1. Ami Jehovachea lagim sorlolim taka zai mhunn amkam koxem kolltta?

 JEHOVA amkam aplea lagim soronk apounnem dita. (Jak. 4:8) To fokot amcho Devuch nhoi punn amcho Bapui ani Ixtt zaun asa. Ami tache lagim magnnem kortat tednam to amchem aikota, ani oddchonneanchea vellar amkam modot korta. Toxench, aple songottnne udexim to amkam xikoita ani amchi rakhonn korta. Punn ami Jehovak koxim lagim soronk xoktat?

2. Ami Jehovak lagim koxem soronk zata?

² Magnnem korun, Bible vachun ani tacher niall korun ami Jehovak lagim soronk xoktat. Ami oxem kortat tednam Jehova pasot amcho mog ani upkariponn vaddttolem. Toxench, Jehovachem aikonk ani taka favo ti vakhannʼnni diunk ami fuddem sortolim. (Prok. 4:11) Tor ami Jehova Deva vixim jitlim chodd zannam zatolim, titloch tacher ani to amkam modot korunk uzar korta tea songottnnecher amcho visvas vaddttolo.

3. Soitan amkam Jehova koddlean pois vhoronk koso proitn korta, punn Jehovak ani tache songottnnek kednanch soddina zaunk amkam koxi modot zatoli? (Stotr 31:13, 14)

³ Punn Soitan amkam Jehova koddlean pois vhoronk khub vavr korta. Ani khas korun, amkam oddchonneancho fuddo korunk poddtta, tednam to oxem korta. To sovkas-sovkas korun Jehovacher ani tache songottnnecher aslolo amcho visvas moddunk proitn korta. Ani hem ami zannant dekhun ami Soitana koddlean amchi rakhonn korunk zata. Amcho bhavarth ghott asta ani ami Jehovacher purnn toren visvas dovortat tednam ami taka ani tache songottnnek kednanch soddchimnant.—Stotr 31:13, 14 vachat.

4. Ami hea lekhant kitem polloitolim?

⁴ Hea lekhant Soitanachea sonvsarantlean ietat tosleo tin oddchonneo ami polloitolim, jea vorvim Jehova ani tache songottnnecher amcho visvas unno zaunk xokta. Tor hem koxem zaunk xokta, ani Soitanachea hea fasant poddona zaunk ami kitem korunk zata tem ami zannam zaum-ia.

5. Amcher ietat tea oddchonneank lagon Jehova ani tache songottnnecher amcho visvas unno koso zaunk xokta?

⁵ Thodde pavtti, amkam oddchonneancho fuddo korunk poddtta. Zoxem, amchi famil amcho virodh korunk puro, vo ami amchem kam hogddaunk puro. Amcher osleo oddchonneo ietat tednam Jehova ani tache songottnnecher amcho visvas koso unno zaunk xokta? Heo oddchonneo amkam khub temp porian sosunk poddttat tednam ami niraxi zaunk xoktat vo amcho bhorvonso soddun diunk xoktat. Ani Soitan hich sondhi uzar korun Jehova amcho mog korina ani hem soglem Jehova ani tache songottnnek lagon zata mhunn amchea monant dubhav ghalta. Ejiptant aslolea thoddea Israelitkarank oxench kitem ghoddlem. Jehovan tankam Ejiptantlean soddounk, Moizesak ani Aaronak nemleat mhunn survatek tannim visvas dovorlo. (Sutt. 4:29-31) Punn uprant, Faraoh tankam anikui tras korunk laglo tednam te tras tancher Moizesak ani Aaronak lagon aileat mhunn tannim tancher boglantt ghatlem. Tannim mhunnttlem: “Faraoh ani tachea opxalam mukhar, tumi amkam khala ghaleat ani amkam marunk, tanchea hatant tumi tolvar dilea.” (Sutt. 5:19-21) Tor Devachea visvaxi sevokancheruch tannim boglanttam ghatlim. Hem kitlem dukhachem zaun aslem nhoi! Tor tumi khub temp porian oddchonneancho fuddo kortat zalear, Jehova ani tache songottnnecher tumcho visvas hogddaina zaunk tumi kitem korunk zata?

