1-2. Bible vachunk ani tacho obheas korunk ekdom bori vatt khoinchi? Udharonn diat.

 TUMI ek ghor gheunk sodhtat mhunn chintat. Tea ghoracho fokot ek fottu polloun tumi tem gheunk toiar astolim kai? Na. Tumi svota zaun tem ghor pollounk sodhtolim. Tem koxem dista, tantuntle rum kitle vhoddle asat, ani tem soglea vattamnim sarkem asa kai na, tem tumi bariksannen polloitolim. Itlench nhoi, tem ghor koxem bandlolem tem zannam zaunk, tumi ghoddie tacho plan pasun polloitolim. Tor tem gheunchea poilim, tumi ekdom bariksannen tea ghora vixim zannam zaunk sodhtolim.

² Heach bhaxen, Bible vachtana ani tacho obheas kortana ami bariksannen tacher dhean diunk zai. Ek zannar sangta ki Bible “ek lamb bilddinga bhaxen zaun asa, ani tachi buniad ekdom khol asa.” Tor ami Bible soddsoddit vachlo zalear, ami fokot “Devachea povitr utrantleo mullaveo vostu” zannam zatolim. (Heb. 5:12) Punn tantunt kitem asa tem bore bhaxen zannam zaunk, tem ghor bariksannen ami polloitat tea bhaxen, Bible-acho pasun ami bariksannen obheas korunk zai. Oxem korunk ekdom bori vatt mhunnttlear, Bible-antlo dor ek mudʼdo eka-mekak koso zuddlolo asa tea vixim obheas korop. Tor ami kitem patietat titlench nhoi, punn ami tem kiteak patietat tem zannam zaunk ami proitn korunk zai.

3. Apostl Paulun bhav-bhoinnank kitem korunk urba dili, ani kiteak? (Efezkarank 3:14-19)

 ³ Devachem Utor bore toren somzonk, ami tem kholaien xikonk zai. Apostl Paulun bhav-bhoinnank Bible-acho bariksannen obheas korunk urba dili. Oxem kelʼlean, tim sotachi “rundai, lambai, unchai ani kholai bore toren somzonk” pavtaslim. Hea vorvim tanchea bhavarthachim ‘mullam ghott zatolim’ aslim. Ani tea buniadir tim ghott urtolim aslim. (Efezkarank 3:14-19 vachat.) Ami pasun oxench korunk zai. Tor Bible anik bore toren somzonk ami kitem korunk zata tem polloum-ia.

4. Jehovak anikui lagim soronk ami kitem korunk zata? Udharonnam diat.

⁴ Kristanv aslolean ami fokot Bible-antleo mullaveo vostu xiklearuch puro nhoi. Povitr xoktechea modotin ami “Devacheo kholaiecheo vostu pasun” xikonk sodhtat. (1 Kor. 2:9, 10) Tor ami oslea vixoi-ancher svotacho obheas korunk zata, jea udexim ami Jehovak anikui lagim sortolim. Zoxem, Jehovan adlea kallar aplea sevokank koso mog dakhoilo ani tachea voilean to aiz amcho pasun mog korta mhunn koxem kollon ieta, tea vixoi-ancher ami sodh korunk zata. Vo adlea kallar Izraelitkaram jea toren Jehovachi bhokti kortalim ani aiz ami jea toren Jehovachi bhokti kortat tache modem kitem ek-sarkem asa, tea vixoi-ancher ami sodh korunk zata. Vo Jezun hea prithumer seva kortana purnn kelʼlea bhasaunneam vixim ami kholaien obheas korunk zata.

5. Svotachea obheasant tumi khoinchea vixoi-acher kholaien obheas korunk sodhtat?

⁵ Bible-acho bariksannen obheas korpi thoddea bhav-bhoinnank, tim tantuntlea khoinchea khol sotam vixim xikonk sodhtat mhunn vicharlem. Tanchea modlea thoddeanche zobab, “ Bible-acho Kholaien Obheas Korunk Thodde Vixoi” hea boksant dilʼle asat. Hea vixoi-ancher sodh korunk, ami Watch Tower Publications Index vo Research Guide for Jehovah’s Witnesses uzar korunk zata. Oxe toren obheas kelʼlean, amkam khuxalkai mellttoli, amcho bhavarth ghott zatolo, ani amkam “Devachi zannvai” mellttoli. (Mho. 2:4, 5) Tor ami bariksannen obheas korunk zata toslea thoddea khol sotam vixim polloum-ia.

