OBHEASACHO LEKH 45
GIT 138 Dhove Kens Sobit Mukutt
Visvaxi Munxanchea Xevottachea Utram Thaun Xikom-ia
“Zanntteam lagim zannvai asta ani mhatar piraie vangdda xanneponn ieta.”—JOB 12:12.
MUKHEL MUDʼDO
Ami Jehovachi adnea pallʼllear to atam amkam besanvam ditolo ani fuddarak sasnachem jivit ditolo.
1. Vhoddil ani onnbhov aslolea bhav-bhoinnancho solʼlo ami kiteak nakarcho nhoi?
AMKAM sogleank bore nirnnoi gheunk margdorxonachi goroz asta. Ani tem ami vhoddil, toxench onnbhov aslolea bhav-bhoinnam koddlean gheunk zata. Punn tim amchea poros piraien khub vhodd asat zalear, tim sangtat tem adlem chintop oxem amkam disot ani ami tancho solʼlo nakarit. Punn ami toxem korchem nhoi. Karonn ami tanchea koddlean xiklolim Jehovak zai. Tim amchea poros chodd vorsam jieleant mhunnttoch, tankam amchea-von chodd onnbhov, somjikai ani zannvai asa.—Job 12:12.
2. Ami hea lekhant kitem polloitolim?
2 Adlea kallar, aplea lokank urba ani margdorxon diunk Jehovan zannttea aslolea visvaxi munxank uzar kele. Zoxem, tannem Moizes, David, ani apostl Juanvak uzar kele. Te veg-vegllea kallar jiele ani tanchi poristhiti eka-meka thaun khub veglli asli. Tanchea jivitacho xevott lagim pavlo toso, tannim tornnatteank khub bore solʼle dile. Jehovachem aikop kiteak mhotvachem, hea vixim tanchea modlea dor eklean solʼlo dilo. Tannim boroilʼlea zannvaiechea utram thaun amkam faido mellonk, Jehovan tim Bible-ant boroun dovorlim. Tor ami tornnattim vo zannttim asum, tanchea utrantlean amkam-i faido mellonk xokta. (Rom. 15:4; 2 Tim. 3:16) Tor, tanchea jivitachea xevottak, hea tin visvaxi munxamnim kitem mhunnttlem ani tantuntlean ami kitem xikonk zata, tem ami hea lekhant polloitolim.
TUMKAM “LAMB AUK” MELLTTOLEM
3. Moizesan khoinchea vattamnim Jehovachi ani Izraelitkaranchi seva keli?
3 Moizesan aplea purnn jivitant Jehovachi seva keli. To ek provadi, neai korpi, fuddari ani boroupi aslo. Taka jivitant zaito onnbhov aslo. Izraelitkarank Ejipttantlea gulamponnantlean bhair kaddunk, Jehovan taka uzar kelo. Ani Jehovan kelʼlim zaitim vizmitam tannem polloilʼlim. Toxench, Jehovan taka Bible-antlim poilim panch pustokam, Stotr 90, ani ghoddie Stotr 91 borounk uzar kelo. Tea bhair, chodd korun tannem Job pustok pasun boroilʼlem.
4. Moizesan konnank urba dili, ani kiteak?
4 Moizes 120 vorsanche piraier bhair poddlo. Punn morchea thoddea vella poilim, tannem soglea Izraelitkarank ektthaim kelim ani Jehovan tanchea pasot kitem-kitem kelʼlem tem tanchea ugddasak haddlem. Jehovan kelʼleo zaiteo vostu Izraelitkaramnim polloilʼleo. Zoxem, thoddea Izraelitkaramnim tim tornnattim aslim tednam, Jehovan koslim vizmitam kelʼlim ani Ejipttkarank koxi khast laili tem polloilʼlem. (Sutt. 7:3, 4) Toxench, Jehovan Tambddo Doria doxim kelo tem tannim polloilem ani tim tantuntlean cholon gelim. Tea bhair, Faraoh ani tache akʼkhe foujecho, Jehovan koso nas kelo tem-ui tannim polloilʼlem. (Sutt. 14:29-31) Itlench nhoi, tim oronnʼnneant aslim tednam, Jehovan tanchi rakhonn keli ani tanchi kallji ghetli mhunn tannim onnbhovlem. (D.S. 8:3, 4) Tor atam rokddinch tim Bhasailʼlea Desant voichim aslim. Tea pasot, morchea poilim Moizes tankam urba diunk sodhtalo. a
5. Dusri Somurt 30:19, 20-ant Moizesan tachea jivitachea xevottak mhunnttlolea utrantlean tannem Izraelitkarank kitem khatri dili?