6. Amcher ietat tea oddchonneancho fuddo korchea vixim provadi Habakuka thaun ami kitem xiktat? (Habakuk 3:17-19)

⁶ Amchea kallzant kitem asa tem ami Jehovak magnneant sangonk zai, ani to amkam tenko ditolo mhunn tacher patieun ravonk zai. Provadi Habakukachea jivitant zaiteo oddchonneo aileo. Eka vellar, Jehovak apli kallji asa kai na mhunn to dubhavlo. Tor apleak koxem bhogta tem tannem Jehovak magnneant sanglem. Tannem mhunnttlem: “Kedna porian, Sorvespora, Tuzo adar magum, ani Tum aikonastana ravtoloi? . . . Kiteak mhonn Tum zulumxai sostai?” (Hab. 1:2, 3) Ani Habakukan kallzantlean kelʼlea magnneacho Jehovan zobab dilo. (Hab. 2:2, 3) Jehovan aplea lokank koxim salvar kelim tacher Habakukan niall kelo tednam to porot khuxal zaunk pavlo. Toxench Jehova tachi kallji gheta, ani tacher ailʼle khoinche-i tras sosunk modot kortolo mhunn Habakukak khatri mellʼlli. (Habakuk 3:17-19 vachat.) Tor ami kitem xiktat? Amkam koslea-i oddchonneancho fuddo korunk poddtta tednam amkam koxem bhogta tem ami Jehovak magnneant sangonk zai, ani to amkam tenko ditolo mhunn tacher patieun ravonk zai. Ami oxem kortat tednam amcher ietat te tras sosunk Jehova amkam goroz ti ghottai ditolo mhunn ami khatri dovrunk zata. Ani Jehova amkam koso tenko dita tem ami polloitat tednam tacher amcho bhavarth anikui vaddttolo.

7. Shirley-chea soireamnim Jehovacher ticho visvas moddunk koso proitn kelo, punn Jehovacher aslolo aplo visvas ghott dovrunk Shirley-k koxi modot zali?

⁷ Jehovak lagim ravonk amkam modot kortat teo sogleo vostu ami korit ravonk zai. Oxem kelolean, Papua New Guinea-nt ravpi, Shirley nanvache eke bhoinnik, tika ailolea trasancho fuddo korunk koxi modot zali tem polloum-ia. b Tea bhoinnichi famil ekdom gorib asli ani thodde pavtti tankam disachem ek jevonn mellonk pasun khub vavr korcho poddttalo. Tichea eka soirean, Jehovacher aslolo ticho visvas moddunk tika thomnne marun oxem mhunnttlem: “Tumi Devachi povitr xokti tumkam modot korta mhunn sangtat. Punn atam khoim asa ti povitr xokti? Tumi tor azun goribuch asat. Tum porgottnnechem kam korun tuzo vell piddʼddear korta.” Hea vixim bhoinn sangta: “Tea vellar mhojea monant dubhav ailo ani hanvem mhakach oxem vicharlem: ‘Jehova khorench amchi  kallji gheta kai?’ Tor hanvem rokddench Jehova lagim magnnem kelem ani mhaka koxem bhogtalem tem taka sanglem. Toxench, hanv sodanch Bible ani Bible-acher adarit prokaxonam vachtalem, mittingek hajir zatalem ani porgottnni kortalem.” Ani Jehova khorench tanchi kallji gheta mhunn bhoinnik rokddench kollon ailem. Tim kednanch upaxim poddonk nant ani tim sodanch khuxal aslim. Shirley sangta: “Jehova khorench mhojea magnneancho zobab dita mhunn mhaka dison ailem.” (1 Tim. 6:6-8) Tor Jehovak lagim soronk gorjecheo asat teo vostu ami korit ravtat tednam ami pasun dubhavank lagon vo amcher ietat tea oddchonneank lagon Jehova thaun kednanch koddsorchimnant.

