1-2. Ahab ani Manasse modem koslo ontor aslo, ani ami khoinchea don prosnanche zobab polloitolim?

ADLEA kallar jielolea don razam vixim ami polloum-ia. Ek raza, Israelachea dha kullancher raj choloitalo ani dusro raza Judachea don kullancher raj choloitalo. He donui raza veg-vegllea kallar jielʼle. Tori punn, tanchea modem zaiteo vostu ek-sarkeo asleo. Teo mhunnttlear, dogaimni Jehova add patok kelem ani taka lagon Jehovache lok taka ovisvaxi zaunk pavle. Toxench, dogaimni murti puza keli ani zaitea lokank jivexim marle. Punn hea dogaim modem ek ontor aslo. To mhunnttlear, ek raza, morosor Jehovachea nodren vaitt tem korit ravlo, punn dusrea razan poschatap kelo ani Jehovan taka bhogxilo. He donui raza konn te tumi zannant?

² Poilo, Israelacho raza Ahab, ani dusro Judacho raza Manasse. Hea don razam modem aslolo ontor amkam poschatapa vixim zaitem xikoita. (Itihas 17:30; Rom. 3:23) Ami hem zannam zavop kiteak gorjechem? Karonn ami patok adartat tednam Jehovan amkam-i bhogxilolim amkam zai. Tor poschatap mhunnttlear kitem, ani tem ami amchea korneamnim koxem dakhounk zata hem zannam zaunk, hea donui razamnim kitem kelem ani tanchea udharonnantlean ami kitem xikonk zata tem ami hea lekhant polloitolim. Tea bhair, Jezun poschatapa vixim kitem xikoilem tem-ui ami polloitolim.

3. Ahab koslo raza zaun aslo?

³ Ahab, Israelachea dha kullancher raj choloupi satvo raza aslo. To Sidon raxttrachea razachi dhuv, Jezebela lagim kazar zalo. Hem raxttr Israelachea utʼtore vatten aslem ani khub girest zaun aslem. Tor Ahabachea kazara udexim Israel raxttrachi  girestkai vaddli. Punn Jezebel, Baal devachi bhokti kortali ani hacho vaitt porinnam Israelachea lokancher poddlo. Karonn, Israel raxttran tea devachi bhokti korunk, tinnem aplea ghovak uksailo ani te Jehovachea add anikui patok korunk lagle. Tanchi bhokti itli vitt haddtta tosli asli ki tanchea devmondirant pozoddponn choltalem ani lhan bhurgeanchem bolidan pasun tim ditalim. Jezebel ranni asli tednam soglea Jehovachea provadiancho jiv dhokeant aslo karonn tinnem zaitea provadiank marun udoilʼle. (1 Raz. 18:13) Toxench, Ahaban “Sorvesporache nodre mukhar vaitt tem kelem ani aplea purvozam von odhik vaitt tem tannem kelem.” (1 Raz. 16:30) Ahab ani Jezebel kitem kortalim tem Jehova soglem zannam aslo. Tori astana, tannem tankam doia dakhoili ani Elija provadiak dhaddun, tankam ani Israelachea lokank apleo vatto bodlunk ani tachi seva korunk tankam urba dili. Punn Ahab ani Jezebelan kainch kanar gheunk na.

4. Jehovan Elija provadiak Ahab razak kitem sangonk dhaddlo, ani hacho tacher koslo porinnam zalo?

⁴ Hea pasot Jehovan ek nirnnoi ghetlo. Tannem Elija provadiak dhaddun Ahabak ani Jezebelak, tanchi akʼkhi famil apunn nas kortolo mhunn sanglem. Him utram tea gorvixtt razachea kallzak laglim. Ani ojapachem mhunnttlear, to “khalto zalo.”—1 Raz. 21:19-29.

5-6. Ahaban khorench poschatap korunk na mhunn amkam koxem kollon ieta?

