OBHEASACHO LEKH 44
Tumcho Bhorvonso Ghott Samballat
“Sorvesporacher visvas dovor.”—ST. 27:14.
GIT 144 Keep Your Eyes on the Prize!
KITEM XIKTOLIM *
1. Jehovan amkam koslo bhorvonso dila?
JEHOVAN amkam sasnak jieuncho bhorvonso dila. Amche modlea thoddeank, sorgar omor jivit jieuncho bhorvonso asa. (1 Kor. 15:50, 53) Punn choddxea zannank, hea prithumer bore bholaiken ani khuxalkaien sasnak jieuncho bhorvonso asa. (Prok. 21:3, 4) Tor amkam sorgar vo prithumer jieuncho bhorvonso asum, amkam aslolo bhorvonso amkam khub moladik!
2. Amcho bhorvonso kiteacher adarit asa, ani kiteak?
2 Bible-ant “bhorvonso” hea utracho orth, “fuddarak borem zatolem mhunn axeun ravop” zaun asa. Punn ho bhorvonso bexttem ek sopon vo ek polki axa nhoi. Tachea bodlek, to puraveancher ani khorea ghoddnneancher adarit asa. Ani ho bhorvonso purnn zatoloch mhunn amkam khatri asa karonn Jehova amkam ho bhorvonso dita. (Rom. 15:13) Ani Jehova kitem-i kortolo mhunn sangta tednam to tem kortoloch mhunn ami zannant. (Lok. 23:19) Karonn Jehova lagim to kitem sangta tem korunk itsa ani xokti asa mhunn amkam khatri asa.
3. Hea lekhant ami kitem polloitolim? (Stotr 27:14)
3 Amcho sorgincho Bap amcho khub mog korta. Ani ami tacher bhorvonso dovorlolo taka zai. (Stotr 27:14 vachat.) Tor Jehovacher amkam ghott bhorvonso asa zalear amcher atam ani fuddarak ietolea oddchonneancho ami khuxalkaien ani dhiran fuddo korunk pavtolim. Tor hea lekhant, bhorvonso eka nangra bhaxen ani ek xirostrann vo helmet-a bhaxen koxe toren amchi rakhonn korta, toxench ho bhorvonso ami koso ghott korunk zata tem ami polloitolim.
AMCHO BHORVONSO EKA NANGRA BHAXEN ZAUN ASA
4. Bhorvonso eka nangra bhaxen koso zaun asa? (Hebrevank 6:19)
4 Apostl Paulun Hebrevank chitt boroili tednam amcho bhorvonso eka nangra bhaxen zaun asa mhunn tannem sanglem. (Hebrevank 6:19 vachat.) Paulu zaite pavtti tarvantlean provas kortalo. Tor ek nangor eka tarvak thir samballunk uzar kortat mhunn to zannam aslo. Ek pavtti, Paulu tarvantlean provas kortalo tednam ek vhodd vadoll zalem. Tea vellar, tarum choloupeamnim tem tarum fatrank apttona zaunk, doriant nangor denvoile tem tannem polloilem. (D.I. 27:29, 39-41) Tor amchea jivitant vadolla sarkeo oddchonneo ietat tednam amcho bhorvonso eka nangra bhaxen, ami Jehova thaun pois vochona zaunk amkam thir samballtta. Ho bhorvonso amkam xanti dita. Karonn heo oddchonneo ek-na-ek dis kabar zatoleo mhunn amkam khatri melltta. Jezun pasun amkam dhumallo sosunk poddttolo mhunn xittkaunni dilʼli. (Ju. 15:20) Tor Jehovan amkam dilʼlea bhorvonxeacher niall kortat tednam ami tachi seva korit ravonk pavtolim.
