1. Ek devdut kitem sangta, ani tea vixim chintun amkam koxem dista?

 EK DEVDUT tumchea lagim uloita zalear to kitem sangta tem tumi aikonchim nant kai? Khorem mhunnttlear, aiz ek devdut “dor-eka desak, dor-eka kullak, dor-eke bhaxechea lokak, ani dor-eke porjek” oxem sangta: “Devachi bhokti korat ani Taka mhoima diat! . . . Zannem rochleat sorg ani sonvsar, . . . Taka saxttangim poddun nomoskar korat.” (Prok. 14:6, 7) Jehova ekloch khoro Dev ani sogleamnim tachich bhokti korunk zai. Tor aplea vortea otmik Devmondirant tannem amkam apli bhokti korunk ek vhodd sueog dila mhunn, ami khorench taka khub upkari asat nhoi!

2. Jehovachem otmik devmondir mhunnttlear kitem? (“ Otmik Devmondir Mhunnche Kitem Nhoi?” hem boks polloiat.)

² Otmik Devmondir mhunnttlear kitem, ani tea vixim bariksannechi mahiti amkam khoim mellonk xokta? Hem Devmondir ami pollounk xokta toslem ek bildding nhoi. Punn Jezuchea bolidana udexim khore bhoktek lagon Jehovan kelʼlea manddavollik tem suchit korta. Hea manddavolle vixim apostl Paulun poilea xekddeantlea Judeiant ravtolea Hebrev Kristanvank boroilem. b

3-4. Paulun Judeiantlea Hebrev Kristanvank koslea karonnank lagon chitt boroili, ani tannem tankam koxi modot keli?

³ Paulun hea Kristanvank kiteak chitt boroili? Chodd korun don karonnank lagon. Poilem mhunnttlear, to tankam urba diunk sodhtalo. Karonn hea Kristanvam modlea choddxea zannamnim Judev dhorm soddun Kristanv dhorm apnnailʼlo. Tor Judev dhormantle dhormik fuddari tanchi fokannam  kortale astole. Karonn Kristanvank Jehovachi bhokti korunk Devmondir naslem, bolidan bhettounk vedi nasli, toxench Jehovachi seva korunk iadnikanchi manddavoll nasli. Tor him Kristanvam niraxi zaunk xoktalim ani tancho bhavarth unno zaunk xoktalo. (Heb. 2:1; 3:12, 14) Itlench nhoi, tim ghoddie Kristanv dhorm soddun porot Judev dhormant vochonk xoktalim.

⁴ Dusrem mhunnttlear, him Kristanvam kholaiechi xikounn zannam zaunk vo Devachea Utrant aslolem “nibor jevonn” jevunk vavr korinant, mhunn Paulu tankam sangonk sodhtalo. (Heb. 5:11-14) Tantuntlim thoddim zannam azunui Moizesa udexim dilʼle Kaide pallttalim. Tor Paulun tankam sanglem ki Kaidea pormonnem tim ditat tim bolidanam, purnn toren patok kaddun uddounk xokonant dekhun Kaido ‘kaddun uddoilʼlo.’ Ani uprant tannem tankam kholaiecheo thoddeo xikounneo xikoileo. Jezuchea bolidana vorvim tankam ek “boro bhorvonso” melltta, ani hea vorvim tim ‘Devachea lagim soronk’ xoktat mhunn Paulun tanchea ugddasak haddlem.—Heb. 7:18, 19.

