CHUKONASTANA Bible-acho obheas korunk ani tantuntlean khuxalkai mellonk tumkam kotthin zata kai? Amkam sogleank thodde pavtti oxem korunk kotthin zata astolem. Punn ami chukonastana kortat tea her vostum vixim chintat. Zoxem nhavop. Hem kam korunk amkam vell ani vavr lagta tem khorem, punn toxem kelea uprant amkam khub borem dista. Teach bhaxen, Bible-acho obheas kelea uprant amkam khub borem dista! (Ef. 5:26) Tor chukonastana Bible-acho obheas korunk tumkam modot zaunk xoktat tosleo thoddeo suchounneo sokol dileat.

• Ek umkoch vell tharaiat. Svotacho Bible obheas, Kristanvamnim korunk zai tea ‘chodd mhotvachea’ kamam modlem ek kam zaun asa. (Filp. 1:10) Tumi tharaila to vell ani dis visorna zaunk, tumi to eka kagdacher borounk zata ani tumkam sompeponnim dista thoim tem lavunk zata, zoxem fridge-achea darar. Vo tumkam ugddas zaunk tumchea fonar alarm dovrunk zata.

• Tumi kitlo vell obheas kortolim tem tharaiat. Tumkam khub vell obheas korunk avoddtta kai? Vo thoddo-thoddo vell obheas kelear tumkam faideak poddtta? Tumkam kitem boreak poddttolem tem tumi bore bhaxen zannant. Tor tea pormonnem, tumi kitlo vell obheas kortolim tem tharaiat. Punn obheas korchea vellar toxem korunk tumkam mon na zalear kitem? Tumi fokot dha minttam obheas korunk zata. Tea thoddeach vellan pasun tumi zaitem xikonk zata. Ani oxem korit ravlear, Bible obheas korop tumkam avddonk lagtolem ani tumkam anikui chodd vell obheas korunk-xem distolem.—Filp. 2:13.

• Tumi khoinchea vixoi-ancher obheas kortolim tem poilinch tharaiat. Tumi obheas korunk bostat tednam tumi khoinchea vixoi-acher obheas kortolim tem chintunk boslear, tumi ‘tumcho vell bore toren uzar korchimnant.’ (Ef. 5:16) Tumi khoinchea lekhancher vo vixoi-ancher obheas kortolim tanchem ek list korunk zata. Obheas kortana tumchea monant kitem prosn ietat zalear tumi te boroun dovrunk xoktat. Ani obheasa uprant, tumchea monant kitem-i prosn vo ideas ietat, te tumi fuddlea pavtti obheas korunk boroun dovrunk xoktat.

• Goroz poddtta tednam bodol korunk toiar ravat. Tumi chukonastana Bible-acho obheas korop khub gorjechem zaun asa. Hea pasot goroz poddtta tednam, Bible obheas korunk tumi zo dis ani vell tharaila tantunt bodol korunk toiar ravat. Toxench, tumi kitlo vell poriant obheas kortolim, vo khoinchea vixoi-ancher obheas kortolim hantunt pasun bodlav korunk zata.

Tor chukonastana Bible-acho obheas kelʼlean amkam khub faido zata. Jehova sangata amchi ixttagot ghott zata, ami jivitant bore nirnnoi gheunk pavtat ani amkam ghottai melltta.—Josh. 1:8.