1-2. (a) Ami khoinchea prosnanche zobab polloitolim? (b) Jehova amkam modot korunk sodhta mhunn amkam koxem kollon ieta?

 AMCHER ietat tea oddchonneancho fuddo korunk ani khuxalkaien apli seva korunk, Jehova amkam modot korunk xokta. Tor Jehova amkam koso modot korta? Ani tache modoti thaun ami purnn toren koso faido gheunk zata? Hea prosnanche zobab ami hea lekhant polloitolim. Punn poilim, ami hea prosnacho zobab zannam zaum-ia: Jehova amkam khorench modot korunk sodhta kai?

² Hacho zobab amkam apostl Paulun Hebrev Kristanvank boroilʼlea chittint aslolea eka utrantlean kollon ieta. Paulun boroilem: ‘Jehova mhojea pokxak asa vo mhaka modot korpi: tor kosli bhirant? Munis mhaka kitem korunk xokta?’ (Heb. 13:6) Hea versant uzar kelʼlem ‘modot korpi’ hem utor, oslea munxak uzar kelam, zo dhanvon vochon modotichi goroz aslolea konn ekleak modot korta, mhunn Bible-a vixim mahiti diupi eka pustokant sanglam. Tor eka orthan ami oxem mhunnonk zata. Konnui trasant asa tednam Jehova dhanvon vochon taka modot korta. Hea vixim ami chintʼtat tednam Jehova amkam modot korunk toiar asa, hoi, amkam modot korunk taka itsa asa mhunn amkam kollon ieta. Ani Jehova amchea pokxak asa zalear, amcher ietat tea koslea-i oddchonneancho ami khuxalkaien fuddo korunk pavtolim.

3. Jehova khoinchea tin vattamnim amcher ietat tea oddchonneancho khuxalkaien fuddo korunk amkam modot korta?

³ Tor Jehova hem khoinchea vattamnim korta tem zannam zaunk, ami Izaiasachea pustokacher dhean dium-ia. Karonn Jehovan Izaiasak borounk lailʼleo teo zaiteo bhasaunneo aiz  amkam lagu zatat. Ani Jehova vixim sangonk, Izaiasan jim utram uzar kelim, tim amkam sompeponnim somzotat. Hachim thoddim udharonnam amkam Izaias odheai 30-ant mellttat. Tea odheai-ant, Jehova aplea lokank koxi modot korta tem sangonk Izaiasan borim udharonnam uzar keleant. Thoim Jehova aplea lokank (1) tanchem bariksannen aikon ani tanchea magnneancho zobab diun, (2) tankam margdorxon diun, ani (3) tankam atam ani fuddara pasot besanvam diun modot korta mhunn Izaiasan sanglem. Tor heo tin vatto uzar korun, Jehova amkam koso modot korta tem fuddem ami anikui bariksannen polloum-ia.

4. (a) Izaiasachea disamnim aslolea Judevam vixim Jehovan kitem mhunnttlem, ani Jehovan tankam kitem ghoddonk dilem? (b) Jehovan visvaxi Judevank koslo bhorvonso dilo? (Izaias 30:18, 19)

⁴ Izaias odheai 30-achea survatechea utramnim, Judev lok ‘fitur bhurgim’ ani “patkacher patok choddoit asat” oxem Jehovan sanglem. Toxench, tanche vixim Jehovan fuddem mhunnttlem: “Hi ek fitur porza . . . Sorvesporache Somurtik kan dinant tosleo put-dhuvo.” (Iz. 30:1, 9) Ani Israelitkaramnim Jehovachem aikonk nakarlem dekhun, tancher odruxtt ietolem tednam Jehova tem addauncho na mhunn provadi Izaiasan bhasaunni keli. (Iz. 30:5, 17; Jer. 25:8-11) Ani toxench ghoddlem. Karonn Babilonkaramnim Israelitkarank koidi korun vhelim. Punn tanchea modem aslolea thoddea visvaxi Judevank, Izaiasan ek bhorvonxeacho sondex dilo. Tem mhunnttlear, ek dis Jehova tankam porot Jeruzalemant ieunk ditolo mhunn tannem sanglem. (Izaias 30:18, 19 vachat.) Ani oxench zalem. Karonn Jehovan tankam Babilonantlim soddoilim. Punn hem rokddench zaunk na. Karonn “tumcher upkar korunk Jehova pasiensan ravla” him utram, Jehovan aplea visvaxi lokank soddounchea poilim thoddo vell voitolo aslo mhunn dakhoun ditat. Tor Israelitkaram 70 vorsam porian Babilonant koidi aslim. Punn tea uprant, thoddea Israelitkarank porot Jeruzalemant ieunk mellʼllem. (Iz. 10:21; Jer. 29:10) Israelitkaram Babilonant koidi aslim tednam tim dukhi zaun roddlim. Punn atam tim porot aplea ganv-ghora ailim tednam tim khuxal zaun roddlim.