5 Moizesan kitem mhunnttlem? (Dusri Somurt 30:19, 20 vachat.) Jehovan Izraelitkarank ek ekdom boro fuddar dovorlolo mhunn Moizesan tanchea ugddasak haddlem. Jehova tancher axirvad ghaltolo aslo ani tannem bhasailʼlea desant tim zaito temp poriant jieunk xoktalim. To des khorench sobit aslo ani thoim zaiti pik zatali. Tea desa vixim Moizesan Izraelitkarank oxem sanglem: “Thoim tumi bandunk naslolim vhodd ani grest xaram, tumi bhorunk naslolim borea-borea vostumnim bhorlolim ghoram, tumi marunk nasloleo baio, tumi lavunk naslole zoitunanche molle ani follam tumkam melltolim.”—D.S. 6:10, 11.
6. Jehovan dusrea raxttrank Izraelitkarancher zoit kiteak vhoronk dilem?
6 Moizesan Izraelitkarank xittkaunni pasun dili. Tankam bhasailʼlea desant jieunk zai zalear tannim Jehovachi adnea pallunk zai mhunn tannem tankam sanglem. Toxench, Jehovachi adnea pallun ani “takach chikttun” ravon, “jivit vinchun kaddat” mhunn tannem tankam urba dili. Punn dukhachem mhunnttlear, Izraelitkaramnim Jehovachem aikonk na. Tor vell gelo toso, Jehovan Asiriekarank ani uprant Babilonkarank tancher zoit vhoronk ani tankam koidi korun vhoronk dilim.—2 Raz. 17:6-8, 13, 14; 2 It. 36:15-17, 20.
7. Moizesachea utrantlean ami koslem lisanv xiktat? (Chitr pasun polloiat.)
7 Moizesachea utrantlean ami koslem lisanv xiktat? Jehovacheo adnea pallʼllear amkam sasnachem jivit mellonk xokta. Izraelitkarank Bhasailʼlea Desant vochonk thoddoch vell urlolo tea bhaxen, aiz amkam novea sonvsarant vochonk thoddoch vell urla. Beginuch hi akʼkhi prithum porot ek sobit bag zatoli. (Iz. 35:1; Luk. 23:43) Thoim Soitan ani noxtte dut aschenant. (Prok. 20:2, 3) Jehova vixim fotti xikoitat te sogle dhorm kabar zaun voitole. (Prok. 17:16) Toxench, munxank tras kortat tosle sorkar aschenant. (Prok. 19:19, 20) Ani sobit bagent Jehova konnakuch vaitt kamam korunk diunchona. (St. 37:10, 11) Dor eklo Jehovacheo adnea pallttolo. Tea pasot, thoim xanti ani ekvottkai astoli. Soglim eka-mekacher visvas dovortolim ani eka-mekacho mog kortolim. (Iz. 11:9) Tor tea vella pasot ami axeun ravleant nhoi! Jehovachi adnea pallʼllear sobit bag zalʼlea hea prithumer ami fokot xemboramnim vorsanch nhoi, punn sasnak jieunk xoktolim.—St. 37:29; Ju. 3:16.
Jehovacheo adnea pallʼllear, sobit bag zalʼlea hea prithumer ami fokot xemboramnim vorsanch nhoi punn sasnak jietolim (Peregraf 7 polloiat)
8. Sasnak jieunk Jehovan ji bhas dilea tea vorvim eka bhavak koxi modot zali? (Judas 20, 21)
8 Sasnak jieunk Jehovan amkam ji bhas dilea tacher niall korit ravlear, amcher kitle-i tras ailear pasun, Jehovacheo adnea pallunk amkam modot zaunk xokta. (Judas 20, 21 vachat.) Toxench, hi bhas amchea oskotkaiam add zhuzonk amkam modot korunk xokta. Hea vixim zaitim vorsam Afrikent mixinori mhunn seva korpi eka bhavacho amkam onnbhov asa. Jehovak manvona tem korunk taka zaite pavtti tallnni ietali. To sangta: “Hanvem Jehovachem aikonk na zalear hanv sobit bagent sasnak jieunk xokchona mhunn mhaka kollon ailem. Hem ugddas dovorlolean te oskotkaie add zhuzonk ani tea vixim Jehovak anikui magnnem korunk mhaka modot zali. Ani tachea modotin ek nitoll ontoskornnan hanv Jehovachi seva korit ravonk pavlom.”
