1. Ami kitem zannant, ani ami kosli khatri dovrunk zata?

 AMI porgottnnechem kam kortat tednam thoddo lok amkam virodh kortolo mhunn ami zannant. Ani ho virodh ghoddie fuddarak anikui vaddttolo. (Dan. 11:44; 2 Tim. 3:12; Prok. 16:21) Tori astana, Jehova amkam goroz ti modot ditolo mhunn ami khatri dovrunk zata. Karonn Jehovan aplea sevokank tankam dilʼlem kam kitlem-i kotthin aslear pasun, tem purnn korunk sodanch modot kelea. Jehovan hem koxem kelem tem zannam zaunk, provadi Ezekiel, zo Babilonant koidi aslolea Judevank porgott kortalo, tachea jivitant ghoddloleo thoddeo ghoddnneo ami polloum-ia.

2. Ezekielak porgottunk poddle te lok koxe asle mhunn Jehovan sanglem, ani ami kitem polloitolim? (Ezekiel 2:3-6)

² Provadi Ezekielak kosle torechea lokank porgottchem poddlem? Te lok, Jehovacher ‘kolpotat tosle,’ ‘apleach vadeacheʼ ani ‘darunn kallzacheʼ asle mhunn Jehovan sanglem. Te kantteam bhaxen tras ditat tosle ani vinchu bhaxen bhirankull asle. Tea pasot, Jehovan porot-porot Ezekielak oxem sanglem: “Tum bhieum naka.” (Ezekiel 2:3-6 vachat.) Ezekiel porgottnnechem kam korit ravonk pavlo karonn (1) Jehovan taka dhaddlolo, (2) Jehovache povitr xokte udexim taka goroz ti ghottai mellʼlli, ani (3) Jehovachea utram vorvim tacho bhavarth ghott zalo. Tor hea tin karonnank lagon Ezekielak koxi modot zali, ani aiz amkam koxi modot zata?

3. Ezekielak khoinchea utrantlean ghottai mellʼlli astoli, ani apunn Ezekielak tenko ditolo mhunn Jehovan taka koxi khatri dili?

³ Jehovan Ezekielak sanglem: “Hanv tuka dhaddtam.” (Ez. 2:3, 4) Hea utrantlean Ezekielak khorench ghottai mellʼlli astoli. Karonn Jehovan, Moizes ani Izaiasak aple provadi mhunn vinchun kaddle tednam tannem oslinch utram mhunnttlolim mhunn Ezekielak ugddas ailo astolo. (Sutt. 3:10; Iz. 6:8) Hea donui provadeank dilolim kotthin kamam korunk, Jehovan tankam koxi modot keli tem-ui Ezekiel zannam aslo. Tor “hanv tuka dhaddtam,” mhunn Jehovan Ezekielak don pavtti sanglem tednam Jehova taka modot kortolo mhunn to visvas dovrunk pavlo. Toxench, Ezekielachea pustokant, “Sorvesporachem utor mhaka pavlem,” him utram amkam porot-porot vachunk mellttat. (Ez. 3:16; 6:1) Tor khorench apleak Jehovan dhaddla mhunn Ezekielak khatri mellʼlli. Toxench, Ezekielacho bapui ek iadnik aslolean, Jehovan aplea provadeank aplo tenko ditolo mhunn koxi khatri dilʼli, tem taka xikoilem astolem. Udharonnak, Izak, Jakob, ani Jeremiasak Jehovan him utram mhunnttlolim: “Hanv tujea sangata asam.”—Ut. 26:24; 28:15; Jer. 1:8.