5. Amkam Izaias 30:19-antlean kosli khatri melltta?

⁵ Amkam aiz Izaiasachea hea utrantlean bhuzvonn melltta: ‘Tum adarak ulo marta tednam to tuka prosonʼn zatolo, vo tujer upkar kortolo.’ (Iz. 30:19) Tor ami Jehova lagim modot magtat tednam to amchem kan diun aikotolo ani amchea magnneank to rokddoch zobab ditolo mhunn Izaias amkam khatri dita. Izaiasan fuddem oxem mhunnttlem: “Tuzo tallo aikona fuddench To tuka zap ditolo.” Tor hea utrantlean, aplea lagim modot magtat tankam Jehova modot korunk sodhta, ani oxem korunk taka khub itsa asa mhunn amkam khatri melltta. Hem zannam zalolean amkam khuxalkaien oddchonneancho fuddo korunk modot zata.

6. Izaiasachea utrantlean Jehova amchim dor ekleachim magnnim bariksannen aikota mhunn amkam koxem kollon ieta?

⁶ Toxench vers 19-antlean, amkam hem pasun kollon ieta ki Jehova amchim dor ekleachim magnnim bariksannen aikota. Oxem ami kiteak mhunnonk zata? Odheai 30-achea survatechea versamnim, “tumkam” hem utor uzar kelʼlem asa. Karonn thoim Jehova aplea sevokanchea zomea lagim uloita. Punn vers 19-ant, “tum” hem utor uzar kelam. Karonn tim utram Jehova amkam dor ekleak sangta. Thoim Izaiasan boroilam: “Tum anink rudon korchi naim”; ‘To tuka prosonʼn zatolo vo tujer upkar kortolo’; “To tuka zap ditolo.” Tor hantuntlean, Jehova aplea niraxi zalʼlea putak vo dhuvek, “Tunvem tujea bhava vo bhoinni bhaxen dhirvont zaunk zai,” oxem sangona. Punn eka mogall Bapai bhaxen, to amchi kallji gheta ani amchim magnnim bariksannen aikota mhunn amkam kollon ieta.—St. 116:1; Iz. 57:15.

7. Ami magnnem korit ravop kitlem gorjechem tem Izaias ani Jezuchea utrantlean amkam koxem kolltta?

 ⁷ Amkam aslolea eke umkech oddchonne vixim ami Jehova lagim magtat tednam ghoddie poilim, te oddchonnecho fuddo korunk Jehova amkam ghottai ditolo. Punn ti oddchonn amkam zai title begin suttavi zaina zalear, amkam ghoddie Jehova lagim porot-porot magnnem korunk poddot. Ani ami oxench kelʼlem Jehovak zai mhunn Izaiasachea utrantlean kollon ieta. Tannem mhunnttlem: ‘Jehovak tumi thar vo suseg dium nakat!’ (Iz. 62:7) Tor hea utrantlean, eka orthan Jehovak suseguch mellona title pavtti ami tache lagim magnnem korunk zai mhunn sanglam. Izaiasachim him utram vachtana, Jezun, Lukas 11:8-10, ani 13-nt sanglolim utram amkam ugddas ieunk puro. Thoim tannem magnnea vixim thoddeo vopareo dileo, ani “loz dhorinastana” magnnem korunk, toxench, povitr xokte pasot ‘magot ravonk’ urba dili. Tor bore nirnnoi gheunk, ami pasun Jehovachem margdorxon magot ravonk zai.

