OBHEASACHO LEKH 48
Tumchea Visvaxiponnachi Porikxa Zata Tednam Tumchem Chintop Sarkem Dovrat
“Soglea vostumnim tumchem chintop sarkem dovrat.” —2 TIM. 4:5, NW.
GIT 123 Loyally Submitting to Theocratic Order
KITEM XIKTOLIM a
1. Ami amchem chintop sarkem koxem dovrunk zata? (2 Timotak 4:5)
JEHOVA ani tache songottnnecher amkam khub visvas asa astolo. Punn amcher oddchonneo ietat tednam hea visvasachi porikxa zaunk xokta. Oxem zata tednam ami kitem korunk zai? Ami amchem chintop sarkem dovrunk zai, zagrut ravonk zai ani amcho bhavarth ghott samballunk zai. (2 Timotak 4:5 vachat.) Ami xant ravtat, bore bhaxen chintat ani ti poristhiti Jehovache nodren polloitat tednam ami amchem chintop sarkem dovrunk pavtolim. Oxem kelear, amchim bhavnam amchea chintnancher probhav ghalchimnant.
2. Ami hea lekhant kitem polloitolim?
2 Fattlea lekhant, sonvsarantlean ietat tea tin oddchonneam vixim ami polloilʼlem. Hea lekhant, sobhentlean ietat tea tin oddchonneam vixim ami polloitolim, jea udexim Jehovacher aslolea amchea visvasachi porikxa zaunk xokta. Teo mhunnttlear (1) ek bhav vo bhoinn amchea sangata vaitt toren vagleant oxem amkam dista tednam, (2) amkam xist melltta tednam, ani (3) songottnnent zatat te bodlav apnnaunk amkam kotthin zata tednam. Tor hea poristhitimnim amchem chintop sarkem dovrun, ami Jehovak ani tache songottnnek visvaxi koxem ravonk zata?
EK BHAV VO BHOINN AMCHEA SANGATA VAITT TOREN VAGLEANT OXEM AMKAM DISTA TEDNAM
3. Konnui amchea sangata vaitt toren vagla oxem amkam dista zalear ami koxe toren chintunk vo vagonk xoktat?
3 Ek bhav vo bhoinn vo zobabdari aslolo ek bhav, zoso ek vhoddil, tumchea sangata vaitt toren vagla oxem tumkam dislam kai? Tannem chodd korun tumkam mudʼdom zaun dukhounk na astolem. (Rom. 3:23; Jak. 3:2) Tori astana, tache vagnnukek lagon tumi bejar zalim astolim. Ani hea vixim chintun-chintun tumchi nhid pasun gelea astoli. Tumi oxem pasun chintlam zait, ‘Ek bhav hea toren vagta zalear, hem khoreanich Devachem songotton kai?’ Ami oxench chintlolem Soitanak zai. (2 Kor. 2:11) Punn ami oxem chintlear, ami Jehovachi seva korop bond korunk xoktat ani tachem songotton soddun vochonk xoktat. Tor ek bhav vo bhoinn amchea sangata vaitt toren vagleant oxem amkam dista tednam Soitanank zai toxem chintinastana, ami amchem chintop sarkem koxem dovrunk xoktat?
4. Juzeche bhav tachea sangata vaitt toren vagle tednam tannem aplem chintop sarkem koxem dovorlem, ani Juze thaun ami kitem xiktat? (Utpoti 50:19-21)
4 Rag dhorun ravonakat. Juze tornnatto aslo tednam tache bhav tachea sangata vaitt toren vagle. Te tacho itlo dves kortale ki tanche modle thodde taka jivexim pasun marunk sodhtale. (Ut. 37:4, 18-22) Uprant, tannim taka gulam mhunn viklo. Tea pasot 13 vorsam porian, Juzek zaite tras sosunk poddle. Tor hea vellar, Jehova aplo mog korina ani aplea trasanchea vellar tannem apleak soddla, oxem Juze ghoddie chintunk xoktalo. Tori astana, tannem konnachoch rag dhorunk na. Taka aplea bhavancho bodlo gheunk sondhi mellʼlli tednam toxem korchea bodlek, tannem tankam mog dakhoilo ani tankam bhogxile. (Ut. 45:4, 5) Hea toren to xant ravlo dekhun to aplem chintop sarkem dovrunk pavlo. Aplea trasancher dhean diunchea bodlek, Jehovak kitem zai tacher tannem dhean dovorlem. (Utpoti 50:19-21 vachat.) Tor ami kitem xiktat? Konnui amchea sangata vaitt toren vagta zalear, Jehovan amkam soddun dileant oxem ami chintchem nhoi vo ami Jehovacher ragar zaunchem nhoi. Tachea bodlek, amche tras sosunk to amkam koso modot korta tacher ami niallunk zai. Ani amchea sangata vaitt toren vagtat tankam ami mog dakhounk proitn korunk zai.—1 Ped. 4:8.
