1-2. Eka vhoddilacheo zobabdareo kitem?

 TUM ek sobhecho sevok mhunn seva korta zalear, ek vhoddil zaunk goroz te choddxe gunn tunvem vaddoileat astole. Tor ek vhoddil zaun bhav-bhoinnanchi anikui seva korunk tunvem fuddem soronk zata kai?—1 Tim. 3:1.

² Eka vhoddilacheo zobabdareo kitem? To porgottnnechea kamant fuddakar gheta, bhav-bhoinnank xikounk ani gonvlli bhett korunk khub vavr korta, toxench tachea utramnim ani korneamnim bhav-bhoinnancho bhavarth ghott korunk modot korta. Teach pasot, hea koxtti vavr korpi amchea bhavank Bible-ant ‘dennim mhunn dilʼle munis’ mhunnttleat.—Ef. 4:8.

3. Tunvem ek vhoddil zaunk koso vavrunk zata? (1 Timotak 3:1-7; Titak 1:5-9)

³ Tunvem ek vhoddil zaunk koso vavrunk zata? Vhoddil zavop, ek kam melloun gheunchea sarkem nhoi. Karonn tuka umkeoch kola asat zalear, tuka ek kam mellonk xokta. Punn vhoddil zaunk, tuka porgottchi vo xikounchi bori kola aslearuch puro nhoi. Bible-ant, 1 Timotak 3:1-7 ani Titak 1:5-9-ant sanglole gunn pasun tuka asonk zai. (Vachat.) Tor tunvem khas korun khoinchea tin mudʼdeancher kam korunk zai tem hea lekhant polloum-ia. Tem mhunnttlear, sobhent ani sobhe bhair tunvem ek borem nanv koxem zoddunk zata, tujea familicho tunvem bore toren koso samball korunk zata, ani ap-khuxen bhav-bhoinnanchi seva korunk tunvem kitem korunk zata tacher dhean dium-ia.

EK BOREM NANV ZODDUNK VAVR KOR

4. Tujer “kosloch arop lailʼlo asonk zaina” hacho orth kitem?

⁴ Ek vhoddil zaunk, tujer “kosloch arop lailʼlo asonk zaina.”  Hacho orth, tuje bore vagnnukek lagon bhav-bhoinnam modem tuka ek borem nanv asonk zai. Tea bhair, ‘bhailea lokamnim pasun tujea vixim borem ulounk zai.’ Jehovachi seva korinant tim, tuje patienne vixim vaitt uloit. Punn tum promannik ani ek boro munis mhunn tankam kosloch dubhav asonk favona. (Dan. 6:5, 6) Tor tukach vichar: ‘Sobhe bhitor toxench bhair, mhaka ek borem nanv asa kai?’

5. “Boreponnacho mog korta toslo” mhunnttlear kitem?

⁵ Toxench, tum “boreponnacho mog korta toslo” asonk zai. Hacho orth, tum dusreanche bore gunn polloitolo ani tea gunnank lagon tankam xabaski ditolo. Toxench dusrim opekxa korinant tednam pasun, tum tankam borem korunk ap-khuxen fuddem sortolo. (1 Tes. 2:8) Ho gunn vhoddilank asop kiteak gorjecho? Karonn vhoddil aplo zaito vell bhav-bhoinnanchi kallji gheunk ani apleo zobabdareo samballunk uzar kortat. (1 Ped. 5:1-3) Tor tankam khub kam poddtta tem khorem. Tori astana, dusreank modot korunk tankam khub khuxalkai melltta.—D.I. 20:35.

6. “Poramos korta toslo” asop mhunnttlear kitem? (Hebrevank 13:2, 16; chitr pasun polloiat.)

⁶ Tea bhair, tum “poramos korta toslo” asonk zai. Tujim lagxilʼlim ixttam nhoi tea munxam pasotui tunvem udarponnan borim kamam korunk zai. (1 Ped. 4:9) Bible-ache eke dictionary-nt sanglam ki poramos korta to munis, onvollkhi munxank pasun doia dakhoita ani khuxalkaien tankam aplea ghorant ieukar dita. Tor tunvem tukach vicharunk zata: ‘Mhojea sobhent konnui poilech pavtti ietat tednam, hanv tankam doia dakhoitam kai?’ (Hebrevank 13:2, 16 vachat.) Poramos korta to munis soglea torechea lokank, zoxem goribank, toxench jahir bhaxonnam diunk dusre sobhe thaun ieupi bhavank, ani dusreank urba diunk khub vavr korpi bhav-bhoinnank, zoxem sorkittachi dekhrekh korpeank doia dakhoita.—Ut. 18:2-8; Mho. 3:27; Luk. 14:13, 14; D.I. 16:15; Rom. 12:13.