“TUKA IES MELLUM”
9. Davidak aplea jivitant kosle tras sosunk poddle?
9 Aplea lokancher razvottki cholounk, Jehovan Davidak raza mhunn nemlo. To ek songitkar, ek kovi, ek zhuzari ani ek provadi aslo. Taka zaite tras sosche poddle. Raza Saulu tacho jiv kaddunk sodhtalo dekhun taka zaitim vorsam poriant lipon ravchem poddlem. Ani to raza zalea uprant pasun tachea jivak dhoko aslo. Karonn tacho put Absalanv, taka jivexim marun apunn raza zaunk sodhtalo. Davidachea jivitant zaiteo oddchonneo asleo. Ani tannem thoddim gombhir patkam pasun kelʼlim. Tori astana, to moro poriant visvaxiponnan Jehovachi seva korit ravlo. Tea pasot, Jehovan taka “mhojea kallzak avoddtta toslo” mhunn sanglem. Tor Davidachim zannvaiechim utram aiz amkam pasun faideak poddttat!—D.I. 13:22; 1 Raz. 15:5.
10. Davidan aplea put Solomonak solʼlo kiteak dilo?
10 Udharonnak, Davida uprant tacho put Solomon raza zauncho aslo. Ani Davidan taka zannvaiecho solʼlo dilo. Soglea lokamnim apli bhokti korunk Jehovan Solomonak, aplea pasot ek mondir bandunk vinchun kaddlolo. (1 It. 22:5) Hantunt zaitem kam mellon aslem ani Solomonak oddchonneancho-i fuddo korunk poddttolo aslo. Tea pasot, Solomonak Jehovachea modotichi goroz asli. Tor Davidan taka kitem sanglem tem polloum-ia.
11. 1 Raza 2:2, 3-a pormonnem, Davidan Solomonak kitem solʼlo dilo, ani Solomonan tachem aikolem tea meren kitem zalem? (Chitr pasun polloiat.)
11 Davidan kitem mhunnttlem? (1 Raza 2:2, 3 vachat.) Davidan Solomonak sanglem ki tannem Jehovachem aikolem zalear, Jehova taka ek boro fuddari kortolo aslo ani taka besanvam ditolo aslo. Ani zaitim vorsam meren, Jehovan Solomonak khub boreo vostu dileo ani taka zaitea vattamnim modot keli. (1 It. 29:23-25) Tannem ek ekdom sobit Devmondir bandlem ani Bible-antlim thoddim pustokam boroilim. Tache zannvaiek ani girestkaiek lagon to khub famad zalo. (1 Raz. 4:34) Punn Davidan sanglolem toxem, to Jehovachem aikota tea meren Jehova taka ies ditolo aslo. Dukhachem mhunnttlear, Solomon uprant tachea jivitant khottea devanchi bhokti korunk laglo. Tea pasot, tannem Jehovachi maniotai hogddaili ani Jehovan taka zannvai divop bond kelem. Dekhun to doiall ani sarke toren lokancher razvottki cholounk pavonk na.—1 Raz. 11:9, 10; 12:4.
Davidan Solomonak sanglolea xevottachea utrantlean amkam kolltta ki ami Jehovacheo adnea pallʼllear, to amkam bore nirnnoi gheunk zannvai ditolo (Peregraf 11-12 polloiat) b
12. Davidachea utrantlean ami koslem lisanv xiktat?
12 Davidachea utrantlean ami koslem lisanv xiktat? Ami Jehovachem aikotat tednam to amkam besanvam ditolo ani amkam modot kortolo. (St. 1:1-3) Jehovan Solomonak girestkai ani podvi dili toxi to amkam diunchona tem khorem, punn ami tachem aikolem zalear bore nirnnoi gheunk to amkam zannvai ditolo. (Mho. 2:6, 7; Jak. 1:5) Tachea totvam udexim amkam kam, xikxonn, monoronjon ani poixeam vixim sarke nirnnoi gheunk modot zatoli. To dita ti zannvai ami apnnaitat zalear, tachea sangata amchi ixttagot ami samballttolim ani to amkam sasnachem jivit ditolo. (Mho. 2:10, 11) Tea bhair, ami borim ixttam kortolim ani amchi famil khuxal astoli.