5. Zobabdari aslole bhav aplea sangata vaitt toren vagle oxem bhav Miqueas-ak dislem tednam tannem aplem chintop sarkem koxem dovorlem?
5 Oxench, Dokxinn Amerikent ravpi, Miqueas nanvachea eka vhoddilak ghoddlem. b Ek pavtti, sobhent zobabdari aslole bhav tachea sangata khub vaitt toren vagle, oxem taka dislem. Tednam taka koxem bhoglem, tea vixim to sangta: “Mhaka itlo usko kednanch zaunk naslo. Hanv ekdom bhielo. Mhaka ratchi nhid pasun poddonasli. Ani hea vixim hanv kainch korunk xokona mhunn chintun hanv khub roddttalom.” Tori astana, bhav Miqueas-an aplem chintop sarkem dovorlem ani aplim bhavnam tabeant dovrunk khub proitn kelo. Tannem porot-porot Jehova lagim tachi povitr xokti magli ani he oddchonnecho fuddo korunk ghottai di mhunn sanglem. Toxench, hea vixim tannem amchea prokaxonamnim sodh kelo. Bhav Miqueas-a koddlean ami kitem xiktat? Amchea sangata konnui vaitt toren vagla oxem amkam dista zalear, ami xant ravonk zai ani amchem chintop sarkem dovrunk proitn korunk zai. Tea bhavan vo bhoinnin toxem kiteak mhunnttlem vo kelem tem amkam ghoddie khobor na astoli. Tor ami Jehova lagim magnnem korunk zai, ani tea poristhiti vixim to bhav vo bhoinn tea toren kiteak chintʼta tem somzonk modot magonk zai. Oxem kelolean, tea bhavan vo bhoinnin amkam mudʼdom zaun dukhounk na mhunn chintunk, ani tankam bhogsunk amkam modot zatoli. (Mho. 19:11) Tor tumkam oxem kitem-i ghoddtta tednam Jehovak te poristhiti vixim soglem khobor asa ani tem sosunk to tumkam goroz ti ghottai ditolo mhunn ugddas dovrat.—2 It. 16:9; Up. 5:7.
AMKAM XIST MELLTTA TEDNAM
6. Jehova amcho mog korta dekhun to amkam xist dita hem somzon ghevop kiteak gorjechem? (Hebrevank 12:5, 6, 11)
6 Jehova amkam xist dita tednam amkam vaitt dista vo khub dukh bhogta. Punn amkam kitlem dukh bhoglam tacheruch ami dhean ditat zalear ti xist amkam favo nasli, oxem ami chintunk puro. Vo te xistintlean ami xikonk zai aslem tem xikonk ami fattim soronk puro. Ami oxem kelem zalear, Jehova amcho mog korta dekhun tannem amkam xist dilea hem somzonk ami chuktolim. (Hebrevank 12:5, 6, 11 vachat.) Toxench, amkam kitlem dukh zalam teach vixim ami chintit ravlim zalear, ami Soitanak he sondhecho faido kaddunk ditolim. Karonn ami ti xist nakarloli, ani Jehova ani sobhe thaun pois gelolim Soitanak zai. Tor amkam xist melltta tednam ami amchem chintop sarkem koxem dovrunk zata?
Pedru khalto aslo ani tannem xist manun ghetli dekhun Jehovan taka aple sevent anikui kam korunk uzar kelo (Peregraf 7 polloiat)
7. (a) Chitrant dakhoilʼlea pormonnem, Pedrun xist manun ghetlea uprant Jehovan taka koso uzar kelo? (b) Pedru thaun ami kitem xiktat?
7 Xist manun gheiat ani goroz te bodlav korat. Jezun zaite pavtti Pedruk dusream apostlam mukhar xist dili. (Mk. 8:33; Luk. 22:31-34) Tea vellar Pedruk kitli loz zali astoli nhoi! Tori astana, to aplea chukintlean xiklo, tannem xist manun ghetli ani Jezuk visvaxi ravlo. Uprant, Pedruchea visvaxiponnak lagon Jehovan taka zaitim besanvam dilim ani taka sobhent mhotvacheo zobabdareo dileo. (Ju. 21:15-17; D.I. 10:24-33; 1 Ped. 1:1) Ami Pedru thaun kitem xikonk zata? Amkam zalea te lojecher dhean dinastana, ami xist manun ghetat ani goroz te bodlav kortat tednam ami Jehovak ani amchea bhav-bhoinnank anikui faideachim zaunk pavtolim.