5. Ami Hebrevachea pustokant, koslea manddavolli vixim zannam zavop gorjechem, ani kiteak?

⁵ Hebrev Kristanvam adim jea toren bhokti kortalim, tachea poros atam tim jea toren Jehovachi bhokti kortat ti kiteak vorti asa tea vixim apostl Paulun tankam somzailem. Kaidea pormonnem, Judev lok kortali ti bhokti “ieuncheo asat tea vostunchi savlli asli, punn teo Krista udexim purnn zatat.” (Kol. 2:17) Ek vostuchi “savlli” polloun, ti vost kitem astoli tea vixim ami odmas lavunk zata. Teach bhaxen, Judev jea toren bhokti kortale, ti eka vortea toren bhokti korchea manddavollichi savlli zaun asli. Tor amkam patkanchem bhogsonnem mellonk ani Jehovak zai te toren bhokti korunk tannem hi manddavoll keli. Tea pasot, hea manddavolle vixim zannam zavop khub gorjechem zaun asa. Tor Hebrevank pustokant somzailʼlea bhaxen, ti “savlli” (adlea tempar Jehovachi bhokti koxi zatali) ani ti koxi ‘purnn zata’ (Krista uprant Jehovachi bhokti koxi zaunk lagli) tem sor korun polloum-ia. Oxem kelʼlean, otmik Devmondir mhunnttlear kitem ani ami tantunt koxim mellon asat, tem ami anik bore toren zannam zaunk pavtolim.

6. Izraelitkaram tombu kitea pasot uzar kortalim?

⁶ Adlea tempar Jehovachi bhokti koxi zatali. 1512 K.X.A.-ant, Moizesan zo tombu toiar kelʼlo tem monant dovrun Paulu uloilo. (“Adlea  Tempar Jehovachi Bhokti Koxi Zatali—Krista Uprant Jehovachi Bhokti Koxi Zaunk Lagli,” ho chartt polloiat.) Hea tombunt Izraelitkaram Jehovachi bhokti korunk, ani bolidanam bhettounk ietalim. (Sutt. 29:43-46) Toxench, tim oronʼneant eka zagear thaun dusrea zagear voitana tombu pasun gheun voitalim. Ani Jeruzalemant Devmondir bandun zaunk na te meren, sumar 500 vorsam poriant bhokti korunk tim “tombu” uzar kortalim. (Sutt. 25:8, 9; Lok. 9:22) Ho tombu Kristanvam pasot kitem tori borem ieunchem asa taka suchit kortalo.

7. Jehovachem otmik Devmondir kednam ostitvant ailem?

⁷ Krista uprant Jehovachi bhokti koxi zaunk lagli. Jehovachi seva korunk uzar kortalim to tombu, ‘sorginchea vostunchi ek savlli’ zaun asli. Ani tombu Jehovachea vortea Devmondirak suchit kortalo. Paulun sanglem ki ho tombu “aichea kallak lagon ek udharonn koxem zaun asa.” (Heb. 8:5; 9:9) Tannem Hebrevank chitt boroili tea meren, Jehovachea otmik Devmondirachi manddavoll ostitvant asli. Ti 29 K.X.-ant suru zalʼli jednam Jezun bautizm ghetlo, Jehovan taka povitr xokten makhlo, ani to Jehovacho “vorto porom iadnik” mhunn tachea otmik Devmondirant seva korunk laglo. c—Heb. 4:14; D.I. 10:37, 38.

8-9. Hebrevank 7:23-27-a pormonnem, Izraelache porom iadnik, ani vorto Porom Iadnik, Jezu modem koslo vhoddlo ontor asa?

⁸ Adlea tempar Jehovachi bhokti koxi zatali. Izrael porje pasot porom iadnik Jehova mukhar voitalo. Jea disak tombu Jehovak somorponn kelo, tednam Jehovan Aaronak Izraelacho poilo porom iadnik mhunn makhlo. Punn Paulun sanglem toxem, “eka-fattlean-ek zaiteank iadnik zaunchem poddttalem, karonn mornnak lagon te iadnik mhunn seva korit ravonk xokonasle.” d (Hebrevank 7:23-27 vachat.) Tea bhair opurnn aslolean, porom iadnikank svotachea patkam pasot bolidanam diunk poddttalim. Tor hachea voilean, Izraelache porom iadnik ani vorto Porom Iadnik Jezu modem, kitlo vhoddlo ontor aslo tem kollon ieta.

