JIVITACHI KANNI
“Hanv Jehova Pasot Vavrunk Sodhtalo”
AMI Suriname-achea ranant, Granbori ganva lagim eka lhanxea zomeak mellonk gelʼlim. Thoinchean bhair sorlea uprant, ami ek lakddache boat-int boslim, ani ami Tapanahoni Nodint, khoddpancher udok vegan voita tea zagear pavlim tednam boat-ichea motor-acho ek bhag eka fatrak apttolo ani boat-i borabor ami udkant buddlim. Tea vellar, mhojem kalliz dhoddʼddoddunk laglem. Hanv itlim vorsam porian sorkittachi dekhrekh korpi mhunn kam kortalo ani boat-imnim provas kortalo. Punn mhaka azun porian penvonk kollonaslem.
Tea uprant kitem zalem tem sangchea poilim, hanv purnn vellachi seva koso suru korunk pavlo tem tumkam sangta.
Hanv 1942-ant, Caribbean-eantlea, Curaçao nanvachea eka sobit zunvear zolmolʼlom. Mhozo daddy Suriname desantlo. Punn to kamak lagon hea zunvear ravonk ailʼlo. Hanv zolmochea sumar don vorsam poilim, to Curaçao-ant bautizm gheupi poilea sakxeam modlo eklo zaun aslo. a Dor sumanak Bible-acho obheas korunk amkam vaz ietalo. Punn amcho daddy to kednanch chukoinaslo. Hanv 14 vorsancho zalo tednam mhojea zanntte ajechi kallji gheunk, mhozo daddy amche familik gheun porot Suriname-ant ailo.
BORE IXTT ASLOLEAN MHAKA MODOT ZALI
Suriname-ant, hanvem sobhentlea oslea tornnatteam sangata ixttagot keli jim urben Jehovachi seva kortalim. Tim piraien mhojea poros thoddim vorsam vhodd aslim ani tim niemit pioneer seva kortalim. Tankam porgottnnent mellʼllolea onubhovam vixim tim mhaka sangtalim tednam tim Jehovache sevent kitlim khuxal asat tem hanv pollounk xoktalo. Mittinge uprant, Bible-antlea vixoi-ancher ulounk amkam khub avoddttalem. Ani thodde pavtti, ami bhair boson mollbar noketram polloun eka-meka lagim uloitalim. Mhojea ixttamnim mhaka hanv mhojea jivitant kitem korunk sodhta, tem mhunnttlear, hanv Jehova pasot vavrunk sodhta, hem zannam zaunk modot keli. Tor 16 vorsanche piraier hanvem bautizm ghetlo. Ani 18 vorsanche piraier hanvem niemit pioneer seva suru keli.
HANV ZAITIM MHOTVACHIM LISANVAM XIKLO
Paramaribo-nt hanv pioneer seva kortalo tednam
Pioneer zalolean hanv zaitim lisanvam xiklo, jea vorvim purnn vellachi seva kortana mhaka modot zali. Udharonnak, dusreank proxikxonn divop kitlem mhotvachem tem hanv survatek xiklo. Hanvem pioneer seva suru keli tednam Willem van Seijl nanvachea eka mixinori bhavan mhaka proxikxonn dilem. b Tannem mhaka sobhecheo zobabdari koxeo samballcheo tem xikoilem. Hea proxikxonnachi mhaka kitli goroz asli tem tea vellar mhaka kollonk na. Rokddench, fuddlea vorsa mhaka ek khas pioneer mhunn nemlo. Ani uprant, sobhe thaun pois, Suriname-achea ranamnim ravtolea bhav-bhoinnanchea lhan-lhan zomeamnim hanv fuddakar gheunk laglo. Khorench, Willem-a sarkea bhavamnim mhaka proxikxonn dilem mhunn hanv khub upkari! Tednam thaun tanchi dekh gheun dusreank proxikxonn diunk hanv vell kaddunk laglo.