4. Ezekielak khoinchea utrantlean ghottai mellʼlli astoli?

⁴ Tor Ezekiel porgottnni kortalo tednam choddxim Israelitkaram kitem kortolim aslim? Hea vixim Jehovan oxem mhunnttlem: “Israelachem Ghorannem tuka aikunchem na, karonn tim Mhaka aikunk toiar nant.” (Ez. 3:7) Khorem mhunnttlear, tim Ezekielak nakartalim tednam tim Jehova Devak nakartalim. Tor hea utrantlean Ezekielak khatri mellʼlli, ki lokamnim tacho sondex nakarlo hacho orth, tannem provadi zaun aplem kam sarke toren korunk na oxem nhoi. Toxench, Ezekielachim zhoddttechim formonnam khorim zatolim tednam lokank ‘tanche modem ek provadi aslo mhunn kollon ietolem,’ oxem Jehovan Ezekielak khatri dili. (Ez. 2:5; 33:33) Hea utrantlean, Ezekielak porgottnnechem kam korit ravonk goroz ti ghottai mellʼlli mhunn kainch dubhav na!

5. Izaias 44:8-ant, oxem kitem sanglam jea udexim amkam dhir melltta?

⁵ Aiz ami dhiran porgottnni korunk pavtat. Karonn Jehovan amkam dhaddleant mhunn ami zannant. Tannem amkam aplim ‘sakxidaram vo sakxi’ mhunnon ek vhodd man dila. (Iz. 43:10) Khorench, ho amkam ek vhodd sueog zaun asa. Zoxem Jehovan Ezekielak sanglem: “Tum bhieum naka,” toxench to amkam sangta: ‘Thorthorum nakat vo bhieum nakat.’ Tor ami amchea virodheank kiteak bhieunchi goroz na? Karonn Ezekiela bhaxen Jehovan amkam dhaddleant ani amkam tacho tenko asa.—Izaias 44:8 vachat.

6. (a) Porgottnni korunk Jehova amkam modot kortolo mhunn tannem amkam koxi khatri dilea? (b) Ami kitem zannam zalolean amkam bhuzvonn ani ghottai melltta?

⁶ Porgottnni korunk Jehova amkam modot kortolo mhunn tannem amkam khatri dilea. Udharonnak, “Mhojim sakxidaram tuminch,” oxem mhunnche poilim Jehovan oxem mhunnttlem: “Udkantlean vexi, tujea sangata Hanv astolom; nodintlean vexi, teo tuka girascheo nant. Ujeantlean cholxi, tum lascho naim, ani dhogan tum ulpocho naim.” (Iz. 43:2) Porgottnni kortana, buddtti ieta tea toren, thodde pavtti amkam zaitea oddchonneancho fuddo korunk poddot. Vo ujea bhaxen, amkam kotthin poristhitincho fuddo korunk poddot. Tori astana, porgottnni korit ravonk Jehova amkam modot korta. (Iz. 41:13) Ezekielak ghoddlem toxem, aiz pasun zaito lok amcho sondex nakartat. Punn hacho orth, ami porgottnnechem kam bore toren korunk na oxem nhoi. Karonn ami visvaxiponnan porgottnnechem kam korit ravtat tednam Jehovak tem manvota ani hem zannam zalolean amkam bhuzvonn ani ghottai melltta. Apostl Paulun mhunnttlolem: “Zonn-eklean kam kelam tea pormannem Dev taka mozuri ditolo.” (1 Kor. 3:8; 4:1, 2) Ani heach vixim, khub temp porian pioneer seva korpi eke bhoinnin mhunnttlem: “Jehova amcho vavr polloun amkam besanvam dita, hem zannam zalolean mhaka khub khuxalkai melltta.”

7. Ezekielan polloilʼlea dorxona vixim tannem niall kelo title-i pavtti kitem zalem astolem? (Masikachem fuddlem chitr polloiat.)

⁷ Devachi povitr xokti kitli bollixtt asa ti Ezekielan eka dorxonant polloili. Tea dorxonant, Devachi povitr xokti bollixtt ainzank koxi modot korta ani sorginchea rothachim vhoddlim chokram ghunvddaunk koxi modot korta tem tannem polloilem. (Ez. 1:20, 21) Hem polloun Ezekielan kitem kelem? Tea vixim tannem boroilem: “To polleun hanv saxttangim poddlom.” (Ez. 1:28) Ezekiel itlo ojap zalo ki to somtoch zomnir poddlo. Ani uprant Ezekielan tea dorxona vixim niall kelo title-i pavtti, Jehovache povitr xoktechea modotin to tachi porgottnni bore toren korunk pavtolo mhunn tachi khatri ghott zali.

