OBHEASACHO LEKH 43
GIT 90 Eka-mekak Dhir Dium-ia
Tumche Dubhav Koxe Pois Korche?
“Soglea vostunchi khatri korun gheiat.”—1 TES. 5:21.
MUKHEL MUDʼDO
Jea dubhavank lagon ami Jehovachi seva korunk fatti soronk xoktat te dubhav ami koxe pois korche tem ami hea lekhant polloitolim.
1-2. (a) Jehovachea sevokank kosle dubhav ieunk xoktat? (b) Hea lekhant ami kitem polloitolim?
AMI lhan vo vhodd asum, amkam sogleank kednam-na-kednam dubhav a ietat. Zoxem eka tornnattea Sakxeachea monant, Jehova khorench tacho mog korta vo na mhunn dubhav ieit. Ani tea pasot to bautizm gheunk fattim sorot. Vo eka bhavan torne piraier Jehovachea sevent anik chodd korunk unnea pagarachi sirvis korunk vinchun kaddli zait. Punn atam taka melltta tea pagaran tache familicheo fokot gorzo purnn korunk zata dekhun tannem sarko nirnnoi ghetlolo vo na mhunn to dubhavta. Vo ek zanntti bhoinn adim Jehovachea sevent zaitem kortali astoli, punn atam tichea piraiek lagon tika titli xokti ani takot na, ani tea pasot ti niraxi asot. Hea bhav-bhoinnam bhaxen tumchea-i monant kednam-i osle prosn aileat: ‘Jehova khoreanich mhoji porva korta kai? Jehovache sevent anik chodd korunk hanvem je teag kelʼle te sarke asle kai? Hanv azunui Jehovak faideacho asam kai?’
2 Osle prosn ami toxech dovorle zalear Jehovacher amcho bhavarth unno zaunk xokta ani tachi seva korop ami bond korunk xoktat. Tor hea lekhant, Bible-antlea totvancher dhean diun (1) Jehova amchi porva korta, (2) ami adim ghetlole nirnnoi sarke asle, ani (3) ami azunui Jehovak faideachim asat mhunn zannam zaunk amkam modot zatoli.
AMCHE DUBHAV AMI KOXE POIS KORUNK ZATAT?
3. Amche dubhav pois korunk ek vatt khoinchi?
3 Amche dubhav pois korunk ek vatt mhunnttlear ami Bible-ant amchea prosnanche zobab sodhunk zai. Oxem kelear, Jehova sangata amchi ixttagot ami ghott samballunk pavtolim ani “bhavarthant ghott” urtolim.—1 Kor. 16:13.
4. Ami ‘soglea vostunchi koxi khatri korun gheunk’ zata? (1 Tesalonikekarank 5:21)
4 1 Tesalonikekarank 5:21 vachat. Bible amkam ‘soglea vostunchi khatri korun gheunk’ urba dita. Hem ami koxem korunk zata? Amkam kosle-i dubhav ietat zalear, tea vixim Bible kitem sangta tem ami zannam zaunk zai. Udharonnak peregraf 1-ant sanglolo tornnatto, Jehova khorench tacho mog korta kai mhunn dubhavta. Tannem to dubhav tosoch dovrunk zai kai? Na. Tannem Bible xikon Jehova tache vixim khorench kitem chintʼta tem zannam zaunk zai. Oxem kelʼlean to ‘soglea vostunchi khatri korun ghetolo.’
5. Eka vixoi-acher Jehovachem chintop zannam zaunk ami kitem korunk zata?
5 Ami Bible vachtat tednam, eka orthan Jehova amche lagim uloita ani ami tachem aikotat. Punn eka vixoi-acher Jehovachem chintop kitem asa tem zannam zaunk, ami fokot Bible vachloch mhunn zaina. Amkam jea vixoi-acher dubhav asa, tacho zobab amkam khoinchea versamnim mellttolo tem ami sodhunk zai ani uprant tea vixim obheas korunk zai. Toxench, songottnnen toiar kelʼlim sodh korchim sadhonam uzar korun ami tea vixoi-acher sodh korunk zata. (Mho. 2:3-6) Itlench nhoi, ami sodh kortat tantuntli khoinchi mahiti amkam lagu zata, ani amchea prosnacho Jehova kitem zobab dita tem zannam zaunk ami tachea lagim magnnem korunk zata. Uprant, amchea poristhitik lagu zatat toslea Bible-antlea totvancher ami dhean diunk zata. Tea bhair, amcheach sarkim bhavnam aslolea adlea visvaxi sevokanchim udharonnam ami vachtat tednam amkam faido zaunk xokta.