5. Bhorvonso aslolean Jezuk visvaxi ravonk koxi modot zali?
5 Apnnank ek krur torechem moronn sosunk poddttolem mhunn Jezu zannam aslo. Tori astana, taka bhorvonso aslo dekhun to visvaxi ravonk pavlo. 33 K.X.-achea Ponʼnasavea disa, apostl Pedrun, Stotranchea pustokant aslole eke bhasaunnentlim utram sanglim, jea udexim Jezuk koslo bhorvonso aslo ani to kitlo xant aslo tem ami zannam zatat. Pedrun mhunnttlem: “Mhoji kudd porian bhorvanxean sust zatoli, kiteak Tum mhozo jiv Norkant [“fonddant,” NW] sanddcho nai ani Tujea visvaxi bhoktacho vinas zaunk diuncho nai . . . Tuje mukhar mhaka melltoli anondachi bhorti.” (D.I. 2:25-28; St. 16:8-11) Apunn mortolo mhunn Jezuk khobor asli. Tori astana, Jehova Dev apleak jivont kortolo ani apunn aplea Bapak sorgar porot mellon khuxal zatolo mhunn Jezuk ghott bhorvonso aslo.—Heb. 12:2, 3.
6. Ek bhav bhorvonxea vixim kitem sangta?
6 Bhorvonso aslolean, amchea zaitea bhav-bhoinnank pasun tancher ailole tras sosunk modot zalea. Hea vixim, amkam England-ant ravtolea bhav Leonard Chinn-achem udharonn asa. Poilea Vixv Zhuza vellar, tannem military-nt bhag gheunk nakarlem dekhun taka bondkhonnint ghatlo. Don mhoineam pasot, taka ekloch koidi korun dovorlo ani taka zaitem koxtti kam korunk lailem. Punn hea vixim to sangta: “Mhojea onubhovantlean, amcher ailʼle tras sosunk bhorvonso kitlo gorjecho tem mhaka kollon ailem. Amkam Jezuchem, apostlanchim, ani provadeanchim udharonnam asat. Toxench, amkam Bible-ant dilʼleo moladik bhasaunneo pasun asat. Hea soglea udexim amkam fuddara pasot bhorvonso melltta ani amcher ailʼle tras sosunk amkam modot zata.” Khorench, bhav Leonard-acho bhorvonso eka nangra sarko aslo! Toxench, amcho bhorvonso pasun eka nangra sarko zaunk xokta, mhunnche tras ailear pasun, tancho fuddo korunk ho bhorvonso amkam modot korunk xokta.
7. Amcher tras ietat tednam amcho bhorvonso koso ghott zata? (Romkarank 5:3-5; Jakob 1:12)
7 Ami amcher ietat te tras sostat, ani Jehova amchi koxi modot korta tem polloitat tednam amkam tachi maniotai asa mhunn amkam kollon ieta. Hea vorvim amcho bhorvonso anikui ghott zata. (Romkarank 5:3-5; Jakob 1:12 vachat.) Tor atam amcho bhorvonso, ami poile pavtti sot xiklolim tachea poros odik ghott zala. Amchea trasank lagon ami niraxi zalolim Soitanak zai. Punn Jehovache modotin ami koslea-i trasancho fuddo korunk xoktat.
AMCHO BHORVONSO EKA HELMET-A BHAXEN ZAUN ASA
8. Bhorvonso eka helmet-a bhaxen koso zaun asa? (1 Tesalonikekarank 5:8)
8 Bible-ant amchea bhorvonxeak eka helmet-ak pasun sor kela. (1 Tesalonikekarank 5:8 vachat.) Ek soinik zhuzta tednam to helmet ghalta. Hea vorvim, dusman tacher akromonn kortat tednam tache toklechi rakhonn zata. Teach bhaxen, Soitan veg-veglleo vatto uzar korun amkam tallnnent ghalunk ani amchem chintop piddʼddear korunk proitn korta. Punn amcho bhorvonso eka helmet-a bhaxen amchea chintnanchi rakhonn korta. Hea vorvim ami Jehovak visvaxi ravonk pavtat.