7. “Poixeancho mog korpi asonk zaina” mhunnttlear kitem?

⁷ Toxench, tum “poixeancho mog korpi asonk zaina.” Hacho orth, tujem dhean poixe ani vostu ektthaim korpacher asonk favona. Tum girest vo gorib asum, Jehovachi seva korop tujea jivitant sodanch poilem asonk zai. (Mt. 6:33) Tunvem tuzo vell, takot ani tujea lagim asat teo vostu Jehovachi bhokti korunk, tujea familichi kallji gheunk ani bhav-bhoinnanchi seva korunk uzar korunk zai. (Mt. 6:24; 1 Ju. 2:15-17) Tor tunvem tukach vicharunk zata: ‘Poixeam vixim mhojem  chintop kitem asa? Mhojea lagim asa tantunuch hanv dhadoxi asam kai? Vo mhojem dhean poixe ani girestkai ektthaim korpacheruch asta kai?’—1 Tim. 6:6, 17-19.

8. Tum ‘tujea sonvoim-ancher’ ani “svotacher tabo dovorta toslo asonk zai” mhunnttlear kitem?

⁸ Tum ‘tujea sonvoim-ancher tabo dovorta toslo’ asonk zai, ani tunvem ‘svotacher tabo dovrunk zai.’ Hacho orth, tujea jivitant kitem-i kortana tum somjikaien vagtolo. Tem mhunnttlear, tum hispa bhair khauncho vo pieuncho na. Toxench, nhespa-dispa vixim ani monoronjona vixim tum sarke nirnnoi ghetolo. Tea bhair, Jehovachi bhokti korinant tea lokanchi jiepachi chal tum apnnauncho na. (Luk. 21:34; Jak. 4:4) Toxench, tuka konnui rag haddtta tednam pasun, tum xant astolo. Itlench nhoi, tum “bebdikai korpi . . . asonk zaina.” Toxench, tum chodd pieta hea nodren lokamnim tuka pollouncho nhoi. Tor tukach vichar: ‘Jea toren hanv mhojem jivit jietam, tantuntlean hanv mhojea sonvoim-ancher ani svotacher tabo dovortam toslo asam mhunn dison ieta kai?’

9. Tum “sarkem chintop dovorpi” ani “kaidea pormonnem cholpi” asonk zai hacho orth kitem?

⁹ Toxench, tum “sarkem chintop dovorpi” asonk zai. Hacho orth, veg-vegllea poristhitim vixim Bible kitem sangta tem tum bariksannen chintʼtolo, ani umkech poristhitint Bible-antlim khoinchim totvam lagu zatat tacher tum bariksannen niall kortolo. Hea vorvim, tuka te poristhiti vixim anikui somzonni mellttoli ani tum bore nirnnoi gheunk pavtolo. Goddboddan nirnnoi gheunchea bodlek, sogli mahiti zannam zalea uprant tum panvl ghetolo. (Mho. 18:13) Oxem kelʼlean, tuje nirnnoi Jehovachea chintpa pormonnem astole. Tea bhair tum “kaidea pormonnem cholpi” asonk zai. Hacho orth, tunvem soglem manddavollin korunk zai, tuka dilʼlim soglim kamam nemlolea vella bhitor korunk zai, tum patieupa sarko asonk zai ani nirdexon pallunk toiar asonk zai. Oxem kelear tum ek borem nanv zoddunk pavtolo. Tor atam, ek boro familicho vhoddil zaunk tuka kosle gunn asonk zai mhunn Bible-ant sanglam tem polloum-ia.

TUJEA FAMILICHO BORE TOREN SAMBALL KOR

10. Eka bhavan aplea “familicho bore toren samball” koso korunk zata?

¹⁰ Tum kazari zalear, ani ek vhoddil mhunn vavrunk sodhta zalear, tuji famil pasun dusream pasot ek borem udharonn asonk zai. Oxem korunk, tum tujea “familicho bore toren samball korpi asonk zai.” Tem mhunnttlear, tunvem mogan tujea familicho samball korunk zai ani tanchea pasot bore nirnnoi gheunk zai. Hacho orth, kuttumbik bhoktent tunvem fuddakar gheunk zai, tuji famil mittingek hajir zata ani porgottnnent aplem boreantlem-borem dita hachi khatri korunk zai. Oxem korop kiteak mhotvachem asa? Apostl Paulun somzailem: “Ek munis aplea familicho samball korunk nokllo zalear, to Devachea sobhechi kallji koso ghetolo?”—1 Tim. 3:5.