⁵ Tor hea vellar Ahab khalto zalo tem khorem, punn uprant tannem kitem kelem tantuntlean tannem khorench poschatap korunk na mhunn amkam kollon ieta. Karonn tannem aplea rajeant Baalachi bhokti bond korunk na ani Jehovachi bhokti korunk lokank urba diunk na. Toxench, tannem khorench poschatap korunk na mhunn tannem anikui dusrea vattamnim dakhoun dilem.

⁶ Udharonnak, Ahab Sirie add zhuzonk voitalo tednam tannem Raza Jehoshafatak aplea sangata apoilo. Jehoshafat ek boro raza aslo ani to Jehovacher patietalo. Tor zhuzant voichea poilim Jehovachem margdorxon gheum-ia mhunn tannem Raza Ahabak sanglem. Punn Ahab hem korunk sodhinaslo. Taka lagon tannem mhunnttlem: “Anink ek provadi asa: tache udexim ami Sorvesporachi khuxi zanno zaum ieta. Punn hanv tacho dves kortam kiteak mhoje vixim kelʼlim bhakitam boreponnanchi nhoi, punn nisonttonachi khobor ditat.” Tor, tannim Mikaia provadiacho solʼlo ghetlo. Ani Ahaban sanglolem toxench zalem. Tannem Ahaba vixim nisonttonnachich khobor sangli. Hem aikon, poschatap korun Jehovachem bhogsonnem magchea bodlek, noxttea Raza Ahaban Mikaiak bondkhonnint ghatlo. (1 Raz. 22:7-9, 23, 27) Punn uprant, Mikaian sanglolem toxench zalem, karonn Ahab tea zhuzant melo.—1 Raz. 22:34-38.

7. Ahab melea uprant Jehova Devan tachea vixim kitem mhunnttlem?

⁷ Raza Ahab tea zhuzant melea uprant, Jehova Devan Jehu provadiak Raza Jehoshafata lagim dhaddlo. Ani tannem Ahabak sangat diun chuk keli mhunn sangonk taka oxem mhunnttlem: “Dev-dhorm nasloleank tunvem kiteak adar dilo? Vo Sorvesporacho dves kortoleancho tunvem kiteak mog kelo?” (2 It. 19:1, 2) Hea utrantlean Jehovan Ahabak koso lekhlo tem amkam kollon ieta. Hea vixim chintat: Ahab Razan khorench poschatap kelʼlo zalear Jehova Dev taka aplo dves korpi, dev-dhorm naslolo vo noxtto mhunntta aslo kai? Tor, hantuntlean amkam kollon ieta ki Ahaban jem kitem kelʼlem tea vixim taka vaitt dislem. Punn tannem khorench poschatap korunk na.

8. Poschatap korchea vixim Ahabachea udharonnantlean amkam kitem xikonk melltta?

⁸ Tor Ahabachea udharonnantlean ami kitem xikonk zata? Jehovan, apunn Ahabachea familicho nisontton kortolo mhunn provadi  Elija udexim sanglolem tednam Ahab khalto zalo. Hem korop sarkem aslem. Punn uprant tannem jem kitem kelem tantuntlean tannem khorench poschatap korunk na mhunn amkam kollon ieta. Tor khoro poschatap mhunnttlear, apnnem kelʼle chuki khatir thoddea vella pasot vaitt disop itlench nhoi punn tantunt anikui zaitem mellon asa. Tem kitem tem somzonk atam ami anik ek udharonn polloum-ia.

9. Manasse koslo raza aslo?

⁹ Ahab moron donxim vorsa uprant, Manasse Judacho raza zalo. Tannem ghoddie Ahaba poros anikui chodd vaitt kelem. Karonn Bible tachea vixim oxem sangta: “Tannem Sorvesporachea dolleam mukhar vaitt tem kelem ani Sorvesporacho rag choddo-so kelo.” (2 It. 33:1-9) Tannem khottea devanchi bhokti korunk vedi ubarleo, ani ek khotte devichi kantoilʼli murti Jehovachea mondirant haddun bosoili! To ghaddiponn ani jadu kortalo ani aplo fuddar parkitalo. Tannem khub ‘niropradi rogot vhanvoilem,’ zaitea lokank jivexim marle ani ‘aplea putank pasun ujeant bolidan’ korun khottea devank bhettoile.—2 Raz. 21:6, 7, 10, 11, 16.