8. Izaias 30:20, 21-antlim utram adlea kallar koxim ghoddon ailim?

⁸ Izaias 30:20, 21 vachat. Babilonache foujen Jeruzalemacher dedd voros porian veddo ghatlo tednam Judevank khub tras bhogche poddle. Udok ani unddo sodanch melltta tea bhaxen, tankam he tras sodanch bhogunk poddle. Punn vers 20 ani 21-a pormonnem, Judevamnim poschatap korun aplo sobhav bodolʼlo zalear, Jehova tankam salvar kortolo mhunn tannem tankam bhas dilʼli. Thoim Izaiasan Jehovak, “Vhodd Xikoupi,” [NW] mhunnttlo, ani to aplea lokank taka manvota tea toren tachi seva korunk modot kortolo mhunn bhas dili. Ani Judevank Babilonantlean suttka mellʼlli tednam him utram ghoddon ailim. Jehova khorench tancho Vhodd Xikoupi zaunk pavlo ani tachea margdorxona khala tim porot khori bhokti sthapon korunk pavlim. Tor aiz Jehova amcho Vhodd Xikoupi mhunn ami khub khuxal asat.

9. Amkam aiz Jehovachem margdorxon melltta ti ek vatt khoinchi?

⁹ Ami vidʼdhearthi ani Jehova amcho Vhodd Xikoupi zaun, don toremnim amkam xikoita mhunn Izaiasan hea versamnim sanglem. Izaiasan poilim mhunnttlem: “Tujeach dolleamnim tujea Vhodd Xikoupeak tum dekhtolo,” [NW]. Hea udharonnantlean, Xikoupi aplea vidʼdheartheam mukhar ubo asa mhunn amkam kollon ieta. Tor eka orthan, Jehova amchea mukhar ravon amkam xikoita. Ani Jehova koddlean xikounn gheunk amkam ek vhodd sueog asa. Tor aiz Jehova amkam koxe toren xikoita? Tache songottnne udexim. Sobhecheo mittingo, zomati, odhivexonam, toxench prokaxonam, broadcast kariavolli, ani her vattamnim Jehovachem songotton amkam spoxtt ritin margdorxon dita.  Ani hea pasot, amcher ietat tea oddchonneancho ami khuxalkaien fuddo korunk pavtat. Khorench, Jehovache songottnne thaun amkam melltta tea margdorxonak lagon ami kitlim upkari asat nhoi!

10. Ami ‘amchea fattlean Jehovacho avaz’ koxim aikotat?

¹⁰ Jehova anik ek vatten amkam margdorxon dita mhunn Izaiasan sanglem. Tannem mhunnttlem: “Tuje pattlean tuje kan him utram aikotole.” Hanga Jehova, eka xikoupea bhaxen aplea vidʼdheartheam fattlean cholta ani tannim khoinchi vatt dhorunk zai tem tankam sangta mhunn Izaiasan sanglem. Tor aiz ami amchea fattlean Jehovacho avaz koxim aikotat? Jehovan apli povitr xokti uzar korun amchea pasot xekddeamnim vorsam poilim, aplim utram Bible-ant boroun dovorlim. Tor ami Bible vachtat tednam eka orthan ami amchea fattlean Jehovacho avaz aikotat.—Iz. 51:4.

11. Jehovachi seva khuxalkaien korunk ami kitem korunk zai, ani kiteak?

¹¹ Jehovachem Utor ani tachea songottnne thaun melltta tea margdorxonantlean purnn toren faido zaunk ami kitem korunk zata? Hem zannam zaunk, Izaiasan khoincheo don vostu mhunnttleo tacher dhean diat. Poilem tannem mhunnttlem, “Hich ti vatt.” Ani uprant, “Tech vatten cholun voch.” (Iz. 30:21) Hi vatt ami zannam zalearuch puro nhoi. Punn ami te vatten cholonk zai. Tor Jehovachem Utor ani tache songottnne thaun melltta tea xikounnentlean, ami kitem kelʼlem Jehovak zai tem ami xiktat tednam tem ami apnnaunk zai. Oxem kelearuch, ami khuxalkaien Jehovachi seva korunk pavtolim ani Jehova amkam inam ditolo mhunn ami khatri dovrunk zata.