8-9. Bhav Bernardo-k xist mellʼlli tednam survatek taka koxem bhoglem, punn tachem chintop sarkem dovrunk taka koxi modot zali?
8 Atam ami Mozambique-ant ravpi, bhav Bernardo-chem udharonn polloum-ia. To vhoddil mhunn seva kortalo. Punn uprant tachi zobabdari kaddun ghetli. Hea vixim taka survatek koxem dislem tea vixim bhav sangta: “Mhaka mellʼlloli xist mhaka avddonk na dekhun hanv rag dhorun boslo.” Toxench, sobhentlim bhav-bhoinnam tache vixim kitem chintʼtolim mhunn taka usko zalo. Hea vixim to sangta: “Tea poristhiti vixim sarkem chintop dovrunk ani Jehovacher ani tache songottnnecher porot visvas dovrunk mhaka thodde mhoine lagle.” Tor Bernardo-k tachem chintop sarkem dovrunk koxi modot zali?
9 Bernardo-n aplem chukichem chintop pois kelem. To sangta: “Hanv ek vhoddil mhunn seva kortalo tednam Hebrevank 12:7 uzar korun, Jehovache xisti vixim sarkem chintop dovrunk hanv dusreank modot kortalo. Punn atam hanvem mhakach vicharlem: ‘Ho solʼlo konnem apnnaunk zai?’ Soglea Jehovachea sevokamnim. Tem mhunnttlear, hanvem pasun.” Tor Jehovacher ani tache songottnnecher aplo visvas porot ghott korunk, Bernardo Bible vachunk ani tacher niall korunk anik vell sartalo. Toxench, bhav-bhoinnam aplea vixim kitem chintʼtat, tea vixim taka usko zatalo. Tori astana, to tanchea sangata porgottnnent kam kortalo ani mittingent bhag ghetalo. Vell soron gelo toso, Bernardo-k porot vhoddil mhunn nemlo. Tor Bernardo bhaxen tumkam xist mellʼllear, tumkam kitli loz bhogli tacher dhean diunchea bodlek to solʼlo apnnaiat ani goroz te bodlav korat. c (Mho. 8:33; 22:4) Oxem korun tumi Jehovak ani tache songottnnek visvaxiponnan chittkun ravlear, Jehova tumkam besanvam ditolo mhunn tumi khatri dovrunk zata.
SONGOTTNNENT ZATAT TE BODLAV APNNAUNK AMKAM KOTTHIN ZATA TEDNAM
10. Koslo bodlav zalolean ghoddie thoddea Israelitkar dadleanchea visvasachi porikxa zali?
10 Songottnnent bodlav zatat tednam amchea visvaxiponnachi porikxa zaunk xokta. Ani ami chotur nant zalear, hea karonnak lagon ami Jehova koddlean pois vochonk puro. Hea vixim amkam adlea tempa voilea Israelitkaranchem udharonn asa. Israelitkarank Kaido diunchea poilim, Jehovan familichea vhoddilank, vedi bandunk ani aplea famili pasot bhettounni korunk porvangi dilʼli. (Ut. 8:20, 21; 12:7; 26:25; 35:1, 6, 7; Job 1:5) Punn Kaido dilea uprant, Jehovan Aaronache familintlean iadnik vinchun kaddle. Tor atam familiche vhoddil nhoi, punn fokot iadnikuch Jehovak bhettounni diunk xoktale. Ani Aaronache sonstintlean naslolo konnui bhettounni kortalo zalear, taka jivexim pasun marunk xoktale. d (Lev. 17:3-6, 8, 9) Ghoddie heach karonnak lagon Korah, Dathan, Abiram, ani 250 mukheleamnim, Moizes ani Aaronacho virodh kelo. (Lok. 16:1-3) Tannim oxem korunk karonn kitem-i asum, punn te Jehovak visvaxi ravonk nant. Tor songottnnent zatat tea bodlavank lagon amchea visvaxiponnachi porikxa zata tednam ami kitem korunk zata?