10. Manassen Jehovachi xittkaunni aikonk na mhunn Jehovan kitem kelem, ani Manassecher hacho koslo porinnam zalo?

¹⁰ Ahaba bhaxen, Manassek pasun xittkaunk Jehovan zaite provadi dhaddle. Punn to tanchem aikonk toiar naslo. Taka lagon “Sorvesporan Assirieche razache foujeche odhikari tanche add ieum-xe kele. Tannim Manassek dhorlo, sanklleamnim bandlo, ani Babilonient vhelo.” Punn Babilonient koidi astana apnnem kitem kelem tea vixim Manassen bariksannen chintlem astolem mhunn amkam kollon ieta. Karonn tannem “Sorvesporak, Aplea Devak ulo marlo ani aplea purvozanchea Deva mukhar sarko khalto zaun, tannem Taka prarthon kelem.” Hacho orth, tannem Jehovak aplo Dev mhunn lekhlo ani taka magnnem korit ravlo.—2 It. 33:10-13.

11. 2 Itihas 33:15, 16 pormonnem, apnnem khorench poschatap kela mhunn Manassen koxem dakhoun dilem?

¹¹ Manassen kelʼlea magnneantlean, to khorench bodolʼla mhunn Jehova Devak kollon ailem. Tannem taka bhogxilo ani uprant taka portun raza zaunk sondhi dili. Khoroch poschatap korunk Manassen apleachean zata tem soglem kelem. Ani Ahaban kednanch korunk na tem tannem kelem. Tem mhunnttlear, tannem aplea vagnnukent bodol kelo, khotte bhoktecho virodh kelo ani Devachi bhokti korunk lokank urba dili. (2 Itihas 33:15, 16 vachat.) Hea vorvim, tannem khorench poschatap kela mhunn dakhoun dilem. Punn hem korunk Manassek dhir ani bhavarthachi goroz asli. Karonn bodlav korchea poilim zaitea vorsam thaun, aplea familik, dorbarant asloleank, ani her lokank tannem ek vaitt dekh dovorli. Punn atam zanntto zalea uprant, apnnem kelʼleo chuki sarkeo korunk tannem khub vavr kelo. Toxench, to aplo natu, Josiahk  ek bori dekh dovrunk pavlo astolo karonn Josiah uprant ek boro raza zaunk pavlo.—2 Raz. 22:1, 2.

12. Poschatap korchea vixim Manassechea udharonnantlean amkam kitem xikonk melltta?

¹² Tor Manassechea udharonnantlean amkam kitem xikonk melltta? Manasse fokot khaltoch zaunk na punn tannem magnneant Jehovachem bhogsonnem maglem, apli vagnnuk bodolʼli, vaitt kamam soddun dilim, Jehovachi bhokti korunk laglo, ani toxench korunk lokank urba dili. Manasse bhaxen ami amchea jivitant zaitim vaitt kamam keleant zalear pasun ami khorench poschatap kelo zalear amkam bhogsonnem mellonk xokta. Karonn Jehova “boro ani bhogsunk toiar asa.”—St. 86:5, NW.

13. Khorench poschatap korop hantunt zaitem mellon asa, hem somzonk ek udharonn diat.

¹³ Manassen khorench poschatap kelo tednam apnnem kelʼlea patka pasot taka fokot vaittuch disonk na punn tannem zaite her vixoi pasun kele. Ami pasun poschatap kortat tednam tantunt zaite vixoi mellon asa. Hem somzonk ami ek udharonn polloum-ia. Chintat tumi bakery-nt cake gheunk voitat. Punn to munis tuka cake diunchea bodlek ek tantem dita. Tumi khuxal zatolim kai? Hem khorem ki cake korunk tantem zai poddtta. Punn cake-int, tantea bhair anikui zaiteo vostu ghalcheo poddttat. Teach bhaxen, ami poschatap kortat tednam tantunt zaite vixoi mellon asat. Te kitem tem somzonk Jezun dilʼle eke vopare thaun ami xikonk zata. Tem ami atam polloum-ia.

