OBHEASACHO LEKH 41
GIT 13 Christ, Our Model
Prithumer Sarlole Jezuche Xevottache 40 Dis
“To 40 dis poriant, tankam dislo ani Devachea Rajea vixim tankam sangot ravlo.”—D.I. 1:3.
MUKHEL MUDʼDO
Prithumer astana Jezun tache xevottache 40 dis koxe sarle tantuntlean ami kitem xikonk zata, tem ami hea lekhant polloitolim.
1-2. Emaus voiche vatter astana Jezuchea don xisam sovem kitem ghoddlem?
NISAN 16, 33 K.X.-ant ghoddloli hi ghoddnni ugddas korat. Jezuche xis khub dukhi asle ani bhielʼle. Tanche modle dog zann Jeruzalem soddun Emaus vochonk bhair sorlole. Ho ganv Jeruzalema thaun sumar 11 kilometr pois aslo. Te ekdom niraxi asle, karonn te pattlav kortale tea Jezuk jivexim marlolo. Mesias tanche pasot zaitim borim kamam kortolo mhunn te axeun asle. Punn atam to tanchea modem naslo. Uprant, tannim chintunk na tem ghoddlem.
2 Te vatter asle tednam ek onvollkhi munis ieun tanche lagim ulounk laglo. Tea vellar, Jezu sovem ghoddloleo sogleo vaitt ghoddnneo te tea munxak sangonk lagle. Ani uprant tea munxan tankam jem kitem sanglem tem te kednanch visorche nasle. “Tannem Moizesachea pustokam thaun tem Provadeanchea Pustokam poriant” jem kitem boroilʼlem, tea vixim tankam somzonni dili. Mesiasak itle tras sosun kiteak morcho poddlo tea vixim tannem tankam sanglem. Ani te tigui Emaus pavlea uprant ho munis Jezu mhunn tankam kollon ailem, zaka Jehova Devan jivont kelʼlo. Tor tea vellar, tancho Mesias jivont asa hem zannam zaun tache xis kitle khuxal zale astole tea vixim ami chintunk zata!—Luk. 24:13-35.
3-4. Jezun aplea xisank urba dilʼlean kitem zalem, ani hea lekhant ami kitem zannam zatolim? (Itihas 1:3)
3 Jivont zaun sorgar voichea poilim, Jezun hea prithumer 40 dis sarle ani aplea zaitea xisank to mellʼllo. (Itihas 1:3 vachat.) Tea vellar je xis bhielʼle ani dukhi asle tankam tannem urba dili. Tannem oxem kelʼlean tache xis khuxal zale ani Devachea Rajeachi bori khobor porgottunk ani xikounk te dhiran fuddem sorle. a
4 Jezun tea vellar jem kitem kelem tem xiklolean amkam faido zaunk xokta. Tor hea lekhant (1) aplea xisank urba diunk, (2) Devachea Utrachi tankam bariksannen somzonni diunk, ani (3) vhoddleo zobabdareo samballunk tankam proxikxonn diunk, Jezun aplo vell koso uzar kelo tem ami zannam zatolim. Ani dor ek mudʼdo polloitana ami Jezuchi dekh koxi gheunk zata tem-ui ami zannam zatolim.
DUSREANK URBA DIAT
5. Jezuchea xisank urba kiteak zai asli?
5 Jezuchea xisank urba zai asli. Karonn purnn vell Jezucho pattlav korunk tannim aplem ghor-dar, famil ani veapar-dhondo soddun dilʼlo. (Mt. 19:27) Toxench, tim Jezuchim xis zalʼlim dekhun lok tanchea sangata onʼneai kortalo. (Ju. 9:22) Jezuch bhasailʼlo Mesias mhunn tannim visvas dovorlolo dekhun tannim he sogle teag kelʼle. (Mt. 16:16) Punn Jezuk jivexim marlea uprant tim khub dukhi ani niraxi zalim, karonn fuddem kitem zatolem tem tankam khobor nasli.
6. Jivont zaun Jezun rokddench kitem kelem?
6 Aplea xisancho bhavarth unno zaunk na, punn apunn mela dekhun tim dukhi asat mhunn Jezu zannam aslo. Tor to jivont zalo teach disa thaun tannem tankam urba diunk suru kelem. Zoxem, apli kudd dovorloli tea dholi bhair Magdalachi Marie roddttali tednam to tika mellʼllo. (Ju. 20:11, 16) Toxench, hea lekhachea survatek sanglam toxem Emaus voitolea don xisank to mellʼllo. Ani apostl Pedruk pasun to mellʼllo. (Luk. 24:34) Tor ami kitem xikonk zata? To Magdalache Mariek mellʼllo tednam kitem zalʼlem tem ami polloum-ia.