6. Amkam aslolea prosnanche zobab mellonk mittinge udexim amkam koso faido zata?
6 Jehova amche lagim mittinge udexim pasun uloita. Ami dor ek pavtt mittingek hajir zatat tednam, bhaxonna udexim vo bhav-bhoinnanchea zobabam vorvim amkam aslolea umkeach prosnacho zobab mellonk xokta. (Mho. 27:17) Tor amkam aslolea prosnanche zobab mellonk ami kitem korunk zai tem atam polloum-ia.
JEHOVAK AMCHI PORVA ASA KAI NA MHUNN AMI DUBHAVTAT TEDNAM
7. Tumchea monant koslo prosn ieunk xokta?
7 ‘Jehovak mhoji porva asa kai?’ Ho prosn kednam-i tumchea monant aila? Tumi kainch valorachim nhoi ani hea akʼkhea vixvachea Rochnnarachim tumi kednanch ixttam zaunk pavchinch nant oxem tumkam dislam zait. Raza Davidak pasun ghoddie oxench dislem astolem. Punn Jehova munxanchi porva korta mhunn taka kollʼllem tednam to itlo ojap zalo ki tannem vicharlem: “Monis konn, Sorvespora, Tunvem tachi porva korcheak? Matiecho put konn, Tunvem tacho ugddas korcheak?” (St. 144:3) Tor Davidan vicharlolea hea prosnacho zobab amkam khoim mellttolo?
8. 1 Samuel 16:6, 7, 10-12 pormonnem Jehova kiteacher dhean dita?
8 Munxachea nodren valorachim nant toslea munxancher Jehova dhean dita mhunn amkam Bible-antlean kolltta. Udharonnak, Izraelacho fuddaracho raza nemunk, Jehovan provadi Samuelak Jesechea ghora dhaddlo tednam, Jesen aplo sogleam-von dhaktto b put Davidak soddun, aplea satui putank apoun haddle. Punn Jehovan Davidak vinchun kaddlo. (1 Samuel 16:6, 7, 10-12 vachat.) Karonn David bhitorlean koso aslo tem Jehovak khobor asli ani to aplo khub mog korta mhunn Jehova zannam aslo.
9. Jehovak amchi porva asa mhunn ami kiteak khatri dovrunk zata? (Chitr pasun polloiat.)
9 Jehovak amchi porva asa mhunn tannem koxem dakhoilam tea vixim ami chintunk zata. Amchea poristhitik sarke lagu zatat tosle solʼle to amkam dita. (St. 32:8) Hantuntlean, amkam kiteachi goroz asa tem to ekdom bore bhaxen zannam mhunn kolltta. (St. 139:1) Tea bhair, tachi seva korunk ani adnea pallunk ami zo vavr kortat tacher pasun to dhean dita. Toxench, to amche bore gunn polloita ani amcho Ixtt zaunk sodhta. (Jer. 17:10) Ani ami tachem apounnem manun gheun tachim ixttam zaunk fuddem sortat tednam to khub khuxal zata. (1 Ju. 4:19) Itlench nhoi, ami tacho solʼlo apnnaitat ani tantuntlean amkam faido zata tednam, Jehovak khorench amchi porva asa mhunn amchi khatri ghott zata.—1 It. 28:9; D.I. 17:26, 27.
“Zor tum Taka sodxi, To tuka melltolo.”—1 It. 28:9 (Peregraf 9 polloiat) c
AMI ADIM GHETLOLE NIRNNOI SARKE ASLE KAI NA MHUNN AMI DUBHAVTAT TEDNAM
10. Ami adim ghetlolea nirnnoi-am vixim chintʼtat tednam amchea monant kosle prosn ieit?
10 Thodde pavtti, amchea modlim thoddim zannam ami adim je nirnnoi ghetlole te sarke asle vo na mhunn dubhavunk xoktat. Zoxem, amchea modlea thoddea zannank zaite poixe zoddchi vo business korchi sondhi asli zait. Punn Jehovache sevent anik chodd vavr korunk ami ti sondhi soddun dili. Torui, ami vollkhotat tantuntlea thoddea zannamnim amchea poros veglle nirnnoi ghetle. Atam zaitea vorsam uprant ami tea munxank polloitat tednam, tanche lagim zaite poixe asat ani tim ek susegad jivit jietat oxem amkam disot. Tor amchea monant osle prosn ieit: ‘Jehovache sevent anik chodd vavr korunk hanvem je nirnnoi ghetlole te sarke asle kai? Vo mhoje lagim atam chodd poixe asonk hanvem tednanch anik chodd kam korunk zai aslem kai?’