6. (a) Jehovachea udʼdhexa vixim Bible-ant kitem sanglam? (b) Prithum ani munxakulla pasot Jehovacho udʼdhex ‘sasnacho’ asa oxem ami kiteak mhunnonk zata? (Efezkarank 3:11)

⁶ Bible-ant Devachea udʼdhexa vixim kitem sanglam tacher dhean diat. Udharonnak, ami eka zagear vochonk sodhtat zalear, ami umkeach rostean voitolim mhunn tharaitat. Punn tea rostear addkholleo aileo zalear, ami ghoddie tea zagear pavchimnant. Punn Jehovacho udʼdhex oso nhoi. To khoim vochonk sodhta, mhunnche to kitem korunk sodhta, tem tannem tharailam. Ani aplo udʼdhex purnn korunk, to veg-veglle roste uzar korunk xokta. Addkholleo aslear pasun, to apleak zai ti vatt uzar korun to purnn korunk xokta. Ani Jehovan aplea Utrant, tachea ‘sasnachea udʼdhexa’ vixim sovkas-sovkas korun amkam kolloilam mhunn ami kitlim upkari asat nhoi! (Efezkarank 3:11-cher aslolo study note polloiat.) Tor Jehova koxe-na-koxe toren tacho udʼdhex purnn korunk xokta. Karonn “tacho udʼdhex purnn zata tea toren to dor ek kam korta.” (Mho. 16:4, NW) Ani Jehova jem kitem korta, tacho amkam sodankal faido zatolo. Tor Jehovacho udʼdhex kitem, ani to purnn korunk tannem kosle bodlav keleat?

7. Adanv ani Even Jehovachi adnea moddli tednam Jehovan aplo udʼdhex purnn korunk kitem bodol kelo? (Matev 25:34)

⁷ Munxakulla pasot aplo udʼdhex kitem asa tem Jehovan Adanv ani Evek sanglolem. Tannem mhunnttlolem: “Choddat ani vaddat, prithum bhorat ani tika tumchea hata khal dovrat . . . prithumer jietolea monzatincher tumchem dhoniponn choloiat.” (Ut. 1:28) Adanv ani Even Jehovachi adnea moddun munxakullacher patok haddlem. Punn hea karonnak lagon, Jehovacho udʼdhex purnn zauncho na oxem nhoi. Karonn to purnn korunk tannem thoddo bodol kelo. Tannem rokddench tharailem ki sorgar ek Raj suru korun to prithum ani munxakulla pasot tacho udʼdhex purnn kortolo. (Matev 25:34 vachat.) Ani munxakullak tea Rajea vixim xikounk, toxench patok ani mornna thaun suttka diunk, tannem mogan aplea malgoddea Putak tharailʼlea vellar hea prithumer dhaddlo. Uprant Jezuk jivont korun, tannem taka aplea sorginchea Rajeacho Raza nemlo. Punn Devacho udʼdhex itloch naslo. Tantunt anikui mellon asa, zacher ami dhean diunk zai.

8. (a) Bible-acho mukhel vixoi kitem? (b) Efezkarank 1:8-11 pormonnem, Jehovachea udʼdhexant anik kitem mellon asa? (Masikachem fuddlem chitr polloiat.)

⁸ Jezuchea khala aslolea aplea Rajea udexim, Jehova hea prithume pasot aplo udʼdhex purnn korit voita toso, tachem nanv povitr zatolem. Ani hoch Bible-acho mukhel vixoi zaun asa. Jehovacho udʼdhex kednanch bodolchona. To kitem-i korun aplo udʼdhex purnn kortolo mhunn amkam guarantee dita. (Iz. 46:10, 11; Heb. 6:17, 18) To hi prithum sobit bag kortolo. Ani tantunt nitivont ani poripurnn asloli Adanvachi sonsot ‘sodankal jietoli.’ (St. 22:26) Punn tachea hea udʼdhexant anikui kitem mellon asa. Tem mhunnttlear, to sorgar ani prithumer aslolea sogleank, ek famil kortolo. Tednam ti soglim Jehovak aplo Raza mhunn manun ghetolim, ani visvaxiponnan tacheo adnea pallttolim. Ani oxem korun, Jehova sompurnn toren aplo udʼdhex purnn kortolo. (Efezkarank 1:8-11 vachat.) Tor Jehova kitle bore toren aplo udʼdhex purnn korit asa tem zannam zaun tumi ojap zainant kai?