7. Magdalachi Marie kitem korta tem Jezun polloilem, ani tannem tiche pasot kitem kelem? (Juanv 20:11-16) (Chitr pasun polloiat.)
7 Juanv 20:11-16 vachat. Nisan 16 tarkechea sokallim, thoddeo bailo Jezuk dovorlolo tea dholi lagim aileo. (Luk. 24:1, 10) Tantuntli ek bail, Magdalachi Marie asli. Ti Jezuchea dholi lagim aili tednam, Jezuchi kudd thoim na tem tinnem polloilem. Tor ti rokddich Pedruk ani Juanvak hea vixim sangonk geli. Te dogui dhanvot dholi lagim aile ani ti tanchea fatta-fatt aili. Jezuchi kudd dholint na tem tannim polloilem ani te porot gele. Punn Marie dholichea bhairuch roddot ubi ravli. Tea vellar, jivont zalʼlo Jezu thoim aslo ani tika polloitalo mhunn tika khobor nasli. Ti aplea pasot roddtta mhunn Jezun polloilem ani to tika bhuzvonn diunk sodhtalo. Tiche lagim uloun tannem tika urba dili ani tika ek ekdom mhotvachem kam dilem. Tem mhunnttlear, aplea apostlank vochon apunn jivont zala mhunn tika sangonk lailem.—Ju. 20:17, 18.
Jezuchi dekh gheun bhav-bhoinnam koslea trasancho fuddo kortat tacher dhean diat ani tankam bhuzvonn diat (Peregraf 7 polloiat)
8. Ami Jezuchi dekh koxi gheunk zata?
8 Ami Jezuchi dekh koxi gheunk zata? Amchea bhav-bhoinnank Jehovachi seva korit ravonk ami urba ditat tednam ami Jezuchi dekh ghetat. Jezuchi dekh gheun amchim bhav-bhoinnam koslea oddchonneancho fuddo kortat tacher ami dhean diunk zai, tankam koxem bhogta tem zannam zauncho proitn korunk zai ani tankam bhuzvonn diunk zai. Hea vixim amkam bhoinn Jocelyn-acho onnbhov asa. Eka opghatant tichea bhoinnicho jiv gelo. Jocelyn sangta: “Zaite mhoine poriant hanv soglea vellar dukhi astalem.” Punn eka bhavan ani tache bailen tika aplea ghora apoun, tichea bhavnam vixim sangonk tika urba dili. Tannim dhean diun bhoinnichem aikolem ani Jehova ticho khub valor korta mhunn tichea ugddasak haddlem. Bhoinn Jocelyn sangta: “Hanv eka vadoll zalʼlea doriant buddttalem oxem mhaka distalem. Punn Jehovan hea bhav-bhoinnank uzar korun mhaka lifeboat-int haddlem oxem mhaka dislem. Jehovachi seva porot urben korit ravonk tannim mhaka modot keli.” Amchea bhav-bhoinnank koxem bhogta tem sangonk ami tankam sondhi ditat ani tanchem dhean diun aikotat tednam ami pasun tankam urba diunk pavtolim. Hea vorvim, ami tankam bhuzvonn ditolim ani Jehovachi seva korit ravonk modot kortolim.—Rom. 12:15.
DEVACHEM UTOR ANIK BORE TOREN SOMZONK DUSREANK MODOT KORAT
9. Jezuchea xisank kiteak modot zai asli, ani Jezun tankam koxi modot keli?
9 Jezuchea xisank Devachea Utracher visvas aslo ani Devacheo adnea pallunk te apleachean zata tem soglem kortale. (Ju. 17:6) Punn Jezuk guneanvkari mhunn tharaun trasanchea khambear jivexim marlo tednam tanchea monant dubhav aile. Tor aple xis Jehovacho mog kortat ani tankam Jehovacher bhavarth asa, punn Devachea Utrachi tankam anik somzonni zai mhunn Jezun somzon ghetlem. (Luk. 9:44, 45; Ju. 20:9) Tea pasot, te Devachea Utrant jem kitem vachtat tem somzonk tannem tankam modot keli. Tache don xis Emaus ganvant vochonk vatter asle tednam, Jezun kitem kelem tacher dhean diat.