Hanv xiklo ti dusri vost mhunnttlear, ek sadem jivit jievop ani manddavollin kam korop khub gorjechem. Dor eka mhoineache survatek, hanv ani mhojea sangata khas pioneer seva kortalo to bhav, ieta tea sumanamnim amkam khoinchea vostunchi goroz poddttoli tem tharaitale. Uprant, amchea modlo eklo ranantlean lamb provas korun xarant voitalo, ani tharailʼlem tem gheun ietalo. Amcho khorch bagounk dor mhoineak amkam mellttale te poixe ani ami haddloleo vostu mhoinobhor pavonk, ami teo samballun uzar korunk zai asleo. Karonn amkam gorjecheo vostu unneo poddleo zalear, ami tea ranant khoim mhunn sodhunk voitole asle! Tor tornnattponnar, hanv ek sadem jivit jieunk ani manddavollin kam korunk xiklo dekhun, hanv mhojem soglem dhean Jehovachea kamacher dovrunk pavlo.
Hanv xiklo ti tisri vost mhunnttlear, ami lokank tanche mai-bhaxen xikoitat tednam tacho faido zata. Hanv lhanponnim thaun Dutch, English, Papiamento, ani Suriname-ant choddso lok uloita ti bhas, ti mhunnttlear, Sranantongo (hea bhaxek Sranan pasun mhunnttat), heo bhaso ulounk xiklo. Punn Suriname-ant ravpi lokanchea mai-bhaxen ami tankam porgottnni kortale tednam tim aikonk umed dakhoitalim mhunn hanvem polloilem. Tancheo thoddeo bhaso ulounk mhaka khub kotthin zalem, zoxem Saramaccan bhas. Karonn hea bhaxent, svor bodolʼlolean utrancho orth samkoch bodoltalo. Lokanche mai-bhaxen tankam porgott korunk mhaka khub vavr korunk poddlo tem khorem. Tori astana hanv khub khuxal! Karonn oxem kelolean hanv anikui zaitea lokank sot xikounk pavlo.
Thodde pavtti lokam lagim tanche mai-bhaxen uloitana, hanvem mhojich loz korun ghetli. Udharonnak, ek pavtti Saramaccan uloupi mhojea Bible vidʼdheartheache pottant dukhtalem. Tor hanv taka tem koxem asa mhunn vicharunk sodhtalo. Punn tem vicharche bodlek, hanvem taka tem gorbest asa kai mhunn vicharlem. Hanvem oxem kelem tednam taka-i loz zali mhunn dubhav na. Punn itleo chuki korun pasun, lokam lagim tanche mai-bhaxen ulovop hanvem kednanch soddun diunk na.
HANV ANIKUI ZOBABDAREO SAMBALLUNK LAGLO
1970-ant, mhaka sorkittachi dekhrekh korpi mhunn nemlo. Tea vorsa, Suriname-achea ranant ravpi lokanchea zaitea lhan-lhan zomeank, hanvem “Visiting the World Headquarters of Jehovah’s Witnesses,” ho slide program dakhoilo. To dakhounk mhaka ani thoddea bhavank nodintlean eke lamb lakddache boat-int provas korunk poddlo. Amchea boat-int, ek generator, gasoline-acho cylinder, petrol-iche dive ani slide dakhounchim sadhonam aslim. Thoim pavlea uprant ami teo sogleo vostu gheun ranantlean to program dakhounk zai thoim cholon voitale. Thoim ravpi lokank he program kitle avoddttale tem mhaka azun porian bore bhaxen
ugddas asa. Tankam Jehova vixim ani Jehovache prithumer aslolea songottnne vixim hanv xikounk pavlo mhunn hanv khub khuxal! Oxem korunk zaito vavr laglo tem khorem. Punn hea vorvim dusrim Jehovachea sangata ixttagot korunk pavlim tem polloun mhaka khub khuxalkai mellʼlli.TIN PODDANCHI DORI
Setembr 1971-ant Ethel ani hanv kazar zalim tednam
Ankvar ravon Jehovachi seva korop sompem aslem mhunn hanv zannam aslo. Tori astana hanv kazar zaunk sodhtalo. Tor mhojea sangata ranant ravon khuxalkaien purnn vellachi seva kortolem toslem ek cheddum hanvem Jehova lagim maglem. Eka vorsa uprant, Ethel nanvachem, khas pioneer seva korpi eke bhoinnik hanv date korunk laglo. Tem kotthin poristhitint pasun, Jehova pasot khub vavr korunk toiar aslem. Tornnattponnar thaun Ethel, apostl Paulu bhaxen zaunk sodhtalem. Tem porgottnnechea kamant apleachean zata tem soglem korunk sodhtalem. Ami Setembr 1971-ant kazar zalim ani rokddench sorkittachem kam korunk laglim.
