Mondirachea Povitr bhagant bhitor sortana bolkanv aslo. 2023 hea vorsa adim chhaplolea New World Translation of the Holy Scriptures Bible-ant oxem boroilʼlem: “Fuddlea bolkanvachi rundai ghorache rundaie pormannem vis hat, unchai ekxem vis hat.” (2 It. 3:4) Toxench, her bhaxantoramnim pasun hea bolkanvachi unchai “120 hat” asa mhunn sanglam. Tem mhunnttlear, tachi unchai 53 metr asli!

Punn 2023-ant chhaplolea New World Translation-ant, Solomonachea mondirachea bolkanva vixim oxem sanglem: “Tachi unchai 20 hat,” vo sumar 9 metr asli. a Ho bodlav kiteak kelo tachim thoddim karonnam ami polloum-ia.

Hea bolkanvachea unchaie vixim amkam 1 Raza 6:3-ant sangonk na. Tea versant, Jeremiasan fokot tache lambaie ani kholaie vixim boroilem. Uprant tachea fuddlea odheai-ant, hea mondirachea thoddea mhotvachea bhagam vixim tannem bariksannen boroilem. Zoxem, tantunt asloli koddoilolea dhatuchi ek Tolli, dha tamreteo, ani bolkanva mukhar aslolea tambeachea don khambeam vixim. (1 Raz. 7:15-37) Tor ho bolkanv 50 metram poros unch aslo ani tachi unchai Solomonachea mondirachea her bhagam poros sogleam-von chodd asli zalear, Jeremiasan tache vixim kiteak borounk na? Toxench, zaitea xekddeam uprant pasun Judevanchea boroupeamnim boroilem ki hea bolkanvachi unchai, Solomonachea mondirachea her bhagam poros chodd nasli.

Mondirachea vontteanchea rundaie pormonnem, hea bolkanvachi unchai 120 hat asonk xokona, oxem zannarank dista. Adlea kallar fator ani vitteamnim bandloleo bilddingo, zoxem Ejipttantlea mondiranche darvontte, sokoilean rund punn voir voita toxe oxir zatale. Punn Solomonachem mondir toxem naslem. Zannar sangtat, ki hea vontteanchi rundai 6 hat vo 2.7 metram poros chodd nasli. Tea pasot, adlea kallavoilea bilddingam vixim sodh korpi itihaskar Theodor Busink oxem sangta: “Hea bolkanvachea vontteanchi rundai jitli asli tachea pormonnem hea bolkanvachi unchai 120 hat asonk xokona.”

2 Itihas 3:4-antlim utram kopi kortana tantunt ghoddie chuk zali zait. Thoddea hostolekhamnim hea versant amkam “120” hat mhunn vachunk melltta. Punn thoddea patieupa sarkea hostolekhamnim, zoxem panchvea xekddeantlo Codex Alexandrinus ani sovea xekddeantlo Codex Ambrosianus, hantunt amkam “20 hat” mhunn vachunk melltta. Tor eka xastrean chukon “120” kiteak boroilem zait? Hebrev bhaxent “xembor” ani “hat” him utram ek-sarkinch distat. Tor eka xastrean kopi kortana, “hat” mhunn borounchea bodlek “xembor” boroilem zait.

Solomonachea mondira vixim ami bariksannechi ani sarki mahiti zannam zaunk sodhtat tem khorem, punn khas korun tem mondir kiteak suchit korta tacher ami dhean dovortat. Tem mhunnttlear, Jehovachem otmik Devmondir. Ani Jehovan amkam tea mondirant apli bhokti korunk amontronn dilam mhunn ami tache khorench upkari asat!—Heb. 9:11-14; Prok. 3:12; 7:9-17.