⁹ Krista uprant Jehovachi bhokti koxi zaunk lagli. Amcho Porom Iadnik Jezu, “khorea tombucho sevok zala, zo khoinchea-i munxan nhoi punn Jehovan ubo kela.” (Heb. 8:1, 2) Ani Paulun sanglem ki ho iadnik “sodanch jivo asa dekhun tachem iadnikponn sodanch urtolem, ani konnuch tacho zago gheunk pavona.” Tea bhair, Jezu “dag naslolo” ani “patki lokam poros vegllo” asa, toxench Izraelitkaranchea her porom iadnikam bhaxen, taka “dor disa bolidan bhettounchi goroz na” oxem-i Paulun sanglem. Tor Judevanchea kallar asloleo vedi ani bolidanam konnachi savlli asat tem atam polloum-ia.

10. Tambeachea vedicher bhettoitalim tim bolidanam konnak suchit kortalim?

¹⁰ Adlea tempar Jehovachi bhokti koxi zatali. Tombuchea bhair tambeachi vedi astali ani tacher Jehovak zonvaranchim bolidanam bhettoitalim. (Sutt. 27:1, 2; 40:29) Punn him bolidanam purnn toren lokanchim patkam kaddun uddounk xokonaslim. (Heb. 10:1-4) Tor tombu lagim vorsan-voros bhettoitalim tim bolidanam, tea eka bolidanak suchit kortalim, jem purnn toren munxakullak patkanchem bhogsonnem diunk xoktalem.

11. Jezun svotak jea vedicher bolidan mhunn bhettoilo tem konnak suchit korta? (Hebrevank 10:5-7, 10)

¹¹ Krista uprant Jehovachi bhokti koxi zaunk lagli. Aplo jiv bolidan korun, zaitea zannank soddvonn diunk Jehovan apleak prithumer dhaddla, mhunn Jezu zannam aslo. (Mt. 20:28) Tea pasot tannem bautizm ghetlo, ani to Jehovak  zai tem korunk toiar asa mhunn dakhoun dilem. (Ju. 6:38; Gal. 1:4) Tor eka orthan, Jezu, svotak vedicher bhettounk toiar zalo. Hi vedi Jehovache ‘khuxek’ suchit kortali. Ani tachi khuxi asli ki tachea Putan apli poripurnn kudd munxakulla pasot bolidan kelʼli. Tor Jezucher bhavarth dovortat tankam purnn toren tanchea patkanchem bhogsonnem mellttolem aslem. Karonn Kristan “ekuch pavtti sodankalla pasot” apli kudd iodn mhunn bhettoili. (Hebrevank 10:5-7, 10 vachat.) Tor atam ami, tombu bhitor kitem aslem ani tem konnak suchit kortalem tem polloum-ia.

12. Tombuchea dor eka bhagant konn bhitor vochonk xoktalo?

¹² Adlea tempar Jehovachi bhokti koxi zatali. Tombu toxench Jeruzalemant uprant bandlolim Devmondiram, bhitorlean chodd korun ek-sarkim aslim. Tantunt bhitor don bhag asle, “Povitr Zago” ani “Bhov Povitr.” Ani hea donui bhagam modem, ek poddʼddo aslo. (Heb. 9:2-5; Sutt. 26:31-33) Povitr hea bhagant diveanchem bhangarachem ek stand, dhump zollounk ek vedi, toxench bhettounche undde aslolem ek mez astalem. Apleak dilʼli zobabdari purnn korunk, fokot ‘iadnik mhunn makhlole’ tech hanga vochonk xoktale. (Lok. 3:3, 7, 10) Bhov Povitr hea bhagant, soglea vatten bhangaran nettoiloli korarachi pett asli. Ani hi pett, Jehova thoim asa mhunn suchit kortali. (Sutt. 25:21, 22) Vorsak ek pavtti, Farikponnachea Disa fokot porom iadnikak poddʼdeachea dusrea vatten, mhunnche Bhov Povitr bhagant vochonk mellttalem. (Lev. 16:2, 17) Ani to dor vorsa, zonvaranchem rogot gheun thoim bhitor voitalo. Kiteak? Svotachea,  toxench akʼkhe porjechea patkam pasot farikponnacho iodn bhettounk. Ani sovkas-sovkas korun, Jehovan aple povitr xokte udexim tombunt aslole he bhag, toxench tantunt asloleo vostu konnak suchit kortat tem dakhoun dilem.—Heb. 9:6-8. e