14. Jezun aplea voparint sanglolea putan apli chuk vollkhon ghetli mhunn amkam koxem kollon ieta?

¹⁴ Jezun sangloli vopar amkam Lukas 15:11-32-ant vachunk melltta. Thoim sanglam ki ek put aplea bapaichea add vochon, ghor soddun “eka poixilea ganvant gelo.” Thoim to ek onoitik jivit jieunk laglo. Punn uprant, to trasant poddlo tednam ‘to soirannar ailo vo apunn chuklo mhunn taka kollon ailem.’ Ani apunn ghorantuch aslo zalear jivit borem astolem aslem mhunn to somzolo. Tor tannem portun ghora vochun aplea bapai lagim bhogsonnem magonk nirnnoi ghetlo. Hea putan apli chuk manun ghetli tem borem asa. Punn itlench korun tannem khorench poschatap kelo oxem ami mhunnonk zata kai? Na! Tannem anik kitem tori korunk zai aslem. Tem kitem tem ami fuddem polloum-ia.

15. Jezuchea voparintlea putan khorench poschatap kela mhunn tannem koxem dakhoun dilem?

¹⁵ Ho put ek lamb provas korun portun aplea ghora ieta. To aplea bapaik mhunntta: “Bapa, hanvem sorgacher ani tujer add patok kelam; mhaka tuzo put mhonnunk anink mhaka favo na.” (Lukas 15:21) Hea utrantlean tannem aplea bapaik dukh dilem mhunn tannem vollkhon ghetlem ani Jehova sangata ani aplea bapai sangata to portun apli ixttagot ghott korunk sodhtalo mhunn tannem dakhoun dilem. Ani hea pasot, to aplea bapaicho ek chakor pasun zaun seva korunk toiar aslo! (Lukas 15:19) Hi  fokot ek kallzak lagta tosli kanni nhoi, punn hea voparintlean vhoddilank zaitem xikonk melltta. Tem mhunnttlear, gombhir patok adarlolea eka munxan khorench poschatap kela kai na, hem zannam zaunk vhoddil proitn kortat tednam hi vopar tankam modot korunk xokta.

16. Eklean khorench poschatap kela kai na hem zannam zaunk vhoddilank kiteak kotthin zaunk xokta?

¹⁶ Punn patok adarlam tannem khorench poschatap kela kai na tem zannam zaunk vhoddilank sompem nhoi. Karonn vhoddil eka munxanchem kalliz topasunk xokonant. Tor, patok adarla to tea patkacho dves korta kai na tem somzonk purave sodhunk vhoddil proitn kortat. Punn thodde pavtti tea patkeachem jivit polloitana, tannem khorench poschatap kela mhunn vhoddilank ghoddie dischem na.

17. (a) Apnnem kelʼlea patkak lagon ek munis fokot khub dukhi zata zalear tannem khorench poschatap kela mhunn sangonk zaina. Hem somzonk ek udharonn diat. (b) 2 Korintkarank 7:11-nt sanglolea pormonnem, khorench poschatap korta tannem kitem korunk zai?

¹⁷ Ek udharonn polloum-ia. Ek bhav zaitea vorsam thaun pordvar korta. Ani to apli chukichi vatt soddun vhoddilanchi modot ghena. Tachea bodlek to tanchea thaun, aple baile thaun, ani heram thaun tem patok lipoita. Punn uprant, dusrea konna thaun tannem patok adarlam mhunn vhoddilank kollon ieta. Ani vhoddil tea bhavak purave dakhoitat tednam apnnem tem patok kelam mhunn to manun gheta ani tea pasot khub dukhi zata. Hacho orth, tannem khorench poschatap kela oxem kai? Oslea vellar, vhoddilamnim tachem chintop, tachi vagnnuk, ani tachea bhavnancher dhean diun tannem khorench poschatap kela kai na tem zannam zaunk zai. Karonn tannem zaitea vorsam thaun patok adarlem ani dusrem mhunnttlear, tea vixim tannem apunn zaun vhoddilank sangonk na, punn dusrea konna thaun tache vixim kollon ailem. (2 Korintkarank 7:11 vachat.) Tor oslea munxak apunn khorench poschatap kela mhunn dakhoun diunk vell zai poddttolo. Hea pasot, tea patkeak chodd korun sobhe thaun bhair kaddttole.—1 Kor. 5:11-13; 6:9, 10.