Kohatitanchi zobabdari bodolʼli tednam te gavpi, dar rakhpi vo gudanvanche dekhrekh korpi mhunn seva korunk khuxal asle (Peregraf 11 polloiat)
11. Kohatit Levitam thaun ami kitem xiktat?
11 Songottnnent zatat tea bodlavank purnn toren tenko diat. Israelitkaram oronneant aslim tednam Kohatit lokank ek khas zobabdari asli. Ti mhunnttlear, Israelitkaram eka zagear thaun dusrea zagear voitalim tednam thoddea Kohatit Levitank sogleam mukhar Arkpett ubarun vhoronk sondhi asli. (Lok. 3:29, 31; 10:33; Josh. 3:2-4) Punn Israelitkar Bhasailʼlea Desant gelea uprant, tankam porot-porot Arkpett eka zagear thaun dusrea zagear vhoronk poddonasli. Ani Solomon raza zalo te meren, thoddea Kohatitanchim kamam bodolʼlim. Tem mhunnttlear, thoddeank gavpi, dar rakhpi ani gudanvanche dekhrekh korpi mhunn nemle. (1 It. 6:31-33; 26:1, 24) Punn tanchem kam bodolʼlem dekhun Kohatit Levit gunngunnle, vo adim te khas zobabdari samballttale dekhun atam pasun tankam ek khas kam zai oxem tannim sanglem mhunn Bible-ant khoinch songonk na. Tor ami kitem xiktat? Jehovache songottnnent bodlav zatat tednam, ani thoddea bodlavancho amchea kamacher probhav poddtta tednam pasun, ami purnn kallzan taka tenko diunk zai, ani ami kortat tea khoinchea-i kamant khuxal asonk zai. Ami ugddas dovrunk zai ki Jehova, amchea kamacher adarit amkam moladik mhunn lekhina, punn ami tachem aikotat tednam ami taka chodd valorachim zatat.—1 Sam. 15:22.
12. Zaina-k Bethel soddchem poddlem tednam tika koxem dislem?
12 Atam ami bhoinn Zaina sangata kitem zalem tem polloum-ia. Bhoinn 23 vorsam poros chodd vorsam thaun Bethel-ant seva kortali. Punn uprant, tika khas pioneer mhunn seva korunk dhaddli. Tika Bethel-ant seva korop khub avoddttalem. Tea pasot, tichea kamant zalʼlo bodlav manun gheunk tika khub kotthin zalem. Hea vixim ti sangta: “Mhaka Bethel soddun vochonk poddlem tednam mhaka dhoko boslo. Hanv kainch kamachem nhoi oxem mhaka dislem. Ani hanv mhakach, ‘Hanv khoim chuklem?’ mhunn vicharit aslem.” Toxench, dukhachem mhunnttlear, sobhentlea thoddea bhav-bhoinnanchea utrank lagon tichem dukh anik vaddlem. Tannim bhoinnik mhunnttlem: “Tum borem kam kortalem zalear songotton tuka Bethel-antlean kednanch vochonk diunchem naslem.” Hea pasot thoddo vell porian bhoinn itli niraxi zali, ki dor rati ti dukhamnim roddttali. Punn Zaina fuddem oxem mhunntta: “Mhojea sangata jem ghoddlem tea pasot, hanv Jehovachea mogacher ani tachea songottnnecher kednanch dubhavunk na.” Tor Zaina-k aplem chintop sarkem dovrunk koxi modot zali?
13. Bhoinn Zaina-n aplem chukichem chintop pois korunk kitem kelem?
13 Bhoinn Zaina-n amchea prokaxonamnim, tiche poristhitik lagu zatat ani tika hi oddchonn sosunk modot kortat, tosle lekh vachle. Oxem kelolean tichem chukichem chintop pois korunk tika modot zali. Khas korun, Febrer 1, 2001-achea Pahrogopur-ant aslolo, “You Can Cope With Discouragement!” hea lekha thaun tika khub modot zali. Tea lekhant, Bible boroupi Markuchea kamant bodol zalo tednam taka ghoddie oxench bhoglem astolem mhunn sanglolem. Bhoinn Zaina sangta: “Niraxi zaina zaunk, Markucho onubhov mhaka goroz asli toslench vokhod koxem zaun aslem.” Toxench, Zaina eksurem ravonk na. Tem bhav-bhoinnam sangata mellon porgottnni korit ravlem ani tannem apnnachech churchure korop bond kelem. Tea bhair, Jehovache songottnnent ghetat te nirnnoi povitr xokte udexim zatat, songottnnent fuddakar gheupi bhav apli khub kallji kortat, ani Jehovachem kam chaluch urop tache songottnnek sogleam-von mhotvachem mhunn bhoinnin vollkhon ghetlem.