13. Tombucho Povitr ani Bhov Povitr bhag konnak suchit korta?

¹³ Krista uprant Jehovachi bhokti koxi zaunk lagli. Kristachea xisam modem fokot umkeach zannank, mhunnche 1,44,000 zannank, Jehovan povitr xokten makhleant. Ani Jehova sangata tancho ek khas sombond asa. Tim Jezu borabor sorgar iadnik mhunn seva kortolim. (Prok. 1:6; 14:1) Tim prithumer astana, Jehova tankam aplea povitr xokten makhta ani aple put mhunn manun gheta. Tor tombunt aslolo Povitr ho bhag Jehova sangata aslolea tanchea khas sombondak suchit korta. (Rom. 8:15-17) Toxench tombunt aslolo Bhov Povitr ho bhag, sorgak suchit korta, zoim Jehova asa. Ani hea donui bhagam modem aslolo “poddʼddo,” Jezuchea rogta-masache kuddik suchit korta. Hi kudd gheun to sorgar vochonk xokonaslo, toxench Jehovachea otmik Devmondiracho Porom Iadnik mhunn seva korunk xokonaslo. Tor tachi kudd munxakulla pasot bolidan korun, tannem soglea makhlolea Kristanvank sorgar voichi vatt ukti keli. Punn tancho sorgincho inam melloun gheunk, tannim pasun tanchi rogta-masachi kudd teag korunk zai. (Heb. 10:19, 20; 1 Kor. 15:50) Jezu jivont zalea uprant, to otmik Devmondirachea Bhov Povitr bhagant bhitor sorlo. Ani fuddarak makhlolim Kristanvam pasun tachea sangata thoim astolim.

14. Hebrevank 9:12, 24-26-a pormonnem, Jehovachea otmik Devmondirant bhokti korchi manddavoll poilim poros vorti kiteak asa?

¹⁴ Jezuchea bolidana vorvim, toxench tachea iadnikponna vorvim khori bhokti korunk Jehovan ji manddavoll kelea, ti poilim poros vorti asa. Karonn Izraelant porom iadnik bolidan kelʼlea zonvaranchem rogot gheun, munxan toiar kelʼlea Bhov Povitr bhagant bhitor sortalo. Punn Jezu, Jehova mukhar vochonk sogleam-von povitr zagear, tem mhunnttlear ‘sorgar bhitor sorlo.’ Ani ‘aplem bolidan diun, patok kabar korunk,’ tannem aplem poripurnn kuddichem mol, tem mhunnttlear sasnak hea prithumer poripurnn munis mhunn jieuncho aplo hokʼk Jehova mukhar dovorlo. (Hebrevank 9:12, 24-26 vachat.) Ani Jezuchea soddvonne udexim, munxakullak purnn toren tanchea patkanchem bhogsonnem melltta. Tor ami fuddem polloitolim toxim, amkam sorgar vo prithumer jieuncho bhorvonso asum, ami soglim Jehovachea otmik Devmondirant tachi bhokti korunk xoktat.