9. Lokank fuddara vixim bhorvonso na dekhun tim kitem kortat?
9 Sasnik jivitacho bhorvonso aslolean amkam xanneponnan nirnnoi gheunk modot zata. Punn sasnik jivitachea bhorvonxeacher aslolem amchem dhean halʼlem zalear, ami svotachea vonddovnneam vixim chodd chintunk lagtolim ani hea bhorvonxea vixim ami visortolim. Oxench Korintantlea Kristanvank ghoddlem. Devan dilʼli ek ekdom mhotvachi bhas, tem mhunnttlear, meloleanchea jivontponnachea bhorvonxeacher tancho bhavarth unno zalʼlo. (1 Kor. 15:12) Jea lokank fuddaracho bhorvonso asona, tim fokot aichea disa pasot jietat mhunn Paulun boroilem. (1 Kor. 15:32) Ani aiz zaitim zannam oxench kortat. Tankam Devachea bhasaunneancher bhorvonso na dekhun tankam oxem dista, ‘Faleancho dis konnem polloila, aiz borench khaum-ia, pieum-ia ani mouza marum-ia.’ Punn amchem chintop tanche poros vegllem asa. Karonn amkam Devan fuddarak bhasailʼlea bhorvonxeacher visvas asa. Ani hoch bhorvonso eka helmet-a bhaxen, amchem chintop rakhta ani amchech vixim chodd chintina zaunk amkam modot korta. Oxem kelolean, Jehova sangata aslole amche ixttagotichi rakhonn zata.—1 Kor. 15:33, 34.
10. Bhorvonso amkam anik koxe toren modot korunk xokta?
10 Amchea bhorvonxeachem helmet amkam anik ek toren modot korunk xokta. Tem mhunnttlear, ‘Jehovak manvota tem korun kainch faido na,’ oslem chintop ami pois korunk xoktat. Udharonnak, thoddim ghoddie oxem mhunnnot: ‘Mhaka sasnachem jivit kednanch mellchem na. Jehovak manvota tem korunk mhojean kednanch zaunchem na.’ Ami oxench chintlolem Soitanak zai mhunn ami ugddas dovrunk zai. Jobacho ek khotto ixtt, Elifazan pasun taka oxench kitem tori sanglem. Elifazan mhunnttlem, “Khoincho monis nirmoll zaum ieta?” Toxench, tannem Deva vixim fuddem oxem sanglem: “Polloi! Taka aplea ainzancher pasun visvas na. Itlench nhoi, sorg pasun tache nodre mukhar povitr na.” (Job 15:14, 15, NW) Punn heo kitleo vhoddleo fotti asleo. Tor ami oslem chintop pois korun, teo fotti nakarunk zai ani Jehovachea bhasaunneancher dhean dovrunk zai. Ami oxem korinant zalear ami amcho bhorvonso soddun ditolim. Tor Jehova amkam sasnachem jivit diunk axeta, ani tem melloun gheunk to amkam modot kortolo mhunn ami kednanch dubhavunk zaina.—1 Tim. 2:3, 4.
TUMCHO BHORVONSO GHOTT SAMBALLAT
11. Jehova aplo udʼdhex purnn korta tea meren ami pasiensan tachi vatt kiteak polloit ravonk zai?
11 Amcho bhorvonso ghott samballunk amkam sodanch sompem zaunchem na. Karonn thodde pavtti, Jehovah aplo udʼdhex purnn korunk, itlo vell kiteak gheta, oxem amkam disonk puro. Punn Jehova sasnak thaun asa ani sasnak urtolo. Tor amchea nodren zaitim vorsam koxim distat, tim tachea nodren kainch nhoi mhunn ami ugddas dovrunk zai. (2 Ped. 3:8, 9) Tor Jehova sarkea vellar ani sogleam-von bore toren aplo udʼdhex purnn kortolo. Punn tem ghoddie amkam zai tea vellar zaunchem na. Tor amcho bhorvonso ghott dovrunk, ani Jehova aplo udʼdhex purnn korta tea meren pasiensan tachi vatt polloit ravonk amkam koxi modot zatoli?—Jak. 5:7, 8.