11. Stotr 73-achea boroupeak kitem ghoddlem?
11 Amchea monant oslech prosn ietat zalear, ami Stotr 73-achea boroupeak kitem ghoddlem tacher dhean diunk zata. Jehovachi bhokti korinant tankam bori bholaiki asa, tim girest asat ani tanchea jivitant koslech uske nant tem tannem polloilem. (St. 73:3-5, 12) Tanchea jivitant soglem borem cholta tem tannem polloilem tednam, Jehovachi seva korun kainch faido na oxem taka disonk laglem. Oslea chukichea chintpak lagon ‘dis-bhor tacher dogdog ietat’ oxem tannem mhunnttlem. (St. 73:13, 14) Tor hea chukichea chintpa thaun to koso bhair soronk pavlo?
12. Stotr 73:16-18 pormonnem stotrkar aplem chintop sarkem koso korunk pavlo?
12 Stotr 73:16-18 vachat. Stotrkar Jehovachea mondirant gelo. Thoim Jehovachea lokam sangata ektthaim zalʼlean to aplem chintop sarkem korunk pavlo. Jehovachi seva korinant tea lokanchem jivit atam borem aslear pasun, fuddarak tankam kainch bhorvonso na mhunn taka kollon ailem. Hem zannam zalʼlean taka monachi xanti mellʼlli ani Jehovachi seva korit ravop sogleam-von boro nirnnoi mhunn taka khatri zali. Oxem kelʼlean, Jehovachi bhokti korit ravonk tacho nichov ghott zalo.—St. 73:23-28.
13. Ami adim ghetlolea nirnnoi-am vixim atam dubhavtat zalear amkam monachi xanti koxi mellonk xokta? (Chitr pasun polloiat.)
13 Devachea Utra vorvim amkam pasun stotrkara bhaxen monachi xanti mellonk xokta. Koxi? Amkam Jehovan aiz koslim dennim dileant, tea vixim ami chintunk zata. Hea denneam modem ami sorgar ektthaim kelʼle theve pasun mellon asat. Punn Jehovachi seva korinant tea lokam lagim hantuntlem kainch na. Tanchi khuxalkai fokot ek borea pagarachi sirvis ani ek susegad jivit hacheruch tharloli asa. Karonn tanchea lagim fuddara pasot kosloch bhorvonso na. Punn Jehovan aiz amkam zaiteo boreo vostu dileat. Ani ami chintunk na titlim besanvam to amkam fuddarak ditolo mhunn tannem bhas dilea. (St. 145:16) Tea bhair hea vixim chintat: Jehovache sevent chodd vavr korchea bodlek ami veglle nirnnoi ghetlole zalear, aiz ami jivitant khuxal astolim aslim mhunn ami khatren sangonk xoktat kai? Punn ami hem mat khatren sangonk xoktat ki Jehovachea ani lokanchea mogak lagon ami je nirnnoi ghetat, tea pasot Jehova amkam kitem borem asa tem kednanch unnem zaunk diunchona!
Jehova tumkam fuddarak ditolo tea soglea besanvam vixim chintat (Peregraf 13 polloiat) d
AMI JEHOVACHE SEVENT AZUNUI FAIDEACHIM ASAT KAI NA MHUNN DUBHAVTAT TEDNAM
14. Jehovachim thoddim sevokam koslea poristhitint asat, ani tanchea monant koslo prosn ieunk xokta?
14 Jehovachim thoddim sevokam zannttim, duent vo opong asat dekhun Jehovache sevent titlem korunk xokonant. Tor tim Jehovak valorachim nant oxem tankam disonk xokta, ani tankam oso dubhav ieunk xokta: ‘Hanv Jehovak azunui faideacho asam kai?’
15. Stotr 71-achea boroupeak kosli khatri asli?
15 Stotr 71-achea boroupeak pasun osloch usko aslo. Tannem oxem magnnem kelem: “Boll mhojem virlem mhonn mhaka soddum naka.” (St. 71:9, 18) Tannem visvaxiponnan Jehovachi seva kelear, Jehova taka sodanch vatt dakhoitolo ani tenko ditolo mhunn taka khatri asli. Itlench nhoi, apleak unnemponnam aslear pasun, apunn Jehovache sevent zata tem korta tednam Jehova khuxal zata mhunn taka kollon ailem.—St. 37:23-25.