8. Amchea songottnnent fuddakar gheupi bhavam sangata kitem ghoddonk xokta?

⁸ Amche dusman, TV, newspaper, internet, toxench social network uzar korun amchea songottnnent fuddakar gheupi bhavam vixim khotteo khobro sangtat, vo tanche vixim chukichi mahiti diun tanchem nanv piddʼddear kortat. (St. 31:13) Hea pasot, amchea thoddea bhavank arrest keleat ani te opradi mhunn tancher khotte arop ghatleat. Poilea xekddeantlea Kristanvank pasun oslech poristhiticho fuddo korcho poddlo, jednam apostl Paulucher khotte arop ghatle ani taka bondkhonnint ghatlo. Tea vellar amchea bhav-bhoinnamnim kitem kelem?

9. Apostl Pauluk dhorun bondkhonnint ghatlo tednam thoddea Kristanvamnim kitem kelem?

⁹ Apostl Pauluk dhorun Romant bondkhonnint ghatlo tednam poilea xekddeantlea thoddea Kristanvamnim taka tenko divop bond kelo. (2 Tim. 1:8, 15) Kiteak? Lok Pauluk opradi mhunn polloitale dekhun tankam Pauluchi loz disli kai? (2 Tim. 2:8, 9) Vo tannim Pauluk tenko dilo zalear, tankam-i dhumallo sosunk poddttolo mhunn tim bhieun fattim sorlim kai? Karonn kitem-i asum, apostl Paulun tanche pasot zaite tras soslole ani aplo jiv porian dhokeant ghatlolo. (D.I. 20:18-21; 2 Kor. 1:8) Punn atam Pauluk tanchi chodd goroz asli tednam tim taka soddun gelim tem polloun, Pauluk kitlem dukh zalem astolem tea vixim ami chintunk zata. Ami tanche bhaxen kednanch zaunchim nhoi! Tor aiz fuddakar ghetolea amchea bhavank dhumallo ditat tednam ami kitem ugddas dovrunk zai?

10. Fuddakar gheupi amchea bhavank dhumallo sosunk poddtta tednam ami kitem ugddas dovrunk zai, ani kiteak?

 ¹⁰ Amcher dhumallo kiteak ieta ani to konn haddtta tem ami ugddas dovrunk zai. 2 Timotak 3:12 mhunntta: “Jezu Krista sovem bhoktiponnan jieunk sodtat tim sogllim dhumallo sostolinch!” Tor Soitan khas korun fuddakar gheupi amchea bhavancher dhumallo haddtta tem polloun ami ojap zainant. Karonn to tancho visvas moddunk ani tankam bhieunk sodhta mhunn ami zannant.—1 Ped. 5:8.

11. Onesifora thaun ami kitem xikonk zata? (2 Timotak 1:16-18)

¹¹ Amchea bhavank ami tenko diunk zai ani tankam modot korunk amchean zata tem soglem korunk zai. (2 Timotak 1:16-18 vachat.) Pauluk bondkhonnint ghatlo tednam Onesifor nanvachea eka Kristanvan kitem kelem? “[Pauluchea] sankllinchi taka loz disunk na.” Onesiforan Pauluk soddun diunk na. Tachea bodlek, tannem Pauluk sodhun kaddlo ani tachea gorzam pormonnem taka modot korunk, apleachean zata tem soglem kelem. Oxem korunk tannem aplo jiv pasun dhokeant ghatlo. Hantuntlean ami kitem xiktat? Amchea bhavank dhumallo sosunk poddtta tednam ami bhieun fattim sorchem nhoi. Tachea bodlek, ami tanche pasot ulounk toiar asonk zai, ani tankam tenko diunk ani modot korunk amchean zata tem soglem korunk zai. (Mho. 17:17) Karonn amchea bhavank amchea mogachi ani modotichi goroz asa.