10. Apunnuch bhasailʼlo Mesias mhunn Jezun aplea xisank koxi khatri dili? (Lukas 24:18-27)
10 Lukas 24:18-27 vachat. Jezun aplea xisank rokddich apli vollokh diunk na, punn tannem tankam prosn vicharle. Karonn aplea xisanchea monant ani kallzant kitem asa tem ghoddie to zannam zaunk sodhtalo. Ani xisamnim toxem kelem. Jezu Izraelacho Raza zatolo ani Romi sorkara thaun tankam suttka ditolo, oxem te chintʼtale mhunn tannim taka sanglem. Tor aplea kallzant kitem asa tem tannim sanglea uprant, Jezun Devachem utor uzar korun, bhasaunneo koxeo purnn zalʼleo tem tankam somzailem. b Magir tea sanjer, to aple her xisank mellʼllo ani tankam pasun tannem bhasaunneancho orth somzailo. (Luk. 24:33-48) Hantuntlean ami kitem xiktat?
11-12. (a) Bible-antlea sotam vixim Jezun jea toren dusreank somzailem tantuntlean ami kitem xiktat? (Chitram pasun polloiat.) (b) Nortey-chea Bible xikoupean taka koxi modot keli?
11 Ami Jezuchi dekh koxi gheunk zata? Poilem mhunnttlear, amchea Bible vidʼdheartheank xikoitana ami tankam chintunk laitat tosle prosn vicharunk zai, jea vorvim tankam koxem bhogta tem tim ukteponnim sangonk pavtolim. (Mho. 20:5) Tanchea monant ani kallzant kitem asa tem kollʼllea uprant, tanchea poristhitik lagu zatat toslim Bible-antlim versam tannim koxi sodhunk zatat tem ami tankam dakhounk zata. Oxem kortana, kitem korchem tem sangchea bodlek, tea Bible-antlea versam vixim ami prosn vicharunk zatat ani tea vixim chintunk tankam urba diunk zata. Hea vorvim, him Bible-antlim totvam tim aplea jivitant apnnaunk pavtolim. Hea vixim, amkam Ghana-ntlea bhav Nortey-cho onnbhov asa.
12 Nortey 16 vorsancho aslo tednam to Bible xikonk laglo. Punn rokddich tachi famil tacho virodh korunk lagli. Tea vellar thir ravonk taka koxi modot zali? Tachea Bible xikoupean Matev odheai 10 uzar korun, khorea Kristanvank dhumallo ietoloch mhunn somzonk taka modot kelʼli. Hea vixim Nortey sangta: “Tor mhaka dhumallo ailo tednam, mhaka sot mellʼllem mhunn mhaka khatri zali.” Toxench, tachea Bible xikoupean taka Matev 10:16 dakhoun ami chotur ravonk zai mhunn sanglem. Ani aple famili lagim sota vixim uloitana respedan ulounk hem vers taka koxem modot korunk xokta tem taka somzailem. Bautizm ghetlea uprant Nortey pioneer seva korunk sodhtalo. Punn tannem university-chem xikop ghetlolem tachea daddy-k zai aslem. Tor kitem korchem tem Nortey-k sangchea bodlek, tachea Bible xikoupean taka chintunk laitat tosle prosn vicharle ani Bible totvam vixim chintunk taka modot keli. Taka lagon, Nortey-n purnn vellachi seva korcho nirnnoi ghetlo. Tea vellar, tachea daddy-n taka ghor soddun vochonk sanglem. Hea vixim Nortey-k koxem bhoglem tem to sangta: “Hanvem sarko nirnnoi ghetlo mhunn mhaka khatri asa.” Tor Devachea Utra vixim chintunk ami dusreank urba ditat tednam, tancho bhavarth vaddounk ani Jehovachi seva korit ravonk ami tankam modot korunk pavtolim.—Ef. 3:16-19.