8-9. (a) Jehovan Ezekielak “ubo rav” mhunn sanglea uprant taka kitem zalem? (b) Porgottnni korunk kotthin aslolea vattarant porgottunk Jehovan Ezekielak anikui ghottai koxi dili?

⁸ Hem dorxon polloilea uprant, Jehovan Ezekielak oxem mhunnttlem: “Monʼxachea puta, tujea paiancher ubo rav; tuje lagim Hanv ulounk sodtam.” Jehovachi hi adnea aikon toxench tache povitr xokte udexim Ezekielak porot ubo ravonk goroz ti ghottai mellʼlli. Tea vixim Ezekielan oxem boroilem: “Sorvesporacho Atmo mhoje bhitor ieun riglo. Tannem mhaka mhojea paiancher ubo kelo.” (Ez. 2:1, 2) Tea uprant Ezekiel porgottnnechem kam korit ravlo toso, Jehovacho “hat,” tem mhunnttlear, Jehovachi povitr xokti taka margdorxon di-it ravli. (Ez. 3:22; 8:1; 33:22; 37:1; 40:1) Tor Jehovan dilʼlem kam, tem mhunnttlear, Ezekielachea vattarant aslolea, ‘nibor manichea ani urmott kallzachea’ lokank porgottnni korunk Jehovache povitr xokten taka ghottai dili. (Ez. 3:7) Jehovan fuddem Ezekielak oxem mhunnttlem: “Atam Hanv tuka tanche itlo nibor manicho kortam, ani tanche itlo thir-ghott kallzacho. Hanv tujem mon vozra sarkem ghott ani paxonni fatra poros nibor kortam. Tankam bhieum naka . . . tankam polleun tum akantum naka.” (Ez. 3:8, 9)  Tor Jehovan Ezekielak, eka orthan oxem sanglolea bhaxen zaun asa: ‘Tea nibor kallzachea lokank lagon tum niraxi zaum naka. Hanv tuka ghottai ditolo.’

⁹ Uprant, Jehovache povitr xokten Ezekielak, tannem porgott korunk zai aslem thoim vhelo ani “Sorvesporacho hat mhojer ghott boslolo aslo,” oxem Ezekielan sanglem. Tannem dusreank diunk zai aslo to sondex khatren porgottunk, Ezekielan to purnn toren xikonk ani somzonk zai aslo. Ani oxem korunk taka ek suman laglem. (Ez. 3:14, 15) Magir Jehovache povitr xokten taka falkeant vochonk lailem. Ani thoim “Sorvesporacho Atmo [tache] bhitor ieun riglo.” (Ez. 3:23, 24) Tednam Ezekiel porgottnnechem kam korunk toiar zalo.

10. Porgottnnechem kam korit ravonk amkam kiteachi goroz asa, ani kiteak?

¹⁰ Ezekielan porgottnni suru korchea poilim, Jehovache povitr xokten taka goroz ti ghottai dili. Teach bhaxen aiz porgottnnechem kam korunk, Jehovachi povitr xokti amkam pasun goroz ti ghottai dita. Ani Ezekiela bhaxen, fokot Jehovache povitr xoktechea modotin ami hem porgottnnechem kam korunk pavtat. Karonn amchem porgottnnechem kam bond korunk Soitan amchea add zhuz korit asa. (Prok. 12:17) Ani Soitan ekdom bollixtt dekhun tachea add ami jikhonk xokonant, oxem zaitea lokank disonk puro. Punn amchea porgottnnechea kama udexim ami tacher zoit vhortat. (Prok. 12:9-11) Hea vorvim ami Soitanak bhienant mhunn ami taka dakhoun ditat. Ani dor ek pavtti ami porgottat tednam ami taka haroitat. Tor hantuntlean, Jehovachi povitr xokti amkam ghottai dita ani Jehovachi maniotai amcher asa dekhun virodh aslear pasun ami porgottnni korit ravonk pavtat mhunn amkam kollon ieta.—Mt. 5:10-12; 1 Ped. 4:14.