14. Bhav Vlado-k songottnnent zalolea koslea bodlavak tenko diunk kotthin zalem, ani taka koxi modot zali?
14 Atam ami Slovenia-nt ravpi, 73 vorsanchea, Vlado nanvachea eka vhoddilachea udharonnacher dhean dium-ia. Tachi sobha dusre eke sobhe sangata zoddloli, ani to mittingek voitalo tem Raj-ghor bond kelʼlem. Hea vixim to sangta: “Hem itlem sobit Raj-ghor kiteak bond kelem tem mhaka somzona zalem. Toxench, tem halinch sarkem kelʼlem ani thoim noveo vostu pasun ghatloleo dekhun mhaka anik dukh zali. Ani hanv ek thovoi aslolean thoincheo thoddeo moderacheo vostu hanvem kelʼleo. Tea bhair, hea bodlavak lagon amchea oslea zannttea bhav-bhoinnank zaitea oddchonneancho fuddo korcho poddlo.” Tor hea bodlavak tenko diunk bhav Vlado-k koxi modot zali tea vixim to sangta: “Jehovache songottnnent zatat tea bodlavank tenko dilolean amkam sodanch faido zata. Toxench, fuddarak zatolea vhodd bodlavam pasot te amkam atanch toiar kortat.” Tor tumche sobhek dusre eke sobhe sangata zoddlea kai? Vo Jehovache sevent tumi kortalim tea kamant bodol zala kai? Toxem zalear, tumkam koxem bhogta tem Jehova somzota mhunn khatri dovrat. Ani tumi hea bodlavank tenko ditat ani Jehovak ani tache songottnnek visvaxiponnan chittkun ravtat tednam to tumkam besanvamnim bhortolo.—St. 18:25.
SOGLEA VOSTUMNIM TUMCHEM CHINTOP SARKEM DOVRAT
15. Sobhentlean oddchonneo ietat tednam ami amchem chintop sarkem koxem dovrunk xoktat?
15 Xevott lagim pavta toso, sobhentlean ieunk xoktat toslea anikui oddchonneancho amkam fuddo korunk poddot. Heo oddchonneo Jehovacher aslolea amchea visvasachi porikxa korunk xoktat. Tea pasot, ami sodanch amchem chintop sarkem dovrunk zai. Tor ek bhav vo bhoinn amchea sangata vaitt toren vagleant oxem amkam dista zalear ami rag dhorun ravonk zaina. Toxench amkam xist melltta zalear, amkam kitli loz bhogli tacher dhean dinastana ami ti xist manun gheunk zai ani goroz te bodlav korunk zai. Tea bhair, Jehovachea songottnnent bodlav zatat tednam ani tea bodlavank lagon amchea kamacher probhav poddtta zalear pasun ami purnn toren tea bodlavank tenko diunk zai ani Jehovachem margdorxon apnnaunk zai.
16. Ami Jehovacher ani tachea songottnnecher amcho visvas ghott koso samballunk zata?
16 Tor amchea visvasachi porikxa zata tednam pasun ami Jehovacher ani tachea songottnnecher amcho visvas ghott koso samballunk zata? Ami amchem chintop sarkem dovrunk zai. Tem mhunnttlear, ami xant ravonk zai, bore bhaxen chintunk zai ani ti poristhiti Jehovache nodren pollounk zai. Toxench, ami fuddo kortat toslea poristhitincho bore toren fuddo kelo tea Bible-antlea udharonnancher ami obheas ani niall korunk zai. Ami magnneant Jehova lagim modot magonk zai, ani sobhe thaun kednanch pois vochonk zaina. Ami oxem kelear amchea jivitant kitem-i zaum, Soitan amkam kednanch Jehova ani tachea songottnne koddlean pois vhoronk xokchona!—Jak. 4:7.
GIT 126 Zagrut Rav, Ghott Kor Tuzo Bhavarth
a Thodde pavtti, sobhent oxem kitem-i zaunk puro, jea vorvim Jehova ani tache songottnnecher aslolea amchea visvasachi porikxa zaunk xokta. Tor hea lekhant, ami oslea tin oddchonneam vixim polloitolim ani amchem visvaxiponn samballunk ami kitem korunk zata tem xiktolim.
b Thoddim nanvam bodolʼleant.
c Agost 15, 2009-achea Pahrogopur-ant, p. 30-acher aslolo, “Did You Once Serve? Can You Serve Again?” hea lekhant tumkam faideak poddttat tosleo anikui suchounneo mellonk xoktat.
d Kaidea khala, familiche vhoddil eka poslolea zonvarak jevnna pasot marunk sodhtale zalear tannim tea zonvarak povitr tombunt vhoronk zai aslem. Punn povitr tombu thaun khub pois ravpi familichea vhoddilank oxem korunk poddonaslem.—D.S. 12:21.