Jezuchi dekh gheun dusreank Devachem Utor anik bore toren somzonk modot korat (Peregraf 11 polloiat) e
FUDDAKAR GHEUNK BHAVANK PROXIKXONN DIAT
13. Apunn sorgar gelea uprant porgottnnechem kam chaluch uronk Jezun kitem kelem? (Efezkarank 4:8)
13 Prithumer astana, Jehovan Jezuk dilʼlem kam tannem ekdom bore bhaxen kelem. (Ju. 17:4) Punn Jehovachem kam fokot toch bore bhaxen korunk xokta mhunn tannem kednanch chintunk na. Tannem sadde-tin vorsam porgottnnechem kam kelem tednam dusreank proxikxonn dilem. Aplea xisancher Jezuk visvas aslo dekhun tannem tankam bori khobor porgottchi, xikounchi ani Jehovachea moladik menddranchi kallji gheunk zobabdari dili. Tachea xisam modle thodde fuddakar gheupi bhav 30-am poros unnem piraieche asle. (Efezkarank 4:8 vachat.) Hea bhavamnim Jezu sangata khub vavr kelo ani te taka visvaxi asle. Punn Jezu sorgar voichea poilim, tannem tankam anikui proxikxonn dilem, jea udexim tankam fuddakar gheunk modot zatoli asli. Jezun tankam koxem proxikxonn dilem?
14. Jezun prithumer sarlolea xevottachea 40 disamnim aplea xisank kitem xikoilem? (Chitr pasun polloiat.)
14 Jezun aplea xisank ukteponnim, punn mogan solʼlo dilo. Udharonnak, apunn moron jivont zala mhunn manun gheunk thoddea xisank kotthin zata tem tannem polloilem ani hea vixim tannem tankam solʼlo dilo. (Luk. 24:25-27; Ju. 20:27) Toxench veapar-dhondeacher dhean diunchea bodlek, aplea menddranchi kallji gheunk dhean diat mhunn Jezun tankam sanglem. (Ju. 21:15) Tea bhair, Jehovachea sevent dusreank kosli zobabdari melltta, tea vixim chodd usko korina zaunk Jezun tankam modot keli. (Ju. 21:20-22) Teach borabor, Devachea Rajea vixim thoddea xisank chukichi somzonni asli. Tor Jezun tanchem hem chintop nittaier haddlem ani porgottnnechea kamacher chodd dhean diunk sanglem. (D.I. 1:6-8) Jezuchea hea udharonnantlean vhoddilamnim kitem xikonk zata?
Jezuchi dekh gheun bhavank anikui zobabdareo samballunk purte zaunk modot korat (Peregraf 14 polloiat)
15-16. (a) Vhoddilamnim Jezuchi dekh koxi gheunk zata? Somzaiat. (b) Bhav Patrick-ak eka vhoddilachea solʼlea vorvim koso faido zalo?
15 Vhoddilamnim Jezuchi dekh koxi gheunk zata? Tannim soglea bhavank, tem mhunnttlear tornnattea bhavank pasun anikui zobabdareo samballunk proxikxonn diunk zata. c Te proxikxonn ditat te bhav chuki korunk xoktat ani tannim zaitem xikchem asa mhunn vhoddil vollkhon ghetat. Tea pasot, goroz poddtta tednam te tankam ukteponnim, punn mogan solʼlo ditat. Hea vorvim proxikxonn gheupi bhav khalti, patieupa sarke ani dusreank modot kortat tosle munis zaunk pavtat.—1 Tim. 3:1; 2 Tim. 2:2; 1 Ped. 5:5.
16 Solʼlo mellʼllolean Patrick nanvachea eka bhavak koxi modot zali tacher dhean diat. To tornnatto aslo tednam to bhavam sangata, toxench bhoinnam sangata krur toren uloitalo ani doiall toren vagonaslo. Onnbhov aslolea eka vhoddilan tachea hea vagnnukecher dhean dilem ani taka ukteponnim punn mogan solʼlo dilo. Bhav Patrick sangta: “Tannem mhaka solʼlo diun borem kelem. Karonn mhaka zai asleo teo zobabdareo dusreank mellttaleo tem hanv polloitalom tednam, hanv ekdom niraxi zatalom. Punn tea vhoddilan dilʼlea solʼlea vorvim hanvem mhaka zai tea zobabdareancher dhean diunchem nhoi, punn khalti ravonk zai ani bhav-bhoinnancho mog korunk zai mhunn hanv xiklom.” Tor bhav Patrick-an tea vhoddilacho solʼlo apnnailo dekhun to fokot 23 vorsanche piraier vhoddil zaunk pavlo.—Mho. 27:9.
