1. Amkam kosli “bhuk” asa, ani hantuntlean amkam khuxalkai koxi melltta?

 KHORI khuxalkai eka munxachea jivitant thoddoch vell nhoi, punn sodankal uronk xokta. Jezun dongra voilea updesant oxem sanglem: “Devachea margdorxonachi bhuk asa tim munxam khuxal.” (Mt. 5:3) Jehovan amkam hea ritin rochleant ki taka zannam zaunchi ani tachi bhokti korchi “bhuk” amkam asa mhunn Jezu zannam aslo. Ani Jehova ek “khuxal Dev” dekhun tachi bhokti kortat tim pasun khuxal ravonk xoktat.—1 Tim. 1:11, NW.

2-3. (a) Jezuchea utram pormonnem anik konn khuxal asonk xoktat? (b) Hea lekhant ami kitem polloitolim, ani ami tem kiteak zannam zaunk zai?

² Tor amkam koslech tras nant zalearuch ami khuxal asonk xoktat kai? Na. Hem amkam Jezun dongra voilea updesant kitem sanglem tantuntlean kollon ieta. Aplea patkank lagon vo kotthin poristhitincho fuddo kortat dekhun jim konn “dukh kortat” tim khuxal, oxem Jezun sanglem. Toxench “sarkem tem kortat dekhun dhumallo sostat” vo Jezucho xis zalolean “opman” sostat, tim pasun khuxal asonk xoktat oxem tannem sanglem. (Mt. 5:4, 10, 11) Punn oslea poristhitimnim ami koxim khuxal asonk xoktat?

³ Amchea jivitant tras aslear pasun ami Jehova vixim zannam zaun ghetat ani tachea lagim sortat tednam ami khuxal asonk xoktat mhunn Jezun xikoilem. (Jak. 4:8) Tor amkam khori khuxalkai koxi mellonk xokta tea vixim tin panvlam ami hea lekhant polloitolim.

4. Khori khuxalkai mellonk poilem panvl khoinchem? (Stotr 1:1-3)

⁴ POILEM PANVL: Khori khuxalkai mellonk, ami Devachem Utor vachunk zai ani tacho obheas korunk zai. Jezun Devachea Utrak jevnnak sor kelem. Munxank ani zonvarank jieunk jevnnachi goroz asa. Punn fokot munxam Devachem Utor vachunk ani tacho obheas korunk xoktat. Ani tannim oxem korop gorjechem. Hea pasot Jezun oxem mhunnttlem: “Munis fokot unddea vorvim nhoi punn Jehovachea tonddantlean bhair sorta tea dor eka utra vorvim jieta.” (Mt. 4:4) Tor ami dor disa chukonastana Devachem Utor vachunk zai ani tacho obheas korunk zai. Hea vixim Stotrkaran pasun oxem mhunnttlem: ‘Jehovachea updesancher sontosta ani dis-rat Tache nem monant nialltta to khorench khuxal.’—Stotr 1:1-3 vachat.

5-6. (a) Ami Bible-a thaun kitem xikonk zata? (b) Bible vachlolean amkam koxi modot zaunk xokta?

⁵ Jehova amcho khub mog korta dekhun ami khuxal ravonk kitem korunk zai tem tannem amkam tachea Utrant sanglam. Zoxem, amchea jivitacho udʼdhex kitem, ami tache lagim amchi ixttagot ghott koxi korunk zata, amkam amchea patkanchem bhogsonnem koxem mellonk xokta tem ami tachea Utrantlean xiktat. Toxench, tannem amkam bhorvonxean bhorlolea fuddarachi bhas dilea mhunn ami xikonk pavtat. (Jer. 29:11) Ani him Bible-antlim sotam ami xiktat tednam amcho sontos vaddtta nhoi!

⁶ Toxench Bible-ant, sodanchea jivita pasot faideak poddttat tosle solʼle mellttat mhunn ami zannant. Ani ami te solʼle apnnaitat tednam amkam khuxalkai melltta. Punn jivitachea oddchonneank lagon ami niraxi zatat. Tea vellar, Devachem Utor vachunk ani niallunk ami  anik chodd vell ghalchi goroz asa. Karonn Jezun mhunnttlem: “Je lok Devachem utor aikotat ani pallttat te khuxal!”—Luk. 11:28.