12. Russia-ntlea bhav-bhoinnam thaun ami kitem xiktat?

¹² Russia-ntlea amchea bhav-bhoinnank bondkhonnint ghatlim tednam her bhav-bhoinnamnim tankam koxi modot keli tea vixim chintat. Tantuntlea thoddea bhav-bhoinnanchi korttachi kes choltali tednam zaitim bhav-bhoinnam tankam tenko diunk korttant ailim. Hantuntlean ami kitem xiktat? Amchea songottnnent fuddakar ghetolea bhavanchim nanvam piddʼddear kortat, tankam bondkhonnint ghaltat, vo tankam dhumallo ditat tednam ami bhieunk zaina. Punn ami tanchea pasot magnnem korunk zai, tanchea familichea sodoxianchi kallji gheunk zai, ani tankam her vattamnim modot korun tenko diunk zai.—D.I. 12:5; 2 Kor. 1:10, 11.

13. Lok amchim fokannam kortat tednam Jehova ani tache songottnnecher amcho visvas koso unno zaunk xokta?

¹³ Sotant naslolim amchim soirim, amchea sangata kam kortat tim, vo iskolant xiktat tim, amchea porgottnnechea kamak lagon vo ami Jehovachea noitik dorjeam pormonnem jietat dekhun amchim fokannam korunk xoktat. (1 Ped. 4:4) Tim ghoddie oxem mhunnonk puro: “Tum ek boro munis, punn tujea dhormant kitle kaide asat. Aiz konn hem soglem gheun bosta?” Toxench, sobhentlean bhair kaddttat tanchea sangata ami kainch sombond dovornant tem polloun thoddim ghoddie oxem mhunnot: “Tumi sogleancho mog kortat mhunn sangtat, ani oxe toren tumcho mog dakhoitat?” Tor lok oxem mhunntta tednam amchea monant dubhav ieunk puro. Ani ami pasun ghoddie oxem chintunk puro: ‘Jehova mhoje koddlean chodduch opekxa korta kai? Tachea songottnnent chodduch kaide asat kai?’ Amkam oslea poristhitincho fuddo korunk poddlear, Jehovak ani tache songottnnek lagim ravonk amkam koxi modot zatoli?

14. Ami Jehovachea dorjeam pormonnem jietat dekhun dusrim amchim fokannam kortat zalear ami kitem korunk zata? (Stotr 119:50-52)

¹⁴ Jehovachea dorjeam pormonnem jieunk nichov korat. Lokamnim tachim fokannam kelear pasun, Job Jehovachea dorjeam pormonnem jielo. Joban, Devache dorje pallʼlle vo pallunk nant zalear pasun Devak tachem poddlolem na mhunn Jobachea eka khottea ixttan taka sanglem. (Job 4:17, 18; 22:3) Punn Joban heo fotti aikonk nant. Karonn Jehovache bore ani vaittache dorje sarke asle mhunn to zannam aslo. Ani hea pasot, tea pormonnem jieunk tannem aplo  nichov kelʼlo. Tannem sodanch aplem visvaxiponn samballʼllem. (Job 27:5, 6) Tor ami kitem xiktat? Dusrim amchim fokannam kortat dekhun Jehovache dorje sarke asat kai na mhunn ami dubhavunk zaina. Tachea bodlek, Jehovachea dorjeam pormonnem jielolean amkam atam porian koso faido zala tea vixim ami chintunk zai. Tor lokamnim amchim kitlim-i fokannam kelear pasun Jehovache songottnnek tenko diunk nichov korum-ia. Ami oxem kelem zalear, Jehovachi seva korop ami kednanch soddun diunchimnant.—Stotr 119:50-52 vachat.