Ethel-achi famil titli girest nasli ani tanche lagim zaiteo vostu nasleo. Hea pasot tem mhojea sangata ranant bore bhaxen ravonk pavlem. Udharonnak, ami ranant aslolea sobhank bhett ditalim tednam ami chodd vostu vhoronaslim. Ami nodint amche kopdde dhutalim ani nhavtalim. Toxench, bhav-bhoinnam amkam jem kitem vaddttalim tem ami jevtalim, zoxem iguana ani piranha, vo tim ranant dhortalim tem khoinchem-i zonvar vo nodint dhortalim tem khoinchem-i nustem. Boxeo nasleo tednam ami kelleanchea panar jevtalim ani aidonam naslim tednam ami amchea hatamnim jevtalim. Tor Jehovachi seva kortana, Ethel ani hanvem je teag kele tea pasot ami ek ghott tin poddanchi dori zaunk pavlim. (Up. 4:12) Ani he onubhov amkam ekdom chodd moladik!
Ek dis ranant aslolea bhavank mellon ami porot ietalim tednam hanvem survatek sangloli ti ghoddnni ghoddli. Tem mhunnttlear, khoddpancher udok vegan voita tea zagear ami pavlim tednam amchi boat okosmat udkant buddli ani rokddich porot voir aili. Ami life-jacket ghatloli dekhun ami soglim
boat-intuch urlim. Punn amche akʼkhe boat-int udok bhorlem. Tor amchea jevnnachea aidonamnim aslem tem ami udkant uddoilem, ani tim aidonam uzar korun ami boat-intlean udok bhair kaddlem.Punn atam amche lagim jevunk jevonn naslem. Tea pasot, ami nustem dhorunk laglim. Punn nustem pasun amkam mellona zalem. Tor amkam tea disachem jevonn di mhunn ami Jehova lagim maglem. Magnnem kelea uprant rokddench, amche modlea eka bhavan, nustem dhorunk ghori ghatli ani tache ghoriek itlem vhoddlem nustem laglem ki tea rati ami panchui zannam pottbhor jevun dhadoxi zalim.
HANV EK GHOV, BAPUI ANI SORKITTACHI DEKHREKH KORPI ZALO
Panch vorsam sorkittachem kam kelea uprant, Ethel ani mhaka, ami chintukuch nasli tosli khobor mellʼlli. Tem mhunnttlear, amkam bhurgem zolmochem aslem. Hem aikon hanv ekdom khuxal zalo. Punn hea pasot amchea jivitant fuddarak koslo bodol zatolo tem hanv noko aslo. Amchean zata zalear, purnn vellachi seva korit ravonk amkam khub itsa asli. Uprant 1976-ant amcho put Ethniël zolmolo. Ani oddez vorsam uprant, amcho dusro put Giovanni zolmolo.
1983-ant Tapanahoni Nodint hanv eka bautizmak hajir zalʼlo tednam. Hi nodi Suriname-achea udentek aslolea Godo Holo-chea lagim asa
Tea vellar Suriname-ant goroz asli dekhun, xakha ofisan mhaka sorkittachi dekhrekh korpi mhunn kam korit ravonk dilo. Amche put khub lhan asle ani tednam mhaka dilʼlea sorkittant thoddeoch sobha asleo. Tor dor mhoineak hanv thoddea sumanam pasot sorkittachi dekhrekh korpi mhunn kam kortalo, ani uprant, thoddea sumanam khatir hanv mhojea sobhent pioneer mhunn seva kortalo. Sorkittachem kam korunk ami ravtalim thoim laginch aslolea sobhamnim mhaka dhaddttale tednam Ethel ani mhoje put mhojea sangata astale. Punn ranamnim aslolea sobhamnim ani sorkitt zomatimnim hanv seva korunk voitalo tednam hanv ekttoch voitalo.