15. Tombuchea angnnant konn seva kortale?

¹⁵ Adlea tempar Jehovachi bhokti koxi zatali. Tombuchea bhair ek angonn pasun aslem. Ho ek vhoddlo zago aslo ani tantunt sorvbhonvtim voi ghatloli. Hanga iadnik seva kortale. Thoim hulpailʼli bhett bhettounk, tambeachi ek vhoddli vedi asli. Toxench udok aslolem ek tambeachem tost aslem. Povitr seva korchea poilim, iadnik svotak nitoll korunk hem udok uzar kortale. (Sutt. 30:17-20; 40:6-8) Punn uprant, jim Devmondiram bandlolim taka bhailean pasun ek angonn aslem, zoim, iadnik nant te pasun ieun Jehovachi bhokti korunk xoktale.

16. Otmik Devmondirachea bhitorlea ani bhailea angnnant konn seva kortat?

¹⁶ Krista uprant Jehovachi bhokti koxi zaunk lagli. Jezu sangata sorgar iadnik mhunn seva korunk voichea poilim, hea prithumer asat tim urlolim makhlolim Kristanvam, otmik Devmondirachea bhitorlea angnnant visvaxiponnan Jehovachi seva kortat. Ani tombunt, toxench Devmondiramnim aslolem udkachem tost, makhlolea toxench, soglea Kristanvanchea  ugddasak haddtta ki tannim noitik ritin nitoll asonk zai ani xudʼdh ritin Jehovachi bhokti korunk zai. Toxem zalear, makhloleank visvaxiponnan tenko diupi ‘vhodd urponz’ khoim seva korta? Apostl Juanvan tankam ‘xinvasona mukhar ubim aslim’ tim polloilim. Hacho orth, tim hea prithumer Jehovachea otmik Devmondirachea bhailea angnnant “dis ani rat tachi seva kortat.” (Prok. 7:9, 13-15) Tor Jehovan amkam tachea otmik Devmondirant bhokti korunk ek moladik sueog dila mhunn ami tachi kitlim upkari asonk zai nhoi!

17. Aiz amkam sogleank Jehovak koslim bolidanam bhettouncho sueog asa?

¹⁷ Aiz soglea Kristanvank Jehovak bolidanam bhettounk ek khas sueog asa. Ami amcho vell, takot ani amchea lagim asloleo vostu uzar korun Rajeachea kamank tenko diunk zata. Apostl Paulun Hebrev Kristanvank sanglolem toxem ami “sodanch Devak vakhannʼnnecho iodn, mhunnche, tachem nanv sogleam mukhar porgott korta tem amchea vonttanchem foll” bhettounk zata. (Heb. 13:15) Ani Jehovachi seva korchea sueogacho ami valor kortat mhunn dakhounk ami Jehovak amchem boreantlem-borem diunk zata.

18. Hebrevank 10:22-25-a pormonnem, ami sodanch kitem korunk zai, ani ami kitem visorchem nhoi?

¹⁸ Hebrevank 10:22-25 vachat. Paulun Hebrev Kristanvank ji chitt boroilʼli tachea xevottak, Jehovachi seva kortana ami khoincheo vostu sodanch korit ravonk zai tea vixim tannem sanglem. Tantunt, Jehova lagim magnnem korop, amchea bhorvonxea vixim porgottop, mittingek ektthaim ievop ani ‘[Jehovacho] dis lagim ieta tem ami polloitat toxem eka-mekak anikui chodd urba divop’ hem soglem mellon asa. Itlench nhoi, Prokasovnni pustokachea xevottachea odheai-amnim Jehovacho devdut oxem sangta: “Devachi bhokti kor!” (Prok. 19:10, NW; 22:9, NW) Ani oxem korop kitlem mhotvachem tem dakhoun diunk to oxem don pavtti mhunntta. Tor Jehovachea otmik Devmondira vixim aslolem kholaiechem sot ani amchea Vortea Devachi bhokti korunk amkam kitlo vhoddlo sueog asa tem ami kednanch visorchim nhoi!