12. Hebrevank 11:1, 6-a pormonnem, bhorvonso ani bhavarth eka-mekak koxe toren mellon asat?
12 Jehovan amkam bhorvonso dila ani to bhorvonso toch purnn kortolo mhunn ami ugddas dovrunk zai. Ami Jehova sangata amchi ixttagot ghott kortat tednam amcho bhorvonso anikui ghott zaunk pavtolo. Bible-ant, bhorvonso ani bhavarth eka-mekak mellon asat mhunn sanglam. Tor Jehova khoreaninch asa ani “apnnak sodtoleank to inam dita” mhunn ami bhavarth dovortat tednam tannem bhasailam tem soglem ghoddon ietolench mhunn amcho bhorvonso anik ghott zaunk pavtolo. (Hebrevank 11:1, 6 vachat.) Tor Jehova sangata amchi ixttagot ani amcho bhorvonso ami koso ghott korunk zata tem ami fuddem polloum-ia.
Magnnem ani niall kelolean ami amcho bhorvonso ghott samballunk pavtolim (Peregraf 13-15 polloiat) *
13. Ami Jehovak lagim koxem soronk zata?
13 Magnnem korat ani Bible vachat. Ami Jehovak pollounk xokonant tem khorem. Punn ami magnnem korun Jehova lagim ulounk xoktat ani to amchem aikotoloch mhunn khatri dovrunk xoktat. (Jer. 29:11, 12) Toxench, Bible vachun ani tacher niall korun Jehova amkam kitem sangonk sodhta tem ami aikonk xoktat. Adlea kallar Jehovan aplea visvaxi sevokanchi koxi kallji ghetli tem vachtat tednam amcho bhorvonso anikui ghott zata. Karonn Devachea Utrant asa tem soglem “amcho bhorvanso upzounk boroilam, kiteak Povitr Pustokar boroilolem asa tem amkam thir ravunk xikoita ani dhir dita.”—Rom. 15:4.
14. Jehovan dusreank dilʼli bhas koxe toren purnn kelea tea vixim ami kiteak niall korunk zai?
14 Apnnem dilʼli bhas Jehovan koxe toren purnn kelea tea vixim niall korat. Jehovan, Abraham ani Sarak dilʼli bhas tannem koxe toren purnn keli tea vixim chintat. Abraham ani Sara zannttim zalʼlim ani tankam bhurgem zaunk xokonaslem. Tori astana, tankam ek bhurgo zolmotolo mhunn Jehovan tankam bhas dili. (Ut. 18:10) Tor Abrahaman Jehovachea utracher visvas dovorlo kai? Hea vixim Bible oxem sangtam: “Tannem oso bhavarth dhorlo ki khub lokancho to bapui zaunk pavlo.” (Rom. 4:18) Jehovan dilʼli bhas to koxe toren purnn kortolo tem Abrahamak khobor nasli. Tori astana, Jehovan sanglolem tem ghoddon ietolem mhunn Abrahamak bhorvonso aslo. Ani Jehovan sanglolem toxench zalem. (Rom. 4:19-21) Tor oslea ghoddnneantlean ami kitem xiktat? Jehova sangta tem zaunkuch xokona oxem amkam dista zalear pasun, tannem sanglam tem to purnn kortoloch mhunn ami khatri dovrunk zata.
