OBHEASACHO LEKH 42
GIT 103 Gonvlli—Jehovachem Dennem
Fuddakar Ghetolea Bhavank Upkariponn Dakhoiat
“To voir choddlo tednam . . . tannem munis dennim mhunn dile.”—EF. 4:8.
MUKHEL MUDʼDO
Sobheche sevok, vhoddil ani sorkittachi dekhrekh korpi amkam koxe modot kortat, ani he visvaxi munis kortat tea vavra pasot ami upkariponn koxem dakhounk zata tem ami hea lekhant polloitolim.
1. Jezun amchea pasot kitem kelam?
JEZUN udar kallzan munxank jitli modot kelea titli anik konnench korunk na. Hea prithumer astana, vizmitam korun tannem lokank modot keli. (Luk. 9:12-17) Toxench, amchea pasot aplo jiv bolidan korun tannem amkam ek vhoddantlem-vhodd dennem dilam. (Ju. 15:13) Jivont zalea uprant pasun, to amkam udar kallzan modot korit asa. Tannem bhas dilʼli toxi, amkam xikounk ani bhuzvonn diunk povitr xokti di mhunn to Jehova lagim magta. (Ju. 14:16, 17, ftn.; 16:13) Ani sobheche mittinge udexim sonvsarbhorchea lokank aple xis korunk to amkam goroz tem proxikxonn di-it asa.—Mt. 28:18-20.
2. Efezkarank 4:7, 8-nt sanglole ‘dennim mhunn dilʼle munis’ konn zaun asat?
2 Jezun amkam anik ek dennem dilam. Tea vixim apostl Paulun boroilem ki Jezu sorgar gelea uprant “tannem munis dennim mhunn dile.” (Efezkarank 4:7, 8 vachat.) Sobhank zaitea vattamnim tenko mellonk lagon Jezun oxem kelem mhunn Paulun sanglem. (Ef. 1:22, 23; 4:11-13) Tor he ‘dennim mhunn dilʼle munis’ konn zaun asat? He munis sobheche sevok, vhoddil ani sorkittachi dekhrekh korpi bhav zaun asat. a Te opurnn asat dekhun tanchea koddem chuki zatat tem khorem. (Jak. 3:2) Punn amcho Somi Jezu Krist tankam uzar korun amkam modot korta. Khorench, he munis tachea thaun amkam dennim koxe zaun asat!
3. Fuddakar gheupi bhav kortat tea kamank ami sogleamnim koso tenko diunk zata tem somzaiat.
3 Jezun hea bhavank soglea sobhank ghott korchem mhotvachem kam dilam. (Ef. 4:12) Punn hi zobabdari samballunk ami sogleamnim tankam tenko diunk zata. Hem somzonk hea vixim chintat. Ek Raj-ghor bandunk umkinch thoddim bhav-bhoinnam bandkamachem kam kortat. Punn her bhav-bhoinnam tankam goroz poddtta tem saman, toxench jevonn haddun diun vo her vattamnim modot korun tenko ditat. Heach bhaxen ami sogleamnim sobheche sevok, vhoddil ani sorkittachi dekhrekh korpi bhav kortat tea kamank, amchea utramnim ani korneamnim tenko diunk zata. Tor he bhav kortat tea koxtti vavra vorvim amkam koso faido zata ani ami tankam, toxench Jezu Kristak koxem upkariponn dakhounk zata tem polloum-ia.
SOBHECHE SEVOK ‘MODOT KORUN SEVA KORCHEM’ KAM KORTAT
4. Poilea xekddeant sobhek modot korunk sobheche sevok koslim thoddim kamam kortale?
4 Poilea xekddeant pasun thoddea bhavank sobheche sevok mhunn nemlole. (1 Tim. 3:8) 1 Korintkarank 12:28-ant, apostl Paulu ‘modot korun seva korpeam’ vixim boroitana to tancheach vixim uloitalo zait. Sobheche sevok zaitim gorjechim kamam kortale. Zoxem, te Devachem Utor kopi korunk vo kopi korunk uzar zatalem tem saman viktem haddunk modot kortale zait. Te him gorjechim kamam kortale dekhun vhoddil aplem dhean xikoupachea kamacher, toxench bhav-bhoinnank urba diunchea kamacher dovrunk pavle.