12. Izaias 30:23-26-a pormonnem, Jehova aplea lokank koso besanvam ditolo aslo?

¹² Izaias 30:23-26 vachat. Babilonant koidi aslolim Judev, Israelant porot ailim tednam hi bhasaunni koxi purnn zali? Jehovan tankam jieunk ani apli seva korit ravonk modot korunk zaiteo vostu dileo. Tannem tankam zaitem jevonn dilem. Punn chodd mhotvachem mhunnttlear, aplea sangata tanchi ixttagot ghott korunk ani apnnak manvota te toren khori bhokti sovkas-sovkas porot suru korunk, Jehovan tankam goroz tem soglem dilem. Jehovachea lokank adim Jehova koddlean itlim besanvam kednanch mellonk naslim. Ani vers 26-ant sanglam toxem, Jehovan tankam anikui uzvadd dilo. Mhunnche, aplem utor somzonk tankam anikui modot keli. (Iz. 60:2) Tor Jehovachea itlea besanvank lagon tanchem ‘kalliz anondan ulʼlastalem’ dekhun tankam ghottai mellʼlli ani khuxalkaien Jehovachi seva korit ravonk tankam modot zali.—Iz. 65:14.

13. Khori bhokti porot suru zatoli mhunn dilʼli bhasaunni aiz koxi purnn zata?

 ¹³ Khori bhokti porot suru zatoli mhunn dilʼli bhasaunni amkam lagu zata kai? Hoi! 1919 K.X.-a thaun lakʼkhamnim lok Vorixtt Babilon, tem mhunnttlear, khottea dhormantlean bhair sortat. Israelitkarank dilʼlea Bhasailʼlea Desa poros, tankam kitem tori odik borem mellʼllam. Tem mhunnttlear, Jehovachea lokam sangata mellon tim ekvottan khori bhokti korunk pavleant.—Iz. 51:3; 66:8.

14. Her menddram makhlolea Kristanvam bhaxen kitem onubhovtat?

¹⁴ 1919 K.X.-a thaun makhlolim Kristanvam ekvottan Jehovachi bhokti kortat. Oxem korunk tim khub khuxal asat. Ani vell soron gelo toso, ‘her menddram,’ [NW] zankam hea prithumer jieuncho bhorvonso asa, tim pasun ekvottan Jehovachi bhokti korunk laglim. Tankam khottea dhormancheo khotteo xikounneo nhoi, punn makhlolea Kristanvam bhaxen Jehova sangata tanchi ixttagot ghott korunk goroz tem soglem melltta. Ani tankam dhadosponn dita toslem kam asa. Tem mhunnttlear, Devachea Rajeachi bori khobor porgottop. Toxench, amkam sogleank Jehova sangata ek ghott ixttagot asa. Ani amcher ietat tea oddchonneancho khuxalkaien fuddo korunk amkam modot kortat toslea mogall bhav-bhoinnam sangata ami xantin jietat. Punn ami hem soglem kednam onubhovunk pavtat? Jednam ami Jehovak manvota tea ritin tachi bhokti kortat ani tachi dekh gheunk amchean zata tem soglem kortat.—Ju. 10:16; Iz. 25:6; 65:13.

15. Aiz khori bhokti korunk ekuch zago asa kai?

¹⁵ Israelitkaram porot Jeruzalemant ailim tednam tim thoim khori bhokti porot stapon korunk pavlim. Punn aiz ami sonvsarant khoinsorui asum, je meren ami Jehovache khore bhoktek tenko ditat, te meren ami ekvottan tachi bhokti korunk pavtolim.