15. Jehovan amchea pasot kitem kelam tea vixim ami kiteak niall korunk zai?
15 Jehovan aiz porian amchea pasot kitem kelam tea vixim chintat. Jehovan aplea Utrant amkam zaitem kitem bhasailam. Tor Jehovachea khoinchea utrantlean aiz amkam svota zaun faido zata tea vixim ami chintunk zata. Udharonnak, Jehova amcheo gorzo purnn kortolo mhunn Jezun amkam bhas dilea. (Mt. 6:32, 33) Toxench, ami Jehova lagim tachi povitr xokti magtat tednam Jehova ti amkam ditolo mhunn Jezun sanglam. (Luk. 11:13) Aiz Jehova amkam apli povitr xokti dita ani amcheo gorzo purnn korta tem ami pollounk xoktat. Toxench, Jehovan dilʼli anik khoinchi bhas to aiz amche pasot purnn korta tea vixim ami chintunk zata. Udharonnak, to amkam bhogxitolo, amkam bhuzvonn ditolo, ani tachea sangata amchi ixttagot ghott korunk amkam goroz tem soglem ditolo mhunn tannem amkam bhas dilea. (Mt. 6:14; 24:45; 2 Kor. 1:3) Tor Jehovan aiz porian amchea pasot kitem-kitem kelam tea vixim ami niall kortat tednam to fuddarak amche pasot kitem kortolo mhunn tannem sanglam tacher amcho bhorvonso anik ghott zata.
BHORVONSO ASA MHUNN KHUXAL ZAIAT
16. Amcho bhorvonso ek moladik dennem kiteak zaun asa?
16 Jehovan amkam dilʼlo sasnik jivitacho bhorvonso ek moladik dennem zaun asa. Ani ho bhorvonso purnn zatolo, tea vella pasot ami axeun ravleant. Ani to purnn zatoloch mhunn amkam khatri asa. Ho bhorvonso eka nangra sarko, trasanchea vellar thir ravonk, toxench dhumallo ani moron pasun sosunk amkam modot korta. Itlench nhoi, to eka helmet-a sarko amchea chintnanchi rakhonn korta. Hea vorvim, vaitt chintop nakarunk ani borem tem korunk amkam modot zata. Tea bhair, ho bhorvonso amkam Jehovak lagim soronk ani to amcho kitlo mog korta tem zannam zaunk modot korta. Tor amcho bhorvonso ami ghott samballttat tednam amkam khub faido zata.
17. Amchea bhorvonxeak lagon ami khuxal kiteak ravonk xoktat?
17 Paulun Romkarank boroilʼlea chittint tannem tankam oxem sangon urba dili: “Bhorvanso asa mhonnun khuxal ravat.” (Rom. 12:12) Paulu khuxal ravonk xoklo. Karonn to visvaxi ravlo zalear taka sorgar sasnak jieunk mellttolem mhunn to zannam aslo. Ami pasun amkam aslolea bhorvonxeak lagon khuxal ravonk xoktat. Karonn Jehovan jem kitem bhasailam tem to purnn kortoloch mhunn amkam khatri asa. Hea vixim eka Stotrkaran oxem mhunnttlem: “Zo konn Sorvespora aplea Devacher visvas tthevta, to monis bhagi! . . . [“karonn Jehova sodanch visvaxi,” NW].”—St. 146:5, 6.
GIT 139 See Yourself When All Is New
^ Jehovan fuddara pasot, amkam ek ekdom boro bhorvonso dila. Ho bhorvonso amkam urba dita, amcher ietat tea trasancher dhean dina zaunk amkam modot korta, ani amcher kitleo-i oddchonneo ailear pasun amkam visvaxi ravonk adar korta. Toxench, Jehova sangata amchi ixttagot piddʼddear korunk xokta toslea chintnam thaun ho bhorvonso amchi rakhonn korta. Tor hea lekhant ami hea vixim zannam zatolim, ani ami amcho bhorvonso kiteak ghott samballunk zai tem polloitolim.
^ CHITRACHI MAHITI: Ek helmet eka soinikachea toklechi rakhonn korta, ani ek nangor eka tarvak thir samballtta tea bhaxen, amcho bhorvonso amchea chintnanchi rakhonn korta ani trasanchea vellar amkam thir ravonk modot korta. Jehova aplem aikota mhunn tacher visvas dovrun, ek bhoinn tache lagim magnnem korta. Abrahamak dilʼleo bhas Jehovan koxe toren purnn keleo tea vixim ek bhav niall korta. Anik ek bhav, Jehovan tacher koso axirvad ghatla tea vixim chintʼta.