17. Jezuk aplea xisancher purnn khatri asli mhunn tannem koxem dakhoilem?
17 Jezun aplea xisank fokot porgottnni korchich nhoi, punn Devachem Utor dusreank xikounk pasun zobabdari dilʼli. Hem kam korunk apunn purte nant, oxem Jezuchea xisank dislem zait. Punn te hem kam bore bhaxen kortole mhunn Jezuk tancher purnn khatri asli. Dekhun tannem tankam oxem sanglem: “Mhojea Bapan mhaka dhaddla toso, hanv-ui tumkam dhaddttam.”—Ju. 20:21.
18. Vhoddilamnim Jezuchi dekh koxi gheunk zata?
18 Vhoddilamnim Jezuchi dekh koxi gheunk zata? Onnbhov aslole vhoddil dusreank zobabdareo diun tankam proxikxonn ditat. (Filp. 2:19-22) Udharonnak, tannim tornnatteank Raj-ghor nitoll korchem ani samballpachem kam diunk zata, tem korunk proxikxonn diunk zata, ani tem kam te bore bhaxen kortole mhunn tancher visvas dovrunk zata. Novoch vhoddil mhunn nemlolo bhav Matthew onnbhov aslolea vhoddilancho upkari asa. Karonn tannim taka sobhent veg-veglleo zobabdareo samballunk proxikxonn dilem ani to teo bore bhaxen samballttolo mhunn tacher visvas dovorlo. Bhav Matthew mhunntta: “Hanvem chuki keleo tednam, tea chukim thaun xikonk ani mhaka dilʼleo zobabdareo dusre pavtti anik bore toren korunk tannim mhaka modot keli.” d
19. Ami kitem korunk nichov korunk zai?
19 Jezun hea prithumer aple nimanne 40 dis dusreank urba diunk, xikounk, toxench proxikxonn diunk uzar kele. Ami Jezuchi dekh gheun toxench korcho nichov korunk zai. (1 Ped. 2:21) Oxem korunk, Jezu amkam modot kortolo. Karonn tannem amkam bhas dilea: “Sonvsarachea xevottachea vella poriant hanv sodanch tumchea sangata asam.”—Mt. 28:20.
GIT 15 Jezu Kristak Mhoima!
a Jezu jivont zalea uprant aplea xisank zaite pavtti mellʼllo mhunn amkam Bore Khobrechea ani Bible-antlea her pustokantlean kolltta. Zoxem, to Magdalache Mariek (Ju. 20:11-18); her bailank (Mt. 28:8-10; Luk. 24:8-11); aplea 2 xisank (Luk. 24:13-15); Pedruk (Luk. 24:34); Thomas nastana aplea apostlank (Ju. 20:19-24); Thomas astana aplea apostlank (Ju. 20:26); 7 xisank (Ju. 21:1, 2); 500 poros chodd xisank (Mt. 28:16; 1 Kor. 15:6); aplo bhav Jakobak (1 Kor. 15:7); soglea apostlank (D.I. 1:4); ani Bethani xara lagim aslolea apostlank mellʼllo. (Luk. 24:50-52) To anikui zaitea pavtti aplea pattlavdarank mellʼllo astolo, punn tea vixim amkam Bible-ant sangonk na.—Ju. 21:25.
b Mesiasa vixim asloleo bhasaunneo zannam zaunk, “Bible Khorench Kitem Xikoita?” pustokant, Chodd Mahiti hachea khala, “Bhasailolo Mesias” polloiat.
c Thoddea tornnattea vhoddilank, 25-30 piraier pasun sorkittachi dekhrekh korpi mhunn nemunk xoktat. Punn hachea poilim, thoddea tempa pasot tankam vhoddil mhunn seva korcho onnbhov asonk zai.
d Sobhent zobabdareo mellonk tornnattea bhavank purte zaunk koxi modot korunk zata tem zannam zaunk, Agost 2020-achea mittingechea pustikent “Mannsugeche Munis Dusreank Xikoitat Ani Zobabdareo Ditat” ani Setembr 2021-achea Pahrogopur-ant “Tornnattea Bhav-bhoinnancho Valor Korat” hem polloiat.
e CHITRACHI MAHITI: Ek bhav aplea Bible vidʼdheartheak Devachem Utor anik bore toren somzonk modot korta. Uprant, to Bible vidʼdhearthi aplem natalanchem decoration bhair marta.