16. Amche modem aslolea ekvotta pasot ami sodanch upkari koxem ravonk zata?

¹⁶ Ami sodanch ekvottan Jehovachi bhokti korunk, ami sonvsarbhor aslolea amchea bhav-bhoinnancho valor korunk zai. Hem ami koxem korunk zata? Ami amchea bhav-bhoinnanchea unnemponnancher nhoi, punn tanchea sobit vo borea gunnancher dhean diunk zai. (Ju. 17:20, 21) Oxem korop kiteak gorjechem tem zannam zaunk hea vixim chintat. Eka dongrar zaitim veg-veglle torechim zhaddam astat ani to dongor pollounk ekdom sobit dista. Punn ami tea dongrar aslolea dor eka zhaddacher aslolim khotam polloitat zalear, ami tea dongrachi sobitkai pollounk pavchimnant. Sonvsarbhor  aslolim amchim bhav-bhoinnam pasun hea “zhaddam” bhaxen zaun asat ani amchea modem aslolo ekvott hea “dongra” bhaxen. (Iz. 44:4; 61:3) Punn ami amchea, vo dor eka bhav-bhoinnanchea unnemponnancher dhean ditat zalear amche modem aslolea ekvottacho ami valor korunk pavchimnant.

17. Amchea modlea dor eklean sobhent ekvott samballunk kitem korunk zata?

¹⁷ Amchea modlea dor eklean sobhecho ekvott samballunk kitem korunk zata? Ami xanti korpi munxam zaunk zatat. (Mt. 5:9; Rom. 12:18) Ami dusream sangata xanti korunk fuddem sortat title-i pavtti, ami amcho ekvott anikui ghott kortat. Karonn amchea modlea dor ekleak khori bhokti korunk Jehovan oddun haddleant mhunn ami ugddas dovortat. (Ju. 6:44) Tor Jehova moladik mhunn lekhta tea tachea sevokam sangata ami xanti ani ekvott samballunk khub vavr kortat tem polloun, Jehova kitlo khuxal zata astolo tem chintat!—Iz. 26:3; Hag. 2:7.

18. Ami kitea vixim niallunk zai, ani kiteak?

¹⁸ Jehova aplea sevokank zaitim besanvam dita. Hantuntlean purnn toren faido zaunk ami kitem korunk zata? Ami Bible-ant ani Bible-acher adarit aslolea prokaxonamnim kitem xiktat tea vixim ami bariksannen chintunk zai. Hea toren ami xiktat tacher ami niall kortat tednam ami Kristi gunn vaddounk pavtolim. Hea vorvim ami “eka-mekak mog” ani “moipas” dakhounk pavtolim. (Rom. 12:10, NW) Toxench, Jehova amkam aiz koslim besanvam dita tacher ami niall kortat tednam Jehova sangata amchi ixttagot ghott zatoli. Ani Jehovan fuddarak, to amkam koslim besanvam ditolo mhunn bhas dilea tea vixim ami niall kortat tednam ami sodankal tachi seva korunk pavtolim ho amcho bhorvonso anik ghott zatolo. Ami hem soglem kortat tednam ami khuxalkaien Jehovachi seva korit ravonk pavtolim.

19. (a) Izaias 30:18 pormonnem, ami kosli khatri dovrunk zata? (b) Khuxalkaien oddchonneancho fuddo korunk amkam koxi modot zatoli?

¹⁹ Beginuch, Jehova hea noxttea sonvsaracho nas korunk “uttʼttholo.” (Iz. 30:18, NW) Ani Jehova ek “nitivont Dev” dekhun to kallav korinastana sarko apnnem tharaila teach disak, Soitanachea hea sonvsaracho nas kortolo. (Iz. 25:9) Tor Jehovachea tea disachi ami pasiensan vatt polloit asat. Punn tea meren, ami sodanch magnnem korchea vhodd sueogacho valor korunk, Devachem Utor xikonk ani amchea jivitant lagu korunk, toxench Devan dilʼlea besanvancher niall korunk nichov korum-ia. Oxem kelear, amcher ietat tea oddchonneancho khuxalkaien fuddo korun apli bhokti korunk Jehova amkam modot kortolo.