OBHEASACHO LEKH 44
GIT 33 Ghal Tuje Uske Jehovacher
Onʼneai Zata Tednam Tumi Jehovak Koxim Visvaxi Ravonk Zata?
“Vaittak tumcher zoit vhoronk dium nakat, punn borem tem korun vaittacher zoit melloit ravat.”—ROM. 12:21.
MUKHEL MUDʼDO
Tumchea sangata onʼneai zata tednam poristhiti anikui bigoddna zaunk tumi kitem korunk zata?
1-2. Amchea sangata kosle toreche onʼneai zaunk xoktat?
JEZUN ek pavtti ek vopar sangli, zantunt ek vidva, eka neai korpea lagim aplea pasot neai kor mhunn magot asli. Ani Jezuche xis ti vopar bore bhaxen somzonk xokle. Karonn tanchea disamnim zaitea lokam sangata onʼneai zatalo. (Luk. 18:1-5) Tea vidvechi poristhiti aiz ami pasun somzonk xoktat. Karonn amchea sangata pasun kednam-na-kednam onʼneai zala.
2 Aiz voita thoinsor lok bhedbhav kortat, dusream sangata doiall toren vagonant ani axen bhorlole asat. Tor oslea lokank lagon amkam onʼneai sosunk poddtta tednam ami ojap zainant. (Up. 5:7) Punn eka bhavak vo bhoinnik lagon amkam onʼneai sosunk poddtta tednam, amkam khub dukh zata. Amcho virodh kortat vo amkam dhumallo ditat tea munxam bhaxen amchim bhav-bhoinnam mudʼdom amchea sangata vaitt toren vagonant tem khorem. Punn opurnntaiek lagon tim oxem korunk xoktat. Tor hea vixim chintat: Amchea borabor onʼneai kortat tea virodheam sangata ami pasiensan vagtat zalear, amchea bhav-bhoinnam sangata ami anikui pasiensan vagonk zai nhoi? Oxem korunk amkam koxi modot zaunk xokta? Hem zannam zaunk Jezu sangata virodheamnim onʼneai kelo tednam to koso vaglo tacher ami dhean dium-ia. Toxench, hea sonvsarantlo lok vo amchim bhav-bhoinnam amchea sangata onʼneai kortat tednam Jehovak koxem bhogta ani taka amchi khorench porva asa kai na tem zannam zaum-ia.
3. Dusrim aplea sevokam sangata vaitt toren vagtat tednam Jehovak koxem bhogta, ani kiteak?
3 Dusrim amchea sangata bore toren vaglolim Jehovak zai. Ani tim toxem korinant zalear Jehovak matui avoddnna. Karonn Jehova “niticho mog korpi” zaun asa. (St. 99:4) To amkam aplea sarkea vellar ani “zata title begin . . . neai ditolo” mhunn Jezun khatri dilea. (Luk. 18:7, 8) Toxench, sogle toreche onʼneai Jehova beginuch kaddun uddoitolo ani porot amkam kednanch onʼneai sosunk diunchona.—St. 72:1, 2.
4. Jehova aiz amkam koso modot korta?
4 Tor Jehova amche sogle tras kaddun uddoitolo tea vella pasot ami axeun ravleant. Punn atam pasun Jehova amkam modot korta. (2 Ped. 3:13) Koso? Konnui amchea sangata onʼneai korta tednam, poristhiti anik bigoddna zaunk ami koxem vagonk zai tem to amkam xikoita. Jezu sangata dusreamnim onʼneai kelo tednam to koso vaglo tem Jehovan amchea pasot Bible-ant boroun dovorlam. Titlench nhoi, dusrim amchea sangata onʼneai kortat tednam ami kitem korunk zai tea vixim tannem Bible-ant bore solʼle pasun dileat.
TUMCHEA BHAVNANCHER TABO DOVRAT
5. Amchea sangata onʼneai zata tednam ami amchea bhavnancher kiteak tabo dovrunk zai?
5 Amchea sangata onʼneai zata tednam amkam khub dukh zata. (Up. 7:7) Jehovachea adlea visvaxi sevokank pasun oxench bhoglolem. Zoxem, Job ani Habakuk. (Job 6:2, 3; Hab. 1:1-3) Amkam sogleank oslim bhavnam ietat. Punn tancher ami tabo dovornant zalear ami oxem kitem-i korunk xoktat zaka lagon amkam vaitt porinnam bhogunk poddot.