13. Jivitant bore nirnnoi gheunk Carmen-ak koxi modot zali?
13 Jehovacho solʼlo apnnailʼlean Mozambique-ant ravpi Carmen-ak, boro nirnnoi gheunk koxi modot zali tacher dhean diat. Taka distalem ki unch xikxonn ghetlear tem ek susegad jivit jieunk xoktolem. Tea pasot, tem architecture xikonk university-nt gelem. Tem sangta: “Hanv jem xiktalem tem mhaka khub avoddttalem. Punn mhozo soglo vell ani takot thoinch voitali. Hanv sokallchem 7:30 tem sanjer 6:00 poriant, university-nt astalem. Hea karonnak lagon, mittingek hajir zaunk mhaka kotthin zatalem, ani Jehova sangata mhoji ixttagot oskot zaunk lagli. Tor Jehovachi adnea pallchea bodlek, hanv don dhonianchi seva korunk proitn kortam mhunn mhaka uprant kollon ailem.” (Mt. 6:24) Carmen-an hea vixim Jehova lagim magnnem kelem ani amchea prokaxonamnim sodh kelo. Tem fuddem sangta: “Vhoddilamnim toxench mhoje mummy-n mhaka boro solʼlo dilo. Hea vorvim hanv ek boro nirnnoi gheunk pavlem. Hanvem university soddli ani purnn vellachi seva suru keli. Oxem korun, hanvem sogleam-von boro nirnnoi ghetlo oxem mhaka dista ani hea vixim mhaka koslench dukh na.”
14. Moizes ani Davidan sanglolea sondexacho mukhel mudʼdo kitem aslo?
14 Moizes ani David Jehovacho khub mog kortale ani tachi adnea pallop khub mhotvachem mhunn te zannam asle. Tor tanchea jivitachea xevottak tannim dusreank tanchi dekh gheunk ani Jehovak visvaxi ravonk urba dili. Toxench, jim konn Jehovak visvaxi ravonant tim tachi maniotai hogddaitolim ani Jehova tankam besanvam diunchona mhunn tannim xittkailem. Tannim dilʼlo solʼlo apnnailolean aiz amkam-i faido zata. Xemboramnim vorsam uprant, Jehovachea anik eka sevokan ami Jehovak visvaxi ravop kitlem mhotvachem tem somzailem.
‘KHOINCHEACH VOSTUNT MELLONA TITLI KHUXALKAI’
15. Apostl Juanvan kitem-kitem onnbhovlem?
15 Juanv Jezucho ek lagxilʼlo ixtt ani mogacho apostl aslo. (Mt. 10:2; Ju. 19:26) Tannem zaito temp poriant Jezu sangata porgottnni keli, Jezun vizmitam kelim tem tannem polloilem ani kotthin vellar pasun to Jezuk visvaxi ravlo. Toxench, Jezuk jivexim martale tednam to thoim aslo. Ani Jezu jivont zalea uprant tannem taka polloilo. Kristi sobhechi vaddavoll zali tem pasun tannem polloilem. Ani bori khobor ‘akʼkhea sonvsarant porgott zali’ tem pollounk to jivo aslo.—Kol. 1:23.
16. Apostl Juanvachea chittintlean konnank urba melltta?
16 Apostl Juanv khub zanntto aslo tednam ojapachea ghoddnneam vixim aslolem Prokasovnni pustok borounk taka ek sueog mellʼllo. (Prok. 1:1) Toxench, Bore Khobrechea Pustokam modlem ek pustok tannem boroilem. Tea bhair, tannem tin chitteo boroileo. Tankam ami aiz poilo, dusro ani tisro Juanv mhunn vollkhotat. Hantuntli tisri chitt, tannem Gaius nanvachea eka Kristanvak boroili, zaka to aplo mogacho put mhunn lekhtalo. (3 Ju. 1) Ani tannem hi chitt boroili tea mhunnosor, to zaitea Kristanvank aplim bhurgim koxim lekhtalo. Hea visvaxi apostlan jem kitem boroilem tantuntlean, aiz Kristachea soglea pattlavdarank urba melltta.
17. 3 Juanv 4-a pormonnem, kednam chodd khuxalkai melltta mhunn Juanvan boroilem?
17 Juanvan kitem boroilem? (3 Juanv 4 vachat.) Bhav-bhoinnam Devachem aikotat tem polloun taka khuxalkai mellttali mhunn Juanvan aplea tisrea chittint boroilem. Tannem hi chitt boroili tea mhunnosor, sobhent thoddim zannam khotti xikounn xikoitalim ani futt ghaltalim. Tori astana, her zannam ‘sotachea vatten cholot’ aslim, Devachem aikotalim ani ‘tachea adnea pormonnem choltalim.’ (2 Ju. 4, 6) Tor hea Kristanvanchem visvaxiponn polloun, Juanv toxench Jehova khub khuxal zalo.—Mho. 27:11.