5. Aiz amchea sobhent aslole sobheche sevok koslim mhotvachim kamam kortat?
5 Aiz amchea sobhent aslole sobheche sevok koslim mhotvachim kamam kortat? (1 Ped. 4:10) Tankam ghoddie sobheche account samballchi vo porgottnnechea vattaranchi manddavoll korchi zobabdari asot. Toxench, prokaxonam order korun, tim soglea bhav-bhoinnank mellʼlleant mhunn te khatri korun ghetat. Tea bhair, te audio-video-nt kam kortat, attendant mhunn seva kortat vo Raj-ghor samballunk modot kortat. He bhav him soglim mhotvachim kamam bore bhaxen samballttat dekhun, bhav-bhoinnank mittingecho boro faido gheunk melltta, toxench porgottnnechem kam manddavollin zaunk pavta. (1 Kor. 14:40) Thodde sobheche sevok, Jivit ani Porgottnni Mittingeche bhag kortat ani jahir bhaxonnam ditat. Itlench nhoi, sobhechea sevokank porgottnni grupachea dekhrekh korpeank modot korpi mhunn nemunk xoktat. Toxench, thodde pavtti ek vhoddil gonvlli bhett korunk voita tednam, purto aslolea eka sobhechea sevokak aplea borabor apoit.
6. Ami sobhechea sevokank kiteak upkari asat?
6 Sobheche sevok apleo zobabdareo bore bhaxen samballttat dekhun bhav-bhoinnank koso faido zata? Bolivia-nt ravpi bhoinn Beberly b hea vixim sangta: “Sobheche sevok apleo zobabdareo bore bhaxen samballttat dekhun, hanv mittingecho purnn toren faido gheunk pavtam. Tanchea vavrak lagon hanv gitam gaunk xoktam, zobab diunk pavtam, bhaxonnam aikonk xoktam, toxench video ani chitram udexim mhaka xikonk melltta. Tea bhair, Raj-ghorant hajir zalʼlim soglim bhav-bhoinnam surokxit asat mhunn te khatri korun ghetat. Ani jim bhav-bhoinnam Raj-ghorant mittingek hajir zaunk pavonant, tankam videoconference-a udexim hajir zaunk te manddavoll kortat. Itlench nhoi, mitting zalea uprant Raj-ghor nitoll korunk te fuddakar ghetat, accounts polloitat ani bhav-bhoinnank prokaxonam mellʼlleant mhunn khatri korun ghetat. Tanchea vavra pasot hanv tanche khub upkari asam!” Colombia-nt ravpi bhoinn Leslie-cho ghov sobhent vhoddil mhunn seva korta. Ti sangta: “Mhojea ghovak sobhent asloleo tacheo veg-veglleo zobabdareo samballunk sobhechea sevokanchi modot zai asta. Te apleo zobabdareo urben ani ap-khuxen kortat dekhun hanv tanche khub upkari asam. Karonn tanchi modot nasli zalear, mhozo ghov anikui bizi asta aslo.” Tumchea sobhent aslolea sobhechea sevokanchea vavra vixim tumkam koxem bhogta?—1 Tim. 3:13.
7. Ami amchea sobhechea sevokam pasot upkariponn koxem dakhounk zata? (Chitr pasun polloiat.)
7 Amchea sobhent aslolea sobhechea sevokam pasot ami upkari asat tem khorem, punn amchea utramnim ani korneamnim hem ‘upkariponn dakhounkʼ Bible amkam urba dita. (Kol. 3:15) Hea vixim Finland-ant vhoddil mhunn seva korpi bhav Krzysztof, sobhechea sevokank upkariponn koxem dakhoita tacher dhean diat. To sangta: “Hanv tankam ek kardd vo message dhaddttam, zantunt hanv ek vers boroitam ani tannim kitem mhunnttlem vo kelem, jea vorvim mhaka urba mellʼlli vo hanv tanchea vavra pasot kiteak upkari asam tem hanv tantunt boroitam.” Toxench New Caledonia-nt ravpi Pascal ani Jael, sobhechea sevokam pasot zaite pavtti magnnem kortat. Pascal sangta: “Halinch, ami amchea sobhechea sevokam pasot magnnem ani kallzantlean vinovnneo korit asat. Ani tanchea pasot ami sodanch Jehovak upkar attoitat.” Khorench, Jehova oslim magnnim aikota, ani akʼkhe sobhek faido zata.—2 Kor. 1:11.