6. Absalanva thaun ami koslem lisanv xiktat? (Chitr pasun polloiat.)
6 Amchea vo ami mog kortat tanchea sangata konnui onʼneai kortat tednam, ami ragan bhoron tea munxacho bodlo gheunk chintit. Punn oxem kelear poristhiti anikui bigddonk xokta. Raza Davidacho put, Absalanvak kitem ghoddlem tem chintat. Tacho sovto bhav Amnonan, tachi bhoinn Tamaracho bolotkar kelo tednam Absalanv ekdom ragan bhorlo. Taka rag ievop chukichem naslem. Toxench, Moizesa udexim dilʼlea Kaidea pormonnem Amnonak moronn favo aslem. (Lev. 20:17) Punn Absalanvan Amnonacho jiv kaddun ekdom vaitt kelem. Karonn oxem korunk taka kosloch odhikar naslo.—2 Sam. 13:20-23, 28, 29.
Apli bhoinn Tamara sangata onʼneai zalo tednam Absalanvan aplea ragacher tabo dovrunk na (Peregraf 6 polloiat)
7. Apleak onʼneai sosunk poddlo tednam Stotr 73-achea boroupeak koxem dislem?
7 Dusream sangata onʼneai kortat tankam khast bhogunk poddona tem ami polloitat tednam, borem korun kainch faido na oxem amkam disonk xokta. Ani oxench Stotr 73-achea boroupeak dislem. Noxtte munis borea munxam sangata onʼneai kortale ani te apunn borem jivit jietale tem polloun tannem oxem mhunnttlem: “Polleiat re tankam, noxtte monis oslech! Kosloch tankam husko na.” (St. 73:12) Ho soglo onʼneai polloun to itlo bejar zalo ki Jehovachi seva korop kainch faideachi nhoi oxem taka dislem. Tannem mhunnttlem: ‘Hea prosnacho orth sodhunk khub hanvem niall kelo, punn ekdom ovghodd vo kotthin to mhaka laglo.’ (St. 73:14, 16) Itlench nhoi, fuddem tannem oxem mhunnttlem: “Mhoje pai halonk pavlole, mhojim panvlam nisortat mhonn distalim.” (St. 73:2) Ani oxench bhav Alberto sangata ghoddlem.
8. Eka bhava sangata onʼneai ghoddlo tednam porinnam kitem zalo?
8 Bhav Alberto-n sobheche poixe chorle mhunn thoddea bhavamnim tacher arop ghatlo, zo chukicho aslo. Hea aropak lagon, bhavan vhoddil mhunn seva korchi zobabdari hogddaili, ani jea bhav-bhoinnank hea ghoddnne vixim kollʼllem tim taka resped dina zalim. Bhav sangta: “Hanv khub ragar aslom ani samko niraxi zalʼlom.” Jem kitem ghoddlem taka lagon bhav itlo bejar zalo ki tannem mittingek ievop samkench bond kelem. Ani panch vorsam poriant to seva bond kelolo porgottnnar zalo. Tor amkam onʼneai zata tednam rag gheun boslear kitem zaunk xokta tem amkam hea onnbhovantlean kolltta.
JEZUCHI DEKH GHEIAT
9. Jezuk koslo onʼneai soscho poddlo? (Chitr pasun polloiat.)
9 Dusreamnim Jezu sangata onʼneai kelo tednam, jea ritin to vaglo tea vorvim tannem amkam ek ekdom borem udharonn dovorlam. Taka zaitea lokam koddlean ani tachea ghorcheam koddlean pasun onʼneai soscho poddlo. Tachim ghorchim sangtalim ki to toklen suttla. Dhormik fuddari sangtale ki taka noxttea dutam koddlean xokti melltta. Toxench, Romi soinikamnim tachim fokannam kelim, taka vollvollailo ani jivexim marlo. (Mk. 3:21, 22; 14:55; 15:16-20, 35-37) Jezun ho soglo onʼneai soslo. Tori astana, to kednanch tanchea sangata vaitt toren vagonk na. Tachea udharonnantlean ami kitem xikonk zata?
Onʼneai koso soscho tea vixim Jezun ekdom borem udharonn dovorlam (Peregraf 9-10 polloiat)
10. Jezu sangata onʼneai zalo tednam to koso vaglo? (1 Pedru 2:21-23)
10 1 Pedru 2:21-23 vachat. a Amchea sangata onʼneai zata tednam ami koxem vagchem tea vixim Jezun ek ekdom borem udharonn dovorlam. Kednam ulounchem anik kednam vogi ravchem tem to bore bhaxen zannam aslo. (Mt. 26:62-64) Tea pasot, dusrim tachea vixim fotti sangtalim tednam, to soglech pavtti tankam zobab dinaslo. (Mt. 11:19) Punn to zobab ditalo tednam, to tancho opman korinaslo vo tankam dhomki dinaslo. Jezu svotacher tabo dovrunk xoklo. Karonn “zo nitivontponnan neai korta tachea hatant tannem apleak soddlo.” Ani aplea sangata zo onʼneai zata to soglo Jehovan polloila, ani Jehova aplea vellar soglem sarkem kortolo mhunn Jezuk purnn khatri asli.