9. Bible vachlolean, ami kitlea pois poriant fuddar pollounk xoktat?

⁹ Eden bagent kelʼlea bhasaunnecher dhean diat. Ti amkam Utpoti 3:15-nt vachunk melltta. b Hea bhasaunnent oslea ghoddnneam vixim sanglam, jea udexim Jehovacho udʼdhex  purnn zatolo. Punn heo ghoddnneo hozaramnim vorsam uprant ghoddcheo asleo. Tantuntli ek mhunnttlear, Mesias Abrahamachea sonstintlean ieuncho aslo. (Ut. 22:15-18) Uprant, 33 K.X.-ant, Soitan Jezuchea khonttek chabcho aslo. Ani toxench ghoddlem! (D.I. 3:13-15) Tea bhair, Soitanachem mostok mostitolo mhunn sanglolem. Punn hi bhasaunni Jezuchea Ek Hozar Vorsanchea Razvottke uprant purnn zatoli, jednam Soitanache ani Jehovache songottnne modem asloli dusmankai kabar zatoli. (Prok. 20:7-10) Toxench Soitanachea sonvsaracho purnn toren xevott zata toso, anik kitem ghoddttolem tem pasun Bible-ant sanglam.

10. (a) Fuddarak kosleo ghoddnneo ghoddcheo asat? (b) Tea pasot ami amchem mon ani kalliz koxem toiar korunk zata? (Futtnott polloiat.)

¹⁰ Bible-ant, fuddarachea ekdom ojapachea ghoddnneam vixim kitem sanglam tacher dhean diat. Survatek, sonvsarantlim raxttram, “soglim xantin ani surokxotaien asat!” oxem mhunnttolim. (1 Tes. 5:2, 3) Ani “okosmat” vhodd sonkoxtt suru zatolo, jednam raxttram khottea dhormancho nas kortolim. (Prok. 17:16) Uprant ojapache ritin “mollba voilea kupancher munxacho Put xokten ani vhodd mhoimen ieta” to ghoddie dixtti poddot. (Mt. 24:30) Ani Jezu lokancho neai kortolo. Mhunnche to menddrank, bokddeam thaun vegllo kortolo. (Mt. 25:31-33, 46) Punn Soitan hea vellar ogi boscho na. To itlo ragan bhorlolo astolo ki Jehovachea sevokancher akromonn korunk to Magogachea Gogak, mhunnche raxttranchea zomeak uksaitolo. (Ez. 38:2, 10, 11) Hea vella modem, prithumer asat tim urlolim makhlolim Kristanvam sorgar voitolim. Karonn tannim Krist ani tachea sorginchea fouje sangata, Armageddonachem zhuz zhuzonk ieunk zai. c (Mt. 24:31; Prok. 16:14, 16) Ani tea zhuza uprant, Kristachi Ek Hozar Vorsanchi Razvottki suru zatoli.—Prok. 20:6.

11. Sasnachem jivit koxem astolem? (Chitr pasun polloiat.)

¹¹ Atam, 1,000 vorsam uprant anik kitem zatolem tem chintat. Bible sangta: “Sasnak jieunk Jehovan [amchea] kallzant ghatlam.” (Up. 3:11, NW) Tor tea vellar amchem jivit koxem  astolem, ani Jehova sangata amchi ixttagot kitli ghott astoli tem ami chintunk zata. Draw Close to Jehovah hea pustokant, pan 319-acher ek voll dilʼli asa, ji amchi umed vaddoita. Thoim sanglam: “Ami xemboramnim, hozaramnim, lakʼkhamnim ani koroddamnim vorsam jielea uprant pasun, Jehova vixim aiz ami jitlim zannant, tachea poros anikui chodd ami zannam zatolim. Tori astana, tachea vixim mezunk zainant titleo vostu xikonk asat oxem amkam distolem . . . Novea sonvsarant sasnachem jivit kitlem sobit ani ojapachem astolem tem ami chintunk pasun zaina. Ani tache poros sobit mhunnttlear, ami sasnak Jehovak lagim sorot ravtolim.” Tor aiz ami Devachea Utracho obheas korit ravtat toxim, ami anik kitem zannam zaunk xoktat?