TUMCHEA MODEM ASLOLE VHODDIL “KHUB VAVR KORTAT”
8. Poilea xekddeantle vhoddil “khub vavr kortat” oxem Paulu kiteak mhunnonk xoktalo? (1 Tesalonikekarank 5:12, 13)
8 Poilea xekddeantle vhoddil sobhe pasot khub vavr kortale. (1 Tesalonikekarank 5:12, 13 vachat; 1 Tim. 5:17) Te sobhent fuddakar ghetale. Mhunnche, sobhecheo mittingo kortale ani sobhe pasot nirnnoi ghetale. Toxench, bhav-bhoinnamnim aplo bhavarth ghott samballunk te tankam mogan solʼlo ditale. (1 Tes. 2:11, 12; 2 Tim. 4:2) Tea bhair, aplea familichem pott bhorunk te kam kortale ani Jehova sangata apli, toxench aplea familichi ixttagot ghott samballunk te khub vavr kortale.—1 Tim. 3:2, 4; Tit. 1:6-9.
9. Aiz vhoddilank kosleo zobabdareo asat?
9 Amche vhoddil khub bizi asat. Te porgottnnar zaun asat. (2 Tim. 4:5) Urben porgottnni korun te dusreank ek bori dekh dovortat. Te porgottnnechea vattaranchi manddavoll kortat ani bore toren porgottunk ani xikounk te amkam proxikxonn ditat. Toxench, te doiall ani bhedbhav korinant tosle neai korpi zaun asat. Ek Kristanv gombhir patok korta tednam, Jehova sangata tachi ixttagot porot ghott korunk te taka modot kortat. Teach borabor, sobha nitoll dovrunk te khub vavr kortat. (1 Kor. 5:12, 13; Gal. 6:1) Sogleam-von mhotvachem mhunnttlear, vhoddil gonvlli zaun asat. (1 Ped. 5:1-3) Te Bible-acher adarit bore toren toiar kelʼlim bhaxonnam ditat, sobhent aslolea sogleanchi bori vollokh korun gheunk vavr kortat ani bhav-bhoinnank gonvlli bhett kortat. Toxench, thodde vhoddil Raj-ghoram bandpachea ani samballpachea kamant modot kortat, odhivexonachi manddavoll kortat, Hospital Liaison Committee ani Patient Visitation Group-ant pasun vavr kortat. Tea bhair, tankam anikui zaiteo zobabdareo astat. Khorench, vhoddil amchea pasot khub vavr kortat!
10. Ami khoinchea karonnank lagon khub vavr korpi amchea vhoddilank upkari asat?
10 Vhoddil amchi bore toren kallji ghetole ani hea pasot ‘fuddem amkam anik bhirant aschi na, akantui ascho na’ mhunn Jehovan poilinch sangon dovorlolem. (Jer. 23:4) Finland-antli bhoinn Johanna-n, tachi mummy khub duent asli tednam him utram kitlim khorim tem onnbhovlem. Tem sangta: “Mhojea bhavnam vixim dusream lagim ulounk mhaka khub kotthin zata. Punn hanv tea vixim ulounk toiar aslem tednam, mhaka titli vollokh naslolea eka vhoddilan mhojem kan diun aikolem, mhojea sangata magnnem kelem ani Jehova mhozo mog korta mhunn mhaka khatri dili. Tannem sanglolem tem soglem mhaka ugddas na, punn tachea lagim uloilea uprant mhozo usko pois zalo. Mhaka modot korunk Jehovan taka sarkea vellar dhaddlolo oxem mhaka dista.” Tumchea sobhentlea vhoddilamnim tumkam koxi modot kelea?
11. Ami vhoddilanche upkari asat mhunn koxem dakhounk zata? (Chitr pasun polloiat.)
11 Vhoddilanchea “kamank lagon” ami kallzant thaun tankam upkariponn dakhoilʼlem Jehovak zai. (1 Tes. 5:12, 13) Finland-ant ravpi bhoinn Henrietta sangta: “Vhoddil ap-khuxen dusreank modot kortat. Punn hacho orth, tanchea lagim bhorpur vell ani takot asa vo tanchea jivitant oddchonneo nant oxem nhoi. Thodde pavtti hanv tankam fokot itlench mhunnttam: ‘Tum khorench ek boro vhoddil mhunn hanv tuka sangonk sodhtalem.’” Turkiye-nt c ravpi Sera nanvachi bhoinn sangta: “Vhoddilank tanchem kam korit ravonk urba zai asta. Tor tankam urba diunk ami tanchea pasot ek kardd korunk zata, tankam jevnnak apounk zata vo tanchea sangata porgottnni korunk zata.” Tumchea sobhent oslo konnui vhoddil asa, zachea vavrak lagon tumi tache upkari asat? Hoi zalear, tumi kosleo vatto uzar korun taka upkari asat mhunn dakhounk zata?—1 Kor. 16:18.