11-12. Ek bhav vhoddil zaun vavr korunk sodhta zalear, tachea bhurgeanchi vagnnuk bori asop kiteak mhotvachem? (Chitr pasun polloiat.)

¹¹ Tum ek bapui ani tujim bhurgim 18 vorsam poros lhan asat zalear, tim “adnea pallttat toslim ani borea vagnnukechim asonk zai.” Tunvem tankam mogan xikounk zai ani proxikxonn diunk zai. Her bhurgeam bhaxen, tujim-i bhurgim hanson-khellon khuxalkaien jielʼlim tuka zai tem khorem. Punn tunvem tankam tujeo adnea pallunk, herank resped diunk, ani tanchi vagnnuk bori dovrunk xikovop gorjechem. Toxench, Bible totvam pormonnem jieunk, bautizma pasot purtim zaunk ani Jehova sangata tanchi ixttagot ghott korunk tankam modot korunk tujean zata tem soglem tunvem korunk zai.

¹² Toxench, tujim “bhurgim bhavarthant asonk zai ani tancher folgam marpi vo adnea pallinant toslim mhunn arop asonk zaina.” Kiteak? Eka fuddakar gheupi bhava vixim chintat, zachim bhurgim bautizm ghetlolim vo bautizm gheunk naslolim porgottnnaram asat. Tannim ek gombhir patok kelem zalear, to bhav ek sobhecho sevok vo  vhoddil zaun urtolo vo na tem vhoddil tharaitole. Tannem aplea bhurgeank proxikxonn ani xist diunk nasli zalear, to chodd korun vhoddil mhunn seva korunk xokchona.—Otumbr 15, 1996-achea Pahrogopur-ant, p. 21-acher per. 6-7 polloiat.

SOBHENTLEA BHAV-BHOINNANCHI BORE BHAXEN SEVA KOR

13. Tum ek “somjikaiecho” munis ani “apleak zai tench korpi” nhoi mhunn tunvem koxem dakhounk zata?

¹³ Kristi gunn aslole bhav, sobhe pasot moladik zaun asat. Zoxem, ek “somjikaiecho” munis dusream sangata xanti korunk khub vavr korta. Toxench, to dusreank eka-meka sangata xanti samballunk modot korta. Tor ek somjikaiecho munis zaunk, dusreanchem kan diun aikonk ani tankam koxem bhogta tem zannam zaunk vavr kor. Udharonnak, vhoddilanche eke mittingek, tuzo vichar soddun choddxea vhoddilanche vichar ek asat ani te Bible-antlea totvam add vochonant zalear, tum tanchea nirnnoi-ak tenko ditolo kai? Toxench, tum “apleak zai tench korpi” asonk zaina. Punn dusreanche vichar zannam zavop mhotvachem mhunn ugddas dovor. (Ut. 13:8, 9; Mho. 15:22) Tea bhair, tum “zhogddim korpi” vo “rokddoch ragar zata toslo” asonk zaina. Hacho orth, tunvem dusream sangata vad-vivad korcho nhoi, punn tanchea sangata doiall toren ani respedan ulounk zai. Itlench nhoi, ‘xanti samballpi’ munis aslolean poristhiti ekdom kotthin zata tednam pasun, xanti korunk tunvem poilem panvl gheunk zai. (Jak. 3:17, 18) Tujea doiall utram vorvim, dusreancho, tem mhunnttlear amcho virodh kortat tancho pasun rag nivonk xokta.—Fudd. 8:1-3; Mho. 20:3; 25:15; Mt. 5:23, 24.

14. Tum “novoch sotant ailʼlo asonk zaina” ani “visvaxi” asonk zai mhunnttlear kitem?

¹⁴ Tum vhoddil zaun vavr korunk sodhta zalear, tum “novoch sotant ailʼlo asonk zaina.” Bautizm gheun tuka zaitim vorsam zaunk zai oxem na tem khorem. Punn tuka ek vhoddil mhunn nemchea poilim, Jehova sangata tuji ixttagot ghott asonk zai ani Bible uzar korun bore nirnnoi koxe gheunche tem tunvem zannam zaunk zai. Toxench, tunvem Jezu bhaxen khalti asonk zai. Ani Jehovache songottnne thaun melltta tem khoinchem-i kam korunk tunvem toiar asonk zai. Tuka rokddeoch zobabdareo mellonant zalear  bejar zainaka. Punn pasiens dakhoi ani tuka zobabdari kednam divop tem Jehova ekdom bore bhaxen zannam mhunn ugddas dovrun tacher patieun rav. (Mt. 20:23; Filp. 2:5-8) Toxench Jehovak chittkon ravon, tachea nitivont dorjeam pormonnem cholon ani songottnne thaun melltta tem nirdexon pallun tum “visvaxi” asa mhunn tunvem dakhoun diunk zai.—1 Tim. 4:15.