7. Bible vachpantlean faido zaunk tumi kitem korunk zata?

⁷ Tor Bible vachtat tednam tumi kitem vachtat tea vixim chintunk vell gheiat. Hea vixim chintat. Tumkam konnem tori tumchea avddichem jevonn randun dilam. Punn tumi goddboddan asat vo tumchem dhean anik khoim tori asa dekhun tem chakunk vell ghenastana tumi tem soddsoddit jevtat. Punn jevlea uprant, tumi tem susegad jevunk zai aslem vo tem chakunk vell gheunk zai aslo oxem tumkam disonk puro. Heach toren, ami Bible soddsoddit vachtat tednam tantunt kitem sanglam tacher dhean diunk ami chukonk xoktat. Tor Bible vachunk vell gheiat. Tumi vachtat tea ghoddnneam vixim chintat. Tea ghoddnnent bhonvtonnim kitem ghoddtta, thoim koslo avaz zata tem monant gholloiat. Ani tumi jem vachlam tacher niall korat. Oxem kortat tednam tumkam anikui khuxalkai mellttoli.

8. “Visvaxi ani xanno chakor” apli zobabdari bore bhaxen samballtta mhunn ami kiteak mhunnonk zata? (Futtnott pasun polloiat.)

⁸ Amkam sarkea vellar jevonn diunk Jezun “visvaxi ani xanno chakor” nemla. (Mt. 24:45) Ani ho chakor apli zobabdari bore bhaxen samballtta. * Karonn ho chakor toiar korta tem soglem jevonn Bible-acher adarit asa. (1 Tes. 2:13) Tea pasot, ami Pahrogopur ani Zagrut Ravat! masikam, toxench jw.org-cher ietat te lekh vachtat, sumanachea modle ani xevottache mittinge pasot toiari kortat, ani dor mhoineak JW Broadcasting^®-acher ieta ti kariavoll polloitat. Hea vorvim Bible-a pormonnem Jehovachem chintop kitem asa tem somzonk amkam modot zata. Tor oxe toren ami sodanch Bible vachunk ani tacher obheas korunk vell ghetat tednam amkam khori khuxalkai dita ti dusri vatt ami korunk pavtolim.

9. Amkam khori khuxalkai dita tem dusrem panvl khoinchem?

⁹ DUSREM PANVL: Ami khorench khuxal ravonk sodhtat zalear ami Jehovachea dorjeam pormonnem jieunk zai. Hea vixim Stotrkaran oxem boroilem: “Jehovachi bhirant dhortat ani tache vatten choltat tim khuxal.” (St. 128:1, NW) Tor Jehovachi bhirant dovrop mhunnche, ami taka itlo man ditat ki taka manvona toslem kitench ami korunk sodhinant. (Mho. 16:6) Toxench, Bible-ant sanglolea tachea borea ani vaittachea dorjeam pormonnem jieunk ami amchean zata tem soglem kortat. (2 Kor. 7:1) Hea toren Jehovak avoddtta tacho ami mog kortat, ani taka manvona tacho ami dves kortat tednam ami khuxal zaunk pavtolim.—St. 37:27; 97:10; Rom. 12:9.

10. Romkarank 12:2-a pormonnem, ami kitem korop gorjechem?

¹⁰ Romkarank 12:2 vachat. Kitem borem ani kitem vaitt tache dorje tharaunk Jehovak odhikar asa mhunn amkam ghoddie khobor asa astoli. Punn amkam hem khobor aslearuch puro kai? Na. Ami te dorje manun gheunk zai. Udharonnak, eka rostear gaddi kitlea speed-in cholounk zai tem tharaunk sorkarak odhikar asa mhunn eka munxak khobor asa zait. Punn to apli gaddi kitlea speed-in choloita tea vorvim to sorkaracho ho kaido manun gheta vo na tem to dakhoun dita. Teach bhaxen, ami amchem jivit koxe toren jietat tea vorvim ami Jehovachea dorjeam pormonnem jievop sogleam-von borem mhunn ami manun ghetat vo na tem ami dakhoun ditat. (Mho. 12:28) Jehovachea dorjeam pormonnem jievop sogleam-von borem mhunn Davidan pasun manun ghetlem. Tea pasot tannem oxem mhunnttlem: “Tum mhaka jivitachi vatt dakhoitoloi, Tuje mukhar mhaka melltoli  anondachi bhorti, ani Tujea uzveak sasnnachem sukh!”—St. 16:11.