Fuddakar ghetolea bhavamnim tanchem kam korit ravonk tumi tankam urba diunk zata (Peregraf 7, 11, 15 polloiat)
SORKITTACHI DEKHREKH KORPI SOBHANK GHOTT KORTAT
12. Poilea xekddeant sobhank ghott korunk Jezun kosli manddavoll kelʼli? (1 Tesalonikekarank 2:7, 8)
12 Sobhank anik eke toren modot korunk Jezun thoddea bhavank nemle. Tachea margdorxona khala Jeruzalemantlea vhoddilamnim, Paulu, Barnabas, ani herank bhonvddi korun dekhrekh korpi bhav mhunn dhaddle. (D.I. 11:22) Koslea karonnak lagon? Sobheche sevok ani vhoddilam bhaxen sobhank ghott korunk. (D.I. 15:40, 41) Hem kam korunk hea bhavamnim zaite teag kele ani thodde pavtti dusreank xikounk ani urba diunk aplo jiv pasun dhokeant ghatlo.—1 Tesalonikekarank 2:7, 8 vachat.
13. Sorkittachi dekhrekh korpeank kosleo zobabdareo astat?
13 Sorkittachi dekhrekh korpi khub provas kortat. Ek-ek pavtt eke sobhe thaun dusre sobhent vochonk, te xemboramnim kilometr provas kortat. Sobhank bhett ditana te dor sumanak zaitim bhaxonnam ditat, gonvlli bhett kortat, pioneer-am sangata ani vhoddilam sangata mitting ghetat, toxench porgottnni mittingo kortat. Te sorkitt zomatinchi ani odhivexonanchi manddavoll kortat ani toiari korun bhaxonnam ditat. Toxench, te pioneer korsant xikoitat, ani sorkittant aslolea pioneer-am sangata ek khas mitting pasun ghetat. Itlench nhoi, xakha ofisan dilʼlim mhotvachim kamam pasun te kortat ani thodde pavtti tim kamam rokddinch korchim astat.
14. Ami sorkittachi dekhrekh korpeank kiteak upkari asat?
14 Sorkittachi dekhrekh korpeank lagon sobhank koso faido zata? Turkiye-nt ravpi ek bhav sangta: “Sorkittachi dekhrekh korpeanchea dor eke bhette vorvim mhaka bhav-bhoinnank anikui modot korunk urba melltta. Hanv zaitea sorkittachi dekhrekh korpeank mellʼllam. Punn tanchea modlea eklean pasun apunn khub bizi asa vo to mhojea lagim ulounk sodhina, oxem mhaka kednanch bhogonk diunk na.” Ami peregraf 10-nt uloilʼli bhoinn Johanna, ek dis sorkittachi dekhrekh korpea sangata porgottnni kortali. Punn tea disa tankam konnuch ulounk mellonk na. Bhoinn sangta: “Torui hanv to dis kednanch visorchem na. Mhojeo donui bhoinno, dusrea eka vattarant ravonk gelʼleo ani mhaka tancho khub ugddas ietalo. Sorkittachea dekhrekh korpean mhaka bhuzvonn dili ani ami eka-meka thaun pois ravtat tem fokot thoddeach vella pasot, punn novea sonvsarant ami sodankal eka-meka sangata ravtolim mhunn tannem mhojea ugddasak haddlem.” Amchea modlea zaitea zannank sorkittachi dekhrekh korpeam sangata ami khuxalkaien vell koso sarlo ani tannim amkam koxi modot keli tem ugddas astolo nhoi!—D.I. 20:37–21:1.
15. (a) 3 Juanv 5-8-a pormonnem, ami amchea sorkittachi dekhrekh korpeank upkariponn koxem dakhounk zata? (Chitr pasun polloiat.) (b) Fuddakar ghetolea bhavanchea bailank ami upkariponn kiteak dakhounk zai, ani ami hem koxem korunk zata? (“ Fuddakar Gheupi Bhavanchea Bailam Vixim Chintat,” hem boks polloiat.)