15. Vhoddil zaunk tunvem ekdom borim bhaxonnam diupi asonkuch zai kai? Somzaiat.

¹⁵ Ek dekhrekh korpi “xikounk purto asonk zai” mhunn Bible-ant spoxttponnim sanglam. Hacho orth, to ekdom borim bhaxonnam diupi asonk zai kai? Na, toxem nhoi. Karonn zaite vhoddil borim bhaxonnam diupi asonant zalear pasun, te porgottnni ani gonvlli bhett kortana Bible uzar korun bore toren xikounk ani bhav-bhoinnank urba diunk xoktat. (1 Korintkarank 12:28, 29 ani Efezkarank 4:11 sor korat.) Tor tum ekdom borim bhaxonnam diupi asonkuch zai oxem nhoi, punn ek boro xikoupi zaunk tunvem vavr korit ravonk zai. Tunvem hem koxem korunk zata?

16. Ek boro xikoupi zaunk tunvem kitem korunk zai? (Chitr pasun polloiat.)

¹⁶ Tuji “xikoupachi kola, visvas dovrunk zata toslea, Devachea utrachea adarit asonk zai.” Tor ek boro xikoupi zaunk tum jem kitem xikoita ani tum bhav-bhoinnank je solʼle dita te Devachea Utra pormonnem asonk zai. Ani oxem zaunk, Bible ani Bible adarit prokaxonancho tunvem kholaien obheas korunk zai. (Mho. 15:28; 16:23) Bible-antlea versancho obheas kortana, amchea prokaxonamnim tanchi kitem somzonni dilea tacher tunvem dhean diunk zai. Oxem kelʼlean, tum tim versam sarke toren apnnaunk pavtolo. Ani uprant, bhav-bhoinnank xikoitana tujea aiknnareanchea kallzak lagta tea toren xikounk tunvem proitn korunk zai. Tea bhair, tum onnbhov aslolea vhoddilam lagim solʼle magta ani te apnnaita tednam tum anik boro xikoupi zaunk pavtolo. (1 Tim. 5:17) Vhoddil dusreank ‘urba ditat’ tosle asonk zai. Punn thodde pavtti tannim bhav-bhoinnank “sudharunkui” poddtta. Tor te bhav-bhoinnank urba dium vo solʼle dium, tannim sodanch doiall toren vagonk zai. Tum movall asta, mog dakhoita ani tuji xikounn Devachea Utrachea adarit asta tednam tum ek boro xikoupi zaunk pavtolo. Karonn oxem kelʼlean, amcho Vorto Xikoupi Jezuchi tum dekh ghetolo.—Mt. 11:28-30; 2 Tim. 2:24.

 VAVR KOROP SODDUN DIUM NAKA

17. (a) Sobhechea sevokank soddun dinastana vavr korit ravonk koxi modot zatoli? (b) Eka bhavak vhoddil mhunn nemchea poilim vhoddilamnim kitem ugddas dovrunk zai? (“ Eka Bhavak Vhoddil Mhunn Nemtana Somjikai Dakhoiat” hem boks polloiat.)

¹⁷ Tor he sogle gunn zannam zalea uprant, tum kednanch ek vhoddil zaunk pavchona mhunn tuka ghoddie disot. Punn ugddas dovor, he sogle gunn tunvem poripurnn toren dakhounk zai mhunn Jehova ani tachem songotton opekxa korina. (1 Ped. 2:21) Toxench, he gunn vaddounk Jehovachi bollixtt povitr xokti tuka modot korunk xokta. (Filp. 2:13) Tor tum eka umkeach gunnacher kam korunk sodhta kai? Hoi zalear, tea vixim Jehova lagim magnnem kor, tea gunna vixim sodh kor ani tunvem khoim sudharnni korunk zai tem eka vhoddila lagim vichar.

18. Soglea sobhechea sevokamnim kitem korunk zai?

¹⁸ Ami sogleamnim, tem mhunnttlear vhoddilamnim pasun hea lekhant sanglole gunn vaddounk vavr korit ravonk zai. (Filp. 3:16) Tum ek sobhecho sevok zaun asa kai? Hoi zalear, vaddavoll korit rav. Jehovachi ani bhav-bhoinnanchi anikui seva korunk tuka modot kor ani proxikxonn di mhunn Jehova lagim magnnem kor. (Iz. 64:8) Vhoddil zaunk tum zo vavr korta tacher Jehovan zaitim besanvam ghalum!