11. Jehovachi povitr xokti amkam kitem korunk modot kortoli, ani ti povitr xokti amkam mellot ravonk ami kitem korunk zai?

¹¹ Jehovan eka orthan, Ezekielachem mon vozra sarkem ghott ani paxonni fatra poros nibor kelem hantuntlean ami kitem xiktat? Porgottnnechea kamant, amcher kotthin poristhiti ieta tednam Jehovachi povitr xokti tancho fuddo korunk amkam goroz ti ghottai ditoli. (2 Kor. 4:7-9) Tor amkam Devachi povitr xokti mellot ravonk ami kitem korunk zai? Jehova amchim magnnim  aikotolo mhunn visvas dovrunk amkam povitr xokti di mhunn ami porot-porot magnnem korit ravonk zai. Jezu aplea xisank oxem xikoitalo, “magot ravat . . . sodhit ravat . . . darar marit ravat.” Oxem kelolean, Jehova ‘aplea lagim magtoleank povitr xokti ditoloch.’—Luk. 11:9, 13; D.I. 1:14; 2:4.

12. Ezekiel 2:9–3:3-a pormonnem, Ezekielan polloilʼlo kovllo khoim thaun ailʼlo ani tantunt kitem aslem?

¹² Jehovache povitr xokte udexim Ezekielak porgottnni korunk dhir vo ghottai mellʼlli. Titlench nhoi, punn Jehovachea utrantlean tacho bhavarth anik ghott zalo. Eka dorxonant Ezekielan kovllo dhorun aslolo ek hat polloilo. (Ezekiel 2:9–3:3 vachat.) Tor to kovllo khoim thaun ailʼlo, tantunt kitem aslem, ani tea vorvim Ezekielacho bhavarth koso ghott zalo tem ami polloum-ia. Ho kovllo Jehovachea xinvasona thaun ailʼlo ani chodd korun Ezekielan poilim polloilʼlea char ainzam modlea ekleak uzar korun, Jehovan ho kovllo taka dilo. (Ez. 1:8; 10:7, 20) Tea kovlleant Jehovachim utram aslim. Tem mhunnttlear, Jehovacho zhoddttecho sondex. Ho sondex Ezekielan, Jehovachem aikonk toiar naslolea, Babilonant koidi aslolea Israelitkarank diunk zai aslo. (Ez. 2:7) Ho sondex tea kovlleachea donui vatten boroilʼlo aslo.

13. Jehovan provadi Ezekielak kitem korunk sanglem, ani to kovllo Ezekielak godd laglo hacho orth kitem?

¹³ Jehovan provadi Ezekielak to akʼkho kovllo khaun ‘tachem pott bhorunkʼ lailem. Ani Ezekielan toxench kelem. Tannem to akʼkho kovllo khailo. Hacho orth kitem aslo? Ezekielan porgottunk zai aslo to sondex, tannem purnn toren somzon, to manun gheunchi goroz asli. Oxem kelearuch, to dhiran porgottnni korunk pavtolo aslo. Uprant kitem tori ojapachem ghoddlem. Tem mhunnttlear, to kovllo “mhonva itlo godd” aslo mhunn Ezekielak kollon ailem. (Ez. 3:3) Hacho orth, Jehovacho provadi zaun tachi seva korunk apleak ek vhodd man mellʼllo mhunn Ezekielak ekdom borem dislem. (St. 19:8-11) Ani Jehovan taka aplo provadi mhunn vinchun kaddlo dekhun Ezekiel khub upkari aslo.

14. Porgottnnechem kam suru korunk Ezekielan kitem korunk zai aslem?

¹⁴ Uprant Jehovan Ezekielak sanglem: “Sogllim Mhojim utram chit diun aik ani ghott monant dhor.” (Ez. 3:10) Tor Jehovan Ezekielak, kovlleant boroilʼlem aslem tem ugddas dovrunk ani tacher niall korunk sanglem. Oxem kelolean, Ezekielacho bhavarth anikui ghott zalo. Toxench, to lokank porgottcho aslo to khor sondex, to somzonk ani manun gheunk pavlo. (Ez. 3:11) Hea vorvim, Ezekiel porgottnnechem kam suru korunk ani tem somposor korit ravonk pavlo.—Stotr 19:14 sor korat.