15. Brizit-ak virodh kiteak soscho poddlo?

¹⁵ India-nt ravpi Brizit nanvachea bhoinnicho, ami atam onubhov polloum-ia. Tichea bhavarthak lagon tichea familichea sodoxiamnim ani soireamnim tichim khub fokannam kelim ani tika thomnne marle. 1997-ant ticho bautizm zalea uprant, rokddench tichea sotant naslolea ghovachem kam gelem. Tea pasot tichea ghovan, Brizit ani tanchea bhurgeam sangata, aplea avoi-bapai borabor ravonk nirnnoi ghetlo, jim dusrea eka xarant ravtalim. Thoim gelea uprant, Brizit-ak anikui oddchonneancho fuddo korcho poddlo. Tichea ghovak kam naslem dekhun aplea familik samballunk tika akʼkho dis kam korchem poddlem. Itlench nhoi, thoinchean sogleant laginchi sobha 350 km pois asli. Ani dukhachem mhunnttlear, tichea ghovache familin pasun tichea bhavarthak lagon ticho virodh kelo. Ani poristhiti itli bigoddli ki Brizit-ak aple familik gheun thoinchean bhair soronk poddlem. Uprant, okosmat ticho ghov bhair poddlo. Magir tiche eke dhuvek cancer zalo ani 12 vorsanchem astanach tem-ui bhair poddlem. Ani Brizit-achea soireamnim, hem soglem tikach lagon ghoddlem, ani ti Jehovachi Sakxi zaunk nasli zalear heo vaitt ghoddnneo ghoddcheo nasleo, oxem mhunnon tichem dukh tannim anik vaddoilem. Tori astana, Brizit-an Jehovacher aplo visvas ghott dovorlo ani tache songottnnek chittkun ravli.

16. Jehova ani tache songottnnek chittkun ravlolean Brizit-ak koslim besanvam mellʼllim?

¹⁶ Brizit ravtali thoim thaun sobha khub pois asli dekhun sorkittachi dekhrekh korpean ti ravtali thoinch porgottnni korunk ani tichea ghorant mittingo dovrunk tika urba dili. Survatek, hem korop khub kotthin aslem, oxem Brizit-ak dislem. Punn uprant tika sanglolem toxem, ti ravtali thoinch tinnem porgottnni suru keli, aplea ghorant mittingo dovorleo ani ti chukonastana  aplea dhuvam sangata kuttumbik bhokti korunk lagli. Hacho porinnam kitem zalo? Brizit Jehovak visvaxi ravli ani tache songottnnek chittkun ravli dekhun Jehovan tika zaitim besanvam dilim. Brizit zaite Bible obheas suru korunk pavli, ani tichea zaitea Bible vidʼdheartheamnim bautizm ghetlo. Toxench, 2005-ant tinnem niemit pioneer seva suru keli. Tea bhair, ticheo dhuvo aiz visvaxiponnan Jehovachi seva kortat. Ani tim ravtat tea zagear aiz don sobha asat. Tor aplea oddchonneancho ani famili thaun ailolea virodhacho fuddo korunk Jehovan tika ghottai dili mhunn Brizit-ak khatri zali.

17. Ami kitem korunk nichov korum-ia?

¹⁷ Trasanchea vellar Jehova amkam soddun dita ani Jehovachea songottnnek tenko dilear amcheo oddchonneo anikui vaddttoleo oxem ami chintlolem Soitanak zai. Toxench, songottnnent fuddakar ghetolea bhavanchim nanvam piddʼddear kortat, tankam dhumallo ditat, vo tankam bondkhonnint ghaltat tednam ami bhielolim Soitanak zai. Tea bhair, lok amchim fokannam kortat tednam Jehovache songottnnecher amcho visvas moddlolo ani tache dorje kainch faideache nhoi oxem ami chintlolem Soitanak zai. Punn ami Soitanacheo heo naddbudheo zannant dekhun ami fosonant. (2 Kor. 2:11) Tor Soitanacheo fotti nakarunk ani Jehovak ani tache songottnnek visvaxi ravonk ami nichov korum-ia. Toxench, Jehova amkam kednanch sanddchona mhunn ami ugddas dovrum-ia. (St. 28:7) Tor kiteakuch lagon Jehova koddlean kednanch pois vochonakat!—Rom. 8:35-39.

18. Fuddlea lekhant ami kitem polloitolim?

¹⁸ Hea lekhant, amkam ghoddie Soitanachea sonvsara thaun fuddo korunk poddttat tea oddchonneam vixim ami polloilem. Punn thodde pavtti, sobhent oxem kitem-i zaunk xokta, jea vorvim Jehova ani tache songottnnecher amcho visvas halonk xokta. Tor tea oddchonneancho fuddo korunk ami kitem korunk zai tem ami fuddlea lekhant polloitolim.