15 Sobha ghott korunk ietat tea bhavancho poramos korunk ani ‘te voitana tankam Devachea nodren sarkem asa tea ritin dhaddunk,ʼ apostl Juanvan Gaiusak urba dili. (3 Juanv 5-8 vachat.) Aiz oxem korunk ek vatt mhunnttlear, sorkittachi dekhrekh korpi ietat tednam ami tankam amchea ghora jevnnak apounk zata. Toxench, tea sumanak kelʼlea porgottnnechea manddavollik ami tenko diunk zata. Ami poilim uloilʼlim bhoinn Leslie, anikui vattamnim aplem upkariponn dakhoita. Ti mhunntta: “Jehovan tanchea gorzanchi kallji gheunk hanv magnnem kortam. Toxench, hanv ani mhozo ghov chitti boroun tanchea bhette vorvim amkam kitli modot zalea tem tankam sangtat.” Punn amchea bhaxen, amchea sorkittachi dekhrekh korpeank pasun oddchonneo astat ani te thoktat mhunn ami ugddas dovrunk zai. Thodde pavtt te duent poddttat, tankam-i usko zata, ani te niraxi pasun zatat. Tor ami tanche lagim doiall toren uloitat vo ek lhan dennem ditat tednam, tem ghoddie tanchea magnneancho zobab zaunk xokta.—Mho. 12:25.
‘DENNIM MHUNN DILʼLEA MUNXANCHI’ AMKAM GOROZ ASA
16. Mhonnʼnneo 3:27-a pormonnem, bhavamnim svotak kosle prosn vicharunk zatat?
16 Sonvsarbhor fuddakar gheupi anikui chodd bhavanchi songottnnek goroz asa. Tor tum bautizm ghetlolo ek bhav zalear, hea toren modot korunk “tuje lagim ghoddta” kai? (Mhonnʼnneo 3:27 vachat.) Tum ek sobhecho sevok zaunk ap-khuxen fuddem soronk toiar asa kai? Tum sobhecho sevok mhunn seva korta zalear, vhoddil zauncho dhei dovrun tum bhav-bhoinnanchi seva korunk toiar asa kai? d Tujea jivitant thodde bodlav korun Raj Porgottnnarank Korsak tum vochonk xokta kai? Karonn hea korsa vorvim tuka anikui proxikxonn mellttolem ani Jezu tuka songottnnent anikui bore toren uzar korunk pavtolo. Punn heo zobabdareo samballunk tum purto na oxem tuka dista zalear, Jehova lagim tachi povitr xokti magon tum sodʼdheak tache sevent jem kitem korta tem bore toren korunk tuka modot kor mhunn sangonk zata.—Luk. 11:13; D.I. 20:28.
17. Jezun ‘dennim mhunn dilʼle munis’ kortat tea koxtti vavrak lagon amkam koslo puravo melltta?
17 Jezun ‘dennim mhunn dilʼle munis’ khub vavr kortat. Hea vorvim amkam puravo melltta ki hea nimannea disamnim to amkam margdorxon di-it asa. (Mt. 28:20) Tor, amcho Raza itlo mogall ani udar kallzacho asa, zo amcheo gorzo zannam ani amkam modot korunk tannem purte aslole bhav dileat mhunn ami kitlim upkari asat nhoi? Tor hea khub vavr korpi bhavank upkariponn dakhounk ami vatto sodhum-ia. Toxench, tanchea pasot Jehovache upkar attounk ami kednanch visorchem nhoi! Karonn “dor ek borem ani poripurnn dennem” tacheach koddlean amkam melltta.—Jak. 1:17.
GIT 99 Myriads of Brothers
a Je vhoddil Sonchalon Monddollache vangddi asat, Sonchalon Monddollak modot korpi mhunn seva kortat, Xakha Somitiche vangddi asat ani her zobabdareo samballttat, te pasun ‘dennim mhunn dilʼle munis’ zaun asat.
b Thoddim nanvam bodolʼleant.
c Adim taka Turkey mhunnttale.
d Ek sobhecho sevok vo vhoddil mhunn seva korunk purto zaunk bhavamnim kitem korunk zata tem zannam zaunk, Novembr 2024-achea Pahrogopur-ant aslole he lekh polloiat: “Bhavamno—Tumi Sobheche Sevok Zaunk Vavr Kortat Kai?” ani “Bhavamno—Tumi Vhoddil Zaunk Vavr Kortat Kai?”
