatolo’ mhunn Jezun xikoilʼlem. (Ju. 5:29) Hea vellar, to aplea Ek Hozar Vorsanche Razvottke vixim uloitalo, jednam “nitivont ani onitivont” lok jivont zatole. (D.I. 24:15) Tor onitivont lokanchi “zhoddtti zaunk tim jivont zatolim.” Hacho orth, Jehova ani Jezu tanche vagnnukecher dhean ditole ani tankam melltta ti xikounn tim apnnaitat vo na, tache adarit tancho neai kortole. Tor jivont zalolo Ninevecho ek munis Jehovachi bhokti korunk nakarta zalear, Jehova tacho nas kortolo. (Iz. 65:20) Punn jim konn visvaxiponnan tachi  bhokti korunk vinchun kaddttat, tankam to sasnak jieunchi sondhi ditolo!—Dan. 12:2.

15. (a) Sodom ani Gomorantlo konnuch jivont zaunchona oxem ami kiteak mhunnonk zaina? (b) Judas 7-antlea utrancho orth kitem? (“ Judasachea Utrancho Orth Kitem Aslo?” hem boks polloiat.)

¹⁵ Jea lokamnim Jezuk nakarlo ani tachi xikounn manun gheunk na, tancho neai “Zhoddttechea Disa” Sodom ani Gomorachea lokam poros chodd khoraien zatolo mhunn Jezun sanglem. (Mt. 10:14, 15; 11:23, 24; Luk. 10:12) Tor to kitem mhunnonk sodhtalo? Jezu fokot itlench mhunnonk sodhtalo kai ki tachea tempa voile lok, Sodom ani Gomorachea lokam poros paxtt asat? Ugddas dovrat ki Nineveche lok, “Zhoddttechea Disa” uttʼttole mhunn tannem sanglolem. Tor Ninevechea, ani Sodom ani Gomorachea lokam vixim Jezun jem sanglem, tem khorench zatolem oxem dista. Ninevechea lokamnim, Sodom ani Gomorachea lokam bhaxen vaitt kamam kelʼlim. Punn tankam poschatap korunk sondhi asli. Ami hem-ui ugddas dovrunk zai ki “zannim vaitt kamam keleant tanchi zhoddtti zaunk tim jivont zatolim.” (Ju. 5:29) Tor Sodom ani Gomorantlo thoddo lok tori jivont zatolo oxem dista. Ani tankam Jehova ani Jezu Krista vixim xikounchi sondhi amkam ghoddie mellot!

16. Khoinchea-i munxak jivont korchea vixim Jehova koso nirnnoi ghetolo mhunn ami zannant? (Jeremias 17:10)

¹⁶ Jeremias 17:10 vachat. Hea versant, amkam kitem khobor asa tem sanglam. Thoim Jehova dor eka munxachea ‘kallzacho thav gheta ani mon topasun kaddtta’ mhunn sanglam. Tor konnank jivont korcho tea vixim nirnnoi ghetana, to ‘zonn-ekleachea korneam pormonnem tankam mozuri ditolo.’ Oxem kortana to aplea nitichea dorjeank thir ravtolo, punn ek borem karonn aslear doia dakhoitolo. Tor ek munis jivont zaunchona mhunn Bible-ant sanglam zalearuch, to jivont zaunchona oxem ami mhunnonk zata.

‘AKʼKHE PRITHUMECHO NEAI KORPI NIT’ KORTOLOCH!

17. Moron geleant tea munxanchem kitem zatolem?

¹⁷ Adanv ani Even Soitanak sangat diun Jehovachi adnea moddli tednam thaun, koroddamnim lok morot gela. Ani “moronn” ekdom nixttur “dusman” zaun asa. (1 Kor.  15:26) Punn moron gelʼlea soglea munxank koslo tori bhorvonso asa kai? Visvaxiponnan Jezu Kristacho pattlav kortolea 1,44,000 zannank sorgar omor jivit mellttolem. (Prok. 14:1) Toxench, ‘Dev jivont kortolo tea nitivont munxam’ modem, Jehovacho mog kortalim toslim zaitim visvaxi munxam astolim. Ani tim Kristachea Ek Hozar Vorsanchea Razvottkechea vellar, toxench nimanne porikxe vellar Jehovak visvaxi ravlim zalear, tankam hea prithumer sasnak jieunk mellttolem. (Dan. 12:13; Heb. 12:1) Tea bhair, “zannim vaitt kamam keleant” ani zankam Jehovachi bhokti korchi sondhi mellonk na, tea “onitivont” munxank pasun Jehova 1,000 vorsanchea vellar jivont kortolo. Tea vellar, tankam apli vagnnuk bodlun visvaxiponnan Jehovachi bhokti korunk sondhi mellttoli. (Luk. 23:42, 43) Punn thoddim munxam itlim noxttim aslim ki tim Jehovachea add kam korit ravlim. Tea pasot, apunn tankam jivont korchoch na mhunn Jehovan nirnnoi ghetla.​—Luk. 12:4, 5.

18-19. (a) Moron geleant tea munxam vixim Jehova sarke toren neai kortolo mhunn ami kiteak khatri dovrunk zata? (Izaias 55:8, 9) (b) Ami fuddlea lekhant kitem polloitolim?

¹⁸ Jehova neai kortolo tednam, to sodanch sarkem tench kortolo mhunn ami purnn khatri dovrunk zata kai? Hoi! Abrahaman sanglolem toxem ‘akʼkhe prithumecho Neai Korpi’ Jehova Dev poripurnn, zannvaien bhorlolo ani doiall zaun asa. Tannem aplea Putak proxikxonn dilam ani sogleancho neai korunk zobabdari dilea. (Ju. 5:22) Jehova ani Jezu munxanchea kallzant kitem asa tem zannant. (Mt. 9:4) Tor te sodanch sarki ‘nit’ kortole mhunn ami khatri dovrunk zata!

¹⁹ Jehovacher ani to gheta tea soglea nirnnoi-ancher visvas dovrunk ami nichov korum-ia. Neai korunk ami nhoi, punn fokot Jehova Dev purto asa. (Izaias 55:8, 9 vachat.) Ani tacho Put Jezu zo amcho Raza zaun asa, to aplea Bapai bhaxenuch doia dakhoun sarki nit kortolo. Tor nit korpachem ami tancher soddum-ia. (Iz. 11:3, 4) Punn vhodd sonkoxttachea vellar, Jehova ani Jezu koxe toren neai kortole tea vixim amkam kitem khobor na ani kitem khobor asa tem ami fuddlea lekhant polloum-ia.