15. Porgottnnechem kam korit ravonk ami kitem ‘ghott monant dovrop’ gorjechem?

¹⁵ Porgottnnechem kam korit ravonk, Devachea utram udexim ami pasun amcho bhavarth ghott korit ravop gorjecho. Oxem korunk, Jehova amkam sangta tem soglem ami ‘ghott monant dovrunk’ zai. Punn aiz Jehova amchea lagim koxe toren uloita? Aplem Utor, Bible-a udexim. Tor amchea chintnancher, bhavnancher ani ami korunk sodhtat tea kamancher, Devachea Utracho sodanch probhav poddonk ami kitem korunk zata?

16. Devachem Utor somzon gheunk ani amcho bhavarth ghott korunk ami kitem korunk zai?

¹⁶ Ami jevonn jevun tem jirlea uprant, amchea kuddik ghottai melltta. Teach bhaxen, ami Bible-acho obheas korun tacher niall kelea uprant, amcho bhavarth anik ghott zaunk pavta. Ami oxench kelʼlem Jehovak zai. Tachea Utran ami ‘amchem pott bhorlolem,’ mhunnche, tem somzon ghetlolem taka zai. Ami magnnem korun, Devachem Utor vachun ani tacher niall korun oxem korunk zata. Tor sogleant poilim, Devachem chintop apnnaunk amchea kallzachi toiari korunk, ami magnnem kortat. Uprant ami Bible vachtat. Ani magir tem vachtat toxim, ami kitem vachtat  tea vixim ami bariksannen chintʼtat vo tacher niall kortat. Oxem kelolean, Jehovachem Utor ami anik bore toren somzonk pavtolim ani amcho bhavarth odik ghott zatolo.

17. Ami Bible-ant vachtat tacher niall korop kiteak gorjechem?

¹⁷ Bible vachop ani tacher niall korop kiteak gorjechem? Karonn oxem kelolean, amkam aiz Rajeacho sondex porgottunk ghottai mellttoli. Itlench nhoi, beginuch fuddarak amkam zhoddttecho khor sondex porgottunk poddlo zalear, ami to dhiran porgottʼttolim. Toxench, Jehovachea sobit gunnancher ami niall kortat tednam tachea sangata amchi ixttagot anik ghott zatoli. Hea vorvim, eka orthan, ami kitem tori godd onubhovtolim. Tem mhunnttlear, ami dhadoxi zatolim ani amkam monachi xanti mellttoli.—St. 119:103.

18. Amchea vattarantlea lokank kitem vollkhon gheunk poddttolem, ani kiteak?

¹⁸ Ezekiela bhaxen ami provadi nhoi tem khorem. Tori astana Jehovan Ezekielak dilʼlem toslench ek kam amkam-i dilam. Tem mhunnttlear, tachea Utrant aslolo sondex soglea lokank porgott korop. Ani Jehovak zai tea meren ami ho sondex porgottit ravtolim mhunn ami nichov kela. Tor Jehovacho neai korcho dis ieta tednam amchea vattarant aslolo lok, tankam xittkaunni mellonk na vo Devan tanchi beporva keli oxem mhunnonk xokchona. (Ez. 3:19; 18:23) Tachea bodlek, ami porgottʼttalim to sondex Deva thaunuch ailʼlo mhunn tankam vollkhon gheunk poddttolem.

19. Porgottnnechem kam korit ravonk ani thir ravonk ami kitem ugddas dovrunk zai?

¹⁹ Tor Ezekiela bhaxen, amkam Jehovanuch dhaddleant, tachi povitr xokti amkam ghottai dita, ani tachea Utrantlean amcho bhavarth ghott zata mhunn ami ugddas dovortat tednam Jehovachea modotin ami porgottnnechem kam korit ravtolim ani “xevott poriant” thir ravonk pavtolim.—Mt. 24:13.