11. Ami koxe toren amchea uloupacher tabo dovrunk zata? (Chitram pasun polloiat.)
11 Amchea sangata onʼneai zata tednam, ami Jezuchi dekh gheun amchea uloupacher tabo dovrunk zata. Thoddea onʼneai-ancho porinnam titlo chodd asona. Tea pasot, ami tem soddun diunk zata. Vo thodde pavtti poristhiti anikui vaitt zaina zaunk, ami vogi ravonk zata. (Up. 3:7; Jak. 1:19, 20) Punn her pavtti amkam ulounk poddtta zalear, zoxem dusream sangata konnui onʼneai korta vo amchea patienni vixim amkam ulounk poddtta zalear, toxem korunk ami fattim sorchimnant. (D.I. 6:1, 2) Punn oxem kortana, ami respedan ani xantponnim ulounk zata titlo vavr korunk zai.—1 Ped. 3:15. b
Amchea sangata onʼneai zata tednam, Jezuchi dekh gheun ami kednam ani koxim uloitolim tea vixim chotrai dovrunk zata (Peregraf 11-12 polloiat)
12. “Zo nitivontponnan neai korta” tachea hatant ami amkanch koxe soddunk zata?
12 Toxench, Jezuchi dekh gheun “zo nitivontponnan neai korta” tachea hatant ami amkam soddttolim. Amchea sangata onʼneai zata tednam, Jehovan tem soglem polloilam ani to aplea vellar tem soglem sarkem kortolo mhunn ami khatri dovortolim. Hi khatri aslear ami to onʼneai sosunk pavtolim. Tea bhair, soglem Jehovachea hatant soddlear, tea munxancho rag ami amchea kallzant dovorchimnant. Punn ami oxem korinant zalear, ami kitem tori vaitt korunk xoktat, ami amchi khuxalkai hogddaunk xoktat, ani Jehova sangata amchi ixttagot piddʼddear zaunk xokta.—St. 37:8.
13. Onʼneai zata tednam to sosunk amkam koxi modot zatoli?
13 Ami purnn toren Jezuchi dekh gheunk xokonant. Thodde pavtti ami oxem kitem mhunnot vo korit, zaka lagon amkam uprant vaitt disonk xokta. (Jak. 3:2) Ani thoddea onʼneai-ank lagon amkam itlem dukh ani khont zata ki tem ami novo sonvsar ieum poriant visronk xokchimnant. Tumchea sangata oxem zalam zalear, tumkam koxem bhogta tem Jehova ekdom bore bhaxen zannam mhunn khatri dovrat. Toxench, tumkam koxem bhogta tem Jezuk pasun khobor asa mhunn khatri dovrat. Karonn tachea sangata pasun onʼneai zalʼlo. (Heb. 4:15, 16) Onʼneai zata tednam kitem korunk zai, tea vixim Jezun ekdom borem udharonn dovorlam. Tea bhair, onʼneai sosunk Jehova aplea Utrantlean amkam modot korta. Tor atam ami Romkarank pustokantlea don versancher dhean dium-ia, jea udexim amkam onʼneai sosunk modot zatoli.
“DEVAK APLO RAG DAKHOUNK DIAT”
14. “Devak aplo rag dakhounk diat” mhunnttlear kitem? (Romkarank 12:19)
14 Romkarank 12:19 vachat. “Jem vaitt zalam tacher Devak aplo rag dakhounk diat” mhunn apostl Paulun Kristanvank sanglem. Ami hem koxem korunk zata? Kednam ani koso neai korcho tem ami Jehovacher soddttat tednam, ami taka tacho rag dakhounk ditat. John nanvachea eka bhava sangata onʼneai zalo. To sangta: “Kainch vaitt korina zaunk hanvem mhojea ragacher tabo dovrunk zai aslo. Ani oxem korop sompem naslem. Punn Romkarank 12:19-antlean, pasiens dakhounk ani Jehovacher visvas dovrunk mhaka modot zali.”