12. Sorga vixim ami koxem zannam zaunk zata? Ek udharonn diat.

¹² “Sogleant unch zagear,” mhunnche Jehovachea fuddeant asop mhunnttlear kitem, tea vixim Bible-ant thoddi mahiti dilea. (Iz. 33:5, NW) Jehova ani tachea songottnnechea sorginchea bhaga vixim, Bible-ant ekdom ojapacheo vostu sangleat. (Iz. 6:1-4; Dan. 7:9, 10; Prok. 4:1-6) Udharonnak, “sorg ukto zalo ani Deva thaun ailʼlim dorxonam” Ezekielan polloilim, hea vixim ami Bible-ant vachunk zata.—Ez. 1:1.

13. Hebrevank 4:14-16 pormonnem, Jezu sorgar thaun jem kitem korta tea vixim tuka kitem avoddtta?

¹³ Toxench, Jezu sorgar thaun amchea pasot kitem korta tacher dhean diat. To sorgar Raza, ani doia-maia dakhoupi Porom Iadnik zaun asa. Tor ami Jezuchea nanvan magnnem kortat tednam, ami Devache “doiallaiechea xinvasona lagim” soronk pavtat. Toxench, ‘goroz tednam vo sarkea vellar’ ami Jehova lagim vinoti korunk xoktat. (Hebrevank 4:14-16 vachat.) Sorgar thaun Jehovan ani Jezun amchea pasot kitem kelam ani korit asat, tea vixim ami chukonastana niall korunk zai. Karonn toxem kelʼlean amchem kalliz bhoron ietolem, ani ami urben Jehovachi seva korunk pavtolim.—2 Kor. 5:14, 15.

14. Ami Jehovak ani Jezuk kitlim upkari asat tem dakhounk sogleam-von bori vatt khoinchi? (Chitram pasun polloiat.)

 ¹⁴ Ami Jehovak ani Jezuk kitlim upkari asat tem dakhounk sogleam-von bori vatt mhunnttlear, lokank Jehovachim Sakxi zaunk, ani Jezuchim pattlavdaram zaunk modot korop. (Mt. 28:19, 20) Apostl Paulu pasun Jehovak ani Jezuk khub upkari aslo. Ani “sogle toreche lok salvar zaunche ani tankam sotachem khorem ginean mellchem” hich Jehovachi khuxi zaun asa mhunn Paulu zannam aslo. (1 Tim. 2:3, 4) Dekhun “thoddea tori lokank salvar korunk,” tannem zata titlea lokank porgottnni korunk khub vavr kelo.—1 Kor. 9:22, 23.

15. Stotr 1:2-a pormonnem, amkam kitem kelʼlean khuxalkai mellonk xokta?

¹⁵ Eka stotrkaran mhunnttlolem ki ‘Jehovachea updesancher sontosta, ani dis-rat tache nem monant niallit asta’ to munis khuxal asta, ani taka ies melltta. (St. 1:1-3) Hea versam vixim, Bible-acho ek bhaxantor korpi, Joseph Rotherham-an, tachem pustok Studies in the Psalms, hantunt sanglolem ki eka munxak “Devachea margdorxonachi itli bhuk asonk zai ki to tem sodhta, tacho obheas korta, ani tea vixim niallunk zaito vell sarta.” Toxench tannem mhunnttlolem ki “konnui ek dis Bible vachina zalear, tacho to dis piddʼddear zaun gelo.” Tor Bible-acho kholaien obheas korun, ani tantuntlo dor ek mudʼdo eka-mekak koso zuddlolo asa tem zannam zaun, amkam khuxalkai mellonk xokta. Khorench, Devachea Utrant aslolea sotachi rundai, lambai, unchai ani kholai bore toren somzon amkam khub khuxalkai melltta!

16. Fuddlea lekhant ami kitem xiktolim?

¹⁶ Jehovan aplea Utrant boroilʼlim kholaiechim sotam, amchea tokle voilean vochpa sarkim nant. Ami tim bore bhaxen somzonk zatat. Tor fuddlea lekhant, Paulun aplea chittint Hebrev Kristanvank sanglolea Jehovachea vhodd otmik Devmondira vixim zannam zaum-ia. Hea vixim obheas korun tumkam khuxalkai mellom mhunn ami magtat!