18. Juanvachea utrantlean ami koslem lisanv xiktat?
18 Juanvachea utrantlean ami koslem lisanv xiktat? Ami Jehovak visvaxi ravtat tednam amkam toxench dusreankui khuxalkai melltta. (1 Ju. 5:3) Hem koxem? Ami Jehovak khuxal kortat hem zannam zalʼlean amkam khuxalkai melltta. Toxench, ami tallnneo nakartat ani Jehovak manvota tem kortat tem polloun Jehova khuxal zata. (Mho. 23:15) Ani sorgar devdut pasun sontostat. (Luk. 15:10) Tea bhair, amchea bhav-bhoinnank dhumallo ieta vo vaitt korchi tallnni ieta tednam pasun tim Jehovak visvaxi ravtat tem polloun amkam khuxalkai melltta. (2 Tes. 1:4) Ani Jehova, Soitanacho ho noxtto sonvsar kabar kortolo tednam ami Jehovak visvaxi ravlim, hem zannam zalʼlean amkam khuxalkai mellttoli.
19. Dusreank sot xikounchea vixim Rachel nanvache eke bhoinnin kitem sanglem? (Chitr pasun polloiat.)
19 Ami khas korun tednam chodd khuxal astat jednam ami dusreank Jehova vixim xikoitat. Hea vixim, Dominican Republic-ant ravpi, Rachel nanvache eke bhoinnicho amkam onnbhov asa. Tinnem zaitea zannank sot xikonk modot kelea. Ti sangta: “Tim vaddavoll kortat ani kallzantlean Jehovacho mog kortat, toxench tim purnn toren tacher patietat ani taka manvota tem korunk aplea jivitant bodlav kortat tem polloun, mhaka kitli khuxalkai bhogta tem hanv utramnim sangonk xokona. Tankam xikounk hanvem zo vavr ani je teag keleat, te tea khuxalkaie mukhar kainch nhoi!”
Amchea bhaxen Jehovacho mog korunk ani tacheo adnea pallunk ami dusreank xikoitat tednam amkam khuxalkai melltta (Peregraf 19 polloiat)
VISVAXI MUNXANCHEA XEVOTTACHEA UTRAM THAUN FAIDO MELLOUN GHEIAT
20. Moizes, David, Juanv ani amchea modem kitem ek-sarkem asa?
20 Moizes, David, ani Juanv zaitea tempa adim jielʼle. Ani tanchi poristhiti amchea poristhiti poros khub veglli asli. Tori astana, amchea modem zaiteo vostu ek-sarkeo asat. Zoxem, tanchea bhaxen ami khorea Devachi seva kortat, taka magnnem kortat, ani modot, toxench margdorxon mellonk tacher patieun ravtat. Ani tanchea bhaxen, Jehovachem aikotat tankam to besanvam dita mhunn amkam-i khatri asa.
21. Ami Moizes, David, ani Juanvacho solʼlo apnnaun, Jehovachi adnea pallit ravlear to amkam koslim besanvam ditolo?
21 Tor hea visvaxi munxanchea xevottachea utrank kan diun ami Jehovacheo adnea pallit ravom-ia. Oxem kelear, Jehova amkam besanvam ditolo ani modot kortolo. Toxench, amkam “lamb auk” mellttolem. Hoi, ami sasnak jietolim! (D.S. 30:20) Tea bhair, ami amchea mogall sorginchea Bapak manvota tem kortat hem zannam zaun amkam khub khuxalkai mellttoli. Ani to amkam fuddarak ami chintunk xokonant titlim besanvam ditolo.—Ef. 3:20.
GIT 129 Sosnikaien Cholom-ia
a Tambddea Doria lagim Jehovachim vizmitam polloilʼlim tim choddxim Izraelitkaram Bhasailʼlo Des pollounk pavonk nant. (Lok. 14:22, 23) Karonn 20 vorsam vo tachea poros chodd pirai aslolim, oronnʼnneantuch mortolim mhunn Jehovan sanglolem. (Lok. 14:29) Punn 20-am poros unnea piraiechim zaitim zannam jivim urlim, ani Joshua, Kaleb, ani Levichea kullantlea zaitea zannam borabor tannim Jordan Nodi par keli ani Bhasailʼlea Desant bhitor sorlim.—D.S. 1:24-40.
b CHITRACHI MAHITI: Davean: Morchea poilim, David aplea put Solomonak solʼlo dita. Uzvean: Pioneer Sevechea Korsak hajir zalʼlim bhav-bhoinnam, Jehovachea zannvaie thaun faido melloun ghetat.