15. Amcher onʼneai zata tednam Jehova soglem sarkem kortolo mhunn tacher patieun ravop kiteak borem?
15 Amcher onʼneai zata tednam Jehova soglem sarkem kortolo mhunn tacher patieun ravlolean amkanch faido zata. Karonn oxem kelʼlean amkam tea vixim uskeunchi goroz poddona. Jehova amkam modot kortolo mhunn tannem sanglam. Eka orthan to oxem sangta: ‘Tujea sangata zalʼlo onʼneai mhojer sodd, hanv tem polloun ghetolom.’ “Hanv tankam farik kortolom” mhunn Jehovan dilʼli bhas ami manun ghetat zalear, ami to onʼneai tacher soddun ditolim ani to soglem sarkem kortolo mhunn amkam khatri astoli. Oxem kelʼlean, bhav John-ak modot zali. To mhunntta: “Mhaka zalʼlo onʼneai Jehova sarko kortolo mhunn hanvem pasiens dakhoilear, mhojea poros to chodd bore bhaxen tem suttavem kortolo.”
“BOREM TEM KORUN VAITTACHER ZOIT MELLOIT RAVAT”
16-17. ‘Borem tem korun vaittacher zoit melloit ravonk’ magnnea vorvim amkam koxi modot zaunk xokta? (Romkarank 12:21)
16 Romkarank 12:21 vachat. Toxench, “borem tem korun vaittacher zoit melloit ravat” oxem pasun Paulun Kristanvank sanglem. Ani Jezun Dongrar Dilʼlea Xikounnent oxem mhunnttlolem: “Tumchea dusmanancho mog korit ravat, ani tumkam dhumallo ditat tanchea pasot magnnem korit ravat.” (Mt. 5:44) Ani Jezun oxench kelem. Romi soinikamnim taka khambear khillailo tednam taka kitle tras ani dukh sosunk poddlem, tea vixim ami chintlam astolem. Tacho khub opman kelo ani tachea sangata onʼneai zalo. Punn tea vellar taka khoreponnim koxem bhoglem tem ami purnn toren somzonk xokonant.
17 Torui, ho soglo onʼneai sosun Jezu Jehovak visvaxi ravlo. Tannem Jehovak tea soinikank khast di oxem sangonk na. Punn tannem tanchea pasot oxem magnnem kelem: “Bapa, tankam bhogos, karonn te kitem kortat tem tankam khoborna.” (Luk. 23:34) Tor ami pasun amchea sangata onʼneai kortat tanchea pasot magnnem kortat tednam, ami tancho rag gheun boschimnant, amkam xant ravonk modot zatoli, ani tanchea vixim amchem chintop pasun bodlonk xokta.
18. Magnnea vorvim Alberto ani John-ak onʼneai sosunk koxi modot zali?
18 Ami hea lekhant uloilʼlea donui bhavank, onʼneai sosunk magnnea udexim modot zali. Alberto sangta: “Jea bhavank lagon mhaka onʼneai zalo, tanchea pasot hanvem magnnem kelem. Mhaka jem ghoddlem tem visronk hanvem zaite pavtti Jehova lagim magnnem kelem.” Khuxechi khobor mhunnttlear, Alberto porot visvaxiponnan Jehovachi seva korta. John sangta: “Jea bhavan mhaka dukh dilem tachea pasot hanvem zaite pavtti magnnem kelem. Oxem kelʼlean, tachea pasot mhojea kallzant rag gheun bosona zaunk ani taka bhogsunk mhaka modot zali. Itlench nhoi, magnnea vorvim mhaka monachi xanti pasun mellʼlli.”
19. Ami hea noxttea sonvsarant asom poriant kitem korit ravom-ia? (1 Pedru 3:8, 9)
19 Ami hea noxttea sonvsarant asom poriant amkam koslo-na-koslo onʼneai sosunk poddot. Punn amkam kitem-i sosunk poddom, magnnea vorvim Jehova lagim modot magop ami kednanch bond korchem nhoi! Toxench, onʼneai sosunk poddtta tednam ami Jezuchi dekh gheum-ia ani Bible-antlim totvam apnnaunk vavr korit ravom-ia. Oxem kelear, amkam Jehova koddlean daiz mhunn besanvam mellttolim.—1 Pedru 3:8, 9 vachat.
GIT 38 Dev Tuka Thir-ghott Dovortolo
a Apostl Pedrun aplea poilea chittichea dusrea ani tisrea odheai-ant, krur dhoniam koddlean vo sotant naslolea ghovam koddlean poilea xekddeantlea zaitea Kristanvank onʼneai sosunk poddlo tea poristhitim vixim sanglam.—1 Ped. 2:18-20; 3:1-6, 8, 9.
b jw.org-acher, Mog Aslear Khori Xanti Koxi Melltta ho video polloiat.