18. Sobhentlean bhair kaddlolea eka bhavan apnnem khorench poschatap kela mhunn koxem dakhounk zata, ani tannem oxem kelolean kitem zatolem?

¹⁸ Sobhentlean bhair kaddlolo ek bhav khorench poschatap korta tednam to vhoddilancho solʼlo apnnaun, sodanch magnnem ani Bible obheas korit ravtolo. Toxench, to chukonastana mittingek hajir zatolo. Tea bhair, apleak tallnnent ghalta toslea poristhitim thaun to pois ravtolo. Ani Jehova sangata apli ixttagot ghott korunk to zata titlo vavr kortolo. To oxem korta tednam Jehova taka bhogxitolo ani vhoddil taka porot sobhecho bhag zaunk modot kortole mhunn tannem khatri dovrunk zata. Tor eklean khorench poschatap kela kai na hem zannam zaunk vhoddil proitn kortat tednam dor ekleachi poristhiti veg-veglli asta mhunn  vhoddil ugddas dovortat. Ani te taka favo titlich xist ditat.

19. Khorench poschatap korta to munis koslim pavlam gheta? (Ezekiel 33:14-16)

¹⁹ Atam meren ami polloilem toxem ek munis khorench poschatap korta tednam tannem kelʼlea patka pasot taka vaitt dista tem khorem. Punn teach borabor to aplem chukichem chintop soddun dita. Hacho orth, tannem kelʼlea patka vixim taka poilim koxem dislolem tantunt to bodlav korta. Tea bhair, to aplea vagnnukent bodlav korta ani Jehovachea dorjeam pormonnem cholonk vavurta. (Ezekiel 33:14-16 vachat.) Ani mhotvachem mhunnttlear, Jehova sangata apli ixttagot portun koxi ghott korunk zata tacher to dhean dita.

20-21. Amchea eka bhavan vo bhoinnin gombhir patok adarlam zalear ami taka koxi modot korunk zata?

²⁰ Jezun hea prithumer porgottnni kiteak keli tachem ek mukhel karonn tannem hea utramnim sanglem: “Patkiamnim poschatap korunk . . . Hanv apounk ailam.” (Lukas 5:32, NW) Ami pasun Jezuchi dekh gheunk zai. Amcho ek ixtt gombhir patok adarta tednam taka poschatap korunk ami modot korunk zai. Hem koxem korunk zata?

²¹ Amchea eka bhavan vo bhoinnin ek gombhir patok adarlam mhunn ami zannant zalear ami tem lipounchem nhoi. Punn vhoddilank vochon tea vixim sangonk ami taka urba diunk zai. Karonn Jehova soglem polloita ani tachea nodre thaun kainch lipona. (Mho. 5:21, 22; 28:13) Punn to bhav vo bhoinn, vhoddilank vochon sangonk toiar na zalear ami vochon vhoddilank tea vixim sangonk zai. Karonn vhoddil taka modot korunk xoktat. Ani to vhoddilanchi modot ghena zalear Jehova sangata tachi ixttagot piddʼddear zaunk xokta!

22. Fuddlea lekhant ami kitem polloitolim?

²² Konnui eklo zannam zaun zaito temp porian patok korit ravlo zalear vhoddil taka sobhentlean bhair kaddttat. Hacho orth, vhoddilamnim taka doia dakhounk na oxem kai? Hacho zobab zannam zaunk ami fuddlea lekhant, patok kortat tankam Jehova doiall ritin koxi xist laita ani ami tachi koxi dekh koxi gheunk zata tem polloitolim.