16. Zannttim bhav-bhoinnam khoinchea vattamnim Jehovak faideachim asat? (Stotr 92:12-15)
16 Zannttea bhav-bhoinnamno, Jehova tumkam khoinchea nodren polloita tea vixim chintat. Tumi oskot aslear pasun apli seva visvaxiponnan korit ravonk to tumkam modot korunk xokta. (Stotr 92:12-15 vachat.) Tumi atam kitem korunk xokonant tem chintchea bodlek, tumi kitem korunk xoktat tacher dhean diat. Udharonnak, bori dekh dovrun ani bhav-bhoinnanchi tumkam porva asa mhunn dakhoun tumi tankam ghottai diunk zata. Toxench, itlim vorsam Jehovan tumkam apli seva korunk koxi modot keli ani fuddarak Bible-antli khoinchi bhasaunni purnn zaunk tumi axeun asat, tem tankam sangonk zata. Tea bhair, tumi bhav-bhoinnam pasot kallzant thaun magnnem kortat dekhun tankam kitli modot zata tem kednanch visornakat. (1 Ped. 3:12) Tor ami atam khoinchea-i poristhitint asum, Jehova pasot ani bhav-bhoinnam pasot kitem-na-kitem korunk amkam sogleank sondhi astach!
17. Ami amkanch dusream sangata kiteak sor korchem nhoi?
17 Ami Jehovache sevent chodd vavr korunk xokonant mhunn niraxi zatat zalear, ami tachea pasot jem kitem kortat tem taka khub valorachem mhunn ami ugddas dovrunk zata. Ami ghoddie amkanch dusream sangata sor kortat astolim. Punn toxem korop ami bond korum-ia. Karonn Jehova amkam dusream sangata sor korina. (Gal. 6:4) Udharonnak, Marien khub mharog pormollit tel Jezuchea paim-ar ghatlem. (Ju. 12:3-5) Punn eke gorib vidven khub unnea molache don nanne dan-pettient ghatle. (Luk. 21:1-4) Torui Jezun tanchea modem sor korunk na. Tankam dogainkui Jehovacher bhavarth aslo oxem tannem mhunnttlem. Ani Jezu poripurnn toren aplea Bapachi dekh gheta. Tor ami Jehovache sevent jem kitem kortat tem khub unnem asa oxem amkam dista zalear pasun, amkam Jehovacho mog asa ani tacher bhavarth asa, hacher Jehova dhean dita mhunn ami visorchem nhoi. Toxench, ami zo vavr kortat to taka khub moladik asa mhunn ami khatri dovrum-ia!
18. Amche dubhav pois korunk amkam koxi modot zatoli? (“ Devachem Utor Tumche Dubhav Pois Korunk Tumkam Modot Korunk Xokta,” hem boks pasun polloiat.)
18 Amkam sogleank kednam-na-kednam dubhav ietat. Punn hea lekhant polloilem toxem, ami Bible uzar korun amche dubhav pois korunk xoktat. Tor amche sogle dubhav pois korunk ami vavr korum-ia. Oxem kelear, ami niraxi nhoi punn khuxal astolim. Jehova amkam dor ekleak ekdom bore bhaxen vollkhota. Ami tachea sevent je teag kortat tancho to khub valor korta ani amkam inam ditolo mhunn tannem dilʼli bhas to purnn kortoloch! Tea pasot, aplea soglea visvaxi sevokancho Jehova khub mog korta ani tanchi kallji gheta mhunn ami purnn khatri dovrunk zata.
GIT 111 Khuxal Ravonk Sobar Karonnam
a UTRACHI SOMZONNI: Hea lekhant sanglole dubhav, ami Jehovak valorachim asat kai na vo tachea sevent ami adim ghetlole nirnnoi sarke asle kai na, tea vixim asat. Punn jea dubhavank lagon Jehovacher ani tachea bhasaunneancher amcho bhavarth unno zaunk xokta mhunn Bible-ant sanglam, tosle he dubhav nhoi.
b Jehovan Davidak raza mhunn vinchlolo tednam, to kitle piraiecho aslo tem Bible-ant sangonk na tem khorem. Punn to chodd korun khub tornnatto aslo.—Setembr 1, 2011-chea Pahrogopur-ant, p. 29-acher per. 2 polloiat.