Sorkittachem kam kortana, pois aslolea sobhank bhett diunk, hanv choddxe pavtti boat-in provas kortalo
Mhaka asloleo zobabdareo bore bhaxen samballunk mhaka ek manddavoll korchi poddli. Dor sumanak ami chukonastana kuttumbik bhokti kortalim. Ani hanv ranant aslolea sobhenk bhett diunk voitalo tednam bhurgeam sangata Ethel kuttumbik bhokti kortalem. Punn choddxe pavtti ami kortat tem soglem sangata mellon ek famil zaun korunk proitn kortalim. Toxench, amchea bhurgeam sangata ami monoronjonant pasun vell sartalim. Ami game-i khellttalim vo amchea ghora lagim aslolea sobit zageancher bhonvonk voitalim. Hanv choddxe pavtti ratcho boson sobhe sombondit aslolim kamam kortalo. Ani Ethel, Mhonnʼnneo 31:15-nt sanglole bore baile bhaxen sodanch fatodder uttʼtthalem. Karonn amche bhurge iskolak voiche poilim ami sangata mellon chav pilolim ani dor disachem vers vachlolem taka zai aslem. Ani Jehovan dilʼleo zobabdareo samballunk mhaka modot korta tosli bail tannem mhaka dilea mhunn hanv Jehovacho khub upkari!
Avoi-bapui zalʼlean, amchea bhurgeamnim Jehovacho ani porgottnnechea kamacho mog korunk tankam modot korunk ami khub vavr kelo. Karonn tannim purnn vellachi seva kelʼli amkam zai aslem. Punn hem tannim ap-khuxen kelʼlem amkam zai aslem. Purnn vellachi seva kelolean tankam kitli khuxalkai mellttoli tem ami tankam sodanch sangtalim. Toxench, hea kamant oddchonneo aslear pasun, Jehovan ek famil zaun amkam koxi modot kelʼli ani amkam koxim besanvam dilolim tacher dhean diunk ami tankam modot kortalim. Tea bhair, ami amchea putank Jehovak aplea jivitant poilea zagear dovortat toslea Sakxeam sangata ixttagot korunk modot keli.
Mhojea familik posunk hanvem sodanch mhojean zata tem soglem kelem ani Jehovan amcheo sogleo gorzo purnn keleo. Ankvar astana, hanv Suriname-ant khas pioneer mhunn seva kortalo tednam gorjecheo vostu mellonk hanvem poixe samballun dovrunk zai mhunn hanv xiklo. Punn hem korun pasun thodde pavtti amkam goroz tem soglem mellonaslem. Punn tea vellar Jehovan amkam modot keli. Udharonnak 1986 tem 1992 meren, Suriname-ant zhuz zalem tednam thodde pavtti amkam gorjecheo vostu mellonk pasun kotthin zatalem. Punn tea vellar pasun Jehovan amkam goroz tem mellonk modot keli.—Mt. 6:32.
MHOJEA JIVITA VIXIM HANV CHINTʼTA TEDNAM
Davea thaun uzvea vatten: Hanv ani mhoji bail, Ethel
Amcho vhoddlo put, Ethniël, ani tachi bail, Natalie
Amcho put Giovanni ani tachi bail, Christal
Amchea akʼkhea jivitant, Jehovan sodanch amchi kallji ghetli, amkam khuxal dovorlim ani amche lagim asa tantunuch dhadoxi ravonk amkam modot keli. Toxench, amchea bhurgeank Jehovache sevent dhei dovrunk ami modot korunk pavlim mhunn ami khub khuxal. Te pasun aiz purnn vellachi seva kortat tem polloun ami khub sontostat. Amche dogui put, Ethniël ani Giovanni, aiz ami Raj Porgottnnarank Kors mhunnttat tea korsache graduate zaun asat. Ani atam tem dogui tanchea bailam sangata Suriname-achea xakha ofisant seva kortat.
Ethel ani hanv atam zannttim zaleant. Tori astana khas pioneer-am zaun ami Jehovachea sevent vavr korit asat. Khorem mhunnttlear, ami itlim bizi asat ki hanv azun porian penvonk xikonk na! Punn mhaka koslench dukh na. Karonn aiz hanv mhojea jivita vixim niallttana, tornnattponnar purnn vellachi seva korunk ghetlolo nirnnoi sogleam-von boro nirnnoi aslo mhunn mhaka kainch dubhav na!
b Willem van Seijl-achi jivitachi kanni, “Reality Has Exceeded My Expectations,” Otumbr 8, 1999-achea, Zagrut Ravat! masikent chhaploli asa.