11-12. (a) Amkam khub uske astat vo ami niraxi astat tednam ami kosli chotrai dovrunk zai? (b) Monoronjon vinchun kaddttat tednam Filipkarank 4:8-antlim utram amkam koxim modot korunk xoktat?

¹¹ Amkam khub uske astat vo ami niraxi astat tednam tea vixim chintit ravona zaunk ami dusrea khoinchea-i kamant amchem dhean lavunk xoktat. Punn oxem kortana, Jehova dves korta toslem khoinchench kam korina zaunk ami chotrai dovrunk zai.—Ef. 5:10-12, 15-17.

¹² Apostl Paulun, Filipkarank chitt boroili tednam tannem tankam oxem sanglem: “Jem kitem nitin sarkem ani guneanva-mekllem, jea kiteachi ami opurbai ani tokhnnai kortanv, tumchea monant gholloiat.” (Filipkarank 4:8 vachat.) Paulun him utram mhunnttlim tednam to khas korun monoronjona vixinch uloinaslo. Punn hea utrancher dhean dilolean borem monoronjon vinchun kaddunk amkam modot zaunk xokta. Tumi oxem korunk zata: Ho vers vachtana, jea-jea zagear, “jem kitem” hem utor asa, thoim tumi “gitam,” “pichʼcheram,” “pustokam” vo “video game-i,” him utram ghalun hem vers vachunk zata. Oxem kelolean Jehovak kosle torechem monoronjon manvota ani manvona tem zannam zaunk tumkam modot zatoli. (St. 119:1-3) Hea toren, Jehovachea unch noitik dorjeam pormonnem ami jietat tednam amkam ek nitoll ontoskornn astolem ani khori khuxalkai mellonk ami tisrem panvl gheunk pavtolim.—D.I. 23:1.

13. Khori khuxalkai mellonk tisrem panvl khoinchem? (Juanv 4:23, 24)

¹³ TISREM PANVL: Tumchea jivitant Jehovachi bhokti poilea zagear dovrat. Jehova amcho Rochnnar dekhun ami fokot tachich bhokti korunk zai. (Prok. 4:11; 14:6, 7) Tor Jehovak manvota tea toren, tem mhunnttlear, “atmean ani sotan” tachi bhokti korunk ami sogleam-von chodd mhotv diunk zai. (Juanv 4:23, 24 vachat.) Hacho orth, Jehovache povitr xoktechea modotin, Bible-antlea sotam pormonnem ami tachi bhokti korunk zai. Tor amchea kamank addkholl asa vo bondi aslolea zageacher ami ravtat zalear pasun, ami Jehovachi bhokti poilea zagear dovrunk zai. Sodʼdheak amchea 100-am poros chodd bhav-bhoinnank, tim fokot Jehovachim Sakxi mhunn bondkhonnint ghatleant. * Tori astana, magnnem korunk, Devachea Utracho obheas korunk ani dusreank Jehova Dev ani tachea Rajea vixim sangonk, tim khuxalkaien apleachean zata tem soglem kortat. Tor amkam dhumallo sosunk poddtta vo lok amche vixim vaitt uloita tednam tem sosunk Jehova amkam modot korta, ani fuddarak to amkam inam ditolo mhunn ugddas dovorlolean ami khuxal ravonk xoktat.—Jak. 1:12; 1 Ped. 4:14.

14. Tajikistan-ant ravpi eka tornnattea bhava sangata kitem ghoddlem, ani kiteak?

¹⁴ Atam porian polloileant tim tin panvlam amkam khoreaninch khuxalkai diunk xoktat mhunn amchea bhav-bhoinnanchea onubhovantlean amkam kollon ieta. Hea vixim, Tajikistan-ant ravpi 19 vorsancho bhav Jovidon Bobojonov-achem udharonn polloum-ia. Amchea hea bhavan military seva korunk nakarli. Tea pasot, Otumbr 4, 2019 tarker taka zobordosten tachea ghorantlean bhair kaddlo. Taka zaite mhoine porian bondkhonnint dovorlo, ani to ek opradi aslolea sarko te tachea sangata vagle. Tachea sangata zalʼlo onʼneai her desanchea news-acher pasun dakhoilo. Military-cho soput gheunk ani military-che kopdde ghalunk tacher dobhav ghatlo ani taka khub marlo, oxem  news riporttant ailem. Uprant taka guneanvkar mhunn tharailo ani bondkhonnint ghatlo. Punn magir tea desachea raxttrpotin to guneanvkari nhoi mhunn tharailem ani taka suttka dili. Itlem soglem sosun pasun, bhav Jovidon visvaxi ravlo ani apli khuxalkai tannem hogddaunk na. Karonn Jehova sangata apli ixttagot ghott samballunk goroz aslem tem soglem tannem kelem.

15. Bondkhonnint astana pasun bhav Jovidon Jehova vixim koso xikot ravlo?

¹⁵ Bhav Jovidon bondkhonnint aslo tednam tache lagim Bible vo Bible-acher adarit prokaxonam naslim. Tori astana, to Jehova vixim xikot ravlo. Hem to koso korunk pavlo? Bhav-bhoinnam taka jevonn dhaddttalim tednam tim tea jevnnachea begancher, tea disachem vers boroitalim. Haka lagon bhav Jovidon Bible vachunk ani tacher niall korunk xoklo. Bondkhonnintlean bhair ailea uprant, azun porian dhumallo sosunk na tea bhav-bhoinnank, bhavan ho solʼlo dilo: “Bible ani Bible-acher adarit aslolim prokaxonam vachun, Jehova vixim zata titlem xikonk tumche lagim atam asloli svotontrtai tumi uzar korop ekdom gorjechem!”

16. Bhav Jovidon-an aplem dhean kiteacher dovorlem?

¹⁶ Bhav Jovidon Jehovachea dorjeam pormonnem jielo. Chukichea anvddeam vixim chintit ravchea bodlek vo vaitt kamam korchea bodlek, bhav Jovidon-an Jehovacher, ani apnnem kitem kelʼlem Jehovak zai tacher dhean dilem.  Jovidon rochnnecher niallttalo. Zoxem, to dor sokallim suknneancho avaz aikon uttʼttalo. Ani ratchea vellar, to chondrim ani noketram polloitalo. To mhunntta: “Jehovachea hea denneam udexim mhaka khuxalkai ani urba mellʼlli.” Tor Bible-antlean Jehova dita tea margdorxona pasot, ani to dita tea her vostum pasot ami upkari astat tednam ami khuxal ravonk pavtat. Ani hi khuxalkai amkam soglem sosunk modot korta.

17. 1 Pedru 1:6, 7-antlim utram, bhav Jovidon-a sarkea poristhitint aslolea munxak koxim lagu zatat?

¹⁷ Toxench, bhav Jovidon-an Jehovachi bhokti poilea zagear dovorli. Jehovak visvaxi ravop kitlem mhotvachem tem bhav zannam aslo. Karonn Jezun mhunnttlolem: “Tum fokot Jehova Devachich bhokti kor, ani tachich povitr seva kor.” (Luk. 4:8) Military-chea odhikareamnim ani soinikamnim bhav Jovidon-acher tacho dhorm soddun diunk khub dobhav ghatlo. Tori astana, Jovidon dis-rat, apleak visvaxi ravonk modot kor mhunn Jehova lagim magtalo. Bhavak khub onʼneai sosunk poddlo. Punn tannem soddun diunk na. Taka dhorun vhelo, marlo, bondkhonnint ghatlo. Punn itlem zaunui, to atam chodd khuxal asa. Karonn hea vorvim tachea bhavarthachi porikxa zali ani atam tacho bhavarth odik ghott zala.—1 Pedru 1:6, 7 vachat.

18. Ami amchi khuxalkai koxi samballunk zata?

¹⁸ Khoreaninch khuxal ravonk, amkam kiteachi goroz asa tem Jehova ekdom bore bhaxen zannam. Tor khori khuxalkai mellonk hea lekhant sanglolim tin panvlam ami apnnailear, kotthin poristhitimnim pasun ami amchi khuxalkai samballunk pavtolim. Ani stotrkara bhaxen ami oxem mhunnonk pavtolim: “Jicho Dev Sorvespor, ti porza khorench bhagi